Amube Basungu Kubukombi Bwakasimpe

“Mulimo wakutebula mupati, pele basimilimo mbasyoonto.”—MT. 9:37.

1. Ino kuti cintu kaciyandika kapati caamba nzi?

MUJISI lugwalo luyandika kupegwa kumuntu umwi kalitana bbila. Ino inga mwacita buti? Mwalulemba kuti “LULAYANDIKA KAPATI.” Muli munzila kuya kumuswaangano pele mwamuka. Ino inga mwacita buti? Mwaambila namutekenya kuti, “Ndalomba kuti mufwambaane; lugwalo oolu LULAYANDIKA KAPATI.” Masimpe, kuti kamujisi mulimo umwi ngomuyanda kuti ucitwe amane mwabona kuti ciindi camana, mulalibilika. Mulakopana mumoyo alimwi mulafwambaana kucita zyintu. Eeci cilayandika kapati.

2. Ino mulimo nzi uyandika kapati ngobacita Banakristo mazuba aano?

² Ku Banakristo bakasimpe mazuba aano, kwiina cintu ciyandika kapati kunze lya kukambauka makani mabotu a Bwami akugwasya bantu bamunyika yoonse kuti babe basikwiiya. (Mt. 24:14; 28:19, 20) Kaamba majwi aa Jesu, sikwiiya Marko wakalemba kuti mulimo ooyu weelede “kusaanguna” mamanino katanasika. (Mk. 13:10) Oobu mboceelede kuba. Jesu wakaamba kuti: “Mulimo wakutebula mupati, pele basimilimo mbasyoonto.” Ciindi cakutebula casika, aboobo mweelede kutebula cilimo kacitanainda.—Mt. 9:37.

3. Ino ncinzi bamwi ncibacita kutegwa bakambauke cakufwambaana?

³ Akaambo kakuti mulimo wakukambauka ulayandika kapati kulindiswe, tweelede kuubikkila maano. Bakwesu abacizyi banji balacita oobu. Bamwi baubya-ubya bukkale bwabo kutegwa batalike kucita mulimo waciindi coonse mbuli bupainiya, bumisyinali naa kubeleka ku Mutabi. Baliimya kuzyintu zinji alimwi balajana buyumu-yumu. Pesi balalongezyegwa a Jehova. Balatukkomanisya kapati. (Amubale Luka 18:28-30.) Bamwi batakonzyi kucita mulimo waciindi coonse balabeleka kapati mumulimo wakugwasya bantu kuti bakafwutuke eeci calo cibikkilizya kugwasya bana babo kuti bakafwutuke.—Dt. 6:6, 7.

4. Ino ncinzi cikonzya kupa bamwi kuti baleke kubeleka cakufwambaana?

⁴ Mbuli mbotwabona kale tuyandika kubeleka cakufwambaana kuti naa twabona kuti ciindi camana. Tupona mumazuba amamanino alimwi cilalibonya—Mumagwalo azyintu zyakali kucitika kaindi—zilatondezya oobu. (Mt. 24:3, 33; 2 Ti. 3:1-5) Nokuba boobo, kunyina uuzyi ciindi mamanino naayakusika. Nakali kupandulula “citondezyo” citondezya “mamanino abweende bwazyintu” Jesu wakaamba kuti: “Kujatikizya buzuba oobo alimwi aciindi, kunyina uuzizyi pe, nobaba bangelo kujulu naba Mwana, pele Taata alikke.” (Mt. 24:36) Akaambo kaceeci, cilakonzya kubakatazya bamwi kubona kuti ciindi camana kapati kuti balindila kwaciindi cilamfwu. (Tus. 13:12) Sena kuli ziindi nzyomulimvwa boobo? Ino ncinzi cikonzya kutugwasya kutegwa tube naa tuzumanane kufwaambaana kucita mulimo Jehova Leza a Jesu Kristo ngobayanda kuti tucite mazuba aano?

Atulange Jesu Icikozyanyo Cesu

5. Ino Jesu wakatondezya buti kuti mulimo wakukambauka ulayandika kubeleka cakufwambaana?

⁵ Abantu boonse bakatondezya kuti mulimo wa Leza uyandika kubeleka cakufwambaana ngu Jesu Kristo. Ncaakali kucitila  boobo ncakuti wakalijisi buyo myaka yotatwe acisela kucita zyoonse nzyakali kuyanda kucita. Nokuba boobo, Jesu wakazuzikizya zyintu zinji kujatikizya bukombi bwakasimpe kwiinda bantu boonse. Wakalizyibya izyina lya Bausyi kubantu ancibakali kuyanda kucita, wakakambauka makani mabotu a Bwami, wakabayubununa basololi bazikombelo bakali kuupa-upa bantu ameso anjiisyo zyabo zyakubeja alimwi wakabulemeka bweendelezi bwa Jehova kusikila ciindi naakafwa. Wakalyaaba kwiisya bantu, kubagwasya alimwi akubaponya kufwumbwa nkwaakaunka. (Mt. 9:35) Jesu wakazuzikizya zyintu zinji muciindi cisyoonto. Jesu wakabeleka canguzu.—Joh. 18:37.

6. Ino ncinzi Jesu ncaakali kubikkila maano kapati mubuumi bwakwe?

⁶ Ino ncinzi cakapa kuti Jesu kabeleka cakutaleka? Kweelana abusinsimi bwa Daniele, Jesu wakalizyi ciindi cini ncajisi kweelana abubambe bwa Jehova. (Dan. 9:27) Aboobo, mbuli mbukwaambwa kale, mulimo wakwe anyika wakeelede kumana kumamanino a “cisela cansondo yomwe,” naa kwainda myaka yotatwe acisela. Mbwaakanjilila buyo mu Jerusalemu mu 33 C.E., Jesu wakaamba kuti: “Casika ciindi cakuti Mwana wamuntu alemekwe.” (Joh. 12:23) Nokuba kuti Jesu wakalizyi kuti lufwu lwakwe lwakali afwaafwi, aka takali nkakaambo kakamupa kubeleka canguzu mubuumi bwakwe. Muciindi caboobo, wakabelesya ciindi coonse ncaakajisi kucita mulimo wa Bausyi akutondezya kuti wakali kubayanda bantunyina. Eeci cakamupa kuti abunganye akwiiyiisya basikwiiya bakwe akubatuma mumuunda kukukambauka. Wakacita oobo kutegwa bazumanane kucita mulimo ngwaakatalika alimwi akuti bayakuzuzikizya zyintu zipati kapati.—Amubale Johane 14:12.

7, 8. Ino basikwiiya bakacita buti Jesu naakali kutanda basimakwebo atempele alimwi ino ninzi Jesu ncaakacitila boobo?

⁷ Kuli cintu comwe mubuumi bwa Jesu cakatondezya busungu mbwaakajisi. Kwakali kumatalikilo kwamulimo wakwe, ciindi ca pobwe Lyakwiindilila mu 30 C.E. Jesu abasikwiiya bakwe bakainka ku Jerusalemu oko kwalo nkubakaakujana “baabo bakali kusambala ŋombe, mbelele, nkwilimba alimwi abasikucinca mali kabakkede muzyuuno zyabo” mutempele. Ino Jesu wakacita buti alimwi ino ncinzi ncobakaiya basikwiiya bakwe?—Amubale Johane 2:13-17.

⁸ Ncaakacita akwaamba Jesu aciindi eeci cakayeezya basikwiiya bakwe majwi abusinsimi ngaakaamba sintembauzyo Davida naakati: “Busungu bwakuŋanda yako bwandilya.” (Int. 69:9) Ino nkaambo nzi? Akaambo kakuti Jesu ncaakacita cakali kukonzya kumuletela mapenzi. Beendelezi ba tempele—bapaizi, balembi abamwi bakali kwaakkomanina makwebo aakali kucitika atempele. Akaambo kancaakacita Jesu wakabasinkondonyina  abeendelezi batempele. Basikwiiya bakali bonena mbwaakali musungu kubukombi bwakasimpe. Ino busungu ninzi? Sena ciliindene acintu ciyandika kapati?

Kweendelana Kuliko Akati Kakufwambaana Abusungu

9. Ino inga mwabupandulula buti busungu?

⁹ Ibbuku limwi lipandulula mabala lyaamba bbala lya “busungu” kuti “nkubeleka canguzu alimwi akuyandisya kucita cimwi cintu,” alimwi eeli bbala ndemunya lilakonzya kwaamba kuba aluyandisisyo mucintu cimwi. Masimpe, mabala aya alakonzya kupandulula mbwaakali kuucita mulimo wamumuunda Jesu. Mumyaambo iimwi ibbala lya “busungu” lyaamba kupya moyo. Nkakaambo kaako basikwiiya ncobakayeeya majwi ngaakamba Davida nobakabona ncaakacita Jesu kutempele. Ino ncinzi cakapa kuti Jesu apye moyo akumupa kuti acite ncaakacita?

10. Ino bbala lya “busungu” lyaamba nzi nolibelesyegwa mu Bbaibbele?

¹⁰ Ibbala lyakuti “busungu” muntembauzyo ya Davida lyakazwa kubbala lya Chihebrayo. Eeli bbala lijanika muzibeela zinji zya Bbaibbele lilapandululwa munzila zinji. (Amubale Kulonga 20:5; 34:14; Joshua 24:19.) Ibbuku ilipandulula mabala aali mu Bbaibbele lyaamba boobu kubbala eeli: “Ikanji-kanji libelesyegwa kubanabukwetene . . . Mbubwenya mbuli mulumi naa mukaintu mbwaba abuzuba awalo Leza ulacita oobo kubantu bakwe.” Aboobo, busungu ibwaambwa mu Bbaibbele bulainda aali boobo ibujisi muntu weebelela cisobano ncayanda kapati. Ibuzuba mbwaakajisi Davida bwakali bubotu akaambo kakuti wakali kuyanda kulemeka zyina lya Jehova. Ibuzuba buli boobu mbubotu nkaambo muntu ulakonzya kugwasya muntu uumbi kuti litabiji zyina lyamweenzinyina naa kugwasya muntu ooyo watyompwa.

11. Ino ncinzi cakapa kuti Jesu abeleke cabusungu?

¹¹ Basikwiiya ba Jesu bakayeeya majwi a Davida nobakabona Jesu ncaakacita atempele. Jesu wakali musungu mumulimo wakwe kutali akaambo kakuti wakalibuzyi buzuba mbwayakufwa pele akaambo kakuti wakali kuuyanda mulimo naa wakali amunyono kuzyina lya Bausyi abukombi bwakasimpe. Naakabona bantu mbobakali kulisampaula zyina lya Leza wakacimwa cakuti wakabatanda. Jesu naakabona bantu babombe moyo kabapenzyegwa abasololi bazikombelo, eeci cakamupa kuti abagwasye bantu aaba akusinganya basololi bacikombelo bakali kubadyaaminina.—Mt. 9:36; 23:2, 4, 27, 28, 33.

Amube Basungu Kubukombi Bwakasimpe

12, 13. Ino basololi bazikombelo zya Bunakristo bwanyika ncinzi ncibacita kujatikizya (a) zyina lya Leza? (b) Bwami bwa Leza?

¹² Mazuba aano micito yabantu balyaamba kuba Banakristo taayindene aya mazuba a Jesu. Mucikozyanyo, amuyeeye kuti cintu cakusaanguna Jesu ncaakayiisya basikumutobela bakwe nkupailila zyina lya Leza naakaamba kuti: “Alisalazyigwe zyina lyako.” (Mt. 6:9) Sena kuli nomwakabwene basololi bazikombelo kabayiisya bantu kuzyiba Leza akulemeka zyina lyakwe? Muciindi caboobo, baamba zyintu zyakubeja ali Leza mbuli zyanjiisyo ya Butatu, kutafwidilila kwamuntu, njiisyo yamulilo uutamani, kutondezya kuti Leza tatumvwisyi akuti uulaalunya. Alimwi balisampaula zyina lya Leza akaambo kazyintu zibi nzyobacita akuupaupa-upa ameso kwabo. (Amubale Baloma 2:21-24.) Kuyungizya waawo, tabayandi kuti bantu balizibe zyina lya Leza, cakuti bakaligusya amuma Bbaibbele aabo. Aboobo, balesya bantu kuti baabe a cilongwe a Leza.—Jak. 4:7, 8.

¹³ Jesu alimwi wakayiisya basikumutobela bakwe kupailila Bwami bwa Leza kuti: “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Mt.  6:10) Nokuba kuti basololi bazikombelo zya Bunakristo bwanyika balawiinduluka mupailo ooyu, baambila bantu kuti kabatola lubazu mutwaambo twacisi amutubunga twabantu. Aboobo, balabanyansya aabo bakambauka akupa bumboni ku Bwami oobu. Akaambo kaceeci, akati kabaabo balyaamba kuba Banakristo, Bwami bwa Leza tababwambi alimwi tabajisi lusyomo muli ndulo.

14. Ino basololi bazikombelo mbuti mbubalyuubya-ubya Ijwi lya Leza?

¹⁴ Jesu naakali kupaila kuli Leza wakaamba kuti: “Ijwi lyako nkasimpe.” (Joh. 17:17) Alimwi katanaunka kujulu, Jesu wakaamba kuti uyakusala “muzike musyomesi uucenjede” kuti kapa bantu bakwe cakulya aciindi ceelede. (Mt. 24:45) Nokuba kuti basololi bazikombelo balyaamba kuti bayiisya bantu Ijwi lya Leza, sena baucita kabotu mulimo ngwaakabapa Simalelo wabo? Peepe. Baamba kuti zili mu Bbaibbele twaano buyo twakaindi. Muciindi cakubapa cakulya cakumuuya bantu babo akubaumbulizya alimwi kubayiisya kasimpe, basololi aaba bayiisya bantu babo injiisyo zyabantu izikonzya kubanonezya. Kuyungizya waawo, basololi bazyuubya-ubya njiisyo zya Leza akaambo kakuyoowa kuti balabanyemya bantu babo.—2 Ti. 4:3, 4.

15. Ino mulimvwa buti kuzyintu zyoonse nzyobacita basololi bazikombelo kwiinda muzyina lya Leza?

¹⁵ Akaambo kazyintu zyoonse eezyi nzyobacita muzyina lya Leza uulembedwe mu Bbaibbele, bantu banji batyompwa naa baleka kumusyoma Leza alimwi tabalisyomi Bbaibbele. Bakatalika kubelekela Saatani akucita zyintu zicitwa mazuba aano zitali kabotu. Ino mulimvwa buti nomubona akumvwa zyintu zicitika abuzuba? Mbomuli babelesi ba Jehova, nomubona mbolisampaulwa zyina lya Leza, sena eeci tacimupi kucita zyintu munzila iili kabotu? Nomubona bantu basyomeka kabacengwa akupenzyegwa, sena muyakubakulwaizya aabo bapenzegwa? Jesu naakabona bantu bakali kupona ciindi eeco ‘ibakali mbuli mbelele zitakwe mweembezi,’ tanaakabafwida buyo lubomba. Pele “wakatalika kubaiisya makani manji.” (Mt. 9:36; Mk. 6:34) Tulijisi twaambo tutupa kuti tube basungu mubukombi bwakasimpe mbubwena mbwaakabede Jesu.

16, 17. (a) Ino ncinzi cikonzya kutukulwaizya kuti katubeleka canguzu mulimo wamumuunda? (b) Ino ncinzi ncotutiilange-lange mucibalo citobela?

¹⁶ Kuti naa twaubona boobu mulimo wamumuunda nkokuti majwi aamwaapostolo Paulo aali ku 1 Timoteyo 2:3, 4 alakonzya kuba abupanduluzi bumwi bukonzya kutugwasya.  (Amubale.) Tatubeleki buyo canguzu akaambo kakuti tupona mumazuba amamanino pele akaambo kakuti tulizyi kuti nkuyanda kwa Leza. Uyanda kuti bantu boonse bazyibe kasimpe kutegwa abalo baiye kumukomba akumubelekela akuti balongezyegwe. Tulakulwaizigwa kubeleka canguzu mumuunda, kutali akaambo kakuti ciindi ciceede caceya pele akaambo kakuti tuyanda kulemeka zyina lya Leza alimwi akugwasya bantu kumuzyiba. Tulabeleka canguzu akaambo kabukombi bwakasimpe.—1 Ti. 4:16.

¹⁷ Mbuli bantu ba Jehova, tuli acoolwe cakuziba kasimpe kumakanze ngajisi Leza kujatikizya bantu anyika. Tulizi mbotukonzya kugwasya bantu kuti babe alukkomano abulangizi bwakumbele. Inga twabatondezya mbobakonzya kukwabililwa ciindi bweende bwazyintu bwa Saatani bwakunyonyoonwa. (2 Te. 1:7-9) Muciindi cakutyompwa akaambo kakuti buzuba bwa Jehova bwamuka, tulakonzya kukkomana nkaambo tucili aciindi cakuti tubeleke canguzu mubukombi bwakasimpe. (Mik. 7:7; Hab. 2:3) Ino mbuti mbotukonzya kuba busungu? Tuya kucilanga-langa eeci mucibalo citobela.

Sena Inga Mwapandulula?

• Ino ncinzi cakapa kuti Jesu kabeleka cakutaleka mumulimo wamumuunda?

• Ino mu Bbaibbele “ibusungu” bupandulula nzi?

• Ino ncinzi ncotubona mazuba aano cikonzya kutupa kuba basungu mubukombi bwakasimpe?

[Mibuzyo yaciiyo]

[Cifwanikiso icili apeeji 8]

Jesu wakali kubikkila maano kucita kuyanda kwa Bausyi akuyanda bantunyina

[Cifwanikiso icili apeeji 10]

Tulijisi twaambo tutupa kuba basungu mubukombi bwakasimpe