Twaambo Tugwasya Mubbuku lya Ba-Roma
Ijwi lya Jehova Lili Abuumi
Twaambo Tugwasya Mubbuku lya Ba-Roma
KUTANDILA mu 56 C.E., kali mulweendo lwatatu lwabumisyinali, mwaapostolo Paulo wasika mumunzi wa Korinto. Wazyiba kwiindana kuliko kweelana ambobazibona zyintu Banakristo ba Juda alimwi a Banakristo Bamasi mumunzi wa Roma. Kayanda kubakamantanya boonse muli Kristo, Paulo wabalembela lugwalo kubagwasya kuti bamane mazwanga akati kabo.
Mulugwalo oolu ndwaakalembela bana Roma, Paulo upandulula bantu mbobaambwa kuti baliluleme alimwi ambobeelede kupona bantu aaba. Lugwalo oolu luyungizya luzyibo lwesu kuli Leza alimwi aku Jwi lyakwe, lukankaizya luzyalo lwa Leza alimwi akulemeka mulimo ngwajisi Kristo mulufwutuko lwesu.—Heb. 4:12.
BALALULAMIKWA—MUNZILA NZI?
Paulo ulemba kuti: “Boonse babisya akulela kubulemu bwa-Leza, pele balalulamikwa buyo kuluzyalo [lwa Leza] kubununu bwamuli-Jesu Kristo.” Alimwi waamba kuti: “Kulusyomo nkwalulamikwa muntu, teensi kumilimo ya-Mulao pe.” (Rom. 3:23, 24, 28) Kwiinda mukuba alusyomo “kubululami bwamuntu omwe,” Banakristo bananike alimwi abaciinga “[ca]nkamu impati” iba “mbelele zimwi” balakonzya ‘kululamikwa’—Banakristo bananike kubuumi bwakujulu kabali basikulelanyina a Kristo alimwi bankamu mpati kabali balongwe ba Leza, kabajisi bulangizi bwakuyoofwutuka “kumapenzi ayo mapati.”—Rom. 5:18; Ciy. 7:9, 14; Joh. 10:16; Jak. 2:21-24; Mt. 25:46.
Paulo ubuzya kuti: “Sa tucite zibi, nkaambo kakuti tatuli kunsi ku-Mulao anukuti tuli kunsi kuluzyalo?” Wiingula kuti: “Ne!” Eelyo upandulula kuti: “Muli bazike . . . , nikuba zibi zileta lufu, nikuba luswiililo luleta bululami.” (Rom. 6:15, 16) Mpoonya waamba kuti: “Kuti kamujazya Muuya milimo yanyama, mulapona.”—Rom. 8:13.
Kwiingula Mibuzyo Yamu Magwalo:
1:24-32—Sena kutalilemeka kupandululwa aawa kwakali kwaamba ba Juda naa Bamasi? Nokuba kuti bupanduluzi bulakonzya kwaamba nkamu iili yoonse akati kazeezi zyobilo, Paulo cacigaminina wakali kwaamba bana Israyeli bakazanga kwamyaanda yamyaka. Nokuba kuti bakaluuzyi mulawo wa Leza uululeme, taakwe nobakayeeya “kuba a-Leza muluzibo lwabo.” Aboobo, bakajisi mulandu.
3:24, 25—Ino mbuti ‘cinunuzyo cakabbadelwa a Kristo Jesu’ mbocakali kukonzya kumanya “zibi ezyo izyakacitwa kalekale” cinunuzyo kacitana kubbadelwa? Businsimi bwakusaanguna bujatikizya Mesiya ibwakalembwa kuli Matalikilo 3:15, bwakazuzikizyigwa mu 33 C.E. ciindi Jesu naakajaigwa acisamu cakupenzyezya. (Gal. 3:13, 16) Nokuba boobo, ciindi Jehova naakaamba businsimi oobu, wakali kubona mbuli kuti muulo wacinunuzyo wabbadelwa kale, nkaambo kunyina cikonzya kumukasya kuzuzikizya makanze aakwe. Aboobo kujatikizya cinunuzyo ca Jesu Kristo cakumbele, Jehova wakali kukonzya kulekelela zibi zyabana ba Adamu aabo bakajisi lusyomo mucisyomezyo eeco. Alimwi cinunuzyo cipa kuti aabo bakafwa kabutanatalika Bunakristo bakabusyigwe.—Inc. 24:15.
6:3-5—Ino ncinzi cipandululwa kwiinda mukubbapatizigwa muli Jesu Kristo alimwi akubbapatizigwa mulufwu lwakwe? Jehova nananika basikutobela Kristo amuuya uusalala, balakamantana a Jesu alimwi balaba cibeela cambungano ya Banakristo bananike, yalo iili mubili wa Kristo walo uuli ngo Silutwe wayo. (1 Kor. 12:12, 13, 27; Kol. 1:18) Eeci ncocipandulula kubbapatizigwa muli Jesu Kristo. Alimwi Banakristo bananike ‘balabbapatizigwa mulufwu lwa Kristo’ munzila yakuti bapona buumi bwakulyaaba alimwi tabacijisi bulangizi bwakupona buumi butamani anyika. Aboobo, lufwu lwabo ndwakulyaaba mbubwenya mbolwakabede lufwu lwa Jesu, nokuba kuti lufwu lwabo talukonzyi kunununa. Lubbapatizyo oolu mulufwu lwa Kristo lulamanizyigwa ciindi nobafwa akubusyigwa kubuumi bwakujulu.
7:8-11—Ino mbuti ‘zibi mbozyakaba aciindi ceelede cakubelesya mulawo’? Mulawo wakabagwasya bantu kuzyiba mbocakabede cibi coonse, kubapa kuti bazyibe kuti mbaasizibi. Aboobo, bakalibona kuti mbaasizibi munzila zinji, alimwi bantu banji bakazyiba kuti bakali basizibi kwiinda mbobakalikuzyi kusaanguna. Aboobo cilakonzya kwaambwa kuti zibi zyakabelesya Mulawo.
Ziiyo Kulindiswe:
1:14, 15. Tujisi twaambo tunji tweelede kutupa kukambauka makani mabotu cabusungu. Kamwi akati katootu nkakuti tujisi ceelelo naa mukuli wakubagwasya bantu bakaulwa abulowa bwa Jesu kuti babe acilongwe cibotu a Leza.
1:18-20. Bantu bataluleme tabakwe bulekelele, nkaambo bube bwa Leza butalalibonyi bulalibonya muzyintu nzyaakalenga.
2:28; 3:1, 2; 7:6, 7. Naakamana kwaamba majwi aakali kuboneka kuti asampaula ba Juda, Paulo waamba twaambo tubotya majwi ngaakaamba. Eeci ncikozyanyo cibotu ncotweelede kutobela cijatikizya mbotweelede kutubamba cabupampu twaambo ootu tukonzya kuleta mazwanga.
3:4. Ciindi zyaamba muntu nozikazyanya ancolyaamba Jwi lya Leza, tupa kuti “Leza abe musyomesi” kwiinda mukusyoma mulumbe wamu Bbaibbele alimwi akucita kweelana akuyanda kwa Leza. Kwiinda mukutola lubazu cabusungu mumulimo wakukambauka Bwami alimwi akugwasya bantu kuba basikwiiya, tulakonzya kugwasya bantu kubona kuti Leza ulasyomeka.
4:9-12. Lusyomo lwa Abrahamu lwakeelezegwa mbuli bululami kwamyaka minji katana kupalulwa ciindi naakajisi myaka yakuzyalwa iili 99. (Matl. 12:4; 15:6; 16:3; 17:1, 9, 10) Kwiinda mukweeleka lusyomo lwa Abrahamu mbuli bululami, Leza wakatondezya cakusalazya cipa kuti cikonzyeke kumuntu kwaambwa kuti uliluleme kulinguwe.
4:18. Bulangizi ncibeela calusyomo ciyandika kapati. Lusyomo lwesu luyeeme abulangizi.—Heb. 11:1.
5:18, 19. Paulo ulapandulula mumajwi aatakatazyi kumvwa alimwi masyoonto Jesu mbwakozyenye a Adamu, alimwi munzila eeyi Paulo cakusalazya alimwi cakufwiimpya upandulula muntu omwe mbwakonzya “kwaaba buumi bwakwe, bube cinunuzyo cabanji.” (Mt. 20:28) Tweelede kwiiya cikozyanyo eeci cakuyiisya cakusalazya alimwi munzila mfwaafwi.—1 Kor. 4:17.
7:23. Zizyo zyamubili mbuli maanza, maulu, alimwi amulaka zilakonzya kutupa ‘kuba baange bamulawo wazibi,’ aboobo tweelede kuzibelesya kabotu.
8:26, 27. Ciindi notuli mubukkale bukatazya kapati cakunga tatuzyi mbotweelede kupaila, “Muuya mwini ulatukombelezezya.” Mpoonya Jehova, ‘Sikuswiilila zikombyo,’ ulaitambula mipailo yeelela iilembedwe mu Jwi lyakwe kaiboneka mbuli kuti izwa kulindiswe.—Int. 65:2.
8:38, 39. Mapenzi, zilenge zyamyuuya mibi, alimwi amfwulumende zyeendelezyegwa abantu tazikonzyi kupa Jehova kuti aleke kutuyanda; notuba ndiswe tazyeelede kutupa kuleka kumuyanda.
9:22-28; 11:1, 5, 17-26. Businsimi bunji bujatikizya kupilusyigwa kwaba Israyeli kulazuzikizyigwa kwiinda mumbungano ya Banakristo bananike, iijisi bantu bayo ibaitwa kutali buyo kuzwa “kuba-Juda” pele alimwi ‘akubamasi.’
10:10, 13, 14. Kunze lyaluyando ndotujisi kuli Leza abantuma, lusyomo luyumu muli Jehova alimwi azisyomezyo zyakwe zilakonzya kutukulwaizya kutola lubazu cabusungu mumulimo wa Bunakristo.
11:16-24, 33. Eelo kaka luli munzila yeelede ‘luzyalo lwa Leza alimwi abuyumu bwakwe’! Masimpe, “nindomba, amilimo yakwe yoonse ililuleme, nkaambo nzila zyakwe zyoonse zililuzi.”—Dt. 32:4.
KUPONA KWEELANA AKWAAMBWA KUTI MULULAMI
Paulo waamba kuti: “Nkaambo kaako, bakwesu, ndamukumbila kuti kuluzyalo lwa-Leza mutuule mibili yanu, ibe cipaizyo cuumi, cisalala, ciyandisi kuli-Leza.” (Rom. 12:1) “Nkaambo kaako,” naa kweelana akaambo kakuti Banakristo baambwa kuti mbalulami akaambo kalusyomo lwabo, ncaamba Paulo lino ceelede kubapa kubona mbobalibona beni, mbobabona bantu bamwi, alimwi abeendelezi bamfwulumende.
Paulo ulemba kuti: “Ndaambila boonse buyo bali kulindinywe, kuti muntu ataliyeeyi cakulisumpula kwiinda mbukweelede.” Mpoonya ukulwaizya kuti: “Luyandisyo lwanu lutabi lwakuupaupa ameso.” (Rom. 12:3, 9) “Bantu boonse abalibombye kumaami aacisi.” (Rom. 13:1) Kujatikizya twaambo tukonzya kusalwa kubelesya manjezyeezya aamuntu, Paulo ukulwaizya Banakristo ‘kutabetekana.’—Rom. 14:13.
Kwiingula Mibuzyo Yamu Magwalo:
12:20—Ino mbuti ‘mbotulundika makala aamulilo’ amutwe wasinkondoma? Mumazuba aansiku, lubulo lwakali kubikkwa mucitentelo, eelyo kwakali kubikkwa makala aamulilo ansi alimwi aatala. Kupya kapati kuli atala kwakali kugwasya kunyebulula cibulo alimwi akugwisya zintu zitayandiki. Munzila iikozyenye, tulalundika makala aamulilo amutwe wasinkondoma kwiinda mukumucitila milimo yaluzyalo kutegwa bukkale bwakwe bwabusinkazi bunyebuleke, eelyo ulaba abube buli kabotu.
12:21—Ino mbuti mbotuzumanana ‘kuzunda bubi kukucita bubotu’? Nzila yomwe mbotucita oobu nkwiinda mukukanza kuucita cabusungu mulimo ngwaakatupa Leza wakukambauka makani mabotu aa Bwami kusikila ciindi Jehova ncatikabone kuti kwazulila.—Mk. 13:10.
13:1—Muunzila nzi mami aacisi ‘mwaabikkwa a Leza’? Beendelezi bamfwulumende ‘balabikkwa a Leza’ munzila yakuti baleendelezya kwiinda mukuzumizyigwa a Leza, alimwi munzila zimwi bweendelezi bwabo bwakasinsimwa a Leza. Eeci cilalibonya muli ceeco Bbaibbele ncolyakasinsima kujatikizya beendelezi bali mbobabede.
Ziiyo Kulindiswe:
12:17, 19. Kubweedezya cibi kucibi nkulitwika mukuli ngwaali kweelede kulanganya Jehova. Elo kaka inga kwaba kulisumpula kapati ikuti ‘twabeedezya cibi kucibi’!
14:14, 15. Tatweelede kumuusya nsoni mukwesu naa kumufwumpuzya akaambo kacakulya naa cakunywa ncotwamupa.
14:17. Kuba acilongwe cibotu a Leza takuyeeme buyo acintu muntu ncalya naa kunywa naanka acintu muntu ncasala kutalya naa kutanywa. Muciindi caboobo, kuliswaangene abululami, luumuno, alimwi alukkomano.
15:7. Tweelede kubasamausya alimwi akubatambula cakutasalulula aabo boonse bayanda kuzyiba kasimpe baboola mumbungano alimwi akukambauka mulumbe wa Bwami kubantu boonse mbotuyaanya.
[Cifwanikiso icili apeeji 31]
Sena cinunuzyo cilakonzya kubeleka kuzibi zyakacitwa kacitana kubbadelwa?