Amukatalusyigwe Azyintu Zyakumuuya

“Amulikulike ijokwe lyangu . . . , lino mulakatulukwa mumyoyo yanu.”—MT. 11:29.

1. Ino mbubambe nzi mbwaakacita Leza a Cilundu ca Sinai, alimwi nkaambo nzi?

CIZUMINANO ca Mulawo nicakatalisyigwa a Cilundu ca Sinai cakali kubikkilizya kusekelela buzuba bwa Sabata. Ikwiinda muli Musa mwaambilizi wakwe, Jehova wakaambila cisi ca Israyeli kuti: “Mazuba aali musanu abumwi komana milimo yako, pele mubuzuba bwamusanu aabili ulyokezye, kuti basune bako ambongolo zyako zilyokezye, abalo bana babalanda bako basimbi abeenzu boonse bakatulukwe.” (Kul. 23:12) Inzya akaambo kakubabikkila maano aabo batobela Mulawo, Jehova wakababikkila buzuba bwakulyookezya kutegwa “bakatalukwe.”

2. Ino bana Israyeli bakagwasyigwa buti akaambo kakubamba Sabata?

² Sena buzuba bwa Sabata bwakali buyo bwakulyookezya? Peepe, mubuzuba oobu bana Israyeli bakeelede kukomba Jehova. Kubamba Sabata cakali kupa kuti mitwe yamukwasyi bajane ciindi cakuyiisya mukwasyi kutegwa “babambe inzila ya-Jehova akucita bululami.” (Matl. 18:19) Alimwi cakali kubapa ciindi cakuti banamukwasyi abeenzinyina kabaizya akuyeeya zyintu nzyaakacita Jehova akulikondelezya. (Is. 58:13, 14) Icipati ncakuti Sabata eeyi yakali kwaamba ciindi nokuya kuba kulyookezya ncobeni mu Bulelo bwa Kristo bwa Myaka Iili Cuulu. (Rom. 8:21) Ino mbuti aano mazuba? Ino nkuli Banakristo bakasimpe ibayanda kucita kuyanda kwa Jehova nkobakonzya kulyookezya alimwi munzila iili buti?

Amukatalukwe Nomuli Akati ka Banakristonyoko

3. Ino muunzila nzi Banakristo bakusaanguna mobakali kugwasyanya, alimwi ncinzi cakacitika?

³ Mwaapostolo Paulo wakaamba kuti imbungano ya Banakristo “ngomusemu, alimwi ncecisiko calusinizyo.” (1 Tim. 3:15) Banakristo bakusaanguna bakagwasyigwa kapati kwiinda mukukulwaizyanya akuyakana. (Ef. 4:11, 12, 16) Naakali ku Efeso, Paulo wakakulwaizyigwa nibakali kumuswaya bantu bamumbungano yaku Korinto. Amubone mbwaakagwasyigwa. Paulo wakaamba kuti: “Ndakondwa kuti basika ba-Sitefana a-Fortunato a-Akayiko, . . . nkaambo balatontonzya moyo wangu.” (1 Kor. 16:17, 18) Mbubwenya buyo, Tito naakaunka ku Korinto kwaakubelekela bakwesu, Paulo wakabalembela bamumbungano eeyi kuti: “Moyo wakwe wakatontozegwa kulindinywe nyoonse.” (2 Kor. 7:13) Mazuba aano, abalo Bakamboni ba Jehova balakatalukwa kwiinda mukuyanzana a Banakristonyina.

4. Ino miswaangano yambungano itukatalusya buti?

⁴ Mulizyi kuti miswaangano yambungano ilakkomanisya. Kumiswaangano eeyi ‘tulayumizyanya mulusyomo.’ (Baloma 1:12, BT) Bakwesu abacizyi Banakristo mbeenzuma ncobeni alimwi tulabalemeka akubayanda. Alimwi tulakkomana akuumbulizyigwa notubungana ambabo kumiswaangano lyoonse.—Flm. 7.

5. Ino mbuti mbotukonzya kukatalusyanya kumiswaangano mipati?

 ⁵ Akumbi nkotukatalukwa nkuumiswaangano yacooko, yabbazu ayaalubazu. Kunze aakutupa meenda aabuumi aazwa mu Jwi lya Leza Bbaibbele, imiswaangano mipati eeyi itupa coolwe ‘cakujalula myoyo’ notuyanzana. (2 Kor. 6:12, 13) Ino kuti katuli aansoni alimwi kacitukatazya kubandika abantu? Inzila yomwe mbotukonzya kuzyibana abakwesu abacizyi nkulyaaba kubeleka kumiswaangano mipati. Nibakamana kubeleka kumuswaangano wamasi, mucizyi umwi wakati: “Bantu banji bakaliko tiindakabazyi, ndakazyi buyo bamukwasyi wangu abeenzuma basyoonto. Pele nitwakali kusalazya, ndakabazyiba bakwesu abacizyi banji. Cakali kukkomanisya kapati.”

6. Ino ninzila nzi yomwe njotukonzya kukatalusyigwa notulyookezya?

⁶ Bana Israyeli bakali kuunka ku Jerusalemu kukukomba kumapobwe otatwe aakali kucitika amwaka. (Kul. 34:23) Eeci cakali kwaamba kuti basiye myuunda azintoolo zyabo akweenda amaulu mazuba manji. Nokuba boobo, kuunka kutempele cakali ‘kukondelezya kapati’ akaambo kakuti aabo ibakaliko “bakali kutembaula Jehova.” (2 Mak. 30:21) Aalo mazuba aano, babelesi ba Jehova banji balakkomana nobaunka amukwasyi wabo kukuswaya ku Bbeteli, ofesi yamutabi ya Bakamboni ba Jehova iili mucisi cabo. Sena inga tamukonzyi kuswaya kumutabi mwaakujana ciindi cakulyookezya?

7. (a) Ino kulikondelezya inga kwatugwasya buti? (b) Ino ncinzi cikonzya kupa kuti tukkomane akuyakana ciindi notulyookezya?

⁷ Kuba antoomwe amukwasyi alimwi abeenzuma notulikondelezya acalo cilakonzya kutukulwaizya. Mwami musongo Solomoni wakaamba kuti: “Taakwe cintu cibotu kwiinda eci: muntu alye akunywa akulikondezya mumilimo yakwe.” (Muk. 2:24) Notulikondelezya tatukatalusyigwi buyo pele citupa kuyumya cilongwe cesu a Banakristoma akubazyiba  kabotu. Kutegwa tukkomane akuyakana aciindi eeci, inga cagwasya kuti twaita bantu basyoonto mbotukonzya kulanganya, ikapati kuti kakuli bukoko.

Mulimo Wakukambauka Ulatukakatalusya

8, 9. (a) Amwaambe kwiindana kuliko akati kamulumbe wa Jesu awa balembi aba Farisi. (b) Ino tugwasyigwa buti notukambauka kasimpe kamu Bbaibbele?

⁸ Jesu wakali musungu mumulimo wakukambauka, alimwi wakabakulwaizya basikwiiya bakwe kuti abalo kabacita mbweenya oobo. Eeci cilalibonya mumajwi ngaakaamba aakuti: “Kutebula kwavula, batebuzi bacea.” (Mt. 9:37, 38) Mulumbe ngwaakayiisya Jesu wakali kukatalusya kapati; akali “makani mabotu.” (Mt. 4:23; 24:14) Eeci cakaliindene kapati amilawo iiminya ba Farisi njobakababikkila bantu.—Amubale Matayo 23:4, 23, 24.

⁹ Notubakambaukila bamwi mulumbe wa Bwami, tulabakatalusya kumuuya alimwi andiswe cilatugwasya kumvwisya akuyandisya kasimpe kamu Bbaibbele. Sintembauzyo wakaamba kuti: “Amumutembaule [Jehova], ncibotu kwiimbila Leza wesu, cilabotezya.” (Intembauzyo 147:1, BT) Amuyungizye lukkomano kwiinda mukutembaula Jehova nomukambaukila bamwi.

10. Sena kuzwidilila kwesu mumulimo kuyeeme ambobautambula bantu mulumbe wesu? Amupandulule.

¹⁰ Masimpe ngakuti, muzilawo zimwi bantu balaatambula kapati makani mabotu kwiinda muzilawo zimbi. (Amubale Incito 18:1, 5-8.) Ikuti naa mukkala mucilawo bantu mobatautambuli kapati mulumbe wa Bwami, amubikkile buyo maano kuzyintu zibotu nzyomucita mumulimo. Amuzyibe kuti mulimo ngomucita nomuzumanana kwaambilizya zyina lya Jehova tuuli wabuyo. (1 Kor. 15:58) Kuyungizya waawo, kuzwidilila kwesu mumulimo takuyeeme ambobaatambula bantu makani mabotu. Tulakonzya kusinizya kuti Jehova uyakubapa coolwe cakuumvwa mulumbe wa Bwami bantu bakonzya kuutambula.—Joh. 6:44.

Kukomba Mumukwasyi Kulakatalusya

11. Ino mukuli nzi Jehova ngwaakabapa bazyali, alimwi mbuti mbobakonzya kuucita?

¹¹ Bazyali babelekela Leza bajisi mukuli wakuyiisya bana babo kujatikizya Jehova anzila zyakwe. (Dt. 11:18, 19) Ikuti naa muli bazyali, sena mulabikka ciindi cakuyiisya bana banu kujatikizya Taateesu wakujulu uutuyanda? Kutegwa muucite mulimo ooyu uuyandika kapati akubapa nzyobayandika banamukwasyi, Jehova watubambila cakulya cakumuuya ciyaka kwiinda mumabbuku, mamagazini, mavidiyo, ma CD amateepu.

12, 13. (a) Ino mbuti mikwasyi mboikonzya kugwasyigwa kububambe bwa Kukomba Mumukwasyi? (b) Ino mbuti bazyali mbobakonzya kubona kuti kukomba mumukwasyi kulakatalusya?

¹² Kuyungizya waawo, muzike musyomesi uucenjede wabikka bubambe bwa Kukomba Mumukwasyi. Eeci nciindi cibikkidwe ambali ansondo cakuti banamukwasyi kabacita ciiyo ca Bbaibbele. Banji bajana kuti bubambe oobu bwabakamantanya akubapa kuti kabamvwana alimwi bwapa kuti cilongwe cabo a Jehova ciyume. Pele ino mbuti bazyali mbobakonzya kubona kuti kukomba mumukwasyi inga kwabakatalusya kumuuya?

¹³ Kukomba Mumukwasyi kweelede kuti kakunoneezya. Tukomba Leza uukkomene, alimwi uyanda kuti katukkomana notumukomba. (1 Tim. 1:11; Flp. 4:4) Kuba abuzuba abumwi bwakubandika kasimpe kamu Bbaibbele kulakonzya kutugwasya kapati. Bazyali balakonzya kucinca-cinca nzila nzyobabelesya kuyiisya bana babo. Mucikozyanyo, mumukwasyi umwi bakaambila mwanaabo musankwa Brandon, kuti ape lipooti lijisi mutwe wakuti: “Ino Nkaambo Nzi Saatani Ncaitwa Kuti Ninzoka mu Bbaibbele?” Kaambo aaka kakamukatazya kapati  Brandon akaambo kakuti ulaziyanda nzoka aboobo wakanyema kumvwa kuti ziyeeyelwa kuba mbuli Saatani. Mumikwasyi imwi zimwi ziindi bacita zisobano zyamu Bbaibbele, umwi aumwi wamumukwasyi kaiminina muntu ngwabala mu Bbaibbele, naa kusobana buya zibeela eezyi zyaambwa. Nzila eezyi zyakuyiisya tazikkomanisyi buyo pele zipa kuti bana kababikkilizyigwa mububambe oobu, kutegwa njiisyo zyamu Bbaibbele zibanjile mumoyo. *

Mutanoociti Zyintu Zikonzya Kumulemya

14, 15. (a) Ino nkaambo nzi mapenzi akulibilika ncozyavwula mazuba aano aamamanino? (b) Ino mapenzi nzi aambi aakonzya kutucitikila?

¹⁴ Bantu balalibilika kapati mazuba aano aamamanino aabweende bwazyintu bubyaabi oobu. Tuulunzuma twabantu tababeleki alimwi bamwi bajisi penzi lyakubula mali. Nibaba baabo babeleka balimvwa kuti mali ngobavwola masyoonto cakuti taakkwani kuula ziyandika mumukwasyi. (Amukozyanyisye Hagai 1:4-6.) Basitwaambo twacisi abasololi bamwi balibonya kukatazyigwa nobasola kumana manyongwe aaletwa azigwebenga alimwi amapenzi aambi. Banji balapenga mumizeezo akaambo kakutalondoka kwabo.—Int. 38:4.

¹⁵ Banakristo bakasimpe abalo balaba amapenzi aaletwa anyika eeyi ya Saatani. (1 Joh. 5:19) Zimwi ziindi, basikwiiya ba Kristo alimwi balakonzya kupenga akaambo kakuzumanana kusyomeka kuli Jehova. Jesu wakaamba kuti: “Kuti bakandipenzya mebo, bayoomupenzya anywebo.” (Joh. 15:20) Nokuba boobo, nokuba kuti tulapenzyegwa, tatulekelezyegwi pe. (2 Kor. 4:9) Ino nkaambo nzi ncocili boobo?

16. Ino ncinzi cikonzya kutugwasya kukkomana lyoonse?

¹⁶ Jesu wakati: “Amuboole kulindime nyoonse nomukatede nomulemenwa, ndime enti kamulemunune.” (Mt. 11:28) Kwiinda mukuba alusyomo mububambe bwacinunuzyo ca Kristo, tulibikka mumaanza aa Jehova. Notucita boobu, tulapegwa “nguzu zigambya.” (2 Kor. 4:7) Muuya wa Leza “mugwasyi” alimwi ulayumya lusyomo lwesu kapati kutegwa tutakonzyi buyo kuliyumya mumasukusyo amumapenzi aatucitikila, pele akuti katukkomene.—Joh. 14:26; Jak. 1:2-4.

17, 18. (a) Ino tweelede kulikwabilila kumuuya uuli buti? (b) Ino ncinzi cikonzya kucitika ikuti katubikkila maano kukulikondelezya?

¹⁷ Banakristo beni-beni mazuba aano bayandika kulikwabilila kutegwa batayungwi amuuya wanyika eeyi uupa kuti bantu kabayanda buyo kulikkomanisya. (Amubale Ba-Efeso 2:2-5.) Buyo-buyo inga twacegwa “[a]zisusi zyanyama niziba zisusi zyameso nikuba kulisumpula kwabuumi.” (1 Joh. 2:16) Zimwi ziindi inga twalicenga kuti kutobela zisusi zyanyama kulakatalusya. (Rom. 8:6) Mucikozyanyo, bantu bamwi nobasola kulikondelezya, babelesya misamu iikola akuciindizya kunywa bukoko, kweebelela zyintu ziletela muzeezo wakoonana, kucita zisobano zikonzya kuleta ntenda naa zyintu ziindene-indene zitali kabotu. Saatani ubelesya “meneeno” aakwe kucenga bantu kuti balimvwe mbuli kuti balakatalusyigwa.—Ef. 6:11.

 ¹⁸ Masimpe, tacilubide kulya, kunywa akulikondelezya kuli kabotu ikuti naa tiimwaciindizya. Nokuba boobo, eezyi tazyeelede kuba zyintu ziyandika kapati mubuumi bwesu. Kulijata muzyintu eezyi kulayandika, ikapati akaambo kamazuba ngotupona. Zyintu nzyotuyandisya kucita zilakonzya kutulemya cakuti twaba “batolo nanka kubula micelo mukuzibisya Mwami wesu Jesu Kristo.”—2 Pet. 1:8.

19, 20. Ino kukatalukwa kwini-kwini inga twakujana buti?

¹⁹ Notuyeeya kweelana amilawo ya Jehova, tulazyiba kuti kulikondelezya kuli munyika eeyi nkwakaindi kasyoonto buyo. Musa wakalikazyi kaambo aaka, andiswe mbubwenya tulikazyi. (Heb. 11:25) Masimpe ngakuti kulikatalusya kwini-kwini , kwalo ikukkomanisya kapati nkooko ikuboola akaambo kakucita kuyanda kwa Taateesu wakujulu.—Mt. 5:6.

²⁰ Atuzumanane kukatalusyigwa azyintu zyakumuuya. Notucita boobo, “[tula]kazya kasampusampu azisusi zibi zyaansi ano . . . akulindila eco coolwe ncotulangila, nkokuti kupompa kwabulemu kwa-Leza wesu mupati, Mufutuli wesu Jesu Kristo.” (Tit. 2:12, 13) Aboobo atuzumanane kuba mujoko lya Jesu kwiinda mukulibombya kubweendelezi bwakwe. Kwiinda mukucita boobo, tuyoojana lukkomano lwini-lwini akukatalusyigwa.

Bupanduluzi buyungizidwe

Ino Inga Mwaingula Buti?

• Ino mbuti bantu ba Jehova mbobakatalusyigwa mazuba aano?

• Ino mbuti mulimo wakukambauka mboutukatalusya abantu mbotukambaukila?

• Ino mbuti mitwe yamukwasyi mboikonzya kubona kuti kukomba mumukwasyi kulakatalusya?

• Ino nzyintu nzi zitulemya kumuuya?

[Mibuzyo yaciiyo]

[Zifwanikiso izili apeeji 26]

Kwiinda mukuba mujoko lya Jesu, tulajana zyintu zinji zikatalusya