Ino Mbuti Mbomukonzya Kuliyumya Mumulimo Wakukambauka?

SENA kuli nomwakalimvwa kukatala kapati alimwi akutyompwa cakuti mwakayeeya kucileka kukambauka? Kukazyigwa kapati, kulibilika, kuciswa-ciswa, kuyungwa abeenzuma, naa kutabikkila maanu nkobacita bantu kumulumbe ngotubakambaukila zilakonzya kupa kuti cikatazye kuliyumya. Pele amuyeeye cikozyanyo ca Jesu. Wakaliyumya mumasunko mapati “nkaambo kalukondo ndwaakabikilwa kunembo.” (Heb. 12:2) Wakalizyi kuti wakali kukkomanisya Jehova kwiinda mukutondezya kuti twaambo toonse ntwaakatamikizyigwa Leza ntwakubeja.—Tus. 27:11.

Kwiinda mukuliyumya mumulimo wakukambauka, andinywe mulakonzya kumukkomanisya Jehova. Nokuba boobo, ino mbuti ikuti zisinkilizyo zimwi zimumanina nguzu zyakukambauka? Ba Krystyna, ibacembeede alimwi baciswa-ciswa, baamba kuti: “Ndakazyibila kukatala alimwi akutyompwa. Mapenzi aaboola akaambo kakucembaala, mbuli kuciswa-ciswa alimwi akulibilika kujatikizya buponi bwaabuzuba, alakonzya kumana busungu bwangu kwaciindi cisyoonto.” Ino mbuti mbomukonzya kuliyumya mumulimo wakukambauka nociba ciindi nomuli mumapenzi aali boobu?

Amwiiye Basinsimi

Kutegwa bakakatile mumulimo wakukambauka, basikumwaya ba Bwami basyomeka balakonzya kusoleka kuba amuuya ngobakajisi basinsimi bansiku. Mucikozyanyo, amulange-lange makani aajatikizya Jeremiya. Naakasalwa kuba musinsimi, wakasaanguna kuwayawaya. Pele, Jeremiya wakacikonzya kuliyumya mumulimo wakwe uukatazya kwamyaka yiinda ku 40 akaambo kakuti wakali kusyoma Leza cakumaninina.—Jer. 1:6; 20:7-11.

Ba Henryk balakulwaizyigwa acikozyanyo ca Jeremiya. Baamba kuti: “Kwamyaka yiinda ku 70 njondabeleka mulimo wakukambauka, zimwi ziindi ndilatyompwa akaambo kambobacita bantu—kuusulaika mulumbe. Muziindi zili boobu, inga ndiyeeya cikozyanyo ca Jeremiya. Luyando ndwaakajisi kuli Jehova alimwi acilongwe cakwe ciyumu anguwe zyakamugwasya kuzumanana kusinsima.” (Jer. 1:17) Ba Rafał abalo balakulwaizyigwa acikozyanyo ca Jeremiya. Baamba kuti: “Muciindi cakubikkila kapati maanu kuli mbwaakali kulimvwa, Jeremiya wakasyoma muli Leza. Wakazumanana cakutayoowa nokuba kuti bantu bakali kukazya kapati. Ndilasoleka kukayeeya kaambo aaka.”

Musinsimi aumbi uujisi cikozyanyo cibotu calo cigwasya bantu banji kuliyumya mumulimo wakukambauka ngu Isaya. Leza wakamwaambila kuti bantu bamucisi cakwabo tabakamuswiilili. Jehova wakati: “Neneesya moyo wabantu aba, lemezya matwi aabo akulamba kumeso aabo.” Sena Isaya kunyina naakali kuyoozwidilila? Peepe, nkaambo oobu tabusyi mbwaakali kuzibona zyintu Leza. Naakapegwa mulimo wabusinsimi, wakaamba kuti: “Mpendi! Unditume mebo.” (Is. 6:8-10) Isaya wakaubeleka cabusungu mulimo wakwe. Sena andinywe mbomucita oobo kujatikizya malailile aakukambauka?

Kutegwa tuliyumye mumulimo wakukambauka nokuba kuti bantu banji tabaswiilili, tatweelede kubikkila maanu kubantu ibakaka mulumbe wesu. Mboobu mbobacita ba Rafał kutegwa batatyompwi. Baamba kuti: “Tandibikkili maanu kumajwi aatali kabotu ngobaamba bantu. Bantu bali mucilawo mondibelekela balaangulukide kwaamba zili zyoonse nzyobayanda.” Ba Anna bayungizya kuti: “Ndilasoleka kapati kutabikkila maanu kucintu cili coonse citali kabotu naa cityompya. Cindigwasya kucita boobu mmupailo alimwi akulanga-langa lugwalo lwabuzuba kanditanaunka mumulimo wamumuunda. Mizeezo iili yoonse iitali kabotu ilamana.”

Musinsimi Ezekieli wakabeleka akati kaba Juda  basinkazi ibakali mubuzike ku Babuloni. (Ezk. 2:6) Ikuti musinsimi ooyu naatakabaambila bantu majwi aa Leza alimwi ikuti sizibi naakafwa kakunyina kucenjezyegwa, Ezekieli naakaba amulandu akaambo kalufwu lwamuntu ooyo. Jehova wakaambila Ezekieli kuti: “Bulowa bwakwe ngumulandu wako.”—Ezk. 3:17, 18.

Ba Henryk balasoleka kuba amuuya ngwaakajisi Ezekieli. Baamba kuti: “Tandiyandi kuba amulandu wabulowa bwabantu boonse. Buumi bwabantu buli muntenda.” (Inc. 20:26, 27) Ba Zbigniew balakazumina kaambo aaka kabati: “Ezekieli wakazumanana kakunyina makani anzyobayeeya bantu. Eeci cilandigwasya kubona mulimo wakukambauka mbuli mbwaubona Mulengi.”

Tamuli Molikke

Nomukambauka, tamuli molikke pe. Mbubwenya mbuli mwaapostolo Paulo, tulakonzya kwaamba kuti: “Tuli basimilimonyina Leza.” (1 Kor. 3:9) Ba Krystyna, balo ibazumina kuti ziindi zimwi balatyompwa baamba kuti: “Nkakaambo kaako ncondizumanana kulomba Jehova kuti andipe nguzu. Ulandipa nguzu ciindi coonse nondilomba.” Masimpe, tuyandika muuya wa Leza kuti kautugwasya mumulimo wakukambauka.—Zek. 4:6.

Ciindi notukambauka, muuya uusalala alimwi ulatugwasya kutondezya bube “[bwa]micelo ya-Muuya.” (Gal. 5:22, 23) Mpoonya tulagwasyigwa kuliyumya mumulimo wakukambauka kunyina makani ambobaubona bantu. Ba Henryk baamba kuti: “Mulimo wakukambauka undigwasya kubambulula bukkale bwangu. Wandiyiisya kukkazika moyo alimwi akubikkila maanu kubantu bamwi akutafwambaana kutyompwa.” Kuliyumya mumulimo wakukambauka nokuba kuti kuli makatazyo aayindene-indene kulakonzya kumugwasya kuba amicelo yamuuya.

Jehova ubelesya bangelo mukusololela mulimo ooyu uulibedelede. (Ciy. 14:6) Bbaibbele lyaamba kuti kuli bangelo ibali boobu “banjibanji.” (Ciy. 5:11) Kabeendelezyegwa a Jesu, bangelo balabagwasyilizya babelesi ba Leza ibali anyika. Sena mulakayeeya kaambo aaka ciindi coonse nomuli mumulimo wakukambauka?

Ba Anna baamba kuti: “Kuzinzibala kuyeeya kuti bangelo balatugwasya mumulimo wakukambauka, ncintu cindikulwaizya kapati. Ndilalumba lugwasyo ndobapa kwiinda mukusololelwa a Jehova alimwi a Jesu.” Elo ncoolwe cipati kaka ikubelekela aantoomwe abangelo basyomeka!

Ino mbuti kubelekela aantoomwe abasikumwaya bambi mbokukonzya kutugwasya kuliyumya? Tujisi coolwe cakuzyibana kabotu a Bakambonima banji. Cakutadooneka mwakabona mbokali kamasimpe kasimpi aaka kamu Bbaibbele ikaamba kuti: “Lubulo lulanona lubulonyina, mbubonya obo muntu ulanona busyu bwamweenzinyina.”—Tus. 27:17.

Kubelekela aantoomwe abasikumwaya bambi mumulimo wakukambauka kutupa coolwe cakwiiya nzila zimbi zyabukambausi nzyotwatakazyi. Ba Elżbieta baamba kuti: “Kubeleka abasikumwaya baindene-indene kundipa coolwe cakutondezya luyando kubakwesu abacizyi alimwi akubantu mbotukambaukila.” Amusoleke kubeleka mumulimo wakukambauka abasikumwaya baindene-indene. Ciyoomupa kuukkomanina mulimo ooyu.

Amubikkile Maanu Kubuumi Bwanu

Kutegwa tuzumanane kuba basungu mumulimo wesu wakukambauka, tweelede kulibambila kabotu, kuba abubambe bubotu bwaciiyo cesu tobeni, alimwi akuba aciindi cinji cakulyookezya. Munzila imwi inga twaamba kuti tweelede kubikkila maanu kubuumi bwesu bwakumuuya alimwi abwakumubili.

Ibbaibbele lyaamba kuti: “Makanze aabasungu alaleta zilyo zinji.” (Tus. 21:5) Ba Zygmunt, balo lino ibajisi myaka yakuzyalwa iili 88 baamba kuti: “Kuba abubambe bubotu mumulimo wangu wakukambauka kwandigwasya kuzuzikizya mbaakani zimwi. Ndilabikka ciindi cibotu kutegwa ndijane ciindi cinji cakukambauka.”

Kuba aluzyibo lunji lwamu Magwalo kulatuyumya-yumya alimwi kutugwasya kuba bantu ibalibambilide kubeleka mulimo wakukambauka. Mbubwenya mbotuyandika cakulya cakumubili kutegwa tube abuumi bubotu, tweelede kulya cakulya cakumuuya ciindi coonse kutegwa tuzumanane kubeleka mulimo wakukambauka. Kubala Jwi lya Leza abuzuba alimwi akulya ‘cakulya aciindi ceelede’ kulakonzya kutupa nguzu mumulimo wakukambauka.—Mt. 24:45-47.

Ba Elżbieta bakacinca kapati mubuumi bwabo kutegwa bayaambele mumulimo wakukambauka.  Baamba kuti: “Ndacicesya ciindi ncondeebelela cipekupeku kutegwa ndijane ciindi cakulibambila mulimo wakukambauka. Lyoonse nondibala Bbaibbele kumangolezya, inga ndiyeeya bantu mbondiyaanya mucilawo cesu. Inga ndiyandaula magwalo alimwi azibalo zikonzya kubagwasya.”

Kulyookezya kabotu kuyoomugwasya kuba anguzu zyalo iziyoopa kuti kamuba aciindi cinji cakutola lubazu mumulimo wakukambauka. Kulubazu lumwi, kusowa ciindi cinji mukulikkomanisya kulakonzya kupa kuti mutaubeleki kabotu mulimo wanu wakukambauka. Ba Andrzej, basikumwaya ibasungu baamba kuti: “Kutalyookezya kupa kuti mukatale kapati, mpoonya eeci cisololela kukutyompwa. Ndilasoleka kucita nzyondikonzya kutegwa ndibe aciindi cibotu cakulyookezya.”—Muk. 4:6.

Notusoleka buti, tabali boonse ibayakwaazumina makani mabotu. Nokuba boobo, Jehova kunyina nayakuuluba mulimo wesu. (Heb. 6:10) Nokuba kuti bantu banji tabayandi kubandika andiswe, balakonzya kwaamba kujatikizya bukambausi bwesu ciindi twazwa aŋanda yabo. Cilakonzya kuba mbuli nzyotubala kujatikizya Ezekieli kuti: Bantu “bayooziba kuti kwaba musinsimi akati kabo.” (Ezk. 2:5) Masimpe mulimo wesu tuuli muuba-uba pe, nokuba boobo, ulatugwasya kapati swebo alimwi abaabo ibatuswiilila.

Ba Zygmunt baamba kuti: “Kutola lubazu mumulimo kutugwasya kusama buntu bupya alimwi akutondezya luyando kuli Leza akuli basimukoboma.” Ba Andrzej bayungizya kuti: “Ncoolwe cipati ikutola lubazu mumulimo ooyu wakufwutula bantu. Kunyina nouyakwiindulukwa munzila iili boobu alimwi amubukkale buli boobu.” Andinywe muyoogwasyigwa kapati ikuti mwaliyumya mumulimo wakukambauka mazuba aano.—2 Kor. 4:1, 2.

[Zifwanikiso izili apeeji 31]

Kubikkila maanu kubuumi bwesu bwakumuuya alimwi abwakumubili kutugwasya kuliyumya mumulimo wakukambauka