Daniel a Bbaaji Yakwe ya Muswaangano Wacooko

JESU wakabakalalila basololi bazikombelo ibakali kulibona kuti baliluleme aabo ibakanyema nobakabona bana baniini nkobakali kutembaula Leza. Aboobo, Jesu wakababuzya kuti: “Sa tamubalide kuti, Kuzwa kumilomo yatwana atunyonka wakalondola lutembaulo?”—Matayo 21:15, 16.

Daniel uujisi myaka iili cisambomwe, uuswaangana mumbungano mobabelesya mwaambo waku Russia mu Germany, upa bumboni bwakuti bana bacimutembaula Jehova. Walo antoomwe abanyina amucizyi wakwe bakajanika amuswaangano wacooko wa Bakamboni ba Jehova mu Duisburg. Eeci cakali ciindi cakusaanguna kuyoojanika kumuswaangano mupati boobu. Zyoonse zyakali zyeenzu: ihotela, bantu banji bakali amuswaangano, ikukkala imazuba otatwe, kubbapatizigwa kubikkilizya acisobano. Ino Daniel wakalilemeka buti? Wakalilemeka kabotu kapati.

Mu Muhulo buzuba bwakatobela nowakamana muswaangano, kabali kuŋanda, Daniel wakafwuma kubuka kutegwa aunke kucikolo cabana baniini. Pele ino ncinzi cakacili a cibaki cakwe? Ibbaaji yamuswaangano wacooko yakali kumuzibya kuti ngumwi wabasimuswaangano! Banyina bakamwaambila kuti: “Muswaangano wamana. Koigusya lino bbaaji.” Pele Daniel wakati: “Njanda kuti boonse babone nkundakabede akuti bazibe nzyondakaiya.” Aboobo wakaliisamide bbaaji buzuba boonse kucikolo. Baiyi bakwe nobakamubuzya kujatikizya bbaaji, wakabapandulwida bubambe bwamusaangano.

Kwiinda mukucita boobo, Daniel wakali kutobela cikozyanyo cazyuulu zyabana basankwa abasimbi ibali kutembaula Jehova mubuleya kwamyaanda yamyaka.