Amusololelwe A Jwi Lya Leza

“Ijwi lyako ndilampi kuzituta zyangu, lilamunikila inzila yangu.”​—INTEMBAUZYO 119:105.

1, 2. Nkaambo nzi bantu banji ncobatazwidilila mukuba aluumuno lwini-lwini alukkomano?

SENA muliyeeyede nomwakalomba umwi kuti amutondezye nzila njomwakeelede kubelesya? Ndiza mwakali aafwaafwi ampomwakali kuya, pele tiimwakalizyi naa nzila njomweelede kutozya njili. Ndiza mwakaliziminide buya aboobo mwakali kuyandika kuunka kunzila imbi buya. Kufwumbwa naa cili buti, sena inga tacigwasyi kutobela malailile aamuntu uukuzi kabotu kubusena nkomuya? Muntu ooyo ulakonzya kumugwasya kusika nkomuya.

² Kwamyaka minji, bantu basoleka kulyeendelezya kabatayandi kusololelwa aa Mulengi, Jehova Leza. Ibantu batalondokede tabakonzyi kulyeendelezya pe. Tabakonzyi kuba aluumuno lwini-lwini alukkomano pe. Nkaambo nzi ncobatakonzyi kuba luumuno lwini-lwini alukkomano? Kwamyaka iinda ku 2,500, musinsimi Jeremiya wakati: “Muntu ulaya bweenda, pele tabwene kweenzya intaamu zyakwe.” (Jeremiya 10:23) Boonse aabo bayanda kulyeendelezya kakunyina kugwasigwa balatyompwa. Masimpe bantu bayandika kweendelezyegwa.

3. Nkaambo nzi Jehova Leza alikke ncakonzya kupa malailile kubantu, alimwi ino usyomezya nzi?

³ Jehova Leza alikke nguukonzya kupa malailile. Nkaambo nzi? Nkaambo walo alikke nguutuzi kabotu mbotwakalengwa. Alimwi ulicizi kabotu cakapa kuti bantu balubile. Alimwi ulicizi kabotu ncobayandika kucita kutegwa kabapona kabotu. Kunze lyaboobo, mbwali Mulengi Jehova lyoonse ulaziba ncotuyandika. (Isaya 48:17) Aboobo tulakonzya kusyoma cisyomezyo cakwe cilembedwe ku Intembauzyo 32:8 caamba kuti: “Njookulaya akukutondezya inzila njoelede kutola, njookweenzya kukubika liso lyangu alinduwe.” Tuli masimpe kuti: Jehova nguutupa malailile mabotu. Pele ino mbuti mbwatusololela?

4, 5. Ino mbuti ijwi lya Leza mbolikonzya kutusololela?

⁴ Sintembauzyo wakapaila kuli Jehova kuti: “Ijwi lyako ndilampi kuzituta zyangu, lilamunikila inzila yangu.” (Intembauzyo 119:105) Majwi aa Leza alimwi akuyeekezya nkwacita, zilajanika mu Bbaibbele, eezi zilakonzya kutugwasya mumapenzi ngotuba angayo mubuumi. Masimpe notubala Bbaibbele akutobela nzyoliyiisya, tuzibona aameso izyaambwa kuli Isaya 30:21 zyakuti: “Matwi aako ayoomvwa ijwi kusule lyako liti, Njeeyi inzila, amweende mulinjiyo.”

⁵ Amubone kuti, Ijwi lya Leza ku Intembauzyo 119:105 lyaamba twaambo tukozyenyi tobilo. Kaambo kakutaanguna katondezya kuti ndilampi kumaulu eesu. Notucitikilwa mapenzi, injiisyo zijanika mu Bbaibbele zyeelede kutugwasya kusala camaano kutegwa tutacegwi mutukole twamunyika. Kabili nkakuti, ziyeekezyo zya Leza zilamunikila nzila yesu, ikutugwasya kusala kweelana alusyomo ndotujisi lwakupona kukabe kutamani mu Paradaiso, kweelana ambwaakatusyomezya Leza. Kuti nkotuya kakuli mumuni munji cilakonzya kuuba-uba kubona cibi naa cibotu munzila njotwasala. (Ba Roma 14:21; 1 Timoteo 6:9; Ciyubunuzyo 22:12) Atubone majwi aa Leza aajanika mu Bbaibbele mbwaakonzya kuba lampi kumaulu eesu akumunikila nzila yesu.

 “Ndilampi Kuzituta Zyangu”

6. Ndilili majwi aa Leza naakonzya kuba lampi kumaulu eesu?

⁶ Abuzuba, tulasala. Kusala kumwi kulibonya kuti nkusyoonto, pele zimwi ziindi tulakonzya kusunkwa kucita bumambi, kusukwa mbotusyomeka naa mutwaambo twacisi. Kutegwa tukonzye kucita kabotu mutwaambo ootu, tweelede kuba “amiyeeyo iyakaiisigwa kusala cibotu ecibi.” (Ba-Hebrayo 5:14) Kwiinda mukuba aluzibo lwini-lwini lwa Jwi lya Leza akujatisya njiisyo zyalyo, tuyiisya manjezeezya eesu kutegwa kusala kwesu kakumukkomanisya Jehova.—Tusimpi 3:21.

7. Amwaambe nzila yomwe iikonzya kupa kuti Munakristo atalike kumvwana ambabeleka limwi ibatali Bakamboni.

⁷ Amubone cikozyanyo eeci. Sena muli bapati bayanda kukkomanisya Jehova basinizyide? (Tusimpi 27:11) Ikuti naa mbuboobo, mucita kabotu. Pele amuyeeye kuti mbomubeleka limwi bamupa dikiti lyakuti mubasindikile kwaakweebelela cisobano cimwi. Balakkomana kubeleka andinywe, aboobo bayanda kuti mukaakweendeende. Mulakonzya kuyeeya kuti bantu aaba balalilemeka. Balakonzya kuti kabajisi bukkale bubotu. Pele ino ncinzi ncimukonzya kucita? Ikuti naa mwazumina, sena kuli penzi likonzya kuba? Ino mbuti Jwi lya Leza mbolikonzya kumugwasya kusala mukaambo aaka?

8. Ino njiisyo zyamu Magwalo zitugwasya buti caboola kukuba abalongwe?

⁸ Amubone njiisyo zyamu Magwalo zimwi. Yakutaanguna njotukonzya kuyeeya izwa kuba 1 Ba-Korinto 15:33, yamba kuti: “Mweenda abamineme, amywebo mulaminama.” Sena kutobela njiisyo eezi cipa kuti mubatantamukilelyo batali Bakamboni? Bwiinguzi buzwa mu Magwalo kumubuzyo ooyu mbwakuti peepe. Mwaapostolo Paulo wakali kubayanda “bantu boonse” kubikkilizya abatasyomi. (1 Ba-Korinto 9:22) Bunakristo bupa kuti katubayanda bamwi kubikkilizya abaabo mbotutakombi limwi. (Ba-Roma 10:13-15) Ino mbuti mbotukonzya kucilila lulayo lwakuti “atucitile bantu boonse milimo mibotu” ikuti naa twalitantamuna kubantu bayandika kugwasyigwa?—Ba-Galatiya 6:10.

9. Ino ndulayo nzi lwamu Bbaibbele lutugwasya kubona cilongwe mpoceelede kutaana abantu mbotubeleka limwi?

⁹ Nokuba boobo, kuli kwiindana kuliko akati kakusangalazya muntu ngomubeleka limwi akubamba cilongwe. Aamwi njiisyo yamu Magwalo mpoijatikizidwe mpawaawa. Imwapostolo Paulo wakacenjezya Banakristo kuti: “Mutabi nimusungwa mujoko antoomwe abaabo batali bazumini.” (2 Ba-Korinto 6:14) Ino kaambo kakuti “mutabi nimusungwa mujoko antoomwe” kaamba nzi? Busanduluzi bumwi bwama Bbaibbele mukaambo aaka bwamba kuti “mutamvwelani abakunze,” “mutani kuyungani” naa “kamuleka kubamba cilongwe citagwasyi.” Ndilili kumvwana amuntu ngotubeleka limwi  nocitagwasyi? Ino dilili nokukonzya kwaambwa kuti kumvwana kwazwa munzila? Ijwi lya Leza, Bbaibbele lilakonzya kumugwasya mukaambo aaka.

10. (a) Ino Jesu wakali kubasala buti beenzinyina? (b) Ino mibunzyo nzi iikonzya kutugwasya kusala kabotu beezuma?

¹⁰ Amubone cikozyanyo ca Jesu walo kuzwa nakalengwa wali kubayanda bantu. (Tusimpi 8:31) Naakali anyika wakapanga cilongwe abasikumutobela. (Johane 13:1) ‘Wakamuyanda’ muntu watakaisyidwe kabotu mucikombelo cakwe. (Marko 10:17-22) Pele Jesu wakali kukonzya kubasala aabo bakeelede kuba balongwe bakwe beni-beni. Tanaakali kubamba cilongwe abantu batakajisi luyandisisyo lwakucita luyando lwa Bausyi. Aciindi cimwi Jesu wakati: “Munooli beenzuma mwanoozicita nzemwaambila.” (Johane 15:14) Masimpe mulakonzya kweendelana amuntu ngomubeleka limwi. Pele amulibuzye kuti: ‘Sena muntu ooyu ulilibambide kucita nzyayanda Jesu?’ Sena ulayanda kwiiya kucita nzyayanda Jehova, walo Jesu ngwaakatulailila kuti katukomba nguwe? Sena ulalilemeka mbuli mbodililemeka nde Munakristo?’ (Matayo 4:10) Nomwaambaula ambemubeleka limwi akusoleka kutobela lulayo lwamu Bbaibbele, mibunzyo eeyo iiya kwiingulwa.

11. Amupe zikozyanyo zitondezya bukkale bumwi mwalo majwi aa Leza mwaakonzya kutusololela.

¹¹ Kuli nzila azimbi zinji majwi aa Leza mbwaakonzya kuba mbuli lampi kumaulu eesu. Mucikozyanyo, Munakristo uutabeleki ulakonzya kujana mulimo ngwaali kulila misozi. Nokuba boobo, imulimo ooyu tuupi ciindi cakunga naa wauzumina, ciyakwaamba kutajanika-janika kumiswaangano ya Bunakristo akutaicita kabotu milimo iimwi iijanika mubukombi bwakasimpe. (Intembauzyo 37:25) Umwi Munakristo ulakonzya kusukkwa kweebelela zyakulikondelezya ziteendelani anjiisyo zyamu Bbaibbele. (Ba-Efeso 4:17-19) Aumwi ulakonzya kutyompwa kufwambaana akaambo kakutalondoka kwabakwesu. (Ba-Kolose 3:13) Munzila zyoonse eezyi, Ijwi lya Leza lyeelede kuba lampi kumaulu eesu. Masimpe, ikuti twatobela lulayo lwamu Bbaibbele, tulakonzya kuzwidilila kumapenzi  oonse ngetuba aangayo mubuumi. Majwi aa Leza “alikondede kukufundisya akukulaya, akukuolola akukupandulula makani aabululami.”—2 Timoteo 3:16.

“Lilamunikila Inzila Yangu”

12. Ino mbuti majwi aa Leza mbwaamunika munzila zyesu?

¹² Intembauzya 119:105 ayalo yaamba kuti nzyaamba Leza zilakonzya kumunikila inzila yesu. Tatuli mumudima caboola kuzintu ziyakucitika kumbele, akaambo kakuti Ibbaibbele lilapandulula zintu mbozibede munyika lino alimwi aciya kucitika kumbele. Tulizi kuti tupona “kumazuba aakumamanino” aanyika eeyi mbyaabi. (2 Timoteo 3:1-5) Ikuziba ciyakucitika kumbele cilakonzya kutugwasya mbotupona lino. Imwaapostolo Petro wakalemba kuti: “Lino zintu ezi mbuziti kamaninine obo, nywebo muleelede kuba bantu bali buti kukweenda munzila iisalala amukulemeka Leza? Mucilangila akuyandisya buzuba bwakusika kwa-Leza.”—2 Petro 3:11, 12.

13. Ino mbuti kuyeeya kwesu ambotupona mbokweelede kujatikizyigwa akumana kwaciindi?

¹³ Mbotuyeeya ambotupona zyeelede kusininzya kuti “nyika ilamana, azisusi zyayo.” (1 Johane 2:17) Ikutobela njiisyo zyamu Bbaibbele kuya kutugwasya kusala kabotu zintu nzyotuyoocita kumbele. Mucikozyanyo, Jesu wakati: “Pele amusaangune kuyandaula Bwami bwa-Leza abululami bwakwe, elyo zintu ezi zyoonse mulaziyungizizigwa azyalo.” (Matayo 6:33) Cilakkomanisya kaka ikubona bana banji ibasyomeka akutobela ijwi lya Jesu kabanjila mulimo waciindi coonse! Ibamwi antela mukwasyi oonse buya basala kulongela kumasena bakambausi ba Bwami nkobayandika kapati.

14. Ino mbuti mukwasyi umwi wa Banakristo mbuwakayungizya mulimo wamumuunda?

¹⁴ Mukwasyi umwi wa Banakristo bali  bone bakalonga kuzwa ku United States kwaakubelekela mbungano iili mudolopo lijisi bantu bali 50,000 lyamucisi ca Dominican Republic. Imbugano eeyi ilijisi basikumwaya ba Bwami babalilwa ku 130. Pele mu April 12, 2006, ibakajanika ku Ciibalusyo calufwu lwa Kristo bakali kutandila ku 1,300. Myuunda mubusena oobu “yayuma kale kuti itebulwe.” Aboobo nikwakainda myezi iili yosanwe bausyi, banyina, mwana musimbi amusakwa boonse aantomwe bakajisi ziiyo zya Bbaibbele zili 30. (Johane 4:35) Bausyi bakati: “Imbungano ilijisi bakwesu abacizyi ibali 30 ibakaboola kugwasya. Ibali 20 bakazwa ku United States kaali bamwi bakazwa ku Bahamas, Canada, Italy, New Zealand alimwi a Spain. Nobasika inga balilibambide kubeleka alimwi akubakulwaizya bakwesu bakokuya.”

15. Zileleko nzi zimwajana akaambo kakubikka Bwami bwa Leza mubusena bwakutaanguna muumi bwanu?

¹⁵ Masimpe ngakuti, ibanji tabakonzyi kulongela kubusena kuyandika lugwasyo. Aabo bacikonzya kulongela kubusena bumbi baya kulongezyegwa akaambo kakutola lubazu mumulimo ooyu. Kufwumbwa naa mubelekela kuli, mweelede kukkomana akaambo kakubelekela Jehova anguzu zyenu zyoonse. Pele kuti mwataanguna kuyandaula Bwami bwa Leza mubuumi bwenu boonse, Jehova usyomezya kumuletela “zileleko zinji cakuti mulabula aakubikka zintu zyanu.”—Malaki 3:10, BT.

Kugwasyigwa Alulayo lwa Jehova

16. Ino mbuti mbotukonzya kugwasyigwa kwiinda mukusololelwa amajwi aa Leza?

¹⁶ Mbuli mbutwabona kale, majwi aa Jehova alatusololela munzila zyobile zikozyenyi. Alatumunikila mbuli lampi kumaulu eesu kutugwasya kuya kumbele katuli munzila iiluzi alimwi anotusala cakucita. Alimwi alatumunikila munzila yesu, kutegwa tucikonzye kubona cili kumbele. Eeci munzila imwi, citugwasya kutobela lulayo lwa Petro lwakuti: “Amulyaangaange muzibuno zyakuyeeya kwanu, mukabe bapakamani, amukalulangilisye olo luzyalo ndomuyooletelwa kukuyubununwa kwa-Jesu Kristo.”—1 Petro 1:13.

17. Ino buti ciiyo ca Bbaibbele mbocikonzya kutugwasya kutobela malailile aa Leza?

¹⁷ Tacidoonekwi buya kuti Jehova ulatusololela. Mubuzyo ngwakuti, Sena muya kuzitobela nzyatwaambila? Kutegwa mwaamvwisye malailile ngatupa Jehova, mweelede kuba ambaakani yakubala ciibela ca Bbaibbele abuzuba. Amuzinzibale kuyeeya makani ngomwabala, amubone Jehova ncayanda mumakani aaya ambomukonzya kwabelesya mubuumi bwanu. (1 Timoteo 4:15) Mpoonya ciindi nomusala, a “mulipe amibili yanu yoonse.”—Baloma 12:1, Ci.

18. Ino mbulumbu nzi mbotujana notutobela malailile aa Jwi lya Leza?

¹⁸ Ikuti naa twazitobela nzyotwiiya, injiisyo nzyotubala mu Jwi lya Leza ziyakutugwasya akutusololela ciindi notusala ncotweelede kutobela. Tulakonzya kusyoma kuti, majwi aa Jehova apa kuti ‘basongwaale batezi.’ (Intembauzyo 19:7) Notusololelwa a Bbaibbele, tulaba amanjezyeezya mabotu alimwi tulakkutila akaambo kakutembaula Jehova. (1 Timoteo 1:18, 19) Ikuti katusololelwa amajwi aa Leza abuzuba, Jehova uyakutulongezya abuumi butamani.—Johane 17:3.

Sena Muciyeeyede?

• Nkaambo nzi ncociyandika kapati kusololelwa a Jehova Leza?

• Ino muunzila nzi majwi aa Leza mbwaakonzya kuba lampi kumaulu eesu?

• Ino mbuti majwi aa Leza mbwaakonzya kumunika munzila yesu?

• Ino ciiyo ca Bbaibbele ciyakutugwasya buti kutobela malailile aa Leza?

[Mibuzyo yaciiyo]

[Cifwanikiso icili apeeji 19]

Ino ndilili kumvwana abantu batali Bakamboni nokutagwasyi?

[Cifwanikiso icili apeeji 20]

Beenzyinyina Jesu bakali baabo bakacita kuyanda kwa Jehova

[Zifwanikiso izili apeeji 21]

Sena mbotupona abuzuba cilatondezya kuti tubikka Bwami mubusena bwakutaanguna?