Ino Nkaambo Nzi Ncomweelede Kulyaaba Kuli Jehova?

“Sunu masiku wandisikila angelo wa-Leza oyo ngwendi wakwe.”—INC. 27:23.

1. Ino zyintu nzi aabo ibayanda kubbapatizyigwa nzyobacita, alimwi ino mibuzyo nzi iibuzyigwa?

“KWIINDA mucipaizyo ca Jesu Kristo, sena mweempwa zibi zyanu akulyaaba kuli Jehova kuti mucite kuyanda kwakwe?” Ooyu ngumwi wamibuzyo yobilo njobabuzyigwa kumamanino aamakani aalubbapatizyo aabo ibasikubbapatizyigwa. Ino nkaambo nzi Banakristo ncobeelede kulyaaba kuli Jehova? Ino kulyaaba kuli Leza kutugwasya buti? Ino nkaambo nzi muntu uutalyaabide kuli Leza ncatakonzyi kutambulwa kuli nguwe? Kutegwa tujane bwiinguzi, atubone ncocaamba kulyaaba.

2. Ino kulyaaba kuli Jehova caamba nzi?

² Ino kulyaaba kuli Leza caamba nzi? Amubone mwaapostolo Paulo mbwaakacaamba cilongwe cakwe a Leza. Naakali kwaambila bantu mbaakali limwi mubwato nikwakali guwo mpati, wakamwaamba Jehova kuti ngo “Leza oyo ngwendi wakwe.” (Amubale Incito 27:22-24.) Banakristo boonse bakasimpe mbantu ba Jehova. Mukwiimpana, nyika yoonse “ikede muzibi.” (1 Joh. 5:19) Banakristo baba bantu ba Jehova nobalyaaba mumupailo kuli nguwe. Nobacita boobu bazumina kumubelekela Leza. Bamana, balabbapatizyigwa.

3. Ino kubbapatizyigwa kwa Jesu kwakali kutondezya nzi, alimwi ino mbuti basikumutobela mbobakonzya kumwiiya?

³ Jesu wakatusiila cikozyanyo naakasala kucita kuyanda kwa Leza. Akaambo kakuti wakazyalilwa mucisi ca Israyeli icakaabidwe kale, awalo wakalilyaabide kuli Leza. Aboobo, ikubbapatizyigwa kwakwe tiikwakali akaambo kakulyaaba. Ijwi lya Leza Lyaamba kuti: “Mebo mpaawa, ndaboola . . . kuzoocita luyando lwako, O Leza.” (Heb. 10:7; Lk. 3:21) Aboobo kubbapatizyigwa kwa Jesu kwakali kutondezya kuti ulilyaabide kuli Leza kuti acite  kuyanda kwa Bausyi. Basikumutobela baiya cikozyanyo cakwe nibabbapatizyigwa. Pele balo nibabbapatizyigwa batondezya bantu kuti bakalyaaba mumupailo kuli Leza.

Kulyaaba Mbokukonzya Kutugwasya

4. Ino kumvwana kwaba Davida a Jonatani kutuyiisya nzi kujatikizya kubelekelana?

⁴ Kulyaaba kwa Banakristo kweelede kubikkilwa maano. Nzinji nzyotweelede kucita. Pele, ino kulyaaba inga kwatugwasya buti? Mucikozyanyo, atubone kubelekela muntu mbocigwasya. Cikozyanyo comwe ncakumvwana. Ikutegwa kamumvwana, mweelede kuzumina kucita zyintu nzyayanda mweenzinyoko. Eeci ciyandika kumubikkila maano mweenzinyoko ooyu. Cikozyanyo cibotu cabantu ibakali kumvwana kapati ibaambwa mu Bbaibbele nca Davida a Jonatani. Mucilongwe cabo kuli ncibakamvwana. (Amubale 1 Samuele 17:57; 18:1, 3.) Nokuba kuti ikumvwana kuli boobu takuvwuli kucitika, bantu balakonzya kumvwana kapati ikuti kabalisungwide kubelekelana.—Tus. 17:17; 18:24.

5. Ino mbuti muzike mbwaakali kukonzya kuzumanana kukkala asimalelo mubotu?

⁵ Imulawo Leza ngwaakapa bana Israyeli waamba kaambo kambi kakonzya kubagwasya bantu balyaabide. Ikuti muzike wayanda kuzumanana kukkala asimalelo aakwe akaambo kakuti wakali kulelwa kabotu, bakeelede kumvwana. Mulawo waamba kuti: “Oyo muzike aamba kuti, Ndayandisya simalelaangu amukaangu, abana bangu nsikonzyi kwaangunuka, elyo simalelaakwe uleelede kumutola kuli-Leza, amuswenye kumulyango na kumunsende; lino simalelaakwe adonkole kutwi kwakwe ansunda, amubelekele milimo lyoonse.”—Kul. 21:5, 6.

6, 7. (a Ino kulyaaba kubagwasya buti bantu? (b) Ino eeco citondezya nzi kweelana ambotumuyanda Jehova?

⁶ Mucikwati muyandika kumvwana kapati. Ooku takuli kumvwana kwaapepa buyo, pele nkumvwana amuntu ooyo. Bantu bobilo ibakkala buyo antoomwe kabatakwetene mumulawo tabakonzyi kuliiba abana babo. Pele aabo ibakwetene mumulawo balijisi twaambo twamu Magwalo itukonzya kubapa kumana mapenzi ngobajana.—Mt. 19:5, 6; 1 Kor. 13:7, 8; Heb. 13:4.

⁷ Lyansiku, bantu bakali kugwasyigwa nobakali kuzuminizyanya akusaina nobatalika makwebo anobanjila mulimo. (Mt. 20:1, 2, 8) Eeci ncicicitika amazuba aano. Mucikozyanyo, tulakonzya kugwasyigwa ikuti twazuminizyanya akusaina notutalika makwebo anotutalika kubeleka mukkampani. Aboobo, ikuti naa kamuzikkomanina nzyomucita amweenzinyoko, ngomukwetene limwi ankomubeleka, kamuyeeya buyo mbocikonzya kuyuma cilongwe cenu kuti mwalyaaba kuli Jehova. Lino atulange-lange mbobakagwasyigwa bantu bakaindi akaambo kakulyaaba kuli Jehova Leza alimwi akuti tiikwakali buyo kwakwiinzya mulawo.

Kulyaaba Kuli Leza Mbokwakabagwasya Bana Israyeli

8. Ino kulyaaba kuli Leza nkobakacita bana Israyeli cakali kwaamba nzi?

⁸ Cisi ca Israyeli coonse cakalilyaabide kuli Jehova ciindi nibakakonka kuli Leza. Jehova wakababunganya munsi aa Mulundu wa Sinai akubaambila kuti: “Na mwazumina kuswiilila ijwi lyangu akubamba cizuminano cangu, muyooyandika mumeso aangu kwiinda bamasi boonse.” Bantu boonse bakaingula camoyo omwe kuti: “Coonse buyo Jehova ncaamba tulacicita.” (Kul. 19:4-8) Kulyaaba nkobakacita bana Israyeli kwakali kwaamba zinji. Cakali kwaamba kuti lino mbantu ba Jehova, awalo Jehova wakali kubabona kuti mbantu ‘bayandika mumeso aakwe.’

9. Ino mbuti bana Israyeli mbobakagwasyigwa akaambo kakulyaaba kuli Leza?

⁹ Bana Israyeli bakagwasyigwa akaambo kakuba bantu ba Jehova. Wakali kubacitila  zyoonse nzyaakabasyomezya mbubwenya mbuli muzyali mbwalanganya mwanaakwe. Leza wakaambila bana Israyeli kuti: “Ma! Sa mwanakazi ulaluba mwanaakwe uucinyonka? Sa ulaleka kufwida mwana ngwazyede luzyalo? Aba ambweni balaluba, pele mebo nsikonzya kukuluba uwe pe.” (Is. 49:15) Jehova wakabapa Mulawo kuti ubasololele, wakabelesya basinsimi kuti babakulwaizye alimwi wakali kubelesya bangelo kuti babakwabilile. Sintembauzyo wakalemba kuti: “Ulakananina Jakobo ijwi lyakwe, aba-Israyeli imbeta zyakwe amilazyo yakwe. Taakwe cisi cimbi ncaakacitila obo pe.” (Int. 147:19, 20; amubale Intembauzyo 34:7, 19; 48:14.) Mbubwenya Jehova mbwaakali kubabikkila maano bantu bakwe bansiku, abalo bantu ibalyaabide kuli nguwe mazuba aano ulababikkila maano.

Ncotweelede Kulyaaba Kuli Leza

10, 11. Sena twakazyalilwa mumukwasyi wa Leza? Amupandulule.

¹⁰ Bantu bamwi nobayeeya kulyaaba akubbapatizyigwa, balalibuzya kuti: ‘Sena tacikonzyeki ikukomba Jehova kakunyina kulyaaba kuli nguwe?’ Kaambo kalasalala notubona mbotumvwana lino a Leza. Kamuyeeya kuti akaambo kacibi ncaakacita Adamu, toonse twakazyalilwa kunze aamukwasyi wa Leza. (Rom. 3:23; 5:12) Kulyaaba kuli Leza ncintu ciyandika kapati kutegwa tutambulwe mumukwasyi wakwe. Atubone kaambo ncocili boobo.

¹¹ Kunyina muntu uukonzya kutupa buumi butamani mbuli boobo Leza mbwaakali kuyanda kumatalikilo. (1 Tim. 6:19) Tiitwakazyalwa katuli bana ba Leza akaambo kakuti bantu bobilo bakusaanguna nibakabisya, ibantu boonse bakaandaanizyigwa kuli Bausyi Bakabalenga alimwi ibakali kubayanda. (Amweezyanisye Deuteronomo 32:5.) Kuzwa ciindi eeco, bantu boonse bakaandanizyigwa, tabacili mumukwasyi wa Jehova Leza.

12. (a) Ino mbuti bantu batalondekede mbobakonzya kuba mumukwasyi wa Leza? (b) Ino zyintu nzi nzyotweelede kucita katutana bbapatizyigwa?

¹² Nokuba boobo, aumwi ulakonzya kulomba kuti Leza amutambule mumukwasyi wababelesi bakwe mbakkomanina. * Ino swebo tobasizibi inga twacikonzya buti kucita oobu? Mwaapostolo Paulo wakalemba kuti: “Kuciindi ncitwakali basinkondonyina twakayanzanisigwa kuli-Leza kulufu lwamwanaakwe.” (Rom. 5:10) Nitubbapatizyigwa, tulamulomba Leza kuti tube amanjezyeezya mabotu kutegwa atutambule. (1 Pet. 3:21) Katutana bbapatizyigwa kuli zyintu nzyotweelede kucita. Tweelede kumuzyiba Leza, ikumusyoma, kweempwa zibi zyesu alimwi akucinca bukkale bwesu. (Joh. 17:3; Inc. 3:19; Heb. 11:6) Alimwi kuli cintu cimwi ncotweelede kucita katana tutambula Leza mumukwasyi wakwe. Ino ncinzi eeco?

13. Ino nkaambo nzi muntu ncayelede kulyaaba kutegwa abe akati kamukwasyi wabakombi ba Leza?

¹³ Muntu uuzandukide kuli Leza katanaba mumukwasyi wababelesi ba Leza, weelede kusaanguna kumusyomezya Jehova kuti ulilibambide kumubelekela. Ikutegwa mukamvwe kaambo aaka, amuyeeye muntu umwi wamufwida lubomba mucaala akumubweza kuti abe akati kabana bakwe. Bausyi aaba bazibidwe kuti mbantu bali kabotu. Nokuba boobo, kabatana muleta aŋanda mwana ooyu, bayandika kumvwana. Baamba kuti: “Kanditaninga kukubweza ndiyanda kuti undisyomezye kuti unakundiyanda akundilemeka.” Ikuti naa mwana ooyu ulayanda kutobela mulawo ooyu, nceciindi nakonzya kumubweza. Sena kucita boobu tacili kabotu? Mbubwenya buyo, awalo Jehova utambula buyo bantu ibayanda kulyaaba kuli  nguwe. Ibbaibbele lyaamba kuti: “Mutuule mibili yanu, ibe cipaizyo cuumi, cisalala, ciyandisi kuli-Leza.”—Rom. 12:1.

Ikulyaaba Ncitondezyo Caluyando Alusyomo

14. Ino mbuti kulyaaba mbocili citondezyo caluyando?

¹⁴ Ikulyaaba kuli Leza ncitondezyo cakuti tulamuyanda Jehova. Eeci cilakozyanya ambobakonka bakwatana. Sikukwata Munakristo utondezya kuti ulamuyanda mukaintu wakwe kwiinda mukukonka kuti unakusyomeka lyoonse. Eeci ncikonke kumuntu ikutali kukonka kuti uyakumubelekela. Sikukwata Munakristo ulizyi kuti takonzyi kukkala amukaintu wakwe ikuti watamusyomezya kuti uyakumubamba kabotu. Mbubwenya buyo, tatukonzyi kuba mumukwasyi wa Jehova ikuti twatalyaaba kuli nguwe. Aboobo, tulalyaaba kuli Leza akaambo kakuti nokuba kuti tatulondokede, tuyanda kuba mumukwasyi wakwe alimwi tuna kusyomeka kuli nguwe lyoonse.—Mt. 22:37.

15. Ino mbuti kulyaaba mbocili citondezyo calusyomo?

¹⁵ Notulyaaba kuli Leza, tutondezya kuti tuli alusyomo. Ino nkaambo nzi ncocili boobu? Ikumusyoma Jehova citupa kuba masimpe kuti kumvwana a Leza ncintu cibotu kuli ndiswe. (Int. 73:28) Tulizyi kuti tacili cuuba-uba lyoonse ikumutobela Leza akaambo kakuti tupona akati “kabantu bapilingene baleede bamuzukulu uno,” pele tulasyoma kuti Leza uyakutugwasya. (Flp. 2:15; 4:13) Tulizyi kuti tatulondokede, pele tulasyoma kuti Jehova uyakutulekelela nokuba kuti twalubizya. (Amubale Intembauzyo 103:13, 14; Ba-Roma 7:21-25.) Tulasyoma kuti Jehova uyakutulongezya akaambo kakusyomeka kwesu.—Job. 27:5.

Kulyaaba Kuli Leza Kulakkomanisya

16, 17. Ino nkaambo nzi kulyaaba kuli Jehova ncokukkomanisya?

¹⁶ Kulyaaba kuli Jehova kulakkomanisya akaambo kakuti kujatikizya kumubelekela. Jesu wakaamba masimpe naakati: “Kupa kuli coolwe kwiinda kupegwa.” (Inc. 20:35) Jesu cakali kumukkomanisya kupa naakali anyika. Ziindi zimwi tanaakali kulyookezya naa kulya kutegwa agwasye bantu kujana nzila iitola kubuumi. (Joh. 4:34) Jesu wakali kukkomana kubakkomanisya Bausyi. Jesu wakati: “Ndacita lyoonse zintu izimubotela.”—Joh. 8:29; Tus. 27:11.

¹⁷ Aboobo, Jesu wakabatondezya basikumutobela nzila yabuumi iikkomanisya naakati: “Kuti muntu kayanda kunditobela, aliimye, abweze [cisamu cakwe cakupenzyezya] elyo ulanditobela.” (Mt. 16:24) Kucita boobu, kutupa kuti katumvwana a Jehova. Sena kuli uumbi muntu uukonzya kutubikkila maano ngotukonzya kutobela?

18. Ino nkaambo nzi kulyaaba kuli Jehova mbokukkomanisya kwiinda mbotukkomana notucita zyintu zimwi naa notubelekela muntu?

 ¹⁸ Ikulyaaba kuli Jehova akucita zyintu nzyayanda, cilakkomanisya kapati kwiinda mbotukkomana notucita zyintu zimwi naa notubelekela muntu. Mucikozyanyo, bantu banji balabeleka canguzu kutegwa bavwube pele tabakkomani pe. Pele aabo ibalyaaba kuli Jehova balakkomana lyoonse. (Mt. 6:24) Ibulemu mbobajana akaambo kakuba “basimilimonyina Leza” bubapa kukkomana, nokuba kuti tabalyaabide kumulimo pele balilyaabide kuli Leza. (1 Kor. 3:9) Kunyina muntu uukonzya kubalumba akaambo kakulyaaba kwabo pele alikke Leza. Boonse bantu basyomeka kuli nguwe uyakubapa mibili mipya mbuli yabana akubagwasya kukabe kutamani.—Job. 33:25; amubale Ba-Hebrayo 6:10.

19. Ino ncoolwe nzi ncobajana aabo balyaaba kuli Jehova?

¹⁹ Kulyaaba kuli Jehova kupa kuti kamumvwana anguwe. Ibbaibbele lyaamba kuti: “Amuswenenene kuli-Leza, elyo alakwe ulamuswenenena.” (Jak. 4:8; Int. 25:14) Mucibalo citobela, tulalanga-langa ncotukonzya kuba masimpe kuti ncibotu kuba bantu ba Jehova.

Bupanduluzi buyungizidwe

Ino Inga Mwaingula Buti?

• Ino kulyaaba kuli Leza caamba nzi?

• Ino kulyaaba kuli Jehova kutugwasya buti?

• Ino nkaambo nzi Banakristo ncobeelede kulyaaba kuli Jehova?

[Mibuzyo yaciiyo]

[Cifwanikiso icili apeeji 6]

Kuti katupona kweelana akulyaaba kwesu tunakukkomana lyoonse