Sena Muciyeeyede?

Sena cakamukkomanisya kubala mamagazini aa Ngazi Yamulindizi aa lino-lino? Amubone naa inga mwaingula mibuzyo eeyi iitobela:

• Ino “zintu ziyandisi” zyakazwa muzisi zyoonse ninzi? (Hag. 2:7)

Aaba mbantu ibakkomana kumukomba Jehova nokuba kuti tabalondokede. (Tus. 27:11) Eezi “zintu ziyandisi” mbantu bamulemeka alimwi mbakkomanina akaambo kabusungu mbobajisi mumulimo.—Apr-Jun, apeeji 29.

• Ino ncinzi cakapa kuti Daniele abe muntu “uuyandwa loko” kuli Jehova? (Dan. 10:11, 19)

Daniele wakali musungu mukwiiya Magwalo. (Dan. 9:2) Kupaila cakali cintu cipati mubuumi bwakwe. (Dan. 2:17, 18) Wakali kubikkila maano kukulemeka zyina lya Jehova. (Dan. 2:20, 28; 9:19.)—Apr-Jun, apeeji 29.

• Sena Banakristo bakasimpe balalibelesya zyina lya Leza munzila yamasalamuzi?

Bantu bamwi babona zyintu zimwi kuti zilakonzya kubakwabilila munzila yamasalamuzi, pele bantu ba Leza tabaliboni zyina lya Leza kuti ndyamasalamuzi pe. Bayubila muzyina lya Jehova kwiinda mukumusyoma akucita kuyanda kwakwe. (Zef. 3:12, 13)—1/15, mapeeji 5-6.

• Mbuti bazyali mbobakonzya kugwasya bana babo kuti kabalilemeka kabotu?

Bazyali beelede kubaambila bana babo mbobayanda kuti kabalilemeka. Beelede kubayiisya makani oonse aamba zyakoonana. Alimwi beelede kubagwasya bana babo kuzyiba kuti, kuti kabatalilemeki kabotu kweelana ambwayanda Jehova balakonzya kunjila mumapenzi.—Apr-Jun, mapeeji 12-15.

• Ino nkaambo nzi Jehova ncaakamukakila Mwami Saulo?

Saulo wakeelede kulindila musinsimi wa Leza kuti azikutuule zituuzyo, pele muciindi caboobo walo nguwakacita oobo. Amane muciindi cakutobela malailile aakujaya basinkondonyina boonse walo tanaakacita oobo.—2/15, mapeeji 22-23.

• Mbuti mbotukonzya kutondezya kuti tulabusulaika bubi?

Tatunoociindilizyi kunywa, tatunoojatikizigwi mumizimo alimwi tunootobela kucenjezya kwa Jesu kujatikizya kulilemeka. Mucikozyanyo, tatunakweebeleli zyintu ziletela muzeezo wakoonana akuyeeya zyintu zitako. (Mat. 5:27, 28) Alimwi tatweelede kumvwana abantu bakagusyigwa mumbungano.—2/15, mapeeji 28-32.

• Ino ninjiisyo nzi zyamu Bbaibbele zitugwasya kubona Jehova mbwakubona kubbeja? (Ef. 5:17)

Kuli Leza, kuti kamusyoma mukuba acoolwe ncimwi buyo akukomba mituni. (Is. 65:11) Jehova ucenjezya Banakristo kuti tabeelede kulikumbuzya. (Kul. 20:17; Lom. 7:7) Babelesi ba Leza balajana mali amulimo ngobabelekela ncobeni. (Ef. 4:28; 2 Te. 3:10, 12)—Apr-Jun, mapeeji 19-20.

• Ino mbuti Jeremiya mbwaakali mbuli “musamu uubyalidwe kumbali lyamaanzi, uutunga miyanda yawo”? (Jer. 17:7, 8)

Taku naakaleka kuzyala micelo naa kuyoowa bantu bakali kumukazya. Pele wakakakatila ku Kasensa kamaanzi aapa buumi akuyeeya nzyaakamwaambila Leza.—3/15, apeeji 14.

• Nciiyo nzi ncotukonzya kwiiya kuli Jehova kumajwi aalembedwe kuli Jobu 14:13-15?

Jehova ulabayanda aabo baunka kuli nguwe akuzumina kuti ababumbe alimwi akubeendelezya mbuli mbwayanda kutegwa kabayanda kapati. (Is. 64:8)—Apr-Jun, apeeji 15.

• Mbuti musinsimi Samuele ‘mbwaakacita ziluleme’? (Heb. 11:32, 33)

Samuele wakacita zyintu zili kabotu alimwi ziluzi mumeso a Leza. Wakazumanana kusyomeka akaambo kakuti wakali kulanga kuli Jehova, wakazumanana kusyomeka kumulimo ngwaakapedwe nokuba kuti zimwi ziindi wakali kutyompwa.—Apr-Jun, apeeji 22.