Amwiiye Kukkazyika Moyo kwa Jehova
Amwiiye Kukkazyika Moyo kwa Jehova
“Jehova taamusya ngaakasyomezya kale, . . . pele ucimukazikila moyo.”—2 PETRO 3:9.
1. Ncipego nzi citakonzyi kukozyanyisyigwa acintu cimwi eeco Jehova ncaapa bantu?
JEHOVA watupa cintu calo muntu uulya maila ncatakonzyi kutupa. Icintu ncaatupa ncipati kapati alimwi cilayandika kapati, aboobo tacikonzyi kuulwa alimwi tacijanwi cijanwe-janwe. Icintu eeci ncaatupa mbuumi butamani, alimwi bunji bwesu mbuumi butamani muparadaiso anyika. (Johane 3:16) Elo ciya kubota! Izintu zimana maano nkokuti ikutamvwana, lupyopyongano, bucete, nkondo, kuciswa, alimwi alufwu ziya kumana. Bantu baya kukkala muluumuno lwini-lwini acalukamantano kabalelwa abweendelezi bwa Bwami bwa Leza bubotu. Elo tulayeema kaka Paradaiso eeyo!—Isaya 9:6, 7; Ciyubunuzyo 21:4, 5.
2. Nkaambo nzi Jehova ncatana inyonyoona nyika mbi ya Saatani?
2 Jehova awalo ulacilangila ciindi eeco ncaya kuleta Paradaiso anyika. Kayi walo muntu uuyanda bululami. (Intembauzyo 33:5) Takkomani kubona nyika iitaccilili njiisyo zyakwe ziluleme, iikaka bweendelezi bwakwe, alimwi iipenzya bantu bakwe. Aboobo, kuli twaambo tugwasya tupa kuti atainyonyooni nyika eeyi mbi ya Saatani. Twaambo ooto tubikkilizya bubi abubotu kujatikizya bulelo bwakwe bwakoonse-koonse. Nabamba twaambo ootu, Jehova ulatondezya bube butaliboteli ibulombzyeka, ibube bwakukkazyika moyo bwalo banji sunu mbobatajisi.
3. (a) Ino aamba nzi mabala aamu Cigiliki aaci Hebrayo aasanduludwe mu Bbaibbele kuti ‘kukkazyika moyo’? (b) Mibuzyo nzi njotulaalange-lange ino?
3 Ibbala lya ‘kukkazyika moyo’ lya Cigiliki eeli, mu Bbaibbele lya New World Translation lilibelesyedwe zyiindi zyotatwe. Lyaamba “kuzumanana amoyo mubotu,” alimwi ikanji lilembwa kuti ‘kukkazyika moyo’ alimwi ciindi comwe lilembedwe kuti “nkalwa moyo.” Ibbala eeli lya ‘kukkazyika moyo’ mu Cigiliki amuci Hebrayo lyaamba kuba alweetelelo alimwi amoyo mupati. Mbuti kukkazyika moyo kwa Jehova mbokutugwasya? Nziiyo nzi nzyotukonzya kwiiya kukukkazyika moyo akuliyumya kwa Jehova alimwi akooko kwababelesi bakwe basyomeka? Mbuti mbotuzyi kuti kukkazyika moyo kwa Jehova kuli ampokusimpila? Nkooko atubone.
Amulange-Lange Kukkazyika Moyo kwa Jehova
4. Ncinzi mwaapostolo Petro ncaakalemba kujatikizya kukkazyika moyo kwa Jehova?
4 Kujatikizya kukkazyika moyo kwa Jehova, mwaapostolo Petro wakalemba kuti: “Pele nkucili cintu comwe ncimuteelede kuluba, nomuyandwa. Nceeci cakuti ku[li]-Jehova buzuba bomwe buli mbuli cuulu camyaaka, acalo cuulu camyaaka cili mbuli buzuba bomwe buyo. Jehova taamusya ngaakasyomezya kale, mbobayeeya bamwi kuti wamuka, pe, pele ucimukazikila moyo, nkaambo tayandi kuti bantu bafwidilile, ulayanda kuti boonse bajane ciindi cakweempwa.” (2 Petro 3:8, 9) Amubone twaambo tobilo twabelesyegwa aawa tukonzya kutugwasya kumvwisya kukkazyika moyo kwa Jehova.
5. Mbuti Jehova mbwacibona ciindi mbokujatikizya nzyacita?
5 Ikaambo kakutaanguna nkakuti, Jehova ciindi taciboni mbotucibona. Kuli Yooyo uupona kukabe akutamani, cuulu camyaka ucibona kuti mbuzuba buyo bomwe. Taku mbocimukopa ciindi, pele tamuki kubweza ntaamu kutegwa abambe kaambo. Mbwali muntu uujisi busongo butajinki, Jehova ulizyi ciindi cibotu cakubweza ntaamu kutegwa bagwasyigwe abo boonse balilauka, alimwi cakukkazyika moyo ulacilindila ciindi eeco kuti cisike. Nekuba boobo, tatweelede kuyeeya kuti Jehova tabikkili maano kumapenzi oonse aabasikila babelesi bakwe mazuba aano. Ngu Leza “waluzyalo” siluyando. (Luka 1:78; 1 Johane 4:8) Ulijisi nguzu zyakujola zintu mbozyakabede, ikupilingana kuli koonse kwacitika kuciindi eeci ncaalekela kwakaindi kaniini.—Intembauzyo 37:10.
6. Ncinzi ncotuteelede kwaamba kujatikizya Leza, alimwi nkaambo nzi?
6 Masimpe tacili cuubauba kulindila cintu calo muntu ncalila misyozyi abuzuba. (Tusimpi 13:12) Aboobo ikuti bantu kabatafwambaani kuzuzikizya zyisyomezyo zyabo, bamwi inga bayeeya kuti tabayandide. Oku inga kwaba kutayeeya kabotu ikuti twamuyeeyela boobu Leza. Ikuti kukkazyika moyo kwa Jehova twatalika kukubona kuti nkumuka, mukuya kwaciindi inga twatalika kudooneka akutyompwa, alimwi eeci cilakonzya kutunjizya muntenda akutalika koona kumuuya. Limwi inga casika nkotuuninwa abasikasampu-sampu Petro mbaakacenjezya abo batajisi lusyomo. Abo cakasampu-sampu balati: “Ino kuli kuli kuboola kwakwe ukwakasyomezegwa? Nkaambo kakuti kuzwa kuciindi nibakafwa [ba]mataateesu, zintu zyoonse zicili mbubonya mbozyakabede kuzwa kumalengelo.”—2 Petro 3:4.
7. Mbuti kukkazyika moyo kwa Jehova mbokuswaangenyi akuyanda kwakwe kwakuti bantu beempwe?
7 Ikaambo kabili nkotukonzya kwiiya kumajwi aa Petro nkakuti, Jehova ulakkazyika moyo akaambo kakuti uyanda kuti bantu boonse beempwe. Aabo bakaka kweempwa kunzila zyabo zyibi, Jehova uya kubasubula. Nekuba boobo, Leza takkomani kuti sizibi wafwa. Pele cilamukkomanisya kubona kuti bantu beempwa, akuleka nzila zyabo zyibi kutegwa bazumanane kupona. (Ezekieli 33:11) Nkakaambo kaako ncakkazyika moyo, alimwi wapa ciindi kuti makani mabotu akambaukwe munyika yoonse kutegwa bantu bakonzye kujana buumi.
8. Ncinzi ncotukonzya kwiiya kukukkazyika moyo kwa Leza twalanga mbwaakabeendelezya bana Isilayeli?
8 Tulakonzya kwiiya kukkazyika moyo kwa Leza twalanga mbwaakabeendelezya bana Isilayeli bansiku. Kwamyaka minji wakabajatila kulubizya kwabo nkobakali kulubizya. Ikwiinda mubasinsimi bakwe, ciindi aciindi wakali kubaambila kuti: “Amuleke inzila zyanu zibi, mubambe imbeta zyangu amilazyo yangu, mucite mulao woonse ngundakalailila bamauso banu angundakamutumina kumilomo yabalanda bangu basinsimi.” Ncinzi cakaccilila? Cuusisya ncakuti, bantu “teebakamvwa pe.”—2 Bami 17:13, 14.
9. Mbuti kukkazyika moyo kwa Jesu mbokwakatondezya kukkazyika moyo kwa Baswaabo?
9 Nicakakatazya, Jehova wakatuma Mwana wakwe wakabeleka canguzu kakombelezya ba Juda kuti babe acilongwe a Leza. Kukkazyika moyo kwa Jesu kwakatondezya mbobakkazyika moyo Baswaabo. Kazyi kuti taliko kulampa ulajaigwa, Jesu wakati: “Ikaka Jerusalemu, Jerusalemu, noojaya basinsimi, akubafusa mabwe abo batumwa kulinduwe! Kanjikanji ndakali kuyanda kubunganya bana bako mbuli inkuku intumbu mbiibunganya twana twayo mumababa aayo, nekubaboobo mwakakaka.” (Matayo 23:37) Aaya majwi aapa camba, taali majwi aamubetesi uuyanda kusubula muntu, pele ngayaayo aamulongwe uukkazyikila moyo bantu. Jesu mbweena mbuli Baswaabo kujulu, wakali kuyanda kuti bantu beempwe kutegwa batanyonyoonwi. Bamwi bakakuccilila kucenjezya kwa Jesu, aboobo tiibakajatikizyigwa kulunyonyooko lutali lwakusobanina lwakasikila munzi wa Jelusalemu mu 70 C.E.—Luka 21:20-22.
10. Muunzila nzi kukkazyika moyo kwa Leza mbokwatugwasya?
10 Hena kuli ciinda waawa kubota twalanga Leza mbwakkazyika moyo? Nekuba kuti bantu bazanga cakuzwa munzila, Jehova wamupa aumwi ciindi kubikkilizya atuulunzuma tumwi twabantu iciindi cakumuzyiba akuba abulangizi bwakufwutuka. Mwaapostolo Petro wakabalembela Banakristonyina kuti: “Amuyeeye kuti kukazika moyo kwa-Mwami nkokuleta lufutuko.” (2 Petro 3:15) Hena tatukkomenyi kuti kukkazyika moyo kwa Jehova kwatupa coolwe cakuti tukafwutuke? Hena tatupailili kuti kubota Jehova kacizumanana kutukkazyikila moyo tobula bwakwe mbotumubelekela buzuba abuzuba?—Matayo 6:12.
11. Ino ikumvwisya kaambo Jehova ncakkazyikila moyo kuya kutupa kuyandisya kucita nzi?
11 Ikuti twazyiba kaambo Jehova ncakkazyikila moyo, kulatugwasya kukkazyika moyo kulindila lufwutuko ndwaya kuleta, alimwi tatukaambi kuti ulamuka kuzuzikizya zyisyomezyo zyakwe. (Malilo 3:26) Mbotuzumanana kupailila Bwami bwa Leza kuti buboole, tuli alusyomo lwakuti Leza ulizyi ciindi cibotu ncaya kuwiingula mupailo ooyo. Kunze lyaboobo, kutupa kuti tumwiiye Jehova kwiinda mukukkazyika moyo mbuli mbwacita notweendelezya bakwesu alimwi abaabo mbotukambaukila. Andiswe mbweena tatulombozyi kuti bantu banyonyoonwe, pele ncotulombozya ncakuti kubota bantu beempwa akuba abulangizi mbuli bwesu bwabuumi butamani.—1 Timoteo 2:3, 4.
Amulange-Lange Kukkazyika Moyo kwa Basinsimi
12, 13. Ikweelana a Jakobo 5:10, mbuti musinsimi Isaya mbwaakacikonzya kukkazyika moyo?
12 Kwiinda mukulanga-langa kukkazyika moyo kwa Jehova, kulatupa kuti tutalike kukulombozya akuyandisya kuba abube oobo. Tacili cintu cuubauba kubantu batalondokede kukkazyika moyo, pele inga cakonzyeka. Tulaiya kubabelesi ba Leza bansiku. Sikwiiya Jakobo wakalemba kuti: “Nobakwesu, amulange basinsimi abakakambauka muzina lya-Jehova mbubakaliyumya akati kamapenzi akukazika myoyo yabo. Amutobele mbabo.” (Jakobo 5:10) Cilakkazyika moyo, alimwi cilakulwaizya ikuzyiba kuti bamwi bazwidilila mumapenzi aakonzyenyi ayaayo aatusikila.
13 Mucikozyanyo, musinsimi Isaya wakali kuyandika kukkazyika moyo mumulimo wakwe. Jehova wakatondezya oobo naakamwaambila kuti: “Koya ukaambile bantu aba kuti, Kumvwa amumvwe pele mutaswiililisyi. Kubona amubone pele mutabonesyi. Neneesya moyo wabantu aba, lemezya matwi aabo akulamba kumeso aabo, kuti bataboni kumeso aabo nikuba kumvwisya kumatwi aabo nikuba kuswiililisya mumyoyo yabo, batasanduki akuponesegwa.” (Isaya 6:9, 10) Nekuba kuti bantu tiibakabikkila maano, Isaya cakukkazyika moyo wakaambilizya milumbe yakucenjezya ya Jehova kwamyaka iitaleli ku 46. Mbweena buyo, ikukkazyika moyo kuya kutugwasya kuliyumya mumulimo wesu wakukambauka makani mabotu, nekuba kuti bantu tabaatambuli.
14, 15. Ncinzi cakamugwasya Jeremiya kuliyumya mubukkale bukatazya?
14 Inzya, ibasinsimi nibakali kubeleka mulimo wabo, tiibakali buyo kuliyumya akaambo kakuti bantu tiibakali kuutambula mulumbe, pele bakali kupenzyegwa. Jeremiya wakaangwa muziliba “muŋanda ya-Jonatani” kumane bakamuwaala mumulindi. (Jeremiya 20:2; 37:15; 38:6) Ibakamupenzya, mbantu mbamunya mbaakali kuyanda kugwasya. Nekuba boobo Jeremiya tanaakabisya moyo. Cakukkazyika moyo wakaliyumya kwamyaka minji.
15 Kupenzyegwa akusekwa tiikwakapa kuti Jeremiya auleke mulimo, andiswe sunu takutupi kuuleka mulimo. Inzya, aabona inga twatyompwa. Jeremiya wakatyompwa. Wakalemba kuti: “Ijwi lya-Jehova lyandibeda cisampauzyo acisekesyo buzuba boonse. Na ndaamba kuti, Nsikooyeeya limbi makani aakwe, nsikooyooamba limbi muzina lyakwe.” Ncinzi cakacitika? Hena Jeremiya wakacileka kukambauka? Ulati: “Mumoyo wangu muli anga mulilo uuyakisya uujalilidwe mukati kazifuwa zyangu, mane lumwi candikataazya kundikasya, amoyo wangu waata.” (Jeremiya 20:8, 9) Amubone kuti, naakabikkila maano bantu mbobakali kumupenzya, wakatyompwa. Pele naakazyi kukkala ansi kuyeeya kubona mbouyandika ambouli mubotu mulumbe kuugama, wakatalika kukkomana alimwi. Kunze lyaboobo, Jehova wakali a Jeremiya mbuli “singuzu uuyoosya” kamuyumyayumya kwaambilizya jwi lya Leza cabusungu acabusicamba.—Jeremiya 20:11.
16. Mbuti mbotukonzya kuzumanana kukkomana mumulimo wesu wakukambauka makani mabotu?
16 Hena musinsimi Jeremiya wakakkomana mumulimo wakwe? Inzya wakakkomana. Wakati kuli Jehova: “Majwi aako naakajanwa, ndakaalya, nkabela majwi aako akandibeda lukondo abusekelezi bwamoyo, nkaambo ndaambwa muzina lyako, O Jehova.” (Jeremiya 15:16) Jeremiya wakakkomana mumulimo ngwaakapedwe wakwiiminina Leza akukambauka ijwi lyakwe. Andiswe mbweena tulakonzya kukkomana. Alimwi tulakkomana mbuli mbobakkomana bangelo kujulu nkaambo munyika yoonse ibanji bauzumina mulumbe wa Bwami, beempwa akuboola munzila iitola kubuumi butamani.—Luka 15:10.
“Lukakatilo lwa-Jobo”
17, 18. Muunzila nzi Jobu mwaakaliyumya, alimwi ncinzi cakaccilila?
17 Naakamana kulumbaizya basinsimi bakapona katanapona, sikwiiya Jakobo wakati: “Mulimvwide kale aalukakatilo lwa-Jobo, alimwi mulizi mbwaakamucitila Jehova kumamanino. Mwabona kuti Jehova ngusibuuya, ngusiluzyalo.” (Jakobo 5:11) Ibbala eeli lya Cigiliki lisanduludwe kuti “lukakatilo” lilijisi bupanduluzi bukonzyenyi abbala Jakobo ndyaabelesya munsi oomu lya ‘kukkazyika moyo.’ Kaamba kwiindana kwamabala obilo, sikwiiya umwi wakati: “Ibbala lya ‘kukkazyika moyo’ libeleka bantu nobatupenzya, kakuli lya “lukakatilo” lyaamba kuba sicamba notuli mubukkale bukatazya.”
18 Jobu wakabubona bwaansi. Wakasowekelwa lubono, ibana bakwe, alimwi wakaciswa bulwazi bukatazyide. Alimwi wakaliyumya amakani aakubeja aakuti Jehova wakali kumusubula buya. Jobu tanaakafwida mucamba mukupenga kwakwe, wakalilauka bukkale bwakwe, alimwi buya wakati wakali luleme kwiinda Leza. (Jobu 35:2) Nekuba boobo, tanaakaleka kusyomeka. Tanaakamutukila Leza mbuli bwakali kuyeeya Saatani. (Jobu 1:11, 21) Ncinzi cakaccilila? Jehova ‘wakaalongezya mamanino aabuumi bwa Jobu ikwiinda kumatalikilo.’ (Jobu 42:12) Jehova wakamuponya Jobu, lubono lwakwe wakaluvwuzya ziindi zyobilo, alimwi wakamuleleka citaambiki kwiinda mukumupa buumi bubotu abamukwasyi wakwe. Kuliyumya kwa Jobu akwalo kwakamugwasya kumuzyiba Jehova bwini mbwabede.
19. Ncinzi ncotwiiya kukukkazyika moyo kwa Jobu caboola kumakani aakuliyumya?
19 Ncinzi ncotwiiya kukukkazyika moyo kwa Jobu caboola kumakani aakuliyumya? Mbuli Jobu, tulakonzya kuciswa naa kunjila mubukkale bumwi bukatazya. Aabona tatukonzyi kumvwisya cipa kuti Jehova atulekele kunjila mupenzi limwi. Pele ncotweelede kuzyiba ncakuti: Ikuti twazumanana kusyomeka, tuya kulelekwa. Jehova ulapa bulumbu aabo bamulangaula cakusinizya. (Ba-Hebrayo 11:6) Jesu wakati: “Oyo uuliyumya kusikila kumamanino uzoofutuka.”—Matayo 10:22; 24:13.
‘Buzuba bwa Jehova Buya Kuboola’
20. Nkaambo nzi ncotukonzya kuba masimpe kuti buzuba bwa Jehova buya kuboola?
20 Jehova takkazyiki buyo moyo, pele alimwi uliluleme, alimwi takalekeli bubi kuti kabuliko kukabe akutamani. Kukkazyika moyo kwakwe kuli mpokujinkila. Petro wakalemba kuti: “[Leza] takailekede nyika yakalekale.” Nekuba kuti Nowa abamukwasyi wakwe bakafwutulwa, pele nyika eeyo yatakali kabotu yakaloba ameenda aazambangulwe. Alimwi Jehova wakaunyonyoona munzi wa Sodoma a Gomola cakuti kwakaile kucaala twe luzutu. Lunyonyooko luli boobu lwakapa “kuti cibe ciluuzyo kulibaabo beenda cakasampusampu [kuzyintu zyiboola].” Akaambo katwaambo ootu, tulakonzya kuba masimpe kuti: ‘Buzuba bwa Jehova buya kuboola.’—2 Petro 2:5, 6; 3:10.
21. Mbuti mbotukonzya kukutondezya kukkazyika moyo akuliyumya kwesu, alimwi nkaambo nzi kalaalangwe-langwe mucibalo ciccilila?
21 Aboobo atukwiiye kukkazyika moyo kwa Jehova kwiinda mukugwasya bantu kuti beempwe kutegwa ndiza abalo bali kufwutulwa. Alimwi atubaiye basinsimi cakukkazyika moyo tukambauke makani mabotu nekuba kuti bamwi mbotukambaukila tabazumini. Kuyungizya waawo, ikuti mbuli Jobu twaliyumya mumapenzi, tulakonzya kuba masimpe kuti Jehova uya kutuleleka citanabonedwe ikuti twazumanana kusyomeka. Kuli kaambo kaya komoonga ncotweelede kukondwa mumulimo wesu twabona Jehova mbwaakuleleka citaambiki kusoleka kwabantu bakwe ikukambauka makani mabotu nyika yoonse mboiyalidwe. Aaka kaambo, kalalangwa-langwa mucibalo ciccilila.
Hena Muciyeeyede?
• Nkaambo nzi Jehova ncakkazyika moyo?
• Ncinzi ncotwiiya kukukkazyika moyo kwabasinsimi?
• Mbuti Jobu mbwaakaliyumya, alimwi ncinzi cakaccilila?
• Mbuti mbotuzyi kuti kukkazyika moyo kwa Jehova kuli mpokujinkila?
[Mibuzyo yaciiyo]
[Cifwanikiso icili apeeji 15]
Kukkazyika moyo kwa Jesu kwakatondezya mbokubede kukkazyika moyo kwa Baswaabo
[Zifwanikiso izili apeeji 16]
Mbuti Jehova mbwaakamuleleka Jeremiya akaambo kakukkazyika moyo?
[Zifwanikiso izili apeeji 17]
Mbuti Jehova mbwaakamuleleka Jobu akaambo kakukkazyika moyo kwakwe?