Banakristo Nobapupululwa Mbuli Maila

KAKUSYEEDE ciindi cisyoonto buyo kuti afwe, Jesu wakacenjezya basikwiiya bakwe kuti: ‘Amubone! Saatani uyanda kumusunka mbubwenya mulimi mbwapupulula maila.’ (Lk. 22:31) Ino ncinzi ncaakali kwaamba amajwi aayo?

Naakali anyika Jesu, kutebula maila wakali mulimo uukatazya. Kusaanguna, batebuzi bakali kubungika myaangala kuzwa mumuunda. Mpoonya myaangala eeyo bakali kwiipola azibuye naa kubelesya banyama mbuli ŋombe naa mbongolo kwiinzya cilayi alinjiyo kutegwa ivwinyauke. Eeci cakali kugwisya nseke kumyaangala alimwi akumakwa. Kuzwa waawo, balimi bakali kuwaala muvwele ooyo wanseke, myaangala amakwa mujulu. Inseke zyakali kuwida acibuye, pele buungu amankwisilili zyakali kupupululwa amuwo. Mpoonya inseke zyakali kubbeetwa naa kusefwa kabotu-kabotu ikugwisya zitayandiki.

Mbubwenya bwakaambide Jesu, Saatani cakutaleka wakalwana basikwiiya ba Jesu ciindi eeco, aswebo ulatulwana sunu. (Ef. 6:11) Masimpe, talili penzi lyoonse litulwana liletwa a Saatani. (Muk. 9:11) Nokuba boobo, Saatani ukanzide kubelesya nzila iili yoonse njajana ikutupa kuleka kusyomeka. Mucikozyanyo, ulakonzya kutusunka kuyandisya zyakumubili, kulikondelezya kubyaabi naa bwaamu. Alimwi ulakonzya kubelesya balongwe besu kucikolo naa kumilimo alimwi abasazima batali Bakamboni ba Jehova kutuyunga kuyandisya kuzwidilila munyika eeyi mumakani aalwiiyo naa milimo. Kunze lyaboobo, Saatani ulakonzya kubelesya kupenzegwa mukusola kutupa kucileka kusyomeka kuli Leza. Ee, nzinji nzila zimbi nzyabelesya Saatani kutupupulula munzila yacikozyanyo.

Mbuti mbotunga twamukazya sinkondoma ooyu singuzu? Tatukonzyi kumukazya munguzu zyesu tobeni. Saatani ulaanguzu kwiinda ndiswe; pele tulizi kuti Jehova ulaanguzu kapati kwiinda Saatani. Ikuti katumusyoma cakumaninina Jehova, katupaila cakusitikila kulomba busongo abusicamba bwakuti tuliyumye, alimwi akutobela busolozi bwakwe lyoonse, uyootuyumya kukazya kulwana nkwacita Saatani.—Int. 25:4, 5.

Notusunkwa, tuyandika nguzu ‘zyakuziba cibotu acibi,’ kutegwa tuteenwi anzila zyabucenjezu zya Saatani. (Heb. 5:13, 14) Jehova ulakonzya kutugwasya kuba anguzu eezyo. Mpoonya tweelede kutobela nzila iiluzi lyoonse kunyina makani azitucitikila. Ikuti twatobela busolozi bwa Jehova, takakakilwi kutugwasya kuzuzikizya makanze eesu aakucita zintu ziluzi.—Ef. 6:10.

Saatani ulakonzya kusola kutupupulula mbuli maila. Pele kwiinda munguzu nzyatupa Jehova, tulakonzya kumukazya, katuli bayumu mulusyomo. (1 Pet. 5:9) Inzya, Ijwi lya Jehova litusyomezya kuti: “Amumukazye Saatani, [eelyo] uyoomucija.”—Jak. 4:7.