Kucisa kwa Moyo Kutola Ciindi Cilamfwu

CAINO-INO, muvwuntauzyi wakali kuyanda kuzyiba mbobalimvwa aabo bafwidwa kwainda ciindi cili mbocibede. Wakatumizya pepa lyakajisi mibuzyo kubazyali banji bakafwidwa bana myaka minji yainda. Tabali boonse bazyali bakaingula. Ba Vladimir ibakafwidwa mwana musankwa myaka yosanwe yainda, bakati cicibakatazya kwaamba makani aalufwu lwamwana wabo. *

Buumba buli boobu ibutola ciindi cilamfwu, nkobuli kubazyali banji bakafwidwa. Kwamyaka iili kkumi yainda, William wakafwidwa mwana musankwa wamyaka iili 18 iwakanyikila mumeenda, wakalemba kuti, “Kucisa kwamoyo akaambo kakusowekelwa kuli boobu kuciliko, alimwi kuna kuliko kufwumbwa buyo kuti kandicili muumi.” Nokwakainda myaka iili yosanwe Lucy naakafwidwa mwana musankwa kubulwazi bwakaile kuboola cabuuzila, wakalemba kuti: “Nikwakainda mazuba masyoonto kuzwa ciindi naakafwa, ndakali kuyeeya kuti, ‘Kuli nkwaaya buyo.’ Ndaali kubona mbuli kuti ndilota buyo. Nokwakainda mazuba aali mbwaabede ndakalumbula. Kwainda myaka iili yosanwe kuzwa naakafwa mwana wangu, pele aabona nendili endikke, ndilalila.”

Nkaambo nzi bazyali mbuli Vladimir, William a Lucy ncobamvwa moyo kucisa kwaciindi cilamfwu? Atulange-lange cipa kulimvwa boobu.

Nkaambo nzi Ncokuli Mapenzi Manji Boobu?

Mwana nazyalwa, bazyali balakkomana alimwi luyando kumwana lulavwula kwiinda kumuntu uumbi buyo. Bazyali balaseka-seka nobasumpaula mwana, nobamubona mbwaona anamweta-mweta. Bazyali basiluyando balababikkila maano bana babo. Balabayiisya mbobeelede kuba bana bamulemyo. (1 Ba-Tesalonika 2:7, 11) Ibana batalika kuccilila nzyobayiisyigwa, bazyali balakkomana kapati alimwi balatalika kulangila nzyobaya kucita bana baakukomena.

Ibazyali babikkila maano balabeleka canguzu kujana nzyobayandika bana babo. Inga ciindi aciindi balabikka mali ambali naa lubono kutegwa bakonzye kubagwasya bana babo kuyooba amukwasyi wabo uubagemi kumpela aamazuba. (2 Ba-Korinto 12:14) Bazyali balombozya kuti bana babo kabapona lyoonse, nkakaambo kaako balabeleka  canguzu kujana lubono. Ikuti mwana wafwa, imulimo wakukomezya mwana ulatyokezyegwa alimwi kulombozya kwabo kulaba kwabuyo. Luyando lwaliko akati kabazyali amwana lulamana akaambo kalufwu. Luyando ndobakajisi kumwana lulafwidilila. Buumba bwabazyali bulazumanana kwaciindi cilafwu.

Ibbaibbele lilaazuminizya makani aakuti bazyali ibafwidwa balazumanana kukatazigwa mumoyo. Ibbaibbele nolyaamba cakacitika kuli Jakobo sikale naakamvwa kuti mwana wakwe Josefa wajaigwa, lilati: “Jakobo wakadeluula zyakusama zyakwe, wasama azisani zyamasaka mucikungu cakwe, walila mwaanakwe mazuba manji. Nkabela bana bakwe balombe abana bakwe basimbi boonse bakabuka kuti bamuumbulizye, pele wakakaka kuumbulizigwa. Wakati, Ncobeni njooselukila mukabanda mwaabede mwanaangu cakulila.” Kwamyaka minji Jakobo wakacili kumulila mwana wakwe ngwaakali kuyeeya kuti ulifwide. (Matalikilo 37:34, 35; 42:36-38) Acimwi cikozyanyo camu Bbaibbele caamba mukaintu uusyomeka wazina lya Naomi iwakafwidwa bana basankwa bobilo. Akaambo kabuumba bwakamujisi wakali kuyanda kulicinca zina lyakwe lya Naomi lyaamba kuti “Uusangalede” akuba Mala nkokuti “Uuside.”—Lute 1:3-5, 20, 21, BT.

Nokuba boobo, Ibbaibbele taliyiili buyo akwaamba buumba bujisi bazyali. Pele alimwi lilatondezya Jehova mbwapa nguzu kuli baabo balila. Mucibalo ciccilila, tulalanga-langa nzila zimwi Leza mbwabaumbulizya aabo balila.

Bupanduluzi buyungizidwe