Kuba Beelela Kutambula Bwami

“Aya alatondezya kubeteka kwa-Leza kululeme, uuyanda kuti mukeelezegwe mbuli beeledwe Bwami bwa-Leza mbomupengela.”—2 TES. 1:5.

1, 2. Ino makanze nzi ngajisi Leza kujatikizya lubeta, alimwi nguni uuyoobeteka?

MUMWAKA wa 50 C.E., mwaapostolo Paulo wakali ku Atene. Akaambo kakukatazigwa akukomba mituni kwakavwulide ooko nkwaakabona, cakamupa kuti abakambaukile. Wakamanizya mulumbe wakwe amajwi aayelede kuti akapa kuti aabo bantu batakombi mbaakali kwaambila baswiilile. Wakaamba kuti: “Sunu [Leza] ulailila bantu kuti kumasena oonse boonse basanduke, nkaambo wabika buzuba mbwati kabeteke nyika mubululami, kumwaalumi oyo ngwasungwide. Wakabapa bantu boonse cisinizyo camakani ayo mbwaakamubusya kabafu.”—Inc. 17:30, 31.

² Cilayandika kaka kubona kuti Leza wabika buzuba bwalubeta kubantu kumbele! Ilubeta oolo luyoocitwa amuntu Paulo ngwaatakaamba zina mumulumbe wakwe ku Atene pele ooyo ngotuzi kuti ngu Jesu Kristo wakabusigwa. Lubeta luyoocitwa a Jesu lwaamba buumi naa lufwu.

3. Ino nkaambo nzi Jehova ncaakapanga cizuminano a Abrahamu, alimwi nguni uujisi mulimo waalubazu mukuzuzikizigwa kwacizuminano eeci?

³ Oobu Buzuba Bwalubeta buyootola myaka iili cuulu. Jesu nguuya kubweendelezya muzina lya Jehova kali Mwami wa Bwami bwa Leza, pesi takabi alikke pe. Jehova ulasala bamwi akati kabantunsi kuti bakalele alimwi akubeteka antoomwe a Jesu mubuzuba oobu buli myaka iili cuulu. (Amweezyanisye Luka 22:29, 30.) Myaka iitandila ku 4,000 yainda, Jehova wakabamba ntalisyo ya Buzuba Bwalubeta naakapanga cizuminano amubelesi wakwe uusyomeka Abrahamu. (Amubale Matalikilo 22:17, 18.) Kulibonya kuti cizuminano eeco cakatalika kubeleka mu 1943 B.C.E. Mubwini, Abrahamu kwiina naakali kukonzya kumvwisya mbocakali kuyoowujatikizya musyobo wabantu. Pele sunu, tulakonzya kubona kuti kwiinda mububambe bwacizuminano, lunyungu lwa Abrahamu lujisi mulimo waalubazu mukuzuzikizya makanze aa Leza aakubeteka bantu.

4, 5. (a) Ino nguni wakalibonya kuba cibeela cakusaanguna calunyungu lwa Abrahamu, alimwi ncinzi ncaakaamba kujatikizya Bwami? (b) Ndilili bulangizi bwakuba mububambe bwa Bwami nobwakapegwa kubantunsi?

⁴ Cibeela cakusaanguna calunyungu lwa Abrahamu cakalibonya kuba Jesu, iwakananikwa amuuya uusalala mu 29 C.E. akuba Mesiya wakasyomezyegwa, naa Kristo. (Gal. 3:16) Jesu wakali kuyoomana myaka yotatwe acisela kakambauka  makani mabotu aa Bwami kumusyobo waba Juda. Naakaangwa Johane Mubbapatizi, Jesu wakatondezya kuti kuli bantu bamwi bakali kuyooba abulangizi bwakuba mu Bwami naakaamba kuti: “Kuzwa kuciindi ca-Johane Mubapatizi kusikila sunu Bwami bwakujulu bwajatwa canguzu, abalo bakali balabujata cabukali.”—Mt. 11:12.

⁵ Cikkomanisya ncakuti, ndilyonya katanaamba kujatikizya aabo ‘bayoobujata’ Bwami bwakujulu, wakaamba kuti: “Ncobeni ndamwaambila kuti akati kabo bazyedwe kubanakazi tana kuzyalwa mupati kwiinda Johane Mubapatizi, nekubaboobo oyo muniini wamu-Bwami bwakujulu mupati kwiinda nguwe.” (Mt. 11:11) Nkaambo nzi ncaakaambila boobo? Akaambo kakuti bulangizi bwakuba mububambe bwa Bwami taakwe nobwakapegwa kubantu basyomeka kusikila ciindi muuya uusalala nowakatilwa lya Pentekoste 33 C.E. Aciindi eeco, Johane Mubbapatizi wakalifwide kale.—Inc. 2:1-4.

Lunyungu lwa Abrahamu Lwaambwa Kuti Luliluleme

6, 7. (a) Muunzila nzi lunyungu lwa Abrahamu molwakali kunooba mbuli “nyenyeezi zyakujulu”? (b) Ncilongezyo nzi ncaakapegwa Abrahamu, alimwi ncilongezyo nzi cikozyenye ncolwapegwa lunyungu lwakwe?

⁶ Abrahamu wakaambilwa kuti lunyungu lwakwe luyoovwula akuba mbuli “nyenyeezi zyakujulu” alimwi mbuli musee kunkomwe yalwizi. (Matl. 13:16; 22:17) Ooku nkokwaamba kuti kuciindi ca Abrahamu, tiicakali kukonzyeka kumuntunsi kuziba mweelwe wakali kuzooba lunyungu oolu. Pele mukuya kwaciindi, mweelwe wini walunyungu lwakwe lwakumuuya wakazoozibwa. Kunze lya Jesu, mweelwe wakali kuzooba 144,000.—Ciy. 7:4; 14:1.

⁷ Kujatikizya lusyomo lwa Abrahamu, Ijwi lya Leza lyaamba kuti: “[Abrahamu] wakasyoma Jehova, nkabela lusyomo lwakwe lwakeelezegwa mbuli bululami.” (Matl. 15:5, 6) Masimpe, kwiina muntunsi uululeme cakumaninina. (Jak. 3:2) Nokuba boobo, akaambo kalusyomo lupati lwa Abrahamu, Jehova wakamubona kululama alimwi mane akumwaamba kuba mulongwe wakwe. (Is. 41:8) Ibalunyungu lwa Abrahamu lwakumuuya antoomwe a Jesu abalo baambwa kuti baliluleme, icipa kuti babe azilongezyo zipati kwiinda nzyaakapegwa Abrahamu.

8. Ino nzilongezyo nzi nzyobayoopegwa balunyungu lwa Abrahamu?

⁸ Banakristo bananike baambwa kuti baliluleme nkaambo balasyoma mucipaizyo cacinunuzyo ca Jesu. (Rom. 3:24, 28) Mumeso aa Jehova, bakaangununwa kucibi alimwi balakonzya kunanikwa amuuya uusalala kuti babe bana ba Leza, banabakwabo Jesu Kristo. (Joh. 1:12, 13) Balanjila mumulongo mupya akupanga musyobo mupya, wa “bana ba-Israyeli ba-Leza.” (Gal. 6:16; Lk. 22:20) Elo kaka eeci ncoolwe cipati! Akaambo kantaamu eezi nzyaabacitila Leza, Banakristo bananike tabajisi bulangizi bwakuyoopona buumi butamani anyika. Balyaaba kuti batakabi aabulangizi oobu akaambo kalukkomano lwakuba antoomwe a Jesu mu Buzuba Bwalubeta alimwi akulela antoomwe kujulu.—Amubale Ba-Roma 8:17.

9, 10. (a) Ndilili Banakristo nobakatalika kunanikwa amuuya uusalala, alimwi ncinzi cakali kulangilwa kumbele? (b) Ndugwasyo luli buti Banakristo bananike ndobakapegwa?

⁹ Lya Pentekoste 33 C.E., inkamu yabantu  basyomeka yakapegwa coolwe cakuba akati kabaabo ibayoolela antoomwe a Jesu mu Buzuba Bwalubeta. Basikwiiya ba Jesu ibali 120 bakabbapatizigwa amuuya uusalala eelyo bakaba Banakristo bananike bakusaanguna. Nokuba boobo, aaya akali buyo matalikilo aakuyootambula buumi butamani kujulu. Kuzwa ciindi eeci kuyakumbele, bakeelede kusyomeka kuli Jehova nomuba mumasunko ngaakali kunoobaletela Saatani. Bakeelede kusyomeka kusikila kulufwu kutegwa bakatambule musini wabuumi bwakujulu.—Ciy. 2:10.

¹⁰ Akaambo kaceeci, kwiinda mu Jwi lyakwe alimwi amumbungano ya Bunakristo, Jehova wakabapa malailile alimwi akubakulwaizya nkobakali kuyandika Banakristo bananike. Mucikozyanyo, imwaapostolo Paulo wakalembela Banakristo baku Tesalonika kuti: “Twakamucitila umwi aumwi mbuli wisi mbwacitila bana bakwe. Twakali kumukombelezya akumusenengezya akumulungulwida, kuti mweende munzila iielede kumeso aa-Leza iwakamwiitila bulemu bwakwe abwami bwakwe.”—1 Tes. 2:11, 12.

11. Mmakani nzi aalembedwe Jehova ngaakapa “bana-Israyeli ba-Leza”?

¹¹ Nokwakainda myaka yiinda ku 60 kuzwa ciindi bambungano ya Banakristo bananike bakusaanguna nobakasalwa, Jehova wakabona kuti kwakali kuyandika kuyobola makani aamulimo wa Jesu waanyika kubikkilizya mbwaakabeendelezya alimwi alulayo ndwaakabapa Banakristo bananike bamumwaanda wamyaka wakusaanguna. Aboobo Jehova wakayungizya Magwalo aa Banakristo aa Cigiliki ngaakasololela amuuya ku Magwalo aa Cihebrayo aakasololelwa amuuya akaliko kale. Magwalo aa Cihebrayo kusaanguna akalembelwa musyobo wa Israyeli wakumubili ciindi nobakali acilongwe cilibedelede a Leza. Magwalo aa Banakristo aa Cigiliki akalembelwa “bana-Israyeli ba-Leza,” ibananikidwe kuba banabakwabo Kristo alimwi bana ba Leza bakumuuya. Pele eeco tacaambi kuti bantu batali bana Israyeli tabakonzi kujana mpindu mukwiiya Magwalo aa Cihebrayo. Mbubwenya buyo, Banakristo batananikidwe amuuya uusalala balajana mpindu iitakonzyi kweelanizyigwa kwiinda mukwiiya alimwi akupona kweelana amalailile aajanwa mu Magwalo aa Banakristo aa Cigiliki.—Amubale 2 Timoteo 3:15-17.

12. Ino Paulo wakabayeezya nzi Banakristo bananike?

¹² Banakristo bamumwaanda wamyaka wakusaanguna bakaambwa kuti baliluleme alimwi bakananikwa amuuya uusalala kutegwa bakakonzye kutambula lukono lwabo lwakujulu. Pele kunanikwa ooku taakwe nokwakapa kuti babe bami ku Banakristo bananikenyina nobakacili anyika. Kulibonya kuti Banakristo bakusaanguna bamwi bakakaluba aaka kaambo akutalika kuyanda kuba aampuwo iitaluzi mumbungano. Eeci cakapa kuti Paulo abuzye kuti: “Ma! Mwakuta kale sa? Mwaba bavubi kale sa? Mwajana bwami nubeni katutako swebo sa? Nimwajana bwami ncobeni, aswebo nitwaba baaminyokwe.” (1 Kor. 4:8) Aboobo, Paulo wakabayeezya bananike bakuciindi cakwe kuti: “Takweensi kwaamba kuti tulaba abwami kulusyomo lwanu pe, pele tulagwasyanya anywebo kuti mube akukondwa.”—2 Kor. 1:24.

Kuzuzikizya Mweelwe Wakasinsimwa

13. Ino mbuti kusalwa kwabananike mbokwakazumanana kuzwa mu 33 C.E.?

¹³ Tabali boonse Banakristo bananike bali 144,000 bakasalwa mumwaanda wamyaka wakusaanguna. Ikusalwa kwakazumanana kuciindi cabaapostolo, pele mumyaanda yamyaka yakatobela basyoonto bakazoosalwa. Nokuba boobo, kunyina nokwakalekwa, kwakazumanana mane kuzoosika mumazuba eesu. (Mt. 28:20) Mpoonya, kuzwa ciindi Jesu naakatalika kulela mu 1914, zintu zyakatalika kucitika cakufwambaana.

14, 15. Ino ncinzi cacitika mumazuba eesu kujatikizya kusalwa kwabananike?

¹⁴ Kusaanguna, Jesu wakasalazya kujulu kwiinda mukubagusya boonse bakazya bulelo  bwa Leza. (Amubale Ciyubunuzyo 12:10, 12.) Mpoonya, wakatalika kuyobolola basyeede baciinga ca Bwami kutegwa azuzikizye mweelwe wa 144,000. Kusika kuma 1930, mulimo ooyu wakali afwaafwi kumana, alimwi bantu banji ibakali kuuzumina mulumbe wa Bwami taakwe nobakajisi bulangizi bwakuunka kujulu. Muuya taakwe nowakazuminana ambabo kuti bakali bana ba Leza. (Amweezyanisye Ba-Roma 8:16.) Muciindi caboobo, bakaziba kuti bakali ba “mbelele zimwi,” ibajisi bulangizi bwakupona buumi butamani mu Paradaiso anyika. (Joh. 10:16) Aboobo, kuzwa mu 1935 mulimo wakukambauka wakabikkila maanu kukuyobolola ba “inkamu impati,” mbaakabona mwaapostolo Johane mucilengaano ibayoofwutuka “kumapenzi ayo mapati.”—Ciy. 7:9, 10, 14.

¹⁵ Nokuba boobo, mumyaka yainda kuzwa kuma 1930, bantu basyoonto basalwa kuti babe aabulangizi bwakuunka kujulu. Nkaambo nzi? Zimwi ziindi, banjila mubusena bwabamwi bakasalidwe kale mpoonya bakaleka kusyomeka. (Amweezyanisye Ciyubunuzyo 3:16.) Paulo mane wakaamba kujatikizya bamwi mbaakazi ibakaleya kukasimpe. (Flp. 3:17-19) Ino mbaani mbaakali kuyoosala Jehova kutegwa banjile mubusena oobu? Jehova mukamwini nguuzi. Nokuba boobo, cileelela kuti inga wasala bantu basyomeka kwaciindi cili mbocibede mbuli basikwiiya ba Jesu mbaakabandika limwi naakatalisya Ciibalusyo, kutali bantu bapya. *—Lk. 22:28.

16. Kujatikizya bananike, ino ncinzi ncotulumba, alimwi ncinzi ncotukonzya kusinizya calusyomo?

¹⁶ Pele kuboneka kuti tabali boonse basalwa kuzwa kuma 1930 ibanjila mubusena bwabaabo bakaleka kusyomeka. Jehova wabona kuti tweelede kuba a Banakristo bananike ciindi coonse cakumazuba aamamanino aabukkale oobu mane kusikila “Babuloni Mupati” akanyonyoonwe. * (Ciy. 17:5) Alimwi tujisi lusyomo lwakuti mweelwe woonse waba 144,000 uyoozuzikizigwa muciindi Jehova ncabikkide akuti ciyoosika ciindi boonse nobayootalika kulela mu Bwami. Alimwi tulakonzya kulisyoma Ijwi lyabusinsimi lyakuti inkamu mpati iili mukuyungizigwa iyoozumanana kusyomeka kaili mbunga. Ino-ino ‘iyoozwa mumapenzi aayo mapati’ aayoocitikila nyika ya Saatani akunjila munyika mpya ya Leza cakukondwa.

Imfwulumende ya Leza Yakujulu Ilaafwaafwi Kuzulila

17. Kweelana a 1 Ba-Tesalonika 4:15-17 alimwi a Ciyubunuzyo 6:9-11, ino ncinzi cicitika ku Banakristo bananike ibafwa kabasyomeka?

¹⁷ Kuzwa mu 33 C.E., zyuulu-zyuulu zya Banakristo bananike zyatondezya lusyomo luyumu alimwi akuliyumya cakusyomeka kusikila kulufwu. Aaba beelela kale kutambula Bwami  alimwi—kuboneka kuti kuzwa nokwakatalika kubako kwa Kristo—bakatambula bulumbu bwabo bwakujulu.—Amubale 1 Ba-Tesalonika 4:15-17; Ciyubunuzyo 6:9-11.

18. (a) Ino ndusyomo nzi ndobajisi bananike aabo bacipona anyika? (b) Ino mbuti bambelele zimwi mbobababona Banakristonyina bananike?

¹⁸ Ibananike aabo bacipona anyika bajisi lusyomo lwakuti ikuti bazumanana kusyomeka, ino-ino abalo bayootambula bulumbu bwabo bwakujulu. Ituulunzuma twambelele zimwi, nobayeeya lusyomo lwabanyina bananike, balaazumina majwi aamwaapostolo Paulo ngaakaamba kujatikizya bakwesu bananike baku Tesalonika kuti: “Twalilumbaizya aandinywe swebo tobeni mumbungano zyoonse zya-Leza. Tulalumba nkaambo kakukakatila kwanu alusyomo lwanu akati kamafwabi aanu oonse amapenzi ngomupenzegwa. Aya alatondezya kubeteka kwa-Leza kululeme, uuyanda kuti mukeelezegwe mbuli beeledwe Bwami bwa-Leza mbomupengela.” (2 Tes. 1:3-5) Imunanike wamamanino aakufwa, kufwumbwa naa ciyoocitika lili, mfwulumende ya Leza yakujulu iyoozulila. Elo kaka eeci ciyooba ciindi calukkomano—kujulu alimwi aanyika!

Bupanduluzi buyungizidwe

Sena Inga Mwapandulula?

• Ino nkaambo kali buti Leza nkaakamuyubunwida Abrahamu kajatikizya Buzuba Bwalubeta?

• Ino nkaambo nzi Abrahamu ncaakaambwa kuti uliluleme?

• Ino kwaambwa kuti baliluleme balunyungu lwa Abrahamu kusololela kunzi?

• Ino ndusyomo nzi Banakristo boonse ndobajisi?

[Mibuzyo yaciiyo]

[Cifwanikiso icili apeeji 20]

Jesu wakakulwaizya basikumutobela kuti beelele kutambula Bwami

[Cifwanikiso icili apeeji 21]

Lya Pentekoste 33 C.E., Jehova wakatalika kusala bacibeela cabili calunyungu lwa Abrahamu

[Cifwanikiso icili apeeji 23]

Bambelele zimwi balalumba kuti Banakristo bananike bali ambabo mumazuba aakumamanino