‘Micelo Yamuuya’ Ilamulemeka Leza
‘Micelo Yamuuya’ Ilamulemeka Leza
“Taata ulalemekwa muli ceeci, ikuti muzumanane kuzyala micelo minji.”—JOH. 15:8.
1, 2. (a) Ino muunzila nzi motukonzya kubakulwaizya bamwi? (b) Ino ncipego nzi cizwa kuli Jehova citugwasya kuti tuzumanane kumubelekela?
AMUBONE zyintu eezyi zyobilo zyakacitika: Mukaintu Munakristo wabona mucizyi umwi uucili mwana uuboneka kuti ulilibilikide. Walomba kuti babeleke limwi mumulimo wamumuunda. Nobabandika kabaya kuŋanda iimbi, musimbi ooyu watalika kwaamba cimukatazya. Naakapaila buzuba oobo, wakamulumba Jehova kuti wakagwasyigwa amucizyi ooyu usimide. Mubusena bumbi, banabukwetene bakazwa akupiluka ino-ino kucisi nkobakali kukambaukila. Kupobwe naakali kwaamba zyakabacitikila, musankwa umwi wakali kuswiilila. Nokwakainda myaka iili mboibede kalibambila kuya kubelekela kucisi cimbi nkwaakatumwa, wakayeeya mubandi ngobakajisi abanabukwetene aaba bakamupa muzeezo wakuba misyinali.
2 Ambweni bukkale buli boobu bulakonzya kumuyeekezya muntu wakamupa kuti mucince bukkale bwanu. Nokuba boobo, ncamasimpe kuti taili mibandi yoonse ikonzya kupa kuti muntu acince, pele abuzuba bamwi balakonzya kutuyumya-umya akutukulwaizya. Kamuyeeya kuti mulijisi cimwi cintu ncomukonzya kubelesya kutegwa banyoko bagwasyigwe alimwi ncomukonzya kubelesya ikubelekela Leza. Sena inga taciboti kuti mwacita oobo? Jehova ulatupa coolwe cili boobo. (Lk. 11:13) Mbouyabubeleka muuya wa Leza mubuumi bwesu, ulatugwasya kuba abube bubotu butugwasya kuyaambele mumbazu zyoonse nzyotubelekela Leza. Eelo kaka taciliboteli cipego eeci!—Amubale Bagalatiya 5:22, 23.
3. (a) Ino mbuti kujana ‘micelo yamuuya’ mbokumulemeka Leza? (b) Ino mibuzyo nzi njotutiilange-lange?
3 Izyintu zicitwa akaambo kakusololelwa amuuya uusalala, zitondezya bube bwayooyo Uupa muuya, Jehova Leza. (Kol. 3:9, 10) Jesu wakatondezya kaambo kapati Banakristo ncobeelede kusolekesya kumwiiya Leza naakaambila baapostolo bakwe kuti: “Taata ulalemekwa muli ceeci, ikuti muzumanane kuzyala micelo minji.” * (Joh. 15:8) Mbotuya buba ‘amicelo yamuuya,’ tuyoolibonya mbotwaambaula alimwi ambotucita zyintu, eeci cipa kuti tumutembaule Leza. (Mt. 5:16) Ino munzila nzi micelo yamuuya mboyiindene abucenjezu bubelesyegwa munyika ya Saatani? Ino mbuti mbotukonzya kwiijana micelo yamuuya? Ino nkaambo nzi ncocikonzya kutukatazya kucita boobo? Mibuzyo eeyi ilaingulwa twanoobandika twaambo totatwe twamicelo yamuuya—luyando, lukkomano a luumuno.
Luyando Luyeeme Anjiisyo Zyamu Bbaibbele
4. Ino nduyando luli buti Jesu ndwaakaambila basikumutobela kuti kabatondezya?
4 Luyando lutondezyegwa akaambo kamuuya uusalala luliindene kapati aluyando lujanika munyika. Munzila nzi? Nkaambo luyeeme anjiisyo zyamu Bbaibbele. Jesu wakatondezya kwiindana ooku mu Mulumbe wakwe waa Cilundu. (Amubale Matayo 5:43-48.) Jesu wakabona kuti abalo basizibi balakonzya kubacitila bamwi mbubonya mbuli mbobayanda kucitilwa abalo. “Luyando” luli boobu taluli lwakulyaaba kwini-kwini, pele nkwakucitilana buyo zyintu zibotu. Kuti katuyanda kuba mbuli ‘bana ba Taatesu uuli kujulu’ tweelede kwiindana. Muciindi cakucitila zyintu bamwi kweelana ambobatucitila, swebo tweelede kubacitila mbubwenya mbuli Jehova mbwababona akubacitila. Ino inga twabayanda buti basinkondoma kweelana ambwaakaamba Jesu?
5. Ino mbuti mbotukonzya kubayanda aabo batupenzya?
5 Amubone cikozyanyo comwe camu Bbaibbele. Nobakali kukambauka mu Filipi, Paulo a Sila bakaangwa, bakaumwa bakabikkwa muntolongo mwalo mubakabaanga maulu muziliba. Nozyakali kucitika eezyi kuboneka kuti awalo mulindizi wantolongo wakali kubapenzya. Nobakaangululwa cakutayeeyelwa akaambo kamuzuzumo wanyika, sena bakaba amuzeezo wakupilusya cibi kumulindizi wantolongo? Peepe. Akaambo kakuti bakali kumubikkila maano—ikulyaaba kwabo kwakabapa kuti bamugwasye, eeci cakapa kuti mulindizi wantolongo amukwasyi wakwe batalike kusyoma. (Mil. 16:19-34) Bakwesu banji mazuba aano abalo ‘balabalongezya aabo babapenzya.’—Lom. 12:14.
6. Muunzila nzi motukonzya kutondezya kuti tulabayanda bakwesu? (Amubone kabbokesi apeeji 21.)
6 Mbotubayanda basyomima kweelede kwiinda aawo. “Aswebo tweelede kwaaba buumi bwesu akaambo kabakwesu.” (Amubale 1 Johane 3:16-18.) Nokuba boobo, ziindi zinji tulakonzya kutondezya kuti tulabayanda amutuntu tusyoonto-syoonto. Mucikozyanyo, ikuti tiitwaambaula kabotu naa twamulubizyila mukwesu, tulakonzya kutondezya kuti tulamuyanda kwiinda mukulilekelela kutegwa kube luumuno. (Mt. 5:23, 24) Ino mbuti kuti umwi watulubizyila? Sena ‘tulilibambide kumujatila’ naa zimwi ziindi tulamubikkilila? (Int. 86:5) Iluyando ndotujisi akaambo kamuuya uusalala lulakonzya kutugwasya kuti tuzyilube zyintu zimbi zisyoonto-syoonto, akubalekelela bantu “mbubonya Jehova [mbwaakatulekelela] camoyo woonse.”—Kol. 3:13, 14; 1 Pe. 4:8.
7, 8. (a) Ino kubayanda bantu a Leza kweendelana buti? (b) Ino mbuti mbotukonzya kuyumya cilongwe cesu a Jehova? (Amubone cikozyanyo.)
7 Ino mbuti mbotukonzya kubayanda bakwesu? Tulakonzya kucita oobo kwiinda mukumuyanda Leza. (Ef. 5:1, 2; 1 Jo. 4:9-11, 20, 21) Notubandika a Jehova kwiinda mukubala Bbaibbele, notuzinzibala kuyeeya akupaila, kutupa kuti katumuyanda kapati Taateesu wakujulu. Nokuba boobo, tuyandika kujana ciindi cakuswena kuli Leza.
8 Mucikozyanyo: Amweezeezye kuti muyandika kubala Jwi lya Leza, kuzinzibala kuyeeya akupaila kuli Jehova aciindi cibikkidwe abuzuba. Sena inga tamukonzyi kucibikkila maano ciindi eeco kutegwa kutabi cimunyonganya aciindi eeco? Masimpe ngakuti taku muntu uukonzya kumukasya kupaila kuli Leza alimwi bunji bwesu tulakonzya kubala Bbaibbele kufwumbwa ciindi ncotwayanda. Nokuba boobo, tatweelede kulekela zyintu zyakumubili kuti zinyonganye milimo njotucita yakumuuya. Sena mulajana ciindi cinji cakuti muyumye cilongwe cenu a Jehova?
“Kukondwa Ikuzwa Kumuuya Uusalala”
9. Ino kukkomana nkotuba ankuko akaambo kamuuya uusalala inga kwatugwasya buti?
9 Lukkomano lwalo luli ncibeela camucelo wamuuya lulakonzya kuzumanana kuba mulindiswe nokuba kuti tuli mumapenzi. Lukkomano luli mbuli cisamu ciliyumya nokuli ciyuma-yuma. Munyika yoonse, babelesi ba Leza ‘balizumina jwi lya Leza akukondwa ikuzwa kumuuya uusalala nokuba kuti balijisi mapenzi manji kapati.’ (1 Te. 1:6) Bamwi bali mumapenzi. Nokuba boobo, Jehova ulabayumya kwiinda mumuuya wakwe ‘kutegwa baliyumye cakumaninina kumwi kabakkazyikide moyo alimwi akukondwa.’ (Kol. 1:11) Ino lukkomano oolu luzwa kuli?
10. Ino kukkomana kwesu kuzwa kuli?
10 Kwiindana ‘alubono lutasyomeki’ lwamunyika ya Saatani, lubono ndwaatupa Jehova talumani. (1 Ti. 6:17; Mt. 6:19, 20) Uyanda kuti katukkomana lyoonse. Tuli acoolwe cakuba akati ka Banakristoma bamunyika yoonse. Kwiinda zyoonse eezyi, lukkomano lwesu luya buyo mbuli mbotumvwana a Leza. Tulimvwa mbuli mbwaakalimvwa Davida, walo nokuba kuti wakapona mbuli muzangalisi, wakatembaula Jehova mulwiimbo naakati: “Luzyalo lwako ndubotu kwiinda buumi, aboobo milomo yangu ilakutembaula. Njookutembaula nencili muumi.” (Int. 63:3, 4) Nokuba kuti tujisi mapenzi, tulazumanana kumutembaula Leza kuzwa ansi amoyo.
11. Ino nkaambo nzi ncociyandika kubelekela Jehova katukkomene?
11 Mwaapostolo Paulo wakaambila Banakristo kuti: “Lyoonse amukondwe mu Mwami. Alimwi ndainduluka kuti, Amukondwe!” (Flp. 4:4) Ino nkaambo nzi Banakristo ncobayandika kumubelekela Jehova kabakkomene? Akaambo kakaambo nkaakaamba Saatani kajatikizya bweendelezi bwa Jehova. Saatani waamba kuti taku muntu uukonzya kumubelekela Leza cakuliyandila. (Job. 1:9-11) Kuti katumubelekela Jehova katutakkomene, nkokuti kulyaaba kwesu takumaninide. Aboobo tweelede kutobela malailile ngaakaamba sintembauzyo aakuti: “Amukombe Jehova cakukondwa, amuboole kubusyu bwakwe anyimbo.” (Int. 100:2) Kubelekela Leza katukkomene alimwi katulyaabide, kulamulemeka Leza.
12, 13. Ino ncinzi ncotukonzya kucita kuti naa twatyompwa?
12 Nokuba boobo, tacigambyi kuti abalo babelesi ba Jehova balyaabide zimwi ziindi balatyompwa akwaalilwa kuzumanana kuzilanga kabotu zyintu. (Flp. 2:25-30) Ino ncinzi cikonzya kutugwasya kuti kwaba boobu? Lugwalo lwa Baefeso 5:18, 19 lwaamba kuti: “Amuzumanane kuzuzyigwa muuya. Nomwaambauzyanya, kamubandika majwi aantembauzyo, kamutembaula Leza anyimbo zyakumuuya, kamwiimba akulizizya Jehova nyimbo mumyoyo yanu.” Ino inga twaatobela buti malailile aaya?
13 Ikuti naa twatyompwa, tweelede kupaila kuli Jehova akuzinzibala kuyeeya azyintu zikonzya kutugwasya. (Amubale Bafilipi 4:6-9.) Bamwi cilabakkazyika moyo kuti kabaŋuŋuna asyoonto-asyoonto nozilila nyimbo zya Bwami alimwi cibapa kulimvwa kabotu. Mukwesu umwi wakajisi penzi lipati ilyakali kumutyompya ulayeeya kati: “Kunze aakupaila lyoonse, ndakaiya nyimbo zya Bwami zisyoonto. Ikwiimba nyimbo eezyi zibotu zitembaula Jehova cakupozya naa cakaumu-umu, cakandipa kuti moyo ukkale. Alimwi eeco nceciindi bbuku lyakuti Amubaa Cilongwe a Jehova nolyakamwaigwa. Ndakalimanizya kulibala ziindi zyobilo mwaka wakatobela. Eeci cakandikkazyika moyo. Ndili masimpe kuti Jehova wakandilongezya akaambo kakusoleka kwangu.”
“Caanzyo Caluumuno”
14. Ino ncinzi ncotukonzya kubona kujatikizya luumuno luboola akaambo kamuuya uusalala?
14 Amiswaangano yacooko yamasi, bakwesu abacizyi bazwa mubukkale bwiindene-indene balakkomana akuyanzana kwa Bunakristo. Bukkale buli boobu butondezya luumuno ndobajisi bantu ba Leza mazuba aano—lukamantano lwesu lwanyika yoonse. Kanji-kanji basikulangilila balagambwa kubona bantu mbobatayeeyeli kuti inga bamvwana ‘kabasoleka camoyo woonse kuzumanana alukamantano lwamuuya mucaanzyo caluumuno.’ (Ef. 4:3) Lukamantano oolu lulagambya ncobeni twalanga zyintu zyakabacitikila banji.
15, 16. (a) Ino Petro wakakomena buti, alimwi ino nkaambo nzi ncaakajanina buyumu-yumu? (b) Ino Jehova wakamugwasya buti Petro kuti acince kuyeeya kwakwe?
15 Kukamantanya bantu bazwa mubukkale bwiindene-indene cilakatazya. Kutegwa tuzyibe cijatikizyidwe akuti kube lukamantano luli boobu, atulange-lange ncaakacita mwaapostolo Petro mumwaanda wakusaanguna. Mbwaakali kubabona Bamasi batapaludwe kulalibonya mumajwi aakwe naakati: “Mulizyi kabotu mbokutondwa kumu Juda kuyanzana naa kuswaya muntu wamusyobo umbi; pele lino Leza wanditondezya kuti tandeelede kwaamba muntu uuli woonse kuti ulisofweede naa kuti tasalali.” (Mil. 10:24-29; 11:1-3) Kasyoma zyintu nzyobakali kusyoma eeco ciindi, Petro wakakomena kasyoma kuti wakeelede kuyanda buyo bama Juda kweelana a Mulawo. Wakali kucibona kuti Bamasi beelede kubonwa kuti mbaasinkondonyina aboobo beelede kusulwa. *
16 Amuyeeyele buyo mbwaakalimvwa Petro naakanjila muŋanda ya Koneliyo. Sena muntu wakali kubona bantu batali ba Juda kuti mbaasinkondonyina inga ‘waswaanganisyigwa kabotu-kabotu’ “mucaanzyo caluumuno”? (Ef. 4:3, 16) Masimpe, kumazuba akutaanguna muuya wa Leza wakamugwasya Petro kuti atalike kucinca mizeezo yakwe akuleka kusala. Kwiinda mucilengaano, Jehova Leza wakamutondezya kuti walo talangi bantu kweelana amusyobo naa kucisi nkobazwa. (Mil. 10:10-15) Aboobo, Petro wakaambila Korneliyo kuti: “Lino ndazyiba ncobeni kuti Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.” (Mil. 10:34, 35) Petro wakacinca ncobeni alimwi wakaba akati “[ka]ciinga coonse cabakwesu.”—1 Pe. 2:17.
17. Ino ncinzi citondezya kuti bantu ba Leza balikamantene?
17 Cakacitika kuli Petro citugwasya kuti katukkomana notubona mbobacinca bantu ba Leza mazuba aano. (Amubale Isaya 2:3, 4.) Bantu banji “bazwa muzisi zyoonse, mumisyobo yoonse, mumikowa yoonse alimwi amumilaka yoonse” bacinca kuyeeya kwabo kutegwa bazyibe “kuyanda kwa Leza, ikubotu, kutambulika alimwi kulondokede.” (Ciy. 7:9; Lom. 12:2) Ibunji bwabaaba bakali kuyungwa anyika ya Saatani yalo yakali kukulwaizya kusulana, nkondo akutamvwana. Pele kwiinda mukwiiya Jwi lya Leza bagwasyigwa ‘kusungwaalila kucita zyintu ziletela luumuno.’ (Lom. 14:19) Lukamantano luli boobo lulamutembaula Leza.
18, 19. (a) Ino mbuti toonse mbotukonzya kupa kuti lukamantano aluumuno zibe akati kabantu ba Leza? (b) Ino tuya kulanga-langa nzi mucibalo citobela?
18 Ino mbuti toonse mbotukonzya kupa kuti lukamantano aluumuno zibe akati kabantu ba Leza? Mumbungano zinji mulajanika aabo bazwa kumasi aambi. Bamwi bajisi tunsiya-nsiya twiindene alimwi babelesya mwaambo wiindene angotubelesya. Sena mulabandika ambabo kutegwa muzyibane? Jwi lya Leza ncolitwaambila kucita eeco. Kalembela mbungano yaku Roma mwalo mwakali basyomi ba Juda a Bamasi, Paulo wakaamba kuti: “Amutambulane mbubonya Kilisito mbwaakatutambula andiswe, kutegwa Leza alemekwe.” (Lom. 15:7) Sena kuli muntu umwi mumbungano yanu ngomukonzya kuzyibana limwi?
19 Ino ncinzi cimbi ncotukonzya kucita kutegwa muuya uusalala utusololele mubuumi bwesu? Mucibalo citobela tuyoolanga-langa mubuzyo ooyu notubandika aimbi micelo yamuuya.
[Bupanduluzi buyungizidwe]
^ munc. 3 Micelo njaakali kwaamba Jesu ibikkilizya ‘micelo yamuuya’ “[a]micelo yamilomo yesu” yalo Banakristo njobamubelekela Leza kwiinda mukukambauka makani aa Bwami.—Heb. 13:15.
^ munc. 15 Bbuku lya Levitiko 19:18 lyaamba kuti: “Utaliyi inkoto nekuba kuba simfundilizi kubana babantu bako; yanda mweenzinyoko mbubonya mboliyanda omwini.” Basololi bazikombelo zyabama Juda bakali kwaamba kuti majwi aakuti “bana babantu bako” alimwi “mweenzinyoko” aamba buyo bama Juda. Mulawo wakali kwaamba kuti bana Israyeli bakeelede kwaandaana amasi aamwi. Nokuba boobo, mulawo ooyu tiiwakakulwaizya muzeezo ngobakajisi basololi bazikombelo bamumwaanda wakusanguna wakuti boonse batali bama Juda mbaasinkondonyina alimwi beelede kusulwa.
Ino Inga Mwaingula Buti?
• Ino mbuti mbotukonzya kubayanda bakwesu?
• Ino nkaambo nzi ncotuyandika kumubelekela Leza katukkomene?
• Ino mbuti mbotukonzya kupa kuti lukamantano aluumuno zibe mumbungano?
[Mibuzyo yaciiyo]
[Kabbokesi kali apeeji 21]
“Aaba Mbanakristo Bakasimpe”
Bbuku litegwa Between Resistance and Martyrdom—Jehovah’s Witnesses in the Third Reich litwaambila nzyaakaamba mukubusi mu Juda mwaange, mubbuku eeli waakapandulula mbwaakabajana Bakamboni ba Jehova ciindi cakusaanguna naakasika kucilabba cakupenzezya caku Neuengamme:
“Mbotwakasikila buyo mucilabba toba Juda baku Dachau, ba Juda bamwi bakatalika kusisa zyintu zyoonse nzyobakajisi akaambo kakuti tiibakali kuyanda kwaabana andiswe. . . . Kunze acilabba twakali kugwasyanya. Pele akaambo kakubula cakulya cinji azyakubelesya kunyina wakali kuyanda kwaaba ncaakajisi. Pele kamuyeeya buyo Basikwiiya Bbaibbele mbobakali kucita. Aciindi eeco bakapedwe mulimo muyumu wakubamba mapaipi aameenda. Kwakali kutontola alimwi buzuba boonse bakaimvwi mumeenda aatontola. Taku wakalicizyi cakali kubapa kuti baliyumye boobu. Bakaamba kuti Jehova ngowakali kubapa nguzu. Mbubwenya mbuli ndiswe, bakali kuziyanda zyakulya nkaambo bakalifwide nzala. Ino ncinzi ncibakacita? Bakabweza zyakulya zyoonse nzyobakajisi bakazyaabanya akati, cibeela cimwi bakalya icimwi bakapa basyominyina bakazwa ku Dachau bakasika buzuba oobo. Alimwi bakabatambula akubamyonta. Kabatanalya bakapaila. Boonse bakakkuta akukkomana. Bakaamba kuti bakakkuta. Nindakabona boobo, nceciindi nindakaamba kuti: Aaba Mbanakristo bakasimpe.”
[Zifwanikiso izili apeeji 19]
Sena mulajana ciindi cakuti muyumye cilongwe cenu a Jehova?
