Jehova Ulamvwa Notukwiila Kulomba Kugwasyigwa

“Meso aa-Jehova alalangisya baluleme, amatwi aakwe alaswiilila kukwiila kwabo.”—INT. 34:15.

1, 2. (a) Ino bantu banji mazuba aano balimvwa buti? (b) Ino nkaambo nzi ncotutagambwi kujatikizya eeci?

SENA mujisi mapenzi? Ikuti naa kacili boobo, tamuli nyolike pe. Tuulunzuma twabantu balasoleka kuliyumya mumapenzi aamubuumi bwabuzuba abuzuba aaletwa abukkale oobu bubyaabi. Kuli bamwi, cilibonya mbuli kuti tabakonzi kuliyumya. Balimvwa mbubwenya mbuli mbwaakalimvwa sintembauzyo Davida, wakalemba kuti: “Ndafwa cinywe, ndatyolaulwa; ndatongela nkaambo kakupilingana kwamumoyo wangu. Moyo wangu uladuntaana, inguzu zyandimanina, awalo mumuni wameso aangu wandisia.”—Int. 38:8, 10.

² Mbotuli Banakristo, tatugambwi amapenzi aatucitikila mubuumi. Tulizi kuti “mapenzi” ncimwi cacitondezyo cakasinsimwa cijatikizya kubako kwa Jesu. (Mk. 13:8; Mt. 24:3) Bbala lya Cigiliki aawa lisandulwidwe kuti “cimyonzi” lilakonzya kwaamba ntenda naa mapenzi aali oonse. Elo kaka lilaapandulula cakulomya mbwaali mapati mapenzi aacitikila bantu muziindi zino “zikataazya” naa “ziyoosya”!—2 Tim. 3:1; BT.

Jehova Ulaazi Mapenzi Eesu

3. Ino ncinzi bantu ba Leza ncobazi?

³ Bantu ba Jehova balizi kuti mapenzi aaya alabajatikizya abalo, alimwi kulangilwa kuti bukkale buyooindila buya kubija. Kunze lyazintu eezyo zicitikila bantu boonse, swebo mbotuli babelesi ba Leza tulalwanwa ‘asinkondoma, Diabolosi,’ walo uukanzide kutunyonyweeda lusyomo lwesu. (1 Pet. 5:8) Elo kaka cilauba-uba kulimvwa mbwaakalimvwa Davida naakati: “Kukusampaulwa moyo wangu walenda; ndawizauka loko. Ndakalangila basikundifwida buuya, pele katakwe; abasikunduumbulizya, pele tabajaniki”!—Int. 69:20.

4. Ino ncinzi cituumbulizya ciindi notucitikilwa mapenzi?

⁴ Sena Davida wakali kupandulula kuti kunyina bulangizi buli boonse mbwaakajisi? Peepe. Amubone majwi ngaakaamba muntembauzyo eeyo naakati: “Nkaambo Jehova ulaswiilila bacete; tasampauli baange bakwe” naa kuti ‘bantu bakwe baangidwe.’ (Int. 69:33) Toonse buyo, ziindi zimwi inga twalimvwa mbuli kuti tulaangidwe mubuzike bwamapenzi aatucitikila. Cilakonzya kulibonya kuti bamwi tabaazi kabotu mapenzi aatucitikila—alimwi ambweni tabaazi ncobeni. Pele mbubwenya mbuli Davida, tulakonzya kuumbulizigwa kwiinda mukuziba kuti Jehova ulaazi kabotu-kabotu mapenzi aatucitikila.—Int. 34:15.

5. Ino ncinzi Mwami Solomoni ncaakasinizyide?

⁵ Solomoni mwana wa Davida wakakakankaizya kaambo aaka ciindi nolyakali kwaabwa tempele ku Jerusalemu. (Amubale 2 Makani 6:29-31.) Wakakombelezya Jehova kuswiilila mupailo wamuntu mubombe moyo aumwi ngwaakali kupaila kuli nguwe kujatikizya “mapenzi aamumoyo wakwe.” Ino Leza wakali kuyoocita nzi kumipailo yabantu aaba bapengede? Solomoni wakaamba majwi aakwe aakusinizya kuti Leza tanaakali kuyooswiilila buyo mipailo yabo pele alimwi wakali kuyoobagwasya. Ino nkaambo nzi? Nkaambo ulizi kabotu-kabotu zili “[mu]myoyo yabantu boonse baansi.”

6. Mbuti mbotukonzya kuliyumya kukulibilika, alimwi ino nkaambo nzi?

⁶ Mbubwenya buyo, andiswe tulakonzya kupaila kuli Jehova kujatikizya ‘mapenzi aamumoyo wesu,’ mapenzi aatucitikila aumwi kumugama.  Tweelede kuumbulizigwa kuziba kuti ulaazi mapenzi eesu alimwi akuti ulatulanganya. Mwaapostolo Petro wakakasinizya kaambo aaka naakati: “Makataazyo aanu oonse amwaasowele kumaanza aakwe, nkaambo nguumucebuka lyoonse.” (1 Pet. 5:7) Jehova ulabikkila maanu ncobeni kujatikizya zitucitikila. Jesu wakakankaizya kulanganya caluyando nkwacita Jehova naakati: “Sa tuyuni tobile tatuulwi kobili? Nekubaboobo taakwe nikaba komwe akati kantuto kawida ansi atazumina Usowanu. Anywebo aalo masusu aali amitwe yanu alibalidwe oonse. Nkaambo kaako mutayoowi, mulayandika kwiinda tuyuni tunji.”—Mt. 10:29-31.

Amusyome Kuti Jehova Uyoomugwasya

7. Ino ndugwasyo nzi ndotusyomezyegwa?

⁷ Tulakonzya kusyoma cakumaninina kuti Jehova ulilibambilide alimwi ulakonzya kutugwasya ciindi notucitikilwa mapenzi. “Leza macijilo esu anguzu zyesu, mugwasyi loko mumapenzi.” (Int. 34:15-18; 46:1) Ino mbuti Leza mbwagwasya? Amubone lugwalo lwa 1 Ba-Korinto 10:13 ncolwaamba: “Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.” Jehova ulakonzya kweenzya zintu munzila imwi kutegwa agwisye mapenzi eesu, naa ulakonzya kutupa nguzu zyakukakatila mumapenzi aayo. Jehova uyootugwasya munzila iili yoonse.

8. Mbuti mbotukonzya kulubelesya lugwasyo lwa Leza?

⁸ Mbuti mbotukonzya kulubelesya lugwasyo oolo? Amubone ncotulaililwa kucita: “Makataazyo aanu oonse amwaasowele kumaanza aakwe.” Eeci cipandulula kuti tutwika Jehova munzila yacikozyanyo mukuli wazintu nzyotulibilika. Tulasola kuleka kulibilika alimwi tulamusyoma cakukkazika moyo kuti uyootupa nzyotuyandika. (Mt. 6:25-32) Kuba alusyomo lwamusyobo ooyu kuyandika kulibombya, kutali kusyoma nguzu zyesu naa maanu eesu tobeni. Kwiinda mukulibombya “kujanza lya-Leza lyanguzu,” tulaciziba ciimo ncotujisi. (Amubale 1 Petro 5:6.) Mpoonya eeci ciyootugwasya kukakatila kupenzi lili lyoonse Leza ndyakonzya kuzumizya kucitika. Inga twayandisisya kugwasyigwa cakufwambaana, pele tusyoma kuti Jehova ulizi ciindi cini-cini nayelede alimwi ambwakonzya kutugwasya.—Int. 54:7; Is. 41:10.

9. Ino ndipenzi nzi Davida ndyaakeelede kubikka mumaanza aa Jehova?

⁹ Amuyeeya majwi ngaakaamba Davida aalembedwe ku Intembauzyo 55:22 kuti: “Bika makani aako oonse mumaanza aa-Jehova, lino ulakutabilila; lyoonse takooyoozuminina baluleme kuwida mumapenzi.” Davida naakalemba majwi aayo, wakali tyompedwe kapati. (Int. 55:4) Cilibonya kuti intembauzyo eeyi yakalembwa ciindi mwana wakwe Abisalomu naakakanza cakusisikizya kuti amunyange bwami. Sikupa lulayo kuli Davida wakali kusyomeka wazina lya Ahitofeli wakasangana mumakanze aaya. Davida wakatija kuzwa mu Jerusalemu kutegwa alivwune. (2 Sam. 15:12-14) Nomuba mubukkale oobu butyompya, Davida wakazumanana kusyoma muli Leza, alimwi kunyina naakalekelezyegwa pe.

10. Ino ncinzi ncotweelede kucita ciindi notucitikilwa mapenzi?

¹⁰ Mbubwenya mbuli Davida, cilayandika kapati kuti tubandike a Jehova mumupailo kujatikizya mapenzi aali oonse ngotucitikilwa. Atulange-lange mwaapostolo Paulo ncaakatukulwaizya kuti tucite kujatikizya makani aaya. (Amubale Ba-Filipi 4:6, 7.) Ino ncinzi ciyootobela akaambo kakupaila ooku kuzwa kunsi aamoyo? “Luumuno lwa-Leza lwiinda miyeeyo yoonse yabantu  luyooyaminina myoyo [yesu] amiyeeyo [yesu] muli-Kristo Jesu.”

11. Ino mbuti “luumuno lwa-Leza” mbolukwabilila myoyo yesu alimwi amanjezeezya eesu?

¹¹ Sena kupaila kuyoopa kuti bukkale bwanu bucince? Cilakonzyeka kuti buyoocinca. Aboobo, tweelede kuyeeya kuti talili lyoonse Jehova naingula mipailo yesu munzila njotuyanda. Nokuba boobo, mupailo ulatugwasya kukkazika mizeezo yesu kutegwa mapenzi ngotujisi atatutyompyi. “Luumuno lwa-Leza” lulakonzya kutuumbulizya ciindi notuminidwe akaambo kakulimvwa kutyompwa. Mbubwenya mbuli nkamu yabasikalumamba bapedwe mulimo wakukwabilila cisi kukusaalwa calunya, “luumuno lwa-Leza” luyookwabilila myoyo yesu alimwi amanjezeezya eesu. Alimwi luyootupa kuleka kuzumbauzya, kuyoowa akutyompwa alimwi luyootukwabilila kutacita zintu cakubindaana acakubula maanu.—Int. 145:18.

12. Amupandulule muntu mbwakonzya kuliiba mumizeezo.

¹² Ino mbuti mbotukonzya kuliiba mumizeezo ciindi notuli mumapenzi? Amulange-lange cikozyanyo calo munzila imwi cipandulula bukkale bwesu. Mubelesi umwi ulakonzya kabelesyegwa amupati wamulimo silunya. Nokuba boobo, mubelesi ulakonzya kwaamba mbwalimvwa kuli mukamwini kkampani, walo uujisi luse alimwi muntu mubombe. Mukamwini kkampani wasyomezya mubelesi ooyu kuti ulizibwene zicitika alimwi akumwaambila kuti mupati wamulimo ooyu ulaafwaafwi kugwisyigwa acuuno mpabede. Ino eeci cimupa kulimvwa buti mubelesi ooyu? Kusyoma cisyomezyo eeco alimwi akuziba ciyanda kucitika ciyoomuyumya-yumya kuti azumanane kubeleka nokuba kuti ucicitikilwa mapenzi aambi muciindi eeco. Mbubwenya buyo, tulizi kuti Jehova ulizizi zitucitikila, alimwi utusyomezya kuti lino-lino “mwami wenyika ino uyootandwa.” (Joh. 12:31) Elo kaka eeco cilaumbulizya kapati!

13. Kunze buyo lyakupaila, ino ncinzi acimwi ncotweelede kucita?

¹³ Nokuba boobo, sena kwaamba mapenzi eesu kuli Jehova mumupailo nkokuyandika kulikke? Peepe. Nzinji ziyandika. Tweelede kubweza ntaamu kweelana amipailo yesu. Mwami Saulo naakatuma balombwana kumunzi wa Davida kuti bakamujaye, Davida wakapaila kuti: “Undivune kulibasinkondoma, O Leza wangu, unditabilile kulibaabo bandibusizya inkondo. Undivune kulibasizibi, undifutule kulibasimalowa.” (Int. 59:1, 2) Kunze buyo lyakupaila, Davida wakaswiilila zyakaamba mukaintu wakwe alimwi akubweza ntaamu yakali kuyandika yakutija. (1 Sam. 19:11, 12) Mbubwenya buyo, tulakonzya kulomba busongo kuti butugwasye kukakatila alimwi ambweni akupa kuti bukkale bwesu bwamapenzi bubote.—Jak. 1:5.

Mbotukonzya Kujana Nguzu Kutegwa Tuliyumye

14. Ino ncinzi cikonzya kutugwasya kutegwa tukakatile notucitikilwa mapenzi?

¹⁴ Mapenzi aatucitikila inga taakonzyi kugwisigwa mpoonya-mpoonya. Ambweni inga azumanana kwaciindi cili mbocibede. Ikuti naa kacili boobo, ino ncinzi ciyootugwasya kukakatila? Kusaanguna, kamuyeeya kuti notuzumanana kubelekela Jehova cakusyomeka nokuba kuti tuli mumapenzi, tutondezya kuti tulamuyanda. (Inc. 14:22) Kamukayeeya kaambo kakutamikizya nkaakaamba Saatani kujatikizya Jobu kakuti: “Taakwe kaambo sena Jobu nkalemekela Leza? Teewakamuyakilide kabotu, walo abaŋanda bakwe azyoonse nzyajisi? Wakamukupusya mumulimo wakwe, alimwi matanga aakwe avula munyika. Pele, kuti kotambika janza lyako akuguma ncajisi uzookusinga kubusyu bwako!” (Job. 1:9-11) Kwiinda mukusyomeka kwakwe, Jobu wakatondezya kuti kutamikizya ooku nkubeja kwaantangalala. Kwiinda mukukakatila notuli  mumapenzi, andiswe tulakonzya kutondezya kuti Saatani mmubeji. Mpoonya kukakatila kwesu kuyooyumya-yumya bulangizi alusyomo lwesu.—Jak. 1:4.

15. Ino nzikozyanyo nzi zikonzya kutuyumya-yumya?

¹⁵ Cabili, kamuyeeya kuti “mapenzi aya ngaonya alasikila kubunyina bwanu bwakumasi oonse.” (1 Pet. 5:9) Ee, “taakwe lutepauzyo lumusikila cita mbuli matepauzyo ngibajana bantu lyoonse.” (1 Kor. 10:13) Aboobo, mulakonzya kuyumizigwa alimwi akukulwaizigwa kwiinda mukuzinzibala kuyeeya zikozyanyo zyabamwi muciindi cakubikkila maanu kumapenzi eesu tobeni. (1 Tes. 1:5-7; Heb. 12:1) Amujane ciindi cakuyeeya zikozyanyo zyabaabo mbomuzi bakakatila cakusyomeka nokuba kuti bakali mumapenzi mapati. Sena mwakavwuntauzya zyakuluula zyamubuumi zyakamwaigwa kutegwa mujane makani aabaabo bakacitikilwa cintu cikozyenye acimucitikila? Zyakuluula eezi ziyoomuyumya-yumya kapati.

16. Ino Leza utuyumya-yumya buti ciindi notucitikilwa masunko aindene-indene?

¹⁶ Catatu, kamuyeeya kuti Jehova ngu “Taateesu siluzyalo, Leza siluumbulizyo loonse. Nguwe uutuumbulizya mumapenzi esu oonse, kuti tukakonzye kuumbulizya boonse bapengede kuluumbulizyo olo ndulonya ndutuumbulizizigwa tubeni kuli-Leza.” (2 Kor. 1:3, 4) Cili buyo mbuli kuti Jehova uliimvwi kulubazu lwesu kutegwa atukulwaizye alimwi akutuyumya-yumya, kutaamba buyo mumapenzi aatucitikila cino ciindi pele “mumapenzi esu oonse.” Mpoonya eeci cilatugwasya kuumbulizya bamwi ‘bali mumapenzi aali oonse.’ Paulo lwakwe mwini wakaabona mbwaali aamasimpe majwi aaya.—2 Kor. 4:8, 9; 11:23-27.

17. Mbuti Bbaibbele mbolikonzya kutugwasya kulanganya mapenzi aamubuumi?

¹⁷ Cane, tujisi Jwi lya Leza Bbaibbele lyalo “likondede kukufundisya akukulaya, akukuolola akukupandulula makani aabululami, kuti muna-Leza alibambe, azulile kukumana milimo mibotu yoonse.” (2 Tim. 3:16, 17) Jwi lya Leza talipi buyo kuti ‘tulibambe’ pele alimwi lipa kuti ‘tuzulile kukumana milimo mibotu yoonse.’ Alimwi lilatugwasya kulanganya mapenzi aamubuumi. Litupa kuti ‘tulibambe cakumaninina’ alimwi ‘akuzulila cakumaninina.’ Bbala lya Cigiliki lyakuti ‘kuzulila cakumaninina’ lyaamba “kweelela kapati.” Kulangilwa kuti bbala eeli lyakali kubelesyegwa mazuba aansiku kujatikizya bwaato bwakajisi zintu zyoonse ziyandika mulweendo naa kujatikizya muncini wakali kukonzya kubeleka mulimo uuli woonse ngowakali kuyeeyelwa. Mbubwenya buyo, Jehova kwiinda mu Jwi lyakwe ulatupa zintu zyoonse nzyotuyandika kutegwa tucikonzye kulanganya cintu cili coonse cikonzya kutucitikila. Cakweelela, tulakonzya kaamba kuti: “Ikuti Leza wazumizya penzi limwi, ndilakonzya kuliyumya cakuzwidilila kwiinda mukugwasyigwa anguwe.”

 Lufwutuko Kuzwa Kumapenzi Eesu Oonse

18. Nkubikkila maanu kucintu nzi kuyootugwasya kuti tukakatile cakusyomeka?

¹⁸ Casanu, kamubikkila maanu lyoonse kukasimpe kabotu kakuti lino-lino Jehova uyoonununa bantu kuzwa kumapenzi oonse. (Int. 34:19; 37:9-11; 2 Pet. 2:9) Kumamanino, kufwutulwa a Leza takukapandululi buyo kufwutulwa kuzwa kumapenzi aatucitikila mazuba aano pele alimwi ciyoopa kuti tucikonzye kuba abuumi butamani, tacikwe makani naa nkuujulu antoomwe a Jesu naa muparadaiso anyika.

19. Ino mbuti kukakatila cakusyomeka mbokukonzyeka?

¹⁹ Kusikila mane cikasike ciindi eeco, tulazumanana kulanganya bukkale bupenzya bwanyika eeyi mbyaabi. Elo kaka tulacilangila kapati ciindi eeco zintu eezi nozitakabiwo limbi! (Int. 55:6-8) Tutalubi kuti kukakatila kwesu cakusyomeka kutondezya kuti Diabolosi mmubeji. Atuyumizigwe kumipailo yesu alimwi abunyina bwesu bwa Bunakristo, katuyeeya kuti bakwesu abalo balacitikilwa zintu mbubwenya mbuli zitucitikila. Atuzumanane kulibamba cakumaninina alimwi akuzulila cakumaninina kwiinda mukubelesya Jwi lya Leza. Mutalekeli kuti lusyomo lwanu mukulanganya caluyando nkwacita “Leza siluumbulizyo loonse” lumane. Kamuyeeya kuti “meso aa-Jehova alalangisya baluleme, amatwi aakwe alaswiilila kukwiila kwabo.”—Int. 34:15.

Sena Inga Mwaingula?

• Ino Davida wakalimvwa buti kujatikizya mapenzi ngaakacitikilwa?

• Ino ndusyomo luli buti Mwami Solomoni ndwaakatondezya?

• Ino Ncinzi cikonzya kutugwasya kukakatila kuzintu nzyazumizya Jehova?

[Mibuzyo yaciiyo]

[Cifwanikiso icili apeeji 13]

Solomoni wakajisi lusyomo lwakuti Jehova wakali kuyoobagwasya bantu Bakwe bapengede

[Cifwanikiso icili apeeji 15]

Davida wakabikka mapenzi aakwe mumaanza aa Jehova mumupailo alimwi wakabweza ntaamu kujatikizya ncaakali kupailila