Ijwi lya Jehova Lili Abuumi

Twaambo Tupati-Pati Kuzwa Mubbuku lya Daniele

IBBUKU lipandulula mabala aamu Bbaibbele lyakuti Holman Illustrated Bible Dictionary lyaamba kuti: “Ibbuku lya Daniele lili akati kamabbuku aamu Bbaibbele aakkomanisya alimwi aapa kukkala ansi kuyeeya. Lilijisi twaambo tubeleka lyoonse.” Makani aamubbuku lya Daniele atalikila mu 618 B.C.E. ciindi Mwami Nebukadinezara waku Babuloni naaboola ku Jerusalemu akuzinga munzi ooyu alimwi akutola “bamwi babana ba-Israyeli” mubuzike ku Babuloni. (Daniele 1:1-3) Akati kabo kuli mukubusi Daniele, ambweni uujisi myaka yakuzyalwa iili akati ka 13 a 19. Imamanino aabbuku eeli aamba kuti Daniele ucili ku Babuloni. Lino, kajisi myaka iitandila ku 100 yakuzyalwa, Daniele wapegwa cisyomezyo kuli Leza cakuti: “Uuyootanguna kulyokezya, elyo uyooima kubusena mbobambilidwe kumamanino aaciindi.”—Daniele 12:13.

Nokuba kuti cibeela cakusaanguna cabbuku lya Daniele cakalembwa kweelana ambwazibona zintu sikulwiidwa, cibeela camamanino cakalembwa kweelana ambwaakali kuzibona zintu Daniele. Ibbuku eeli lyakalembwa a Daniele, lilijisi businsimi bujatikizya kuba acuuno alimwi akuwa kwabami beendelezya nyika yoonse, ciindi cakuboola kwa Mesiya alimwi azintu zicitika mazubaano. * Imusinsimi uucembeede alimwi wakayeeya buumi mbwaakali kupona alimwi wakaamba zintu zitukulwaizya kuba baalumi alimwi abanakazi bazumanana kusyomeka kuli Leza. Imulumbe uujanwa mubbuku lya Daniele uli abuumi alimwi anguzu.—Ba-Hebrayo 4:12.

INO CIBALO CAAMBA MBOZYAKATOBELANA KUCITIKA ZINTU CITUYIISYA NZI?

(Daniele 1:1–6:28)

Muumwaka wa 617 B.C.E. Daniele abeenzinyina nkokuti, Sadrake, Mesaki a Abedinego bali munkuta ku Babuloni. Mumyaka yotatwe yakuyiisyigwa bukkale bwamunkuta, ibakubusi aaba bazumanana kusyomeka kuli Leza. Nokwainda myaka iitandila kulusele, Mwami Nebukadinezara walota ciloto cinyonganya mizeezo. Daniele wazibya ciloto eeco akucipandulula. Mpoonya mwami wazumina kuti ncobeni Jehova ngu “Leza wabaleza, mupati wabami, sikuyubununa makani aasisidwe.” (Daniele 2:47) Pele, tiilyalampa pe, kuboneka kuti Nebukadinezara waciluba ciiyo eeci. Ciindi beenzinyina Daniele botatwe nobakaka kukomba cikozyanyo cipati, imwami walailila kuti basowelwe mubbibi lyamulilo. Leza mwini-mwini wabavwuna, mpoonya Nebukadinezara wabula cakucita pele kwiile kuzumina kuti “taakwe Leza umbi uukonzya kuvuna obo.”—Daniele 3:29.

Nebukadinezara walota ciloto acimbi ciyandika kapati. Wabona cisamu cipati icagonkwa alimwi akulesyegwa kusyuuka. Daniele wazibya bupanduluzi bwaciloto eeco. Ciloto cazuzikizigwa cakutamaninina ciindi Nebukadinezara naasondoka alimwi akupona mukuya kwaciindi. Nokwainda makumi aamyaka, Mwami Belisazara wacitila  basilutwe bakwe pobwe lipati alimwi calunyansyo wabelesya zinywido zyakagusyigwa mutempele lya Jehova. Masiku ngoona aayo, Belisazara wajaigwa nkabela Dariyo mu Medi wabutola bwami. (Daniele 5:30, 31) Mumazuba aa Dariyo, Daniele kajisi myaka yakuzyalwa yiinda ku 90, musinsimi uucembeede wakanzwa kujaigwa abasilutwe basimunyono. Pele, Jehova wamuvwuna “kumilomo yabalavu.”—Daniele 6:27.

Mibuzyo Yamu Magwalo Iingulwa:

1:11-15—Sena zilyo zyazisyumani nzezyakapa kuti ziwa zyabakubusi ba Juda ziinde kubota? Peepe. Kunyina zilyo zikonzya kupa kucinca kuli boobo mumazuba buyo aali kkumi. Jehova nguwakapa kuti ziwa zyabakubusi bana Hebrayo zicince kwiinda mukubalongezya akaambo kalusyomo ndobakajisi mulinguwe.—Tusimpi 10:22.

2:1—Ino ndiilili Nebukadinezara naakalota ciloto cijatikizya cikozyanyo cipati kapati? Cibalo caamba kuti mwakali “mumwaka wabili wabwami bwa-Nebukadinezara.” Nebukadinezara wakaba mwami wa Babuloni mu 624 B.C.E. Aboobo, imwaka wabili wabulelo bwakwe wakali kunootalikila mu 623 B.C.E., nkokuti kakuceede myaka minji buya kuti alwane Juda. Kuciindi eeco, Daniele kunyina naakali kunga waba mu Babuloni kutegwa apandulule ciloto eeco. Kuboneka kuti “mwaka wabili” ubalwa kuzwa mu 607 B.C.E. ciindi mwami wa Babuloni naakanyonyoona Jerusalemu akuba muleli wanyika yoonse.

2:32, 39—Muunzila nzi ibwami bwansiliva mbobwakali buniini kuli boobo bwakali kwiimininwa amutwe wangolida, alimwi mbuti bwami bwamukuba mbobwakali buniini kuli bwansiliva? Bwami bwaba Medi aba Persia, ibwakali kwiimininwa acibeela cansiliva cacikozyanyo, bwakali buniini kubwami bwa Babuloni, imutwe wangolida, mukuti tiibwakajisi mpuwo yakuzunda Juda. Bwami bwakatobela bwakali bwaba Giliki, ibwakali kwiimininwa amukuba. Abwalo bwami bwaba Giliki bwakali buniini mbubonya mukuba mboutasumpukide kwiinda nsiliva. Nokuba kuti Bwami bwaba Giliki bwakatola cooko cipati, tiibwakajisi coolwe cakwaangununa bantu ba Leza kuzwa mubuzike mbuli mbobakacita ba Medi aba Persia.

4:8, 9—Sena Daniele lwakwe mwini wakaba musondi? Peepe. Majwi aakuti “mupati wabasondi boonse” aamba buyo kuti Daniele wakajisi cuuno kali “silutwe mupati wabasongo boonse ba-Babuloni.”—Daniele 2:48.

4:10, 11, 20-22—Ncinzi cakali kwiimininwa acisamu cipati ncaakalota Nebukadinezara? Kumatalikilo, cisamu cakali kwiiminina Nebukadinezara kali muleli wanyika yoonse. Pele, mbwaanga bulelo bwakali kusika “kumagolelo aanyika,” nkokuti cisamu cakali kwiiminina cimwi cintu cipati kapati. Ibbuku lya Daniele 4:17 lyeendelanya ciloto eeci kubulelo mbwajisi “Syakeemba” naa Mupati Kampatila kubanamaleya. Nkokuti, cisamu ciiminina bulelo bwakoonse-koonse bwa Jehova, ikapati kujatikizya nyika. Aboobo, ciloto cakazuzikizyigwa mumbazu zyobilo—mubulelo bwa Nebukadinezara alimwi amubweendelezi bwa Jehova.

4:16, 23, 25, 32, 33, NW—Ino “ziindi zili ciloba” cakali ciindi cilamfwu buti? Kucinca koonse kwakacitika kujatikizya mbwaakali kuboneka Mwami Nebukadinezara kutondezya kuti “ziindi zili ciloba” cakali ciindi cilamfwu kapati kwiinda mazuba aali ciloba. Kujatikizya  nguwe, ziindi eezyi zyakali myaka iili ciloba nkokuti mwaka amwaka kuujisi mazuba ali 360 naa mazuba ali 2,520 antoomwe. Mukuzuzikizyigwa kupati, “ziindi zili ciloba” ziiminina myaka ili 2,520. (Ezekiele 4:6, 7) Zyakatalika ciindi Jerusalemu naakanyonyoonwa mu 607 B.C.E. alimwi zyakamana ciindi Jesu naakabikkwa acuuno kali Mwami kujulu mu 1914 C.E.—Luka 21:24.

6:6-10—Mbwaanga muntu napaila kuli Jehova takuyandiki kuti akkale naa aimikile munzila imwi iilibedelede, sena tiicakali kunooli cintu camaano kuli Daniele kupaila cakusisikizya kwamazuba aali 30? Bantu banji bakalizi kuti Daniele wakali kupaila ziindi zyotatwe abuzuba. Nkakaambo kaako basinkondonyina ncobakabeda amuzeezo wakubikka mulawo weendelezya mipailo. Ikuti Daniele naakacinca cilengwa cakwe cakupaila, ibamwi nobakamubona kuti uubya-ubya zyeelelo zyakwe alimwi akuti wakakilwa kukomba Jehova luzutu.

Ziiyo Kulindiswe:

1:3-8. Imakanze ngaakajisi Daniele abeenzinyina aakuti bazumanane kusyomeka kuli Jehova akankaizya mpindu yalwiiyo oolo lulangilwa kuti ndobakapegwa abazyali babo. Eelyo bazyali bayoowa Leza nobabikka zintu zyakumuuya kumbele mubuumi bwabo alimwi akuyiisya bana babo kucita mbubonya, ibana babo balalangilwa kapati kukazya masunko amapenzi ngobakonzya kujana kucikolo naa kumbi buyo.

1:10-12. Daniele wakakamvwisya kaambo “silutwe wabazibe” ncaakali kuyoowa mwami alimwi kunyina naakamuzumanana. Nokuba boobo, kumbele Daniele wakasikila “mulangi,” walo oyo ambweni wakali kukonzya kumuteelela akumugwasya. Notulanganya bukkale bumwi bukatazya, tweelede kubelesya bupampu, luzibo abusongo munzila njimunya.

2:29, 30. Mbubonya mbuli Daniele, tweelede kutembaula Jehova kujatikizya luzibo, bube alimwi anguzu zyakucikonzya kucita kabotu zintu ambweni nzyotwakajana kwiinda mukwiiya zintu zyakumuuya.

3:16-18. Bana Hebrayo botatwe bakaamba cakusinizya boobo nkaambo nokuba kumatalikilo tiibakaubya-ubya zyeelelo zyabo zijatikizya zilyo. Buyo-buyo nobatakacita oobo. Andiswe tweelede kusoleka “kusyomeka muzintu zyoonse.”—1 Timoteo 3:11.

4:24-27. Ikwaambilizya mulumbe wa Bwami, walo uubikkilizya lubeta lwa Leza, kuyandika kuba alusyomo alimwi abusicamba buli mbuli boobo mbwaakatondezya Daniele kwiinda mukuzibya Nebukadinezara zyakali kuzyoomucitikila alimwi azyeezyo mwami nzyaakeelede kucita kutegwa ‘ciindi caluumuno cakwe cilampisigwe.’

5:30, 31. ‘Cikozyanyo cakusampaula mwami wa Babuloni’ cakazuzikizigwa. (Isaya 14:3, 4, 12-15) Ncimwi buyo, Saatani Diabolosi sikulisumpula mbubonya mbuli mwami wa Babuloni uyoosampaulwa.—Daniele 4:30; 5:2-4, 23.

INO NCINZI ZILENGAANO ZYA DANIELE NCOZIYUBUNUNA?

(Daniele 7:1–12:13)

Daniele wabona cilengaano cakusaanguna muciloto mu 553 B.C.E. kajisi myaka yakuzyalwa yiinda ku 70. Wabona banyama bapati bone ibaiminina kutobelana kwabami beendelezya nyika yoonse kuzwa kumazuba aakwe kusikila sunu. Mucilengaano cajulu, wabona “umwi uuli mbuli mwana amuntu” kapegwa “bweendelezi butamani.” (Daniele 7:13, 14) Nokwainda myaka yobile, Daniele wabona cilengaano cijatikizya ba Medi aba Persia, ba Giliki alimwi abulelo bujisi “mwami muyumu moyo.”—Daniele 8:23.

Lino, muumwaka wa 539 B.C.E. Babuloni wawa alimwi Dariyo mu Medi waba muleli wabwami bwaba Kasidi. Daniele wapaila kuli Jehova kujatikizya kubukulusigwa kwanyika yokwabo. Kacipaila, Jehova watuma mungelo Gabrieli kuli Daniele kutegwa amupe ‘busongo aluzibo’ kujatikizya kuboola kwa Mesiya. (Daniele 9:20-25) Lino, twasika mumwaka wa 536/535 B.C.E. Bamucaala bapilukila ku Jerusalemu. Pele, mulimo wakuyaka tempele uli mukukazigwa. Eeci camupa kulibilika Daniele. Waapailila makani aaya mpoona Jehova watuma mungelo uujisi cuuno caatala kuli Daniele. Musule lyakumuyumya-yumya akumukulwaizya Daniele, imungelo waamba businsimi bwaamba zyakulwanina  bweendelezi akati kamwami wakunyika alimwi amwami wakumusanza. Kuzwangana ooku kutalikila kuciindi eeco bwami bwa Alesandro Mupati nobwaandaanizigwa akati kabapati babasikalumamba bakwe bone mane kusikila kuciindi ‘cakubuka’ kwa Mikayeli Silutwe Mupati.—Daniele 12:1.

Mibuzyo Yamu Magwalo Iingulwa:

8:9—Ino ncinzi ciimininwa ‘acisi cibotu’? Aawa, ‘cisi cibotu’ ciiminina bukkale mbobajisi Banakristo bananike anyika kuciindi ca Bulelo Bweendelezya Nyika Yoonse bwa Britain a Amelika.

8:25—Ino “Mwami wabami” nguni? Ibbala lya Cihebrayo lyakuti sar, lisanduludwe kuti “mwami,” munzila yacigaminina lyaamba “mweendelezi” naa “silutwe.” Izina lyabulemu lyakuti “Mwami wabami” lyaamba buyo Jehova Leza luzutu—Mweendelezi wabasilutwe boonse babangelo, kubikkilizya a “Mikayeli umwi wabasilutwe bapati.”—Daniele 10:13.

9:21—Nkaambo nzi Daniele ncaakaamba mungelo Gabrieli kuti “oyo muntu”? Cili boobo akaambo kakuti Gabrieli wakaboola kuli Daniele muciimo cabuntu mbubonya mbwaakaboneka naakaboolede mucilengaano ncaakabwene musule.—Daniele 8:15-17.

9:27—Ncizuminano nzi cakazumanana kubeleka kacili “ciyumu abantu banji” mane kumamanino aansondo zili 70 zyamyaka, naa mu 36 C.E.? Cizuminano ca Mulawo cakamana mu 33 C.E. ciindi Jesu naakakankaminwa. Pele kwiinda mukuyumya cizuminano ca Abrahamu kujatikizya bana Israyeli bakumubili mane kusikila mu 36 C.E., Jehova wakasumpya ciindi cakulongezyegwa kwaba Juda akaambo kakuti bakali balunyungu lwa Abrahamu. Cizuminano ca Abrahamu cicibeleka ku “bana ba-Israyeli ba-Leza.”—Ba-Galatiya 3:7-9, 14-18, 29; 6:16.

Ziiyo Kulindiswe:

9:1-23; 10:11. Akaambo kakulicesya kwakwe, kuyoowa Leza, busungu mukwiiya Jwi lya Leza alimwi akukakatila kupaila, Daniele wakali “muntu uuyandwa loko.” Ibube oobu mbubonya bwakamugwasya kuzumanana kusyomeka kuli Leza mane kumamanino aabuumi bwakwe. Andiswe atube amakanze aakutobela cikozyanyo ca Daniele.

9:17-19. Noliba leelyo notupailila kuboola kwanyika mpya ya Leza ‘yabululami,’ ncotweelede kubikkila maanu kapati nkusalazigwa kwazina lya Jehova alimwi akusumpulwa kwabweendelezi bwakwe kutali buyo mamanino aamapenzi abuyumuyumu mbotujisi.—2 Petro 3:13.

10:9-11, 18, 19. Kwiinda mukutobela cikozyanyo camungelo wakaboola kuli Daniele, tweelede kukulwaizyanya kwiinda mukugwasyanya akuumbulizyanya.

12:3. Kuciindi cino camamanino, “basongo,” nkokuti Banakristo bananike, balamweka “mbuli mimuni” alimwi baleta “bantu banji kubululami” kubikkilizya a “inkamu impati” ya “mbelele zimwi.” (Ba-Filipi 2:15; Ciyubunuzyo 7:9; Johane 10:16) Bananike ‘bayoobekema mbuli inyenyeezi’ cakumaninina mu Bulelo bwa Myaka iili Cuulu bwa Kristo ciindi nobayootola lubazu anguwe mukupa kuti bantu bamvwida anyika bakagwasigwe cakuzulila acinunuzyo. Iba “mbelele zimwi” beelede kuba alukamantano lwacinkaminwe abananike, ikubagwasya camoyo woonse.

Jehova ‘Ulabalongezya Aabo Bamuyoowa’

Ino bbuku lya Daniele lituyiisya nzi kujatikizya Leza ngotukomba? Amuyeeye buyo businsimi buli mumo—oobo bwazuzikizyigwa kale aboobo bulangilwa kuzuzikizyigwa. Masimpe, butondezya kuti Jehova ngu Sikuzuzikizya jwi lyakwe!—Isaya 55:11.

Ino makani aaluulwa mubbuku lya Daniele atondezya nzi kujatikizya Leza wesu? Ibakubusi bone bana Hebrayo ibakakaka kutobela buumi bwamunkuta yamwami wa Babuloni bakapegwa ‘luzibo, maanu alimwi abusongo.’ (Daniele 1:17) Leza mwini-mwini wakatuma mungelo wakwe akuvwuna Sadrake, Mesaki a Abedinego kuzwa mubbibi lyamulilo. Daniele wakavwunwa kuzwa mumulindi wabasyuumbwa. Eeci citondezya kuti Jehova ‘mmugwasyi alimwi nintobo yabaabo bamusyoma’ alimwi ‘ulabalongezya aabo bamuyoowa.’—Intembauzyo 115:9, 13.

Bupanduluzi buyungizidwe

[Cifwanikiso icili apeeji 10]

Nkaambo nzi Daniele ncaakali “muntu uuyandwa loko”?