Nobana—amuzumanane Kumubelekela Jehova
Nobana—amuzumanane Kumubelekela Jehova
“Koyeeya Mulengi wako mumazuba aabulombe bwako.”—MUK. 12:1.
1. Ino nkuli nkobakatambwa bana bamu Israyeli?
MYAKA iili 3,500 yainda, imusinsimi wa Jehova Musa wakaambila bapaizi abapati bamu Israyeli kuti: “Amubunganye bantu boonse, baalumi abanakazi abana . . . , kuti baswiilile, baiye, balemeke Jehova Leza wanu akucenjela kubamba majwi oonse aa-Mulao ooyu.” (Dt. 31:12) Amubone bantu ibakaambilwa kuti baswaangane kutegwa bakakombe: ibaalumi, banakazi abana. Masimpe, ibana abalo bakali akati kabaabo ibakaambilwa kuswiilila, kwiiya akutobela malailile aa Jehova.
2. Ino mbuti Jehova mbwaakali kubabikkila maano bakubusi mumbungano ya Banakristo yamumwaanda wamyaka wakusaanguna?
2 Mumwaanda wamyaka wakusaanguna, Jehova wakazumanana kubabikkila maano bana ibakali kumuyoowa. Mucikozyanyo, wakasololela mwaapostolo Paulo kuti abikkilizye malailile aabana mumagwalo amwi ngaakalembela mbungano. (Amubale Ba-Efeso 6:1; Ba-Kolose 3:20.) Banakristo bacili bana ibakaatobela malailile aaya bakazumanana kumubelekela Usyi wakujulu alimwi wakabaleleka.
3. Ino mbuti bana aano mazuba mbobatondezya kuti balayanda kumubelekela Leza?
3 Sena mazuba aano bana balatambwa kumiswaangano kutegwa bamukombe Jehova? Inzya. Aboobo, cilabakkomanisya kapati bantu ba Leza ikubona kuti ibabelesi ba Leza bacili bana munyika yoonse batobela majwi ngaakaamba Paulo aakuti: “Katunga katuyeeyana, katubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, anu kamucenjezyanya twaambo, kamucita obuya lyoonse mbomukubwene kuti buzuba bwa-Kristo buli afwaafwi.” (Heb. 10:24, 25) Kunze lyaboobo, bana banji balakambauka makani mabotu aa Bwami bwa Leza aantoomwe abazyali babo. (Mt. 24:14) Alimwi akaambo kakumuyanda Jehova, ibana banji balalyaaba akubbapatizyigwa amwaka alimwi balalongezyegwa akaambo kakuba basikwiiya ba Kristo.—Mt. 16:24; Mk. 10:29, 30.
Kamukuzumina Kutambwa Ooku Lino
4. Ino ndilili bana nobakonzya kutalika kumubelekela Leza?
4 Lugwalo lwa Mukambausi 12:1 lwaamba kuti: “Koyeeya Mulengi wako mumazuba aabulombe bwako.” Ino mweelede kuba amyaka yongaye kuti mutalike kuswaangana akumubelekela Jehova? Taaku myaka iini iilembedwe mu Magwalo. Aboobo, tamweelede kuyeeya kuti mucili bana akuti tamukonzyi kumuswiilila akumubelekela Jehova. Kufwumbwa naa muli bapati buti, mweelede kukuzumina kutambwa ooku cakufwambaana.
5. Ino mbuti bazyali mbobakonzya kubagwasya bana babo kuti kabacita kabotu kumuuya?
5 Nobanji mwakagwasyigwa abazyali benu kuti kamucita kabotu kumuuya. Kwiinda mukucita boobo, muli mbuli Timoteo iwaambwa mu Bbaibbele. Naakacili mwana, banyina ba Eunike abakaapanyina ba Loisi bakamuyiisya magwalo aasalala. (2 Tim. 3:14, 15) Ambweni, andinywe bazyali benu balamuyiisya Bbaibbele, mulapaila antoomwe, balamutoleezya kumiswaangano yambungano akumiswaangano mipati yabantu ba Leza alimwi amubukambausi. Masimpe, ikumuyiisya kasimpe mukuli mupati ngwaakabapa bazyali benu Jehova. Sena mulabalumba bazyali benu akaambo kakumuyanda akumubikkila maano?—Tus. 23:22.
6. (a) Kweelana a Intembauzyo 110:3, ino nkukomba kuli buti ikumukkomanisya Jehova? (b) Ino ncinzi ncotutiilange-lange lino?
6 Nokuba boobo, nomuyaabukomena, Jehova uyanda kuti “mukasimpikile makani ngaayanda Leza, makani mabotu aatambulika aalondokede” mbubwenya mbwaakacita Timoteo. (Rom. 12:2) Ikuti naa mwacita boobo, munakucita milimo yamumbungano, kutali akaambo kakuti muyanda kukkomanisya bazyali benu, pele munakucita oobo akaambo kakuti muyanda kumubelekela Leza. Ikuti mwamubelekela Jehova cakuliyandila, uyakukkomana. (Int. 110:3) Aboobo, ino mbuti mbomukonzya kutondezya kuti muyanda kuzumanana kumumvwida Jehova akumubelekela? Tulalanga-langa nzila zyotatwe ziyandika kapati zyambomukonzya kucita boobo. Eezyi zyintu nkubala Bbaibbele, kupaila alimwi akulilemeka. Atucilange acimwi calikke.
Amumuzyibe Kabotu Jehova
7. Ino mbuti Jesu mbwaakatondezya cikozyanyo cibotu cakwiiya Magwalo, alimwi ino ncinzi cakamugwasya kucita boobo?
7 Nzila yakusaanguna mbomukonzya kutondezya kuti muyanda kuzumanana kubelekela Jehova njakubala Bbaibbele abuzuba. Mulakonzya kuzizyiba zyintu zyakumuuya kwiinda mukubala Bbaibbele abuzuba. (Mt. 5:3) Jesu wakasiya cikozyanyo. Cimwi ciindi naakajisi myaka yakuzyalwa iili 12, bazyali bakwe bakamujana mutempele, “ulikede akati kabaiyi, ulabaswiilila akubabuzya.” (Lk. 2:44-46) Kacili mwana, Jesu wakali kuyanda kwiiya Magwalo. Ino ncinzi cakamugwasya kucita boobo? Cakutadooneka, bazyali bakwe ba Mariya aba Josefa, bakamugwasya kapati. Bakali babelesi ba Leza, aboobo bakamuyiisya ijwi lya Leza kuzwa kubwana.—Mt. 1:18-20; Lk. 2:41, 51.
8. (a) Ino ndilili bazyali nobeelede kutalika kuyiisya bana Jwi lya Leza? (b) Amwaambe cakacitika citondezya mbociyandika kuyiisya bana kabacili basyoonto.
8 Mbubwenya buyo, bazyali ibamuyoowa Leza mazuba aano balizyi mbociyandika kuyiisya bana kasimpe kamu Bbaibbele kabacili bana. (Dt. 6:6-9) Oobu mbobakacita ba Rubi bacizyi Banakristo, mbwaakazyalilwa buyo mwanaabo wakusaanguna Joseph. Abuzuba, bakali kumubalila mu Bbuku Lyangu lya Makani Aamu Bbaibbele. Naakali kuyaabukomena mwana, bakamugwasya kupeta magwalo. Sena eeci cakamugwasya Joseph? Naakacizyiba kwaambaula, wakatalika kwaamba zyintu nzyaakali kwiiya mubbuku eeli. Alimwi naakaba amyaka yosanwe wakapa makani aakwe aakusaanguna mu Cikolo Camulimo Weendelezyegwa a Leza.
9. Ino nkaambo nzi ncociyandika kwiiya Bbaibbele akuzinzibala kuyeeya nzyomubala?
9 Kutegwa kamucita kabotu kumuuya, nobana mweelede kuba acilengwa cakubala Bbaibbele abuzuba. (Int. 71:17) Ino nkaambo nzi kubala Bbaibbele mbokukonzya kumugwasya kuti mucite kabotu kumuuya? Amubone ncaakaamba Jesu mumupailo kuli Bausyi naakati: “Mboobu buumi ubutamani, kuti bazibe nduwe, Leza mwini-mwini, ooli olike.” (Joh. 17:3) Masimpe, nomuyaabumwiiya Jehova, muya kumuzyiba kabotu mbwabede alimwi eeci ciya kumupa kuti mumuyande kapati. (Heb. 11:27) Aboobo, lyoonse nomubala Bbaibbele, kamucibelesya ciindi kutegwa mumuzyibe Jehova. Amulibuzye kuti: ‘Ino makani aaya andiyiisya nzi kujatikizya Jehova? Ino makani aaya mbuti mbwaatondezya kuti Leza ulandiyanda alimwi ulandibikkila maano?’ Kuyeeya mibuzyo iili boobu kuya kumugwasya kubona Jehova mbwayeeya ambwalimvwa ancayanda kuli ndinywe. (Amubale Tusimpi 2:1-5.) Mbubwenya mbuli Timoteo naakacili mwana, muya kuzisyoma nzyomwiiya mu Magwalo, alimwi eeci ciyakumupa kuti mumubelekele Jehova cakuliyandila.—2 Tim. 3:14.
Mupailo Mboukonzya Kumugwasya Kumuyanda Jehova
10, 11. Ino mbuti mupailo mboukonzya kumugwasya kuzumanana kubelekela Leza?
10 Nzila yabili mbomukonzya kutondezya kuti muyanda kuzumanana kumubelekela Jehova amoyo woonse nkupaila. Kulugwalo lwa Intembauzyo 65:2, tubala kuti: “Webo ooswiilila zikombyo, bantu boonse bayoosika kulinduwe.” Aleelyo ibana Israyeli nibakacili bantu ba Leza basalidwe, ibantu bazwa kuzisi zimbi ibakali kuunka kutempele kwaakupaila Jehova wakali kubatambula. (1 Bam. 8:41, 42) Leza tasali pe. Aabo ibatobela milawo yakwe balasyoma kuti uyakubamvwa. (Tus. 15:8) Masimpe, akati “[ka]bantu boonse” andinywe nobana nkomuli.
11 Mulizyi kuti kutegwa bantu kabamvwana kapati beelede kubandika. Cakutadooneka, mulakkomana kumwaambila mweenzinyoko zyintu nzyomuyeeya alimwi ambomulimvwa. Mbubwenya buyo, kwiinda mukupaila camoyo woonse, mulabandika a Mulengi wanu. (Flp. 4:6, 7) Amumwaambile Jehova mbomulimvwa mbubwenya buyo mbomukonzya kubaambila bazyali benu naa mweenzinyoko. Masimpe ngakuti, mipailo yanu itondezya mbomulimvwa kujatikizya Jehova. Muyakubona kuti mbociyaabukomena cilongwe canu a Jehova, munakupaila mipailo iilimvwisya.
12. (a) Ino nkaambo nzi mipailo iilimvwisya ncoitabikkilizyi buyo majwi? (b) Ino ncinzi ciya kumugwasya kuzyiba kuti Jehova uli afwaafwi andinywe?
12 Pele ncomweelede kuzyiba ncakuti mupailo uulimvwisya taubikkilizyi buyo majwi. Mupailo uuli boobu ubikkilizya mbomulimvwa. Nomupaila amutondezye kuti mulamuyanda Jehova, mulamulemeka alimwi mulamusyoma kapati. Nomubona Jehova mbwaingula mipailo yenu, muya kuzyiba kuti masimpe “Jehova uli kufwaafwi kuliboonse bamwiita, boonse bamwiita calusinizyo.” (Int. 145:18) Masimpe, Jehova uyakuswena kuli ndinywe, akumugwasya kuti mumukazye Diabolosi akusala kabotu nzyomucita mubuumi.—Amubale Jakobo 4:7, 8.
13. (a) Ino mbuti mucizyi umwi mbwaakagwasyigwa akaambo kakuba mweenzinyina Leza? (b) Ikuti kamuli beenzinyina Leza, ino mbuti mbokumugwasya kuti mutayungwi abeenzinyoko?
13 Amubone Cherie mbwaakagwasyigwa akaambo kakumuyanda Jehova. Kucikolo, wakapegwa bulumbu akaambo kakuti wakacita kabotu mumusunko alimwi akuti wakali kubainda boonse muzisobano. Naakamanizya cikolo, wakasalwa kuti aunke kucikolo cipati. Cherie waamba kuti: “Eeli lyakali sunko lipati akaambo kakuti bamayi abasicikoloma bakali kundisinikizya kuti ndizumine.” Pele wakalizyi kuti kuunka kucikolo cipati kuyandika ciindi cinji cakulibambila zyakucikolo alimwi azisobano. Lino eeci inga camupa kuti atajani ciindi cakubelekela Jehova. Ino ncinzi ncaakacita Cherie? Waamba kuti: “Nindakapaila kuli Jehova, ndakakaka kuunka kucikolo eeci mpoonya ndakatalika bupainiya bwaciindi coonse.” Uno mwaka ngwasanu kabeleka kali mupainiya. Waamba kuti: “Tandityompedwe kuti tiindakaunka kucikolo eeci, nkaambo ndilikkomene kuti ndakasala kucita cintu cimukkomanisya Jehova. Masimpe ngakuti, ikuti mwabikka Bwami bwa Leza mubusena bwakutaanguna, zyintu zimbi zyoonse ziya kuyungizyigwa kuli ndinywe.”—Mt. 6:33.
Kulilemeka Kutondezya Kuti Mulasalala “Mumoyo”
14. Ino nkaambo nzi Jehova ncayandila kuti katulilemeka kabotu?
14 Nzila yatatu mbomukonzya kutondezya kuti mulayanda kubelekela Jehova njakulilemeka. Jehova ulabalongezya bakubusi bazumanana kulilemeka. (Amubale Intembauzyo 24:3-5.) Samuele naakacili mwana wakakaka kulilemeka mbuli mbobakali kulilemeka bana ba Eli Imupaizi Mupati. Boonse bantu bakamubona mbwaakali kulilemeka. Ibbaibbele lyaamba kuti: “Nkabela mwana Samuele wakali kuya bukula akubota kumeso aa-Jehova akumeso aabantu.”—1 Sam. 2:26.
15. Ino ntwaambo nzi tumwi tumupa kuti kamulilemeka?
15 Tukkala munyika muli bantu basikuliyanda, basikakomokomo, batamvwi bamawisi, batalumbi, batakombi, basimfundiilili, abasiluvuya lwakutaminizya, basikulisumpula, bayandisya misalo yaansi kwiinda Leza—ikwaamba buyo zisyoonto nzyaakabandauka Paulo. (2 Tim. 3:1-5) Nokuba boobo, mulakonzya kuzumanana kulilemeka nokuba kuti azyintu zibi zilimuzingulukide. Aboobo, lyoonse nomucita zyintu zili kabotu, mutondezya kuti muli kulubazu lwa Jehova. (Job. 2:3, 4) Andinywe mulakkomana nomuzyiba kuti mulaitwa a Jehova naamba kuti: “Songwaala, mwanaangu, ukondezye moyo wangu, kuti mbe aluvwiilo kuliyooyo uundisampaula.” (Tus. 27:11) Kunze lyaboobo, ikuzyiba kuti Jehova ulamukkomanina ciya kumugwasya kuti muzumanane kumubelekela.
16. Ino mbuti mucizyi umwi mbwaakamukkomanisya Jehova?
16 Naakacili mukubusi, Carol mucizyi umwi Munakristo wakali kutobela njiisyo zyamu Bbaibbele naakacili kucikolo alimwi bantu boonse bakali kumubona mbwaakali kulilemeka. Ino ncinzi cakamucitikila? Basicikolonyina bakali kumufwubaazya akaambo kakuti ncaakaiya mu Bbaibbele tiicakali kumuzumizya kuti atole lubazu mukusekelela mazuba aakulyookezya. Zimwi ziindi, mumazuba aayo wakali kuba acoolwe cakwaambila bamwi nzyasyoma. Nokwakainda myaka minji, Carol wakatambula lugwalo kuzwa kumweenzinyina ngobakali kwiiya limwi walo iwakalemba kuti: “Lyoonse ndakali kuyanda kuti ndikulumbe. Mbowakali kulilemeka notwakacili bana ambookali kucita mumazuba aakulyookezya, zyakali kulibonya kubantu boonse kuti uli Munakristo. Ndiwe ngundakataanguna kuzyiba akati ka Bakamboni ba Jehova.” Cikozyanyo ca Carol cakamugwasya sicikolonyina ooyu cakuti mukuya kwaciindi wakatalika kwiiya Bbaibbele. Wakamulembela Carol kuti wakabbapatizyigwa myaka 40 yainda. Mbubwenya mbuli Carol, anywebo nobakubusi nomuzumanana kutobela njiisyo zyamu Bbaibbele mulakonzya kukulwaizya bamwi kuti bamuzyibe Jehova.
Bakubusi Mbobamutembaula Jehova
17, 18. (a) Ino mulimvwa buti nomubona bana mumbungano yenu? (b) Ino ncinzi Leza ncababambide bakubusi bamuyoowa?
17 Toonse notuli mumbunga ya Jehova nyika yoonse mbwiizulwa, tulakkomana kubona bakubusi banji mbotukomba limwi. Bakubusi aaba lusyomo lwabo lulayuma kwiinda mukubala Bbaibbele abuzuba, kupaila lyoonse alimwi akulilemeka kweelana akuyanda kwa Leza. Bakubusi aaba ibacita boobu balabakkomanisya bazyali babo abantu ba Jehova boonse.—Tus. 23:24, 25.
18 Kumbele, ibana boonse basyomeka baya kuba akati kabaabo ibaya kufwutuka akukkala munyika mpya yakasyomezyegwa ya Leza. (Ciy. 7:9, 14) Kuciindi eeci, baya kubona zyintu zinji zibotu nobaya buzumanana kusyomeka kuli Jehova alimwi baya kumutembaula lyoonse kukabe kutamani.—Int. 148:12, 13.
Sena Inga Mwapandulula?
• Ino mbuti bana mbobakonzya kutola lubazu mubukombi bwakasimpe aano mazuba?
• Ikutegwa mugwasyigwe nomubala Bbaibbele, ino nkaambo nzi ncomuyandika kuzinzibala kuyeeya?
• Ino mbuti mupailo mbuukonzya kumugwasya kuti kamumvwana a Jehova?
• Ino kulilemeka kabotu kwa Munakristo kugwasya buti?
[Mibuzyo yaciiyo]
[Cifwanikiso icili apeeji 5]
Sena kubala Bbaibbele ncilengwa cenu?