Kumanizya Cikolo Ca Gileadi Canamba 125

Bamisyinali Bakulwaizyigwa Kuba Mbuli Jeremiya

MUKWESU Geoffrey Jackson wamu Kabunga Keendelezya wakaamba kuti: “Eeyi kkilasi ya Gileadi ililibedelede.” Wakali kwaambila bantu basika ku 6,156 ibakajanika kumuswaangano wa Kumanizya Cikolo ca Watchtower Bible School of Gilead canamba 125 mubuzuba bwa September 13, 2008. Kubikkilizya abasikumanizya cikolo aaba ibali 56, Cikolo ca Gileadi catuma bamisyinali bainda ku 8,000 “kumamanino aanyika”!—Inc. 1:8.

Mukwesu Jackson, sicuuno wapulogilamu, wakabuzya kuti: “Sena kusyomeka kuyoomugwasya kuti muzwidilile mumulimo wenu?” Mpoonya wakaamba zyintu zyone izikonzya kupa muntu kusyomeka: kuzilanga kabotu zyintu, kuba cikozyanyo cibotu, kubelesya Jwi lya Leza mukuyiisya kwakwe koonse, alimwi akubikkila kapati maano kukugwasya bantu kuti bazyibe zyina lya Jehova.

Mukwesu David Schafer, uubeleka mu Kkomiti Yakuyiisya, wakabandika makani aajisi mutwe wakuti, “Sena Muyoozimvwisya Zyintu Zyoonse?” Wakabasyomezya basicikolo ca Gileadi kuti, nokuba kuti tabakonzyi kuyoozimvwisya zyoonse zyaambwa mumyaambo njobayoojana naa zyintu zicitwa kweelana azilengwa zyamumasena mwalo mobanoobelekela, balakonzya ‘kuzimvwisya zyintu zyoonse’ iziyandika kutegwa bazwidilile mumulimo wabumisyinali ikuti naa bazumanana kuyandaula Jehova alimwi akulemeka “muzike musyomesi uucenjede.”—Tus. 28:5; Mt. 24:45.

Mpoonya, mukwesu John E. Barr wamu Kabunga Keendelezya wakakanana makani aajisi mutwe wakuti: “Mutalekeli Cintu Cili Coonse Kumwaandaanya Kuluyando lwa Leza.” Mbubwenya mbwacita usyi siluyando, mukwesu Barr wakakulwaizya basicikolo abazyali babo kujatikizya zyintu zikonzya kubacitikila mumulimo wabo calo cakapa kuti kulibilika kuli koonse nkobakajisi bamisyinali bapya kumane. Wakapandulula kuti: “Ikuba muluyando lwa Leza citupa kuba mubukwabilizi bwakwe alimwi ncintu cikatalusya kapati mubuumi bwesu.” Kunyina cintu cikonzya kwaandaanya bamisyinali kuluyando lwa Leza ccita kuti bamukamwini balyaandaanya kulinguwe.

Mukwesu Sam Robertson iwamu Cibeela ca Zikolo Zyeendelezyegwa a Leza wakakulwaizya baswiilizi kusama “cisani ciinda kubota.” Kwiinda mukwiiya nzyaakacita Jesu alimwi akuzitobela, basikumanizya cikolo balakonzya ‘kulisamika Mwami Jesu Kristo.’ (Rom. 13:14) Mpoonya mukwesu William Samuelson, mulangizi wa Cibeela ca Zikolo Zyeendelezyegwa a Leza, wakatondezya zyintu zipa muntu kuti alemekwe. Mbwazilanga zyintu Leza nkokupa muntu kulemekwa kutali mbwazilanga muntu pe.

Mukwesu Michael Burnett, umwi wabamayi, wakabuzya-buzya basicikolo kujatikizya zyakuluula nzyobakajana mumulimo wamumuunda ciindi nobakali kucikolo. Nokuba kuti basicikolo banji bakapegwa zilawo mukambaukwa lyoonse nobakali ku Cikolo ca Gileadi ku Patterson, New York, bakajana bantu ibakajisi luyandisisyo mumulumbe. Mukwesu Gerald Grizzle wamu Ofesi ya Miswaangano Mipati wakabuzya-buzya bakwesu botatwe ibakajanika ku Cikolo Cabaabo Bali mu Kkomiti Yamutabi. Majwi aabo akagwasya basikumanizya Cikolo ca Gileadi kulibambila nzyobayoocita mumulimo wabo wakuyoobelekela kumasi aambi.

Makani aakuti: “Amube Mbuli Jeremiya” akakananwa  amukwesu David Splane wamu Kabunga Keendelezya, iwakamanizya cikolo canamba 42. Nokuba kuti Jeremiya wakalibilika kujatikizya mulimo wakwe, Jehova wakamuyumya-yumya. (Jer. 1:7, 8) Leza uyoocita mbubwenya oobu akuli bamisyinali bapya. Mukwesu Splane wakati: “Ikuti kamujisi penzi amuntu umwi, amukkale ansi akulemba bube bwakwe buli kkumi mbomukkomanina. Mpoonya ikuti bube mbomwalemba kabutasiki kukkumi, nkokuti tamumuzyi kabotu ooyu muntu.”

Jeremiya wakali muntu uulyaabide. Ciindi naakali kuyanda kucileka, wakapaila, mpoonya Jehova wakamugwasya. (Jer. 20:11) Mukwesu Splane wakaamba kuti: “Ciindi nomwatyompwa, amumwaambile Jehova. Muyoogambwa kubona mbwayoomugwasya.”

Kumamanino aapulogilamu, sicuuno wakabayeezya baswiilizi kuti basikumanizya cikolo baiya nzila zinji mbobakonzya kuba bantu basyomeka. Ikusyomeka kwabamisyinali ciindi nobakambauka kuyakupa kuti bantu bazyibe kuti mulumbe ngobakambauka ulayandika kapati.—Is. 43:8-12.

Kabbokesi kali apeeji 22]

MYEELWE IIJATIKIZYA BASICIKOLO

Mweelwe wazisi nkobakazwa: 6

Mweelwe wazisi nkobakatumwa: 21

Mweelwe wabasicikolo boonse: 56

Mweelwe waakati-kati wamyaka yakuzyalwa: 32.9

Mweelwe waakati-kati kabali mukasimpe: 17.4

Mweelwe waakati-kati kabali mumulimo waciindi coonse: 13

[Cifwanikiso icili apeeji 23]

Basikumanizya Cikolo ca Watchtower Bible School of Gilead Canamba 125

Mumulongo uuli ansi aawa, mindando ilembedwe manamba kuzwa kumbele kuya musyule, alimwi mazyina alembedwe kuzwa kulumwensyi kuya kululyo mumundando aumwi.

[Cifwanikiso icili apeeji 23]

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.