Jehova Mbwabelesya Muuya Wakwe Ikutegwa Azuzikizye Kuyanda Kwakwe

“Ijwi lyangu lizwa kumulomo wangu . . . liyoozuzikizya makanze aangu akucita kabotu makani ngendalitumina.”—IS. 55:11.

1. Amwaambe kwiindana kuliko akati kabantu baambwa waawa.

KAMUYEEYA kuti bantu bobilo balibambila kuunka kuntu kumwi amootokala. Umwi uliizyi nzila njaya kubelesya. Ooyu uumwi, ulikuzyi nkwaya alimwi ulizizyi nzila azimwi nzyakonzya kubelesya kutegwa asike nkwaya. Ulilibambide kubelesya nzila imbi kweelana acikonzya kucitika. Nzila ziindene eezyi nzyobataabelesye bantu aaba bobile kutondezya mbobaindene kuyeeya. Umwi ulakonzya kuti kacizyi cini ncayanda kucita kaali umwi tacizyi kabotu naa ncayeeya ciya kuzwidilila.

2, 3. (a) Ino kuyanda kwa Jehova kujatikizya nzi, alimwi ino ncinzi ncaakacita nibakabisya ba Adamu a Eva? (b) Ino nkaambo nzi ncotweelede kuzyiba akucita zyintu kweelana akuyanda kwa Jehova?

² Jehova nacita kuyanda kwakwe, ucita buyo zyintu nzyazyi kuti ziya kuzuzikizyigwa. (Ef. 3:11) Eeci cibikkilizya ncaakali kuyanda kuti cicitike kubantu amunyika, ooku nkucinca nyika yoonse kuti ibe paradaiso mwalo muna kuli bantu balondokede bakkala muluumuno alimwi kabakkomene lyoonse. (Matl. 1:28) Ba Adamu a Eva nibakabisya, Jehova cakamucima amane wakabikka bubambe bwakuti kuyanda kwakwe kuzuzikizyigwe. (Amubale Matalikilo 3:15.) Jehova wakakanzide kuti imukaintu wakwe wacikozyanyo uyakuba ‘alunyungu’ naa Mwana, uuya kumunyonyoona Saatani iwakatalisya mapenzi akwaamanizya oonse mapenzi ngaakaleta.—Heb. 2:14; 1 Joh. 3:8.

³ Taaku cintu cili kujulu naa cili anyika icikonzya kulesya makanze aa Leza kuti acitike. (Is. 46:9-11) Ino nkaambo nzi ncotwaambila boobo? Akaambo kakuti muuya uusalala wa  Jehova ulijatikizyidwe. Eezyi nguzu zilasinizya kuti kuyanda kwa Leza kukacitike ncobeni. (Is. 55:10, 11) Tweelede kuzyiba akucita zyintu kweelana akuyanda kwa Leza. Aakuzuzikizigwa makanze aaya, ciya kupa kuti tukabe abuumi butamani. Kuyungizya aliceeci, cilayumya-yumya kubona Jehova mbwaubelesya muuya uusalala. Lino atubone muuya uusalala mbowakali kubeleka kaindi, mboubeleka mazuba aano alimwi ambouya kubeleka kumbele kutegwa ukazuzikizye makanze aa Jehova.

Muuya Uusalala Mbowakali Kubeleka Kaindi

4. Ino mbuti Jehova mbwaakali kuyabwaayubununa makanze aakwe asyoonto-syoonto?

⁴ Kaindi, Jehova wakali kuyabwaayubununa makanze aakwe aasyoonto-syoonto. Kumatalikilo, imakani aa Lunyungu lwakasyomezyegwa, akali aamaseseke. (1 Kor. 2:7) Nikwakainda myaka iili 2,000, Jehova alimwi naakazi kwaamba makani aalunyungu. (Amubale Matalikilo 12:7; 22:15-18.) Jehova wakasyomezya Abrahamu cintu cipati cakali kuya kuzuzikizyigwa kumbele. Imajwi aakuti “mulunyungu lwako” akali kutondezya caantangalala kuti Lunyungu luya kuboola kali muntu, imwana wa Abrahamu. Tulakonzya kusyoma kuti kaambo aaka nikakali kwaambwa, Saatani wakali kulangilila kumwi kalombozya. Cakutadooneka, sinkondonyina ooyu wakali kuyanda kunyonyoona naa kunyonganya zyalani ya Abrahamu kutegwa makanze aa Leza atazwidilili. Pele eeci tiicakali kukonzya kucitika akaambo kakuti muuya uutabonwi wa Leza wakali kubeleka. Ino wakabeleka buti?

5, 6. Ino Jehova wakaubelesya buti muuya wakwe uusalala kutegwa akwabilile bantu ibakali muzyalani mwakazwa Lunyungu?

⁵ Jehova wakabelesya muuya wakwe uusalala ikukwabilila bantu ibakali muzyalani mwakazwa Lunyungu. Jehova wakaambila Abramu (Abrahamu) kuti: “Ndime intobo yako.” (Matl. 15:1) Icisyomezyo eeci tiicakali cabuyo pe. Mucikozyanyo, amubone cakacitika mu 1919 B.C.E. ciindi ba Abrahamu a Sara nibakaakukkala-kkala ku Gerari. Akaambo kakuti tanaakalizyi kuti Sara wakali mukaintu wa Abrahamu, mwami Abimeleki waku Gerari wakali kuyanda kumukwata Sara. Sena Saatani wakali kunyonganya zyintu kabatazyi kutegwa Sara atamuzyalili mwana Abrahamu? Ibbaibbele talyaambi oobu. Pele litwaambila buyo kuti Jehova tanaakacizumizya eeco. Muciloto wakaambila Abimeleki kuti atamujati Sara.—Matl. 20:1-18.

⁶ Eeci tacili nceciindi cilikke Jehova ncaakabakwabilila. Jehova wakamukwabilila Abrahamu amukwasyi wakwe ziindi zinji. (Matl. 12:14-20; 14:13-20; 26:26-29) Kaamba Abrahamu amukwasyi wakwe, sintembauzyo wakati: “[Jehova] taakwe naakazumizya bantu kubapenzya. Wakatapatila bami nkaambo kabo. Wakati, Mutagumi bananike bangu, mutabisizyi basinsimi bangu.”—Int. 105:14, 15.

7. Ino muunzila nzi Jehova mwaakabakwabilila bana Israyeli?

⁷ Kwiinda mumuuya wakwe uusalala, Jehova wakabakwabilila bana Israyeli, molwakazyalilwa Lunyungu. Kabelesya muuya wakwe uusalala, Jehova wakabapa Mulawo bana Israyeli, walo wakapa kuti bukombi bwakasimpe buzumanane akubakwabilila bama Juda kutegwa batasofwaali kumuuya akumubili akuti kabalilemeka. (Kul. 31:18; 2 Kor. 3:3) Muciindi ca Babetesi, Jehova wakapa bantu bamwi nguzu zyakufwutula bana Israyeli kubasinkondonyina. (Bab. 3:9, 10) Katanazyalwa Jesu, walo uuli ncecibeela cipati calunyungu lwa Abrahamu, muuya uusalala nguwakabelesyegwa kukwabilila Jerusalemu, Betelehemu alimwi atempele—zyalo zyakabikkilizyidwe mukuzuzikizyigwa kwabusinsimi bwakali kwaamba Jesu.

8. Ino ncinzi citondezya kuti muuya uusalala wakali kumusololela Mwana wa Leza mubuumi bwakwe amumulimo ngwaakali kucita?

⁸ Muuya uusalala wakali kumusololela Jesu  mubuumi bwakwe amumulimo ngwaakali kucita. Kaubeleka mwida lya Mariya nakalindu, imuuya uusalala wakacita cintu cimwi cigambya citanabwenwe kuzwa kaindi alimwi citakacitiki. Ooyu muuya wakapa kuti imukaintu uutalondokede amite akuzyala Mwana wakalondokede, walo watakajisi mulandu walufwu. (Lk. 1:26-31, 34, 35) Naakazyalwa Jesu, imuuya wakamukwabilila kutegwa atajaigwi kacitanasika ciindi. (Mt. 2:7, 8, 12, 13) Jesu naakali amyaka iili 30, Leza wakamunanika amuuya uusalala, ikumusala kuti akakkale acuuno cabwami ca Davida akumupa mulimo wakukambauka. (Lk. 1:32, 33; 4:16-21) Muuya uusalala wakamupa nguzu zyakucita maleele, mbuli kuponya balwazi, kusanina makamu aabantu alimwi akubusya bafwide. Milimo mipati eeyi yakali kwiiminina zilongezyo nzyotulangila mubulelo bwa Jesu.

9, 10. (a) Ino muuya uusalala wakali kubeleka buti kuli basikwiiya ba Jesu bamumwaanda wamyaka wakusaanguna? (b) Ino nzyintu nzi zyakayubununwa mumwaanda wamyaka wakusaanguna C.E. kujatikizya makanze aa Jehova?

⁹ Kuzwa mu Pentecoste 33 C.E., Jehova wakabelesya muuya wakwe uusalala kunanika bantu bamucibeela cabili calunyungu lwa Abrahamu, ibanji akati kabo tiibakali bamuzyalani ya Abrahamu. (Rom. 8:15-17; Gal. 3:29) Imuuya uusalala wakali kubagwasya basikwiiya ba Jesu bamumwaanda wamyaka wakusaanguna ikuti bakambauke cabusungu alimwi akubapa nguzu zyakucita milimo mipati. (Inc. 1:8; 2:1-4; 1 Kor. 12:7-11) Akaambo kakuti bakatambula zipego zyamuuya, eeci cakayubununa cintu cimwi cipya kutondezya Jehova mbwaakali kuya kuzuzikizya makanze aakwe. Jehova tanaakali kuyanda kuti bantu bazumanane kumukomba munzila njaakatalisyide kaindi yakukombela kutempele yakali mu Jerusalemu. Wakatalisya bubambe bupya bwambungano ya Banakristo. Kuzwa ciindi eeco Jehova ubelesya mbungano yabananike ikuzuzikizya makanze aakwe.

¹⁰ Kukwabilila, kupa nguzu akunanika—eezyi nenzila zisyoonto buyo Jehova mbwaakali kubelesya muuya uusalala kaindi ikutegwa makanze aakwe azuzikizyigwe. Ino mazuba aano? Ino Jehova uubelesya buti muuya wakwe uusalala ikuzuzikizya makanze aakwe? Tweelede kuzyiba, nkaambo tuyanda kucita zyintu kweelana amuuya uusalala. Lino atulange-lange nzila zyone Jehova mbwaubelesya muuya uusalala mazuba aano.

Mboubeleka Muuya Uusalala Mazuba Aano

11. Ino ncinzi citondezya kuti muuya uusalala ulabagwasya bantu ba Leza kuti kabali balondo, alimwi ino inga mwatondezya buti kuti mubelekela aantoomwe amuuya uusalala?

¹¹ Nzila yakusaanguna njakuti imuuya uusalala ugwasya bantu ba Leza kuti kabali balondo. Aabo ibabelekela Jehova kweelana amakanze aakwe beelede kuti kabalilemeka. (Amubale 1 Ba-Korinto 6:9-11.) Bamwi kabatanaba Banakristo bakali kucita zyintu zitali kabotu mbuli bwaamu, bumambe alimwi bakali koonana abaaluminyina. Muzeezo wakucita zibi ulakonzya kukomena kapati. (Jak. 1:14, 15) Pele, ibantu bali boobo ‘bakasanzigwa,’ kutondezya kuti bakacinca bukkale bwabo akumukkomanisya Leza. Ino ncinzi cibagwasya aabo bamuyanda Leza kuti kabaliyumya kutegwa bataciti zyintu zibi? Lugwalo lwa 1 Ba-Korinto 6:11 lwaamba kuti: “Muuya wa-Leza wesu.” Nomuzumanana kulilemeka, mupa kuti muuya uusalala kaumugwasya mubuumi bwanu.

12. (a) Kweelana acilengaano ca Ezekiele, ino Jehova wiisololela buti mbunga yakwe? (b) Ino mbuti mbomukonzya kutondezya kuti mucita zyintu kweelana ancouyanda muuya uusalala?

¹² Nzila yabili njakuti, Jehova ubelesya muuya wakwe uusalala ikusololela mbunga yakwe kuli koonse nkwayanda. Mucilengaano ca Ezekiele, imbunga ya Jehova yakujulu itondezyedwe mbuli nkalaki yalo iizumanana kweenda kutegwa izuzikizye makanze aa Jehova. Ino ncinzi cipa kuti nkalaki eeyi kaiya nkoyeelede kuya? Muuya uusalala. (Ezk. 1: 20, 21) Tweelede kuzyiba kuti imbunga ya Jehova ilijisi zibeela zyobilo, yomwe ili kujulu iimwi ili anyika. Ikuti naa cibeela cakujulu cisololelwa amuuya uusalala nkokuti aceeco caanyika mbubwenya. Kwiinda mukutobela ncoyaamba mbunga ya Leza yaanyika, mutondezya kuti mweendela antoomwe ankalaki ya Jehova yakujulu alimwi akuti mucita zyintu kweelana ancouyanda muuya wakwe uusalala.—Heb. 13:17.

13, 14. (a) Ino mbaani bali “[mu]zyalani elino” njaakaamba Jesu? (b) Amupe cikozyanyo citondezya kuti muuya uusalala ulagwasya mukumunikila kasimpe. (Amubone kabbokesi kakuti: “Sena Mweendela Antoomwe Amumuni?”)

¹³ Nzila yatatu njakuti, Jehova ubelesya muuya uusalala kuti utugwasye kukamvwisya kabotu kasimpe. (Tus. 4:18) Imagazini eeyi yali kubelesyegwa ikuzwa kaindi a “muzike musyomesi uucenjede” kuyubununa kasimpe kamu Bbaibbele. (Mt. 24:45) Mucikozyanyo, amubone mbotukamvwa kaambo kabaabo ibali “[mu]zyalani elino” njaakaamba Jesu. (Amubale Matayo 24:32-34.) Ino wakali kwaamba zyalani iili? Icibalo cakuti, “Ino Kubako kwa Kristo Kwaamba nzi Kulindinywe?” cakapandulula kuti Jesu wakali kwaamba basikwiiya bakwe ibakali kulangilwa kunanikwa amuuya uusalala, tanaakali kwaamba bantu babi. * Basikumutobela Jesu bananike, ibamumwaanda wamyaka wakusaanguna alimwi amazuba aano, mbibaya kuzyibona zitondezyo akuzyiba ncozyaamba—kuti Jesu “uli afwiifwi nikuba kumilyango.”

¹⁴ Ino eeci caamba nzi kulindiswe? Nokuba kuti tatukonzyi kuzyiba naa nciindi cilamfwu buti ncobaya kupona bazyalani eeyi, tweelede kuzyiba zyintu zili mbozibede kujatikizya bbala lyakuti “zyalani” izyakuti: Izyalani yaamba bantu bamisela iindene-indene ibapona aciindi cimwi; taili ilamfwu kapati; alimwi akuti ilamana. (Kul. 1:6) Aboobo, ino mbuti mbotweelede kwaamvwa majwi aa Jesu aakuti “izyalani elino”? Wakali kwaamba kuti bananike ibakali kupona ciindi zitondezyo nizyakatalika kulibonya mu 1914 baya kujanana abananike ibaya kubona mapenzi mapati aakutalika. Izyalani eeyi yakali amatalikilo alimwi iyakuba amamanino. Ikuzuzikizigwa kwazibeela ziindene-indene zyacitondezyo, kutondezya kuti mapenzi mapati ali aafwaafwi. Ikuti mwazumanana kupakamana  akulangila, mutondezya kuti mutobela mumuni uyaabungwengwemuka wakasimpe kamu Bbaibbele alimwi akuti mulasololelwa amuuya wa Leza.—Mk. 13:37.

15. Ino ncinzi citondezya kuti muuya uusalala nguutugwasya kukambauka makani mabotu?

¹⁵ Nzila yane njakuti, muuya uusalala ulatugwasya kuti katukambauka makani mabotu. (Inc. 1:8) Ino ncinzi cimbi cikonzya kupa kuti makani mabotu akambaukwe nyika yoonse? Amuciyeeye buyo eeci. Ambweni muli akati kabaabo bakali ansoni cakuti mwakali kwaamba kuti ‘mebo tandikonzyi kuunka kwaakukambauka kuŋanda aŋanda.’ Pele, lino mulabeleka cabusungu mumulimo wakukambauka. * Bakamboni ba Jehova banji basyomeka bazumanana kukambauka nokuba kuti balakazyigwa naa kupenzyegwa. Muuya uusalala wa Leza olikke nguukonzya kutupa nguzu zyakuliyumya kumapenzi alimwi ulakonzya kutupa kucita zyintu nzyotutakonzyi kucita tolikke. (Mik. 3:8; Mt. 17:20) Kwiinda mukutola lubazu mumulimo wakukambauka, tutondezya kuti tubelekela antoomwe amuuya uusalala.

Mbounakubeleka Muuya Uusalala Kumbele

16. Ino nkaambo nzi ncotukonzya kuzyiba kuti Jehova uyakubakwabilila bantu bakwe lyamapenzi mapati?

¹⁶ Kumbele, Jehova uyakubelesya muuya wakwe uusalala ikuzuzikizya makanze aakwe. Atusaangune kulanga-langa kaambo kakukwabililwa. Mbubwenya mbotwabona kale, Jehova wakabelesya muuya wakwe ooyu kaindi ikukwabilila bana Israyeli—muntu aumwi kumugama, alimwi acisi coonse. Aboobo, tulijisi kaambo kapati katupa kusyoma kuti Leza uyakubelesya muuya wakwe ulaanguzu kapati ikukwabilila bantu bakwe lyamapenzi mapati aaboola. Tatuzyi bwini Jehova mbwaya kutukwabilila aciindi eeco. Muciindi caboobo, tulakonzya kulangila kumbele katuli alusyomo, katuzyi kuti boonse ibamuyanda Jehova tabakasoweki kuli nguwe naa kuti muuya uusalala tuukaalilwi kubakwabilila.—2 Mak. 16:9; Int. 139:7-12.

17. Ino Jehova uyakuubelesya buti muuya wakwe uusalala munyika mpya?

¹⁷ Ino Jehova uyakuubelesya buti muuya wakwe uusalala munyika mpya? Imuuya ooyu nguuya kupa kuti kube mabbuku mapya aaya kujalulwa aciindi eeco. (Ciy. 20:12) Ino ncinzi cinakulembedwe mumabbuku aaya? Cakutadooneka, munakuli zyintu nzyayanda Jehova kuti tucite mumyaka iili cuulu. Sena mulayanda kuti mukazibale zyintu zinakuli mumabbuku aaya? Masimpe ngakuti, tulailangila nyika mpya eeyi. Eelyo kaka eeci cinakukkomanisya kapati ciindi Jehova aakuubelesya muuya wakwe kuzuzikizya makanze ngaya kucita anyika akubantu.

18. Ino ncinzi ncomukanzide kucita?

¹⁸ Tutalubi kuti makanze aa Jehova ayakuzuzikizyigwa, akaambo kakuti ubelesya muuya wakwe uusalala—uuli anguzu kapati mububumbo boonse—kutegwa aazuzikizye. Makanze aaya alamujatikizya. Aboobo, amumulombe Jehova kuti amupe muuya wakwe alimwi mubeleke kweelana ancouyanda muuya ooyu. (Lk. 11:13) Kwiinda mukucita boobu, muyakuba abuumi butamani mu Paradaiso anyika—kweelana amakanze ngaakajisi Jehova kubantu.

Bupanduluzi buyungizidwe

Sena Muciyeeyede?

• Ino muunzila nzi Jehova mwaakabelesya muuya wakwe uusalala kaindi ikuzuzikizya makanze aakwe?

• Ino mbuti Jehova mbwabelesya muuya wakwe mazuba aano?

• Ino mbuti Jehova mbwaya kuubelesya muuya wakwe kumbele kutegwa azuzikizye makanze aakwe?

[Mibuzyo yaciiyo]

Kabbokesi kali apeeji 10]

Sena Mweendela Antoomwe Amumuni?

Jehova wazumanana kubagwasya bantu bakwe kuti bakamvwisye kasimpe kamu Bbaibbele. Ino ntwaambo nzi itwakasalazigwa mu Ngazi Yamulindizi?

▪ Ino ncinzi ncotwiiya kucikozyanyo ca Jesu camimena kujatikizya mbotukozya kukomena kumuuya? (Mt. 13:33)—July 15, 2008, mapeeji 19-20.

▪ Ino ndilili Banakristo ibali alusyomo lwakukkala kujulu nobaya kuleka kwiitwa kuya kujulu?—May 1, 2007, (Chichewa) mapeeji 30-31.

▪ Ino kukomba Jehova “mumuuya”caamba nzi? (Joh. 4:24)—August 1, 2002, peeji 12.

▪ Ino bankamu mpati babelekela kulubazu nzi mutempele? (Ciy. 7:15)—May 1, 2002, (Chichewa) mapeeji 30-31.

▪ Ino kwaandaanizyigwa kwambelele ampongo kuya kucitika lili? (Mt. 25:31-33)—October 15, 1995, mapeeji 18-28