Amwiiye Kukulubizya Kwa Bana Israyeli

BANA Israyeli bakalicizi eeco Jehova ncaakali kuyanda kuti bacite nobakali kunjila mu Nyika Yakasyomezegwa. Kwiinda muli Musa, Leza wakalailide kuti: “Muleelede kutanda bantu boonse bakede munyika, kunyonyoona mabwe aazikozyano aabo oonse akunyonyoona zikozyano zyabo zifulidwe zyoonse, akumwaya zyoonse zipaililo zyabo zyakuzilundu.”—My. 33:52.

Bana Israyeli tiibakeelede kupangana zizuminano abantu bakali kukkala munyika eeyo, nokuba kukwatana abantu aabo. (Dt. 7:2, 3) Ee, bantu ba Leza basalidwe bakacenjezedwe kuti: “Cenjela! Utatangi cizuminano abantu bakede munyika eyo nkoyoosika, kuti makani atamubedi kakole.” (Kul. 34:12) Pele bana Israyeli tiibakamumvwida Leza, aboobo bakacegwa mukakole. Ino ncinzi cakabapa kuwa? Nziiyo nzi zyakucenjezya nzyotwiiya kuzintu nzyobakacita azyakabacitikila?—1 Kor. 10:11.

Kuyanzana Kwakasololela Kukukomba Mituni

Nobakali kukona Nyika Yakasyomezegwa, bana Israyeli kumatalikilo bakabazunda bantu bakali kukkala munyika eeyo. Nokuba boobo, bana ba Israyeli tiibakaitobela milawo ya Leza cakumaninina. Tiibakabatanda basinkondonyina boonse. (Bab. 1:1–2:10) Muciindi caboobo, bana Israyeli nobakatalika kukkala akati ‘kamisyobo iili musanu aibili’ yakali mubusena oobo, ikuyanzana lyoonse abantu bamisyobo eeyo kwakatalisya zilongwe ambabo. (Dt. 7:1) Ino eeci cakabajatikizya buti bana Israyeli? Ibbaibbele lyaamba kuti: “Bana babo basimbi bakali kubakwata, abasimbi babo beni bakali kubakwatanya abalombe babo, alimwi bakali kukomba mizimu yabo. Elyo bana ba-Israyeli bakacita bubi mumeso aa-Jehova, bakaluba Jehova Leza wabo akukomba Babaala azifanikisyo.” (Bab. 3:5-7) Kubana Israyeli, kuyanzana abantu bamunyika eeyo kwakabapa kukwatana ambabo alimwi akukomba mituni mbuli mbabo.  Tiikwakacili kulangilwa alimwi kuti bana Israyeli bakali kuyoobatanda bantu aabo batakombi Leza munyika akaambo kazikwati zyakacitika. Bukombi bwini-bwini bwakasofwaazigwa, alimwi bana Israyeli lwabo beni bakatalika kukomba baleza bakubeja.

Akaambo kakuti bantu bakali kukkala mu Nyika Yakasyomezegwa lino bakaba balongwe babo, bana Israyeli bakaindila kuba muntenda kwiinda leelyo bantu aabo nobakali basinkondonyina. Amulange-lange nzila imbi ikusofwaala kwabukombi mbokweelede kuti mbokwakacitika.

Bulimi Bwakasololela Kukukomba Baala

Nobakanjila mu Nyika Yakasyomezegwa, bana ba Israyeli tiibakacili basimutuntuli, ibanji bakaba balimi. Nzila nzyobakabelesya kulima zilangilwa kuti zyakalikozyenye azyabantu mbobakatanda. Kulibonya kuti bana Israyeli bakacita azimbi kunze lyakutobela buyo nzila zyabulimi zyabana Kanana. Ikuyanzana abantu aabo kwakoongelezya bana Israyeli kutobela bukombi bwabo buswaangene abulimi.

Bana Kanana bakali kukomba ba Baala banji—baleza bakali kusyomwa kuti mbabapa kuti nyika ibe ambolezi kapati. Kunze buyo lyakulima nyika akutebula, mukuya kwaciindi bana Israyeli bakasangana amukukomba baleza bana Kanana ibakali kuyeeyelwa kuti mbabapa kooloka. Aboobo banji mu Israyeli bakalicengeezya kuti bakali kukomba Jehova, pele mubwini bakali kutola lubazu mululeyo lupati.

Kucenjezya Kupati Kulindiswe Sunu

Kulangilwa kuti bana Israyeli kunyina nobakajisi makanze aali oonse aakukomba Baala alimwi akucita zintu zisesemya ciindi cakusaanguna nobakatalika kukkala abantu bamu Nyika Yakasyomezegwa. Pele kuyanzana abantu aabo kwakabapa kucita zintu eezyo zibyaabi. Ncimwi buyo andiswe, tuyoojana mapenzi mapati ikuti twayanzana abantu ibali kabotu pele ibatakombi Leza ngotukomba alimwi ibatatobeli zyeelelo anjiisyo zya Bunakristo nzyotutobela. Ee, kuli ziindi notuyanzana abantu batasyomi nzyotusyoma mbuli kumilimo, kucikolo naaba amunzi. Nokuba boobo, icakacitikila bana Israyeli citucenjezya kuti ikuyanzana kuli boobo kuletela mapenzi. Ibbaibbele lyaamba kasimpe aaka nkotutakonzyi kweeleba kakuti: “Mweenda abamineme, anywebo mulaminama.”—1 Kor. 15:33.

Mazuba aano, tujisi masunko manji aakozyenye ayaayo aakacitikila bana Israyeli. Bantu bamazuba aano abalo bajisi baleza babo banji. Babikkilizya mali, bantu baatala muzintu zyakulikondelezya, basimpuwo muzisobano, zibeela zyatwaambo twacisi, basololi bazikombelo bamwi alimwi mane abanamukwasyi. Cimwi akati kazeezi cilakonzya kuba ncecintu ncotubikkila maanu kapati mubuumi. Ikuba azilongwe abantu batamuyandi Jehova kulakonzya kutunyonyweeda cilongwe cesu a Leza.

Koonana kutaluzi cakali cibeela cipati mubukombi bwa Baala kwalo ikwakakwelelezya akoongelezya bana Israyeli banji. Tukole twamusyobo ooyu tuciboongelezya bamwi akati kabantu ba Leza. Mucikozyanyo, inzila iitakatazyi yakubelesya kkompyuta muŋanda ilakonzya kupa kuti muntu atalike kulangilila zintu zikonzya kusofwaazya manjezeezya aakwe mabotu. Elo ncibi kapati kaka ikuti Munakristo woongelezegwa akulangilila zifwoto naa kubala makani aabusya muzeezo wakoonana aakkompyuta!

“Bali Acoolwe Babamba Imbeta Zyakwe”

Aumwi weelede kulisalila kumvwida Jehova naa pe mumakani aakusala bantu mbayanzana ambabo. (Dt. 30:19, 20) Aboobo tweelede kulibuzya kuti: ‘Mbaani mbondiyanzana limwi nondilyookezya? Ino zyeelelo zya Leza bazibona buti alimwi sena balazitobela? Sena bakomba Jehova? Sena kuyanzana ambabo inga kwandipa kuba Munakristo mubotu?’

Sintembauzyo wakaimba kuti: “Bali acoolwe baluleme munzila, beenda mumulao wa-Jehova. Bali acoolwe babamba imbeta zyakwe, bamuyandaula camoyo woonse.” (Int. 119:1, 2) Masimpe, “ngusicoolwe uuyoowa Jehova, uuenda munzila zyakwe.” (Int. 128:1) Caboola kumakani aakusala balongwe besu, atwiiye kukulubizya kwabana Israyeli akumvwida ncaamba Jehova cakumaninina.—Tus. 13:20.

[Cifwanikiso icili apeeji 26]

Kuyanzana abantu batamuyandi Jehova inga kwatupa kukomba mituni