‘Amupakamane’
‘Amupakamane’
“Uuongelezeka ulazuminina makani oonse, pele muntu uucenjede ulayeeya kabotu kweenda kwakwe.”—TUSIMPI 14:15.
1, 2. (a) Ino cakacitikila Loti mu Sodoma cituyiisya nzi? (b) Ino bbala lyakuti ‘amupakamane’ lyaamba nzi?
ABRAHAMU naakapa Loti coolwe cakusaanguna kusala nyika, Loti wakayandisya nyika yakajisi meenda koonse-koonse yakali “mbuli muunda wa-Jehova.” Yeelede kuti yakali kulibonya kuti mbusena bubotu bwakukkala amukwasyi wakwe, mbwaanga “Loti wakalisalila [kkuti] yoonse ya-Jordano” akukkala afwaafwi a Sodoma. Nokuba boobo, mboyakali kulibonya kulamfwu tabusyi mboyakabede munsi-munsi, nkaambo “bantu ba-Sodoma bakali basizibi, bakali babi loko kumeso aa-Jehova.” (Matalikilo 13:7-13) Zintu nozyakatalika kubija, Loti amukwasyi wakwe bakanjila mumapenzi aataambiki. Mukuya kwaciindi walo abana bakwe basimbi bakasinikizyigwa kukkala mumampangala aamabwe. (Matalikilo 19:17, 23-26, 30) Ibusena bwakali kulibonya kubota akusaanguna bwakazyikubija.
2 Icakacitikila Loti cipa ciiyo kubabelesi ba Leza mazuba aano. Notuyanda kusala, tweelede kucenjela kuzintu zikonzya kuccilila, aboobo tatweelede koongelezyegwa ambocilibonya cintu iciindi cakusaanguna. Aboobo, cileelela kuti Ijwi lya Leza litukulwaizya kuti: ‘Atupakamane.’ (1 Petro 1:13) Ibbala lya Cigiliki lisanduludwe kuti ‘amupakamane’ lyaamba “kubatama.” Kweelana amulembi wa Bbaibbele R. C. H. Lenski, kubatama ooko “nkukkalikana kwamizeezo kupa kuti muntu kakonzya kulanga-langa kabotu zintu, kwalo kutupa kuti katukonzya kusala kabotu.” Atulange-lange bukkale bumwi buyanda kuti katukkalikeni mumizeezo.
Ikulanga-langa Makwebo
3. Nkaambo nzi ncokuyandika kucenjela ikuti twapegwa coolwe cakucita makwebo?
3 Atwaambe kuti mwaba acoolwe cakucita makwebo amuntu uujisi mpuwo, ambweni mukombinyoko wa Jehova. Ulikkomenyi kujatikizya kuzwidilila alimwi wamukulwaizya kuti mucite cakufwambaana kutegwa citamwiindi coolwe eeco. Mulakonzya kutalika kuyeeya makwebo aayo ncaakonzya kuleta, buumi bubotu amukwasyi wanu ambweni akuyeeya kuti mwacita boobu cilakonzya kumupa ciindi cinji cakucita zintu zyakumuuya. Nokuba boobo, Tusimpi 14:15 tucenjezyegwa kuti: “Uuongelezeka ulazuminina makani oonse, pele muntu uucenjede ulayeeya kabotu kweenda kwakwe.” Ikukondwa ikuboola akaambo kakutalika makwebo mapya, mulajana kuti kuwa inga tikwabikkilwa maano alimwi akuyaambele kwamakwebo akwalo inga tiikwalangwa-langwa kabotu. (Jakobo 4:13, 14) Mubukkale buli boobu, kulayandika kupakamana.
4. Mbuti mbotukonzya ‘kulanga-langa nzila zyesu’ notulanga-langa makwebo?
4 Muntu uujisi maano ulanga-langa kabotu makwebo katanasala cakucita. (Tusimpi 21:5) Kulanga-langa ooku ikanji kulagwasya kubona ntenda zyiliko. Amulange-lange bukkale oobu: Muntu uuyanda kukweleta mali aamakwebo akumusyomezya kuti uyoomupa cinyonamucila citalikomeneni ikuti mwamukweletesya. Cinyonamucila ncaamusyomezya cilanyamuna moyo, pele sena mulakonzya kuzyiba mapenzi aaliko? Sena syikukweleta ulizumide kujola mali kakunyina makani amakwebo mbwaakonzya kweenda naa ukonzya buyo kujola mali lelikke makwebo naayenda kabotu? Munzila iimwi, sena inga mwazumina kusweekelwa mali ikuti makwebo tanaayenda kabotu? Alimwi mulakonzya kubuzya kuti: “Nkaambo nzi bantu ncobalombelwa mali? Sena mabbanga aayo makwebo aabona kukatazya?” Ikutola ciindi kulanga-langa zikonzya kucitika kulakonzya kumugwasya ikulanga-langa kabotu makwebo.—Tusimpi 13:16; 22:3.
5. (a) Ninzila iili yamaano Jeremiya njaakabweza naakaula muunda? (b) Nkaambo nzi ncocigwasya kuba abumboni bwamakwebo boonse kwiinda mukulembelana?
5 Musinsimi Jeremiya naakaula muunda kumweeninyina, wakali mukombinyina wa Jehova, bakalembelana mapepa aamakwebo kabaliko bakamboni. (Jeremiya 32:9-12) Muntu uucenjede mazuba aano uyoobona kuti bubambe boonse bwamakwebo mbwacita kubikkilizya ayaayo aacitwa abamukwasyi abasyominyina, alembwa kabotu-kabotu. * Ikuba amapepa aalembedwe kabotu aacizuminano kulagwasya kutaleta mazwanga. Kunze lyaboobo, ikuti taku cizuminano calembwa kanji-kanji nkokupa kuti kube mapenzi aamakwebo akati kababelesi ba Jehova. Cuusisya ncakuti, mapenzi aali boobu alacisizya moyo, apa kukalala nokuba kuyaansi kumuuya.
6. Nkaambo nzi ncotweelede kubucenjelela bulyato?
6 Alimwi tatweelede kuba balyato. (Luka 12:15) Ikuyandisya kujana mpindu nji inga kwapa muntu kutabona ntenda iiliko yakucita makwebo aataluzi. Nobaba bamwi bajisi mikuli mumulimo wa Jehova balinjizya mukakole nkoona aaka. Ijwi lya Leza litucenjezya kuti: “Buumi bwanu butabi bwakuyanda mali, pe, mutabi basyaacivulemwangu.” (Ba-Hebrayo 13:5) Nokuboola muzeezo wakucita makwebo, Munakristo weelede kulanga-lange zintu eezyi, ‘Sena cilayandika ncobeni kutalika makwebo?’ Ikupona buumi buuba-uba kuyeeme akukomba Jehova kuyootukwabilila ‘kububi boonse.’—1 Timoteo 6:6-10.
Mapenzi Ngobajana Banakristo Bali Balikke
7. (a) Mapenzi nzi ngobajisi Banakristo banji bali balikke? (b) Ikusala wakukwatana limwi, mbuti mbokujatikizya kusyomeka kwesu kuli Leza?
7 Babelesi banji ba Jehova balayanda kukwatwa naa kukwata pesi tabanajana wakukwatana limwi. Mumasi aamwi bajisi bubi kusinikizyigwa bantu kukwatwa naa kukwata. Pele kukonzya kujana wakukwatana limwi akati kabasyominyina inga kacitali cuubauba. (Tusimpi 13:12) Nokuba boobo, Banakristo baluuzyi mulawo wamu Bbaibbele wakukwata buyo “muna-Kristo,” aaya mmakani aayandika kusyomeka kuli Jehova. (1 Ba-Korinto 7:39) Ikutegwa baime nji kumapenzi amisunko njobayaanya, Banakristo bali balikke beelede kupakamana.
8. Mapenzi nzi musimbi muna Sulamiwe ngaakajana, alimwi mbuti bamakaintu Banakristo mazuba aano mbobakonzya kujana mapenzi aakonzyenyi?
8 Mu Lwiimbo lwa Solomoni, musimbi wazina lya Sulamiwe wakayandwa amwami. Wamoongelezya alubono, cuuno alimwi akweebeka nokuba kuti ulisinkililidwe kale amusankwa uucili mwana-mwana. (Lwiimbo lwa-Solomoni 1:9-11; 3:7-10; 6: 8-10, 13) Ikuti kamuli Banakristo bakaintu, andinywe mulakonzya kupa kuti muntu umwi amuyande nokuba kuti tamulibambide. Muntu ngomubeleka limwi, ambweni muntu uujisi cuuno caatala ulakonzya kutalika kwaamba tukani-kani tukondelezya kuli ndinywe, akutalika kumucitila tuntu tubotu kutegwa ndiza mwali kukkala limwi. Amukucenjelele kuloma kuli boobu. Nokuba kuti makanze aamuntu ooyo taali aakuti ulamuyanda naa kuti nkutalilemeka, ziindi zinji kutondezya kuti ulamuyanda. Mbuli musimbi muna Sulamiwe, amube “bwaanda.” (Lwiimbo lwa Solomoni 8:4, 10, BT) Amubweelebe bukkale buli boobo. Amubaambile mbomubeleka limwi mbomwanjilila buyo mulimo kuti muli umwi wa Bakamboni ba Jehova alimwi amubelesye ciindi cili coonse kubakambaukila. Kucita boobu kuyoomucingilila.
9. Nintenda nzi zyijanika kusinkilila muntu ngomutazyi ikwiinda mukubelesya Intaneti? (Amubone kabbokesi kali apeeji 30.)
9 Masena aa Intaneti aakabambilwa kugwasya bantu batakwete kujana wakukwatana limwi ayaabuvwula. Bamwi babona kuti eeyi nenzila yakuzyiba bantu mbobatakali kukonzya kuzyiba. Nokuba boobo, ikutalika cilongwe amuntu ngomutazi kuletela ntenda zyikatazyide. A Intaneti, tamukonzyi kuzyiba camasimpe acakubeja. (Intembauzyo 26:4) Tabali boonse balyaamba kuti mbabelesi ba Jehova bakasimpe. Kuyungizya waawo, ikusinkilila wakukwatana limwi kwiinda mukubelesya Intaneti luyando lulakonzya kukomena mukaindi kaniini, alimwi kulakonzya kupa kuti muntu atayeeyi kabotu. (Tusimpi 28:26) Kunyina makani naa kusinkilila ooku kwacitwa kwiinda mu Intaneti naa nkwiinda mukubelesya nzila imwi, tacili kabotu kutalika cilongwe amuntu ngomutazyi kabotu.—1 Ba-Korinto 15:33.
10. Mbuti Banakristo bali balikke mbobakonzya kuyumizyigwa abasyominyina?
10 “Jehova ngusibuuya” kubabelesi bakwe. (Jakobo 5:11) Ulizyi kuti mapenzi ngobajana Banakristo batakaliyandila kuba balikke ziindi zimwi alatyompya, pele ulakubikkila maano kusyomeka kwabo. Ino mbuti bamwi mbobakonzya kubayumyayumya? Lyoonse tweelede kubalumbaizya akaambo kakumvwida kwabo akuba amuuya wakulyaaba ngobatondezya. (Babetesi 11:39, 40) Alimwi tulakonzya kubabikkilizya mububambe bwakuyanzana bugwasya. Sena kuli nomwakalicitide oobo caino-ino? Kuyungizya waawo, tulakonzya kubapailila, kulomba Jehova kuti abagwasye kutegwa batajoki munsi kumuuya kabamubelekela calutangalo. Kwiinda mukubabikkila maano, atutondezye kuti tulabalumba aba basyomeka, mbuli Jehova mbwabalumba.—Intembauzyo 37:28.
Ikulanga-langa Mapenzi Aabuzumi
11. Ino mapenzi nzi aboola akaambo kamalwazi mapati?
11 Elo cilamana maano ikuti iswe naa muyandwa wesu kajisi penzi lyakuciswa-ciswa. (Isaya 38:1-3) Notuyandaula busilisi bukonzya kutugwasya, cilayandika kuti twatobela njiisyo zyamu Magwalo. Mucikozyanyo, Banakristo beelede kuutobela kabotu mulawo wamu Bbaibbele wakutantamuka kubulowa alimwi tabeelede kubelesya nzila yabusilisi iijatikizya mizimu. (Incito 15:28, 29; Ba-Galatiya 5:19-21) Aboobo, kuli baabo batayiisyidwe zyamisamu ikukonzya kwiindanya nzila zyakusilikwa kulakonzya kuba cintu cikatazya. Ncinzi cikonzya kutugwasya kupakamana?
12. Mbuti Munakristo mbwakonzya kubona busilisi buli kabotu nalanga-langa nzila yakusilikwa?
12 “Muntu uucenjede ulayeeya kabotu kweenda kwakwe” kwiinda mukuvwuntauzya mu Bbaibbele amabbuku aapandulula Bbaibbele. (Tusimpi 14:15) Mumasi aamwi basilisi azyibbadela mozyili zyisyoonto, misamu yacintu cisiya njiikonzya kuba nzila yabusilisi iiliko. Ikuvwuntauzya ooku kulakonzya kutugwasya kubona ntenda ziliko. Mucikozyanyo, tulakonzya kuyanda kuzyiba twaambo ootu: Sena muŋanga uzyibidwe kuti ubelesya mizimo? Sena busilisi buyeeme akusyoma kuti malwazi alufwu zilacitika akaambo kakuti mizimo ilinyemede (naa mizimo yabasyikale) naa balozi? Sena zipaizyo, kwaambilila naa zintu zimwi zijatikizya mizimo zilabelesyegwa mukubamba musamu naa ciindi noubelesyegwa? (Deuteronomo 18:10-12) Kuvwuntauzya kuli boobu kuyootugwasya kutobela lulayo lwakasololelwa amuuya lwakuti: “Amukasunke zintu zyoonse mbuzibede, kuti mujatisye zibotu.” * (1 Ba-Tesalonika 5:21) Kuyootugwasya kubona busilisi buli kabotu.
13, 14. (a) Mbuti mbotukonzya kutondezya bupampu notulanganya buzumi bwesu? (b) Nkaambo nzi bupampu ncobuyandika notubandika zyabuzumi amakani aamisamu abamwi?
13 Bupampu bulayandika mumbazu zyoonse zyabuumi kubikkilizya akulanganya buzumi bwesu bwakumubili. (Ba-Filipi 4:5) Ikubikkila maano kubuzumi bwesu kutondezya kuti tulalumba cipego cabuumi. Notunjila mupenzi lyakuciswa, masimpe tuyandika kubikkila maano. Nokuba boobo, buzumi buli kabotu tatukonzyi kubujana kusikila ciindi ca Leza cikasike ‘cakuponya bantu.’ (Ciyubunuzyo 22:1, 2) Tweelede kubona kuti titwajata bubi kubuzumi bwakumubili cakuti zintu ziyandika kapati zyakumuuya zyabikwa ambali.—Matayo 5:3; Ba-Filipi 1:10.
14 Alimwi tweelede kutondezya bupampu notubandika abamwi zyabuzumi amakani aajatikizya misamu. Makani aaya taayelede kuba ngomubandi notubungana kutegwa tuyoome zyakumuuya a Banakristo lyamiswaangano yambungano amiswaangano mipati. Kuyungizya waawo, nzyotusala kujatikizya misamu kanji-kanji zijatikizya njiisyo zya Bbaibbele, manjezyeezya aamuntu alimwi acilongwe cakwe a Jehova. Aboobo tacikonzyi kuba kabotu kwaambila musyomima kuti amvwide mizeezo yesu naa kumusinikizya kuunduluzya manjezyeezya aakwe. Nokuba kuti bantu basimide mumbungano balakonzya kubuzyigwa, Munakristo aumwi weelede “kunyampula mukuli wakwe” wakusala alimwi toonse “tuleelede kulyaambilila makani esu kubusyu bwa-Leza.”—Ba-Galatiya 6:5; Ba-Roma 14:12, 22, 23.
Notuli Mubukkale Bukatazya
15. Mbuti bukkale bukatazya mbobukonzya kutujatikizya?
15 Bukkale bukatazya bulakonzya kupa kuti nobaba babelesi ba Jehova basyomeka balakonzya kwaamba nikuba kucita cintu munzila iitali yamaano. (Mukambausi 7:7) Naakali mumasunko mapati, Jobu wakanyongana mumizeezo alimwi wakeelede kululamika kuyeeya kwakwe. (Jobu 35:2, 3; 40:6-8) Nokuba kuti “Musa kali mubombemoyo kwiinda bantu boonse baansi.” ciindi cimwi wakakalala akwaamba cabukali. (Myeelwe 12:3; 20:7-12; Intembauzyo 106:32, 33) Davida wakatondezya kukkazyika moyo kulombozyeka mukutajaya Mwami Saulo, pele Nabala naakamutukila akwaamba cabukali kubabelesi bakwe, Davida wakakalala kapati cakuti wakamusiya moyo. Kusikila Abigayeli naakabweza ntaamu, ndendilyo naakajola moyo akutacita cintu cibi kapati.—1 Samuele 24:2-7; 25:9-13, 32, 33.
16. Ncinzi cikonzya kutugwasya kutafwambaana kucita cintu kakunyina kuyeeya?
16 Andiswe tulakonzya kujana mapenzi aakonzya kutupa kucita cintu kakunyina akuyeeya kabotu. Ikulanga-langa kabotu mbobayeeya bamwi mbuli bwakacita Davida kulakonzya kutugwasya kutafwambaana kucita cintu kakunyina akuyeeya akuwida mucibi. (Tusimpi 19:2) Kuyungizya wawo, Ijwi lya Leza litukulwaizya kuti: “Amukankame, mutabisyi. Amwaambile myoyo yanu amalo aanu, akuumuna.” (Intembauzyo 4:4) Ikuti kacikonzyeka, ncamaano kulindila kusikila twatontomana katutanacita cintu cimwi naa kubweza ntaamu imwi. (Tusimpi 14:17, 29) Tulakonzya kumusikila Jehova mumupailo, “elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.” (Ba-Filipi 4:6, 7) Luumuno lwa Leza luyootukkazyika moyo akutugwasya kupakamana.
17. Nkaambo nzi ncotweelede kusyoma Jehova kutegwa tupakamane?
17 Nokuba kuti tulakonzya kusola-sola kutanjila ntenda alimwi akucita camaano, toonse buyo tulalubizya. (Jakobo 3:2) Tulakonzya kulubizya kakunyina akuzyiba. (Intembauzyo 19:12, 13) Kuyungizya wawo, mbotuli bantu, tatujisi nguzu zyakulyeendelezya kunze lya Jehova. (Jeremiya 10:23) Elo tulalumba natusyomezya kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.” (Intembauzyo 32:8) Inzya kwiinda mulugwasyo lwa Jehova tulakonzya kupakamana.
Bupanduluzi buyungizidwe
^ munc. 5 Makani aambi aayungizyidwe kujatikizya makwebo alembedwe, amubone Ngazi Yamulindizi ya August 1, 1997, mapeeji 30-1; alimwi ayamu Cichewa November 15, 1986, mapeeji 16-17; alimwi a Awake!, yamu February 8, 1983 peeji 13-15, akamwaigwa a Bakamboni ba Jehova.
^ munc. 12 Nzila eeyi iyoobagwasya abaabo bayeeya nzila zyabusilisi zyikatazya zyakusilika malwazi aamwi.
Ino Inga Mwaingula Buti?
Mbuti mbotunga twapakamana
• ikuti twaba aacoolwe cakucita makwebo?
• notuyandaula wakukwatana limwi?
• notulanganya mapenzi aabuzumi?
• notuli mumapenzi?
[Mibuzyo yaciiyo]
Kabbokesi kali apeeji 30
Sena Mulakonzya Kwiisyoma Nzila Eeyi?
Eezyi zyaambwa mumasena aa Intaneti zyakabambilwa bantu batakwete naa batakwetwe bayanda kujana wakukwatana limwi:
“Nokuba kuti twasoleka buti kuvwuntauzya taku masimpe eeni aakonzya kutupa kumuzyiba muntu ooyo.”
“Tatusyomezyi kuti twaambo toonse tuliluzi, tulikkwene naa tulabeleka mucibeela eeci cabaabo bayanda kujana wakukwatana limwi.”
“Mizeezo, lulayo, twaambo naa makani aapegwa kwiinda mumasena aa Intaneti ngabaabo basikulemba . . . aboobo taayelede kusyomwa pe.”
[Cifwanikiso icili apeeji 29]
“Muntu uucenjede ulayeeya kabotu kweenda kwakwe”
[Zifwanikiso izili apeeji 31]
Mbuti bamakaintu Banakristo mbobakonzya kwiiya mukaintu muna Sulamiwe?
[Cifwanikiso icili apeeji 32]
‘Balasunka zintu zyoonse mbozyibede akujatisya kuzintu zibotu’