Mulanda Wa Jehova—“wakayaswa Nkaambo Kamilandu Yesu”
Mulanda Wa Jehova—“wakayaswa Nkaambo Kamilandu Yesu”
“Wakayaswa nkaambo kamilandu yesu, wakaumwa nkaambo kazibi zyesu. . . . Mibunda yakwe njiituponya.”—IS. 53:5.
1. Ino ncinzi ncotweelede kuyeeya ciindi notucita Ciibalusyo, alimwi ino mbusinsimi nzi ibuyootugwasya kucita boobo?
TULACITA Ciibalusyo ikwiibaluka lufwu lwa Kristo alimwi akuyeeya zyintu zyoonse lufwu alimwi akubusyigwa kwakwe ncozyazuzikizya. Ciibalusyo cituyeezya kusinizyigwa kwabweendelezi bwa Jehova, kusalazyigwa kwazyina lyakwe alimwi akuzuzikizyigwa kwacisyomezyo cakwe, ikubikkilizya alufwutuko lwabantu boonse. Ambweni kwiina businsimi bumwi mu Bbaibbele bucaamba cakusalazya cipaizyo ca Kristo alimwi ancocazuzikizya ikwiinda boobo bulembedwe kuli Isaya 53:3-12. Isaya wakasinsima mapenzi ngaakali kuyoocitikilwa Mulanda alimwi wakapa twaambo tugaminide kujatikizya lufwu lwa Kristo alimwi azilongezyo zyakali kuyooba akaambo kalufwu lwakwe kubanyina bananike alimwi “[aku]mbelele zimwi.”—Joh. 10:16.
2. Ino businsimi bwa Isaya bupa bumboni nzi, alimwi ino buyootupa kucita nzi?
2 Kwamyaanda yamyaka iili ciloba Jesu katanazyalwa aano anyika, Jehova wakasololela Isaya kusinsima kuti Mulanda uusalidwe iwa Jehova wakali kuyoosyomeka nociba ciindi naakali kuyoosunkwa kapati. Kaambo aaka mbumboni bwakuti Jehova ulakusyoma cakumaninina kusyomeka kwa Mwanaakwe. Notunoolanga-langa businsimi oobu, cilatupa kulumba kapati alimwi lusyomo ndotujisi lulayumizyigwa.
“Wakasampaulwa” Alimwi ‘Taakalemekwa pe’
3. Ino nkaambo nzi bama Juda ncobakeelede kumutambula kabotu Jesu, pele ino bakamutambula buti?
3 Amubale Isaya 53:3. Elo kaka amweezyeezye buyo ncocakali kupandulula ku Mwana wa Leza simuzyalwa alikke kusiya bubotu bwakubelekela antoomwe a Bausyi alimwi akuboola anyika kuzyooaba buumi bwakwe kacili cipaizyo kutegwa anunune bantu kuzwa kucibi alimwi alufwu! (Flp. 2:5-8) Cipaizyo cakwe cakali camakanze aakulekelela zibi, cituuzyo calo zipaizyo zyabanyama bakali kutuulwa kutobela Mulawo wa Musa ncozyakali kwiiminina. (Heb. 10:1-4) Nocakabota ikuti Jesu naakatambulwa alimwi akulemekwa, ambweni abama Juda balo bakali kulindilila Mesiya wakasyomezyegwa. (Joh. 6:14) Muciindi cakucita boobo, Kristo “wakasampaulwa” abama Juda alimwi ‘tiibakamulemeka pe’ kweelana ambwaakasinsimide Isaya. Mwaapostolo Johane wakalemba kuti: “Wakaboola kucisi cakwabo, pele bantu bakwabo tiibakamutambula.” (Joh. 1:11, NW) Mwaapostolo Petro wakaambila bama Juda kuti: “Leza wamatateesu . . . walemya Jesu [Mulanda wakwe], ngomwakaaba, mwakamukazya kubusyu bwa-Pilato, walo naakali kukanza kumwaangulula. Kwalo mwakamukazya Uusalala Uululeme.”—Inc. 3:13, 14.
4. Ino mbuti Jesu mbwaakaba muntu uubwene naa uuzyi macise aabantu?
4 Alimwi Isaya wakasinsima kuti Jesu wakaba muntu “uubwene maciswe.” Naakali kubeleka mulimo wakwe wakukambauka, Jesu wakali kukatala kapati muziindi zimwi, pele kunyina citondezya kuti kuli naakaciswa. (Joh. 4:6) Nokuba boobo, wakaba muntu uubwene naa uuzyi macise aabaabo mbaakali kukambaukila. Wakabafwida luzyalo, eelyo wakaponya bantu banji. (Mk. 1:32-34) Aboobo Jesu wakazuzikizya businsimi bwaamba kuti: “Ncobeni wakalemenwa maciswe esu, wakatola mapenzi esu.”—Is. 53:4a; Mt. 8:16, 17.
Mbuli Kuti “Ijanza lya-Leza Ndelyamuletela Mapenzi ayo Ngaaumwa”
5. Ino bama Juda banji bakalubona buti lufwu lwa Jesu, alimwi ino nkaambo nzi eeci ncocakapa kuti apengane kapati?
5 Amubale Isaya 53:4b. Bantu banji bakali kupona kuciindi ca Jesu tiibakakamvwisya kaambo kajatikizya kupenga alimwi alufwu lwakwe. Bakasyoma kuti Leza nguwakali kumusubula. (Mt. 27:38-44) Bama Juda bakatamikizya Jesu kuti utukila Leza. (Mk. 14:61-64; Joh. 10:33) Masimpe ngakuti, Jesu kunyina naakali sizibi naa sikasampusampu. Pele akaambo kaluyando lupati ndwaakajisi kuli Bausyi, kaambo kakuti wakali kuyoojaigwa akaambo kakutamikizyigwa kutukila Leza kulangilwa kuti kakapa kuti apengane kapati mbwali Mulanda wa Jehova. Nokuba boobo, wakali kulisungwide kucita kuyanda kwa Jehova.—Mt. 26:39.
6, 7. Ino muunzila nzi Jehova ‘mwaakauma’ Mulanda wakwe uusyomeka, alimwi ino nkaambo nzi eeci ‘ncocakamukkomanisya’ Leza?
6 Tacitugambyi pe kubala kuti businsimi bwa Isaya bwaamba kuti bantu bamwi bakali kuyoobona Kristo mbuli kuti ‘ijanza lya Leza ndelyamuuma,’ pele inga catugambya kuti businsimi bwaamba kuti: “Lukanze lwa-Jehova ndolwakamuuma.” (Is. 53:10) Mbokunga alimwi Jehova wakaambide kuti: “Ngooyu mulanda wangu . . . , musale wangu moyo wangu nguukondelwa,” ino mbuti Jehova mbwaakali kunga ‘wakukkomanina kumuuma’? (Is. 42:1) Ino mbuti mbotukonzya kwaamba kuti eeci cakamukkomanisya Jehova?
7 Kutegwa tucimvwisye kabotu cibeela eeci cabusinsimi oobu, tweelede kuyeeya kuti ciindi Saatani naakakazya bweendelezi bwa Jehova, wakazumbauzya kusyomeka kwabalanda ba Leza boonse bali kujulu alimwi aanyika. (Job. 1:9-11; 2:3-5) Kwiinda mukuzumanana kusyomeka kusikila kulufwu, Jesu wakakwiingula cakulondoka kukazya nkwaakacita Saatani. Aboobo, nokuba kuti Jehova wakazumizya Jesu kuti ajaigwe kuli basinkondonyina, tatukonzyi kuzumbauzya kuti cakamucisa Jehova naakabona Mulanda wakwe uusalidwe kajaigwa. Nokuba boobo, cakamupa kukkomana kapati Jehova kubona kusyomeka cakumaninina nkwaakacita Mwanaakwe. (Tus. 27:11) Kuyungizya waawo, cakamuletela lukkomano lupati Jehova kuzyiba zilongezyo zyakali kuyooboola kubantu ibeempwa akaambo kalufwu lwa Mwanaakwe.—Lk. 15:7.
“Wakayaswa Nkaambo Kamilandu Yesu”
8, 9. (a) Ino mbuti Jesu “[mbwa]akayaswa nkaambo kamilandu yesu”? (b) Ino mbuti Petro mbwaakaasinizya makani aaya?
8 Amubale Isaya 53:6. Mbubwenya mbuli mbelele zyasweeka, bantu basizibi baingaila, kuyandaula lufwutuko kuzwa kukuciswa alimwi alufwu lwakakonwa kuzwa kuli Adamu. (1 Pet. 2:25) Akaambo kakutalondoka, kunyina mwana wa Adamu uuli woonse wakali kukonzya kunununa ceeco Adamu ncaakasowa. (Int. 49:7) Nokuba boobo, akaambo kaluyando lupati ndwajisi, “Jehova walemezya nguwe milandu yesu toonse,” nkokuti Mwanaakwe uuyandwa alimwi uuli Mmulanda uusalidwe. Kwiinda mukulisungula “[ku]yaswa nkaambo kamilandu yesu” alimwi “[aku]umwa nkaambo kazibi zyesu,” Kristo wakayumuna zibi zyesu acisamu alimwi akutufwida.
9 Mwaapostolo Petro wakalemba kuti: “Nciconya eco ncimwakaitilwa, nkaambo Kristo alakwe wakamucisilwa, wakamusiila cibonesyo, kuti mukatobele mumikondo yakwe. Zibi zyesu wakazilemenenwa mumubili wakwe mwini acisamu, kuti tuzwe muzibi, tuponene bululami.” Mpoonya kazubulula businsimi bwa Isaya, Petro wakayungizya kuti: “Mibunda yakwe njiimuponya.” (1 Pet. 2:21, 24; Is. 53:5) Eeci cakapa kuti basizibi bacikonzye kumvwana a Leza alimwi, kweelana ambwaakayungizya Petro naakati: “Kristo wakafwida kale zibi, uululeme wakafwida bataluleme, kuti atuswenye kuli-Leza.”—1 Pet. 3:18.
“Wakeenzegwa Mbuli Kabelele Kaya Kukujayigwa”
10. (a) Ino mbuti Johane Mubbapatizi mbwaakapandulula Jesu? (b) Ino nkaambo nzi majwi aa Johane ncaakazooelela?
10 Amubale Isaya 53:7, 8. Ciindi Johane Mubbapatizi naakabona Jesu kaboola, wakoompolola kati: “Amubone, Mwanaambelele wa-Leza, uugwisya cibi cenyika.” (Joh. 1:29) Naakali kwaamba Jesu kuba mbuli Mwanaambelele, kulangilwa kuti Johane wakayeeya majwi aa Isaya aakuti: “Wakeenzegwa mbuli kabelele kaya kukujayigwa.” (Is. 53:7) Isaya wakasinsima kuti: “Wakazumina akutula buumi bwakwe.” (Is. 53:12) Cakutayeeyelwa, masiku Jesu ngaakatalisya Ciibalusyo calufwu lwakwe, wakapa nkomeki yawaini kubaapostolo bakwe basyomeka bali 11 akwaamba kuti: “Mboobu bulowa bwangu bwamulongo butililwa bantu banji kuti balekelelwe milandu yabo.”—Mt. 26:28.
11, 12. (a) Ino kulisungula kwa Izaka kuti atuulwe kupandulula nzi kujatikizya cipaizyo ca Jesu? (b) Ino ncinzi ncotweelede kwiibaluka kujatikizya Abrahamu Mupati, Jehova, ciindi notucita Ciibalusyo?
11 Mbubwenya mbwaakacita Izaka, Jesu wakali kulisungwide kwaabwa kali cipaizyo. (Matl. 22:1, 2, 9-13; Heb. 10:5-10) Nokuba kuti Izaka cakulisungula wakazumina kwaabwa, Abrahamu nguwakali kuyanda kutuula cipaizyo. (Heb. 11:17) Mbubwenya buyo, Jesu cakulisungula wakazumina kufwa, pele Jehova nguwakasala mbocakeelede kubbadelwa cinunuzyo. Cipaizyo ca Mwanaakwe cakali citondezyo caluyando lupati ndwajisi Leza kubantu.
12 Jesu lwakwe wakati: “Obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Joh. 3:16) Mwaapostolo Paulo wakalemba kuti: “Leza, walo ulatondezya luyandisyo lwakwe kulindiswe boobo, nkaambo nitwakacili basizibi Kristo wakatufwida.” (Rom. 5:8) Aboobo, notulemeka Kristo kwiinda mukwiibaluka lufwu lwakwe, tatweelede kuluba kuti ooyo wakasala mbocakeelede kubbadelwa cinunuzyo ngu Abrahamu Mupati, Jehova. Tulacita Ciibalusyo kutegwa atembaulwe.
Mulanda ‘Walulamika Bantu Banji’
13, 14. Ino mbuti Mulanda wa Jehova ‘mbwaalulamika bantu banji’?
13 Amubale Isaya 53:11, 12. Kujatikizya Mulanda wakwe uusalidwe, Jehova wakati: “Mulanda wangu uululeme uyoolulamika bantu banji.” Munzila nzi? Cibeela camamanino cakapango 12 cilatupa bwiinguzi. Caamba kuti: “[Mulanda waka]kombela basimilandu.” Bana ba Adamu boonse balazyalwa kabali basizibi, “basimilandu,” aboobo batambula “cakuvola cazibi,” nkokuti lufwu. (Rom. 5:12; 6:23) Cilayandika kuti bantu basizibi bamvwane a Jehova alimwi. Caandaano 53 cabbuku lyabusinsimi lya Isaya cilapandulula kabotu-kabotu Jesu ‘mbwaakabakombela,’ naa kuba sikwiiminina bantu basizibi, nocaamba kuti: “Kutugwasya iswe nciceeco ncaakakwabbawidwa, amibunda yakwe njiituponya.”—Is. 53:5.
14 Kwiinda mukuyumuna zibi zyesu alimwi akutufwida, Kristo ‘wakalulamika bantu banji.’ Paulo wakalemba kuti: “Cintu ncaakayanda Leza nceeci cakuti bu-Leza buzulide bukale mulinguwe [Kristo]. Alimwi wakabeleka kujanza lyakwe kukuliyanzanisizya zintu zyoonse, niziba zyaansi niziba zyakujulu, akucitya luumuno abulowa [bwaacisamu cakupenzezya].”—Kol. 1:19, 20.
15. (a) Ino ‘zyintu zyoonse zyakujulu’ nzyaakaamba Paulo mbaani? (b) Ino mbaani balikke beelede kulya zitondezyo zya Ciibalusyo, alimwi ino nkaambo nzi?
15 ‘Zyintu zyoonse zyakujulu’ iziyanzanisyigwa kuli Jehova kwiinda mubulowa bwa Kristo bwakatilwa, Mbanakristo bananike, balo baitwa kuti bakalele aantoomwe a Kristo kujulu. Banakristo balo “[ba]salilwa bukalilo kujulu” baambwa kuti balaba “[a]lululamiko lwabuumi.” (Heb. 3:1; Rom. 5:1, 18) Mpoonya Jehova ulabazumina kuti babe bana bakwe bakumuuya. Muuya uusalala ulazuminana ambabo kuti “[m]baswaana bakwe antoomwe a-Kristo,” balo baitwa kuti bakabe bami alimwi abapaizi mu Bwami bwakwe bwakujulu. (Rom. 8:15-17; Ciy. 5:9, 10) Baba cibeela ca Israyeli wakumuuya, “ba-Israyeli ba-Leza,” alimwi banjizigwa “[mu]cizuminano cipya.” (Jer. 31:31-34; Gal. 6:16) Mbobali mucizuminano cipya, balakonzya kulya zitondezyo zya Ciibalusyo, izibikkilizya ankomeki yawaini uusalala yalo Jesu njaakaamba kuti: “Cinywido eci ngomulongo mupya wamubulowa bwangu, ubutikaikila ndinywe.”—Lk. 22:20.
16. Ino ‘zyintu zyoonse zyaansi’ mbaani, alimwi ino muunzila nzi mobaambwa kuti baliluleme kumeso aa Jehova?
16 ‘Zyintu zyoonse zyaansi’ mbambelele zimwi zya Kristo, balo bajisi bulangizi bwakuyoopona anyika kukabe kutamani. Aaba abalo Mulanda wa Jehova ulabalulamika kumeso aa Jehova. Akaambo kakuti bajisi lusyomo mucipaizyo cacinunuzyo ca Kristo alimwi “bakasanzya zikobela zyabo akuzitubya mubulowa bwa-Mwanambelele,” Jehova ubaamba kuti baliluleme kutaamba kuti mbana bakwe bakumuuya, pele kuti mbalongwe bakwe, ikubapa kuti babe abulangizi bubotu bwakuyoofwutuka “kumapenzi ayo mapati.” (Ciy. 7:9, 10, 14; Jak. 2:23) Akaambo kakutaba mucizuminano cipya alimwi akutaba abulangizi bwakuyoopona kujulu, aaba bambelele zimwi tabalyi zitondezyo zya Ciibalusyo nokuba boobo balajanika lya Ciibalusyo kabali basikulangilila buyo.
Kulumba Koonse Kwiinka Kuli Jehova aku Mulanda Wakwe Uusalidwe!
17. Ino mbuti kwiiya businsimi buli mubbuku lya Isaya bwalo bubandika zya Mulanda mbokwatugwasya kulibambila Ciibalusyo mumizeezo yesu?
17 Kulanga-langa businsimi buli mubbuku lya Isaya bwalo bubandika zya Mulanda yali nzila mbotu yakulibambila Ciibalusyo calufwu lwa Kristo mumizeezo yesu. Kwatugwasya kuti “tudun[amine] kuli-Jesu musolozi uulomya lusyomo lwesu.” (Heb. 12:2) Twaiya kuti Mwana wa Leza tali muzangi pe. Mukwiimpana a Saatani, ulakukkomanina kuyiisyigwa a Jehova akwiibaluka kuti Jehova Mmwami Mupati. Twabona kuti ciindi Jesu naakali kubeleka mulimo wakwe waanyika, wakabafwida luzyalo bantu mbaakali kukambaukila, wakaponya bantu banji kumubili alimwi akubagwasya kuti bamvwane a Leza alimwi. Aboobo wakatondezya ncayoocita kali Mwami wabu Mesiya mubukkale bwazyintu bupya ciindi aakubikka “lubeta mukati kanyika.” (Is. 42:4) Busungu mbwaakajisi mukukambauka Bwami kali “mumuni wabamasi,” nciyeezyo kuli basikumutobela kuti kabakambauka makani mabotu cabusungu munyika yoonse.—Is. 42:6.
18. Ino nkaambo nzi businsimi bwa Isaya ncobutupa kumulumba kapati Jehova alimwi a Mulanda wakwe uusyomeka?
18 Alimwi businsimi bwa Isaya bwatugwasya kuzyiba mboluli lupati luyando ndwaakatondezya Jehova ciindi naakatuma Mwanaakwe uuyandwa kuti aboole anyika kuzoopenga alimwi akutufwida. Jehova wakakkomana kubona kusyomeka cakumaninina nkwaakacita Jesu kusikila kulufwu ikutali kupenga kwa Mwanaakwe. Andiswe tweelede kukkomana mbuli mbwakkomana Jehova, kwiibaluka zyoonse nzyaakacita Jesu kutegwa atondezye kuti Saatani mmubeji alimwi akusalazya zyina lya Jehova, eelyo akusinizya kweelela kwabweendelezi Bwakwe. Kuyungizya waawo, Kristo wakayumuna zibi zyesu alimwi akutufwida. Munzila eeyi, wakapa kuti banabakwabo bananike ibakatanga kaniini alimwi abambelele zimwi kuti balulamikwe kumeso aa Jehova. Twaakubungana lya Ciibalusyo, atukamulumbe kapati Jehova alimwi a Mulanda wakwe uusyomeka.
Kwiinduluka
• Ino muunzila nzi Jehova ‘mbwaakakukkomanina’ ‘kuumwa’ kwa Mwanaakwe?
• Ino mbuti Jesu “[mbwa]akayaswa nkaambo kamilandu yesu”?
• Ino mbuti Mulanda ‘mbwaakalulamika bantu banji’?
• Ino mbuti kwiiya businsimi bujatikizya Mulanda mbokwamugwasya kuti mulibambile Ciibalusyo?
[Mibuzyo yaciiyo]
[Cifwanikiso icili apeeji 26]
“Wakasampaulwa; teetwakamulemeka pe”
[Cifwanikiso icili apeeji 28]
“Wakazumina akutula buumi bwakwe”
[Cifwanikiso icili apeeji 29]
Iba “mbelele zimwi” balajanika lya Ciibalusyo kabali basikulangilila buyo