“Kamulibambilide”—nobanakristo Mumikwasyi

“Kamulibambilide lyoonse andinywe, nkaambo aciindi ncomutayeeyeli, Mwana wamuntu ulaboola.”—LK. 12:40.

1, 2. Ino nkaambo nzi ncotweelede kukubikkila maano kucenjezya kwa Jesu kwakuti “kamulibambilide”?

“MWANA wamuntu aakusika mubulemu bwakwe” ‘akwaandaanya bantu,’ ino ncinzi ciyakucitika kuli ndinywe amukwasyi wanu? (Mt. 25:31, 32) Mbokunga eeci ciyakucitika aciindi ncotutayeeyeli kulayandika kutobela kucenjezya kwa Jesu kwakuti “kamulibambilide.”—Lk. 12:40.

² Cibalo cainda cakabandika mbuli muntu umwi aumwi mumukwasyi mbwakonzya kugwasya kutegwa mukwasyi woonse kaupakamane kumuuya kwiinda mukubikkila maano kumulimo ngobapedwe. Atulange-lange nzila zimwi zikonzya kugwasya mubukkale bwakumuuya mumukwasyi.

Kamuzumanana “Kulanga Buyo Acintu Comwe”

3, 4. (a) Ino ncinzi mikwasyi ya Banakristo ncoyeelede kucenjelela? (b) Ino caamba nzi “kulanga buyo acintu comwe”?

³ Kutegwa balibambile kuboola kwa Kristo, banamukwasyi beelede kucenjela kutegwa batanyonganizyigwi kukukomba kwakasimpe. Bayandika kucenjela kutegwa batayungwi. Mbokunga bantu banji bacegwa akaambo kakuyanda kuvwuba, atubone ncaakaamba Jesu kujatikizya ‘kulanga  buyo acintu comwe.’ (Amubale Matayo 6:22, 23.) Mbubwenya mbuli lambe mbolitumunikila motwiinda kutegwa tutawi, ncotubona kwiinda ‘mumoyo wesu’ wacikozyanyo kulakonzya kutumunikila akutugwasya kutacita cibi.—Ef. 1:18.

⁴ Kutegwa liso kalibona kabotu lyeelede kuti kalili kabotu akubona kabotu acintu eeco. Eeci taciindene ameso aacikozyanyo. Kulanga buyo acintu comwe ameso aacikozyanyo caamba kuti tweelede kubikkila maano acintu comwe. Muciindi cakubikkila kapati maano kuzyintu zyakumubili akuyeeya buyo zyintu ziyandika mumukwasyi, tweelede kubikkila maano kuzyintu zyakumuuya. (Mt. 6:33) Eeci caamba kukkutila azyintu zyakumubili akubikkila maano kumulimo Leza ngwatupede.—Heb. 13:5.

5. Ino mbuti mwana musimbi mukubusi mbwaakatondezya kuti uyanda kubelekela Leza?

⁵ Eelo kaka bana inga bagwasyigwa kuti bayiisigwa kulanga buyo acintu comwe! Atubone cikozyanyo camwana mukubusi musimbi waku Ethiopia. Wakali kucita kabotu kucikolo cakuti naakamanizya cikolo bakamwaambila kuti balamubbadelela kucikolo cipati. Akaambo kakuyanda kubelekela Jehova, wakakaka kubabbadelelwa. Kwiinde buyo ciindi cisyoonto, wakatambwa kuti akaakubeleke mulimo wakali kuvwolwa mali aasika ku $4,200 aaku United States amwezi—mali manji kwiinda ngobavwola bantu banji mucisi eeci. Pele walo musimbi wakali kuyanda buyo kucita mulimo wabupainiya. Tanaakali kuyandika kubuzya bazyali bakwe kutegwa aukake mulimo ooyu. Ino bazyali bakwe bakalimvwa buti nobakazyiba ncaakacita mwanaabo? Bakakkomana kapati akumwaambila kuti balamuyanda.

6, 7. Ino ndipenzi nzi ndyotweelede ‘kucenjelela’?

⁶ Mbuli mbokutondezyedwe kumajwi ngaakaamba Jesu aalembedwe ku Matayo 6:22, 23, kuli kucenjezya kwakuti tutabi balyato. Jesu wakali kwaamba kuti kutalanga buyo acintu comwe caamba ‘kulanga zibi.’ Ibbala lyaci Giliki lyaamba cibi lilakonzya kwaamba busyaacivwulemwangu naa bulyato. (Mt. 6:23) Ino Jehova ulimvwa buti kujatikizya bbivwe naa bulyato? Ibbaibbele lyaamba kuti: “Bwaamu abusofwaazi bwamusyobo uuli oonse naa busyaacivwulemwangu [naa bulyato] tazyeelede nokuba kwaambwa akati kanu pe.”—Ef. 5:3.

⁷ Nokuba kuti bulyato bulakonzya kulibonya kuli bamwi, cilakatazya kulibona kuti tuli balyato. Aboobo inga cainda kubota kutobela malailile aa Jesu aakuti: “Amucenjele akulikasya kubulyato buli boonse.” (Lk. 12:15) Ikucita boobo kupa kuti tuzyibe cini cili mumoyo. Banakristo mumikwasyi beelede kuciyeeya ciindi amali ngobabelesya mukulikondelezya akuula zyintu zyakumubili.

8. Ino mbuti mbotukonzya ‘kucenjela’ ciindi notuula zyintu?

⁸ Kamutanaula cintu eeco mweelede kuyeeya naa ciyandika ncobeni muciindi cakuula buyo akaambo kakuti mulijisi mali manji. Amutubikkile maano twaambo ootu: ‘Sena ndinakujana ciindi cakucibelesya cintu eeci lyoonse akucibamba kabotu? Ino ciyakutola ciindi cilamfwu buti kuti ndikacizyibe mbocibeleka?’ Nywebo nobana tamweelede kuzisyoma zyoonse nzyobaambilizya basimakwebo kujatikizya zyintu nzyobasambala alimwi akumupa kuyanda kuti muule zisani zidula naa zyintu zimwi. Amulikasye. Alimwi kamuyeeya mbociya kubajatikizya banamukwasyi cintu eeco kutegwa bakatondezye kuti balilibambide kukuboola kwa Mwana wamuntu. Amusyome cisyomezyo ca Jehova cakuti: “Ziyume zitete, tandikakusiyi pe alimwi tandikakulekelezyi pe.”—Heb. 13:5.

Amube Aambaakani Zyakumuuya

9. Ino mbuti mbaakani zyakumuuya mbozikonzya kubagwasya banamukwasyi?

⁹ Aimwi nzila banamukwasyi mobakonzya kuyumya lusyomo lwabo kutegwa bayume  kumuuya, nkwiinda mukubikka mbaakani zyakumuuya akuzicita. Ikucita boobo kulakonzya kugwasya banamukwasyi kuzyiba mbobayaabuya ambele mukubelekela Jehova alimwi cilakonzya kubagwasya kuzyiba zyintu nzyobeelede kubikkila maano.—Amubale Bafilipi 1:10.

10, 11. Mbuli mukwasyi, ino nimbaakani nzi zyakumuuya nzyomujisi, alimwi nimbaakani nzi nzyomuyanda kuyoozuzikizya kumbele?

¹⁰ Nokuba kulibikkila mbaakani nzyomukonzya zisyoonto kulakonzya kugwasya banamukwasyi. Mucikozyanyo, mulakonzya kuba ambaakani yakulingaula magwalo abuzuba. Mbobaingula banamukwasyi kulakonzya kugwasya mutwe wamukwasyi kuzyiba mpobasikide kumuuya. Mbaakani yakubala Bbaibbele abuzuba mumukwasyi ninzila mbotu yakugwasya bana kucizyiba kabotu kubala akulizyiba Bbaibbele. (Int. 1:1, 2) Tuyandika kwiiya mbotukonzya kupaila mipailo iimvwika. Ikwiizyiba kabotu micelo yamuuya acalo cilakonzya kumugwasya kuzuzikizya mbaakani zyanu. (Gal. 5:22, 23) Mulakonzya kujana nzila nzyomukonzya kutondezya lubomba kuli baabo mbomujana mumulimo wamumuunda. Ikucita boobo kulakonzya kugwasya bana kwiiya kuba alubomba alimwi banakuli aluyandisisyo lwakuba bapainiya baciindi coonse naa bamisyinali.

¹¹ Mulakonzya kubikka mbaakani nzyomukonzya kuzuzikizya nywebo abamukwasyi wanu. Sena bamukwasyi wanu balakonzya kubikka mbaakani yakubeleka ciindi cilamfwu mumulimo wamumuunda? Sena mulakonzya kubeleka canguzu kwiinda mukukambaukila mumigwagwa naa mumasena mucitilwa makwebo naa kubelesya luwaile? Sena inga mwaakubelekela kubusena  kubulide basikumwaya ba Bwami? Sena umwi mumukwasyi ulakozya kwiiya mwaambo umbi kutegwa kakambaukila baabo bazwa kumasi aambi?

12. Ino ncinzi mitwe yamikwasyi ncoikonzya kucita kutegwa igwasye mikwasyi yabo kuti kabacita kabotu kumuuya?

¹² Mbomuli mutwe wamukwasyi, amubone nzila mukwasyi wanu moukonzya kuyaambele kumuuya. Mwamana amulibikkile mbaakani zikonzya kupa kuti eeco cikonzyeke. Imbaakani nzyomulibikkila mbuli mukwasyi zyeelede kuti kazikonzyeka kweelana abukkale bwanu azyintu nzyomukonzya kucita. (Tus. 13:12) Masimpe ngakuti ikuzuzikizya mbaakani zigwasya citola ciindi. Muciindi cakweebelela buyo cipeku-peku, mweelede kubelesya ciindi cimwi kucita zyintu zyakumuuya. (Ef. 5:15, 16) Mweelede kubeleka canguzu kutegwa musike ambaakani nzyomwakabikka mumukwasyi wanu. (Gal. 6:9) Banamukwasyi ibabikka mbaakani zyakumuuya baya kupa kuti ‘bantu boonse babone kuti bayaambele kumuuya.’—1 Ti. 4:15.

Amuzumanane Kukomba Mumukwasyi

13. Ino ncinzi cakacinca kumiswaangano yansondo ansondo, alimwi ino mibuzyo nzi njotweelede kulibuzya?

¹³ Cibelesyo cibotu cakugwasya mikwasyi kutegwa ‘kabalibambide’ kuboola kwa Mwana wamuntu, nkucinca kwa miswaangano yansondo ansondo ikwakatalika mu January 1, 2009. Ikuswaangana buzuba bumbi bwamuswaangano wakali kwiitwa kuti Ciiyo Cabbuku Cambungano cakacincwa akubikkwa antoomwe amiswaangano ya Cikolo Camulimo Weendelezyegwa a Leza a Muswaangano Wamulimo. Ooku kucinca kwakacitwa kutegwa Banakristo mumikwasyi kabajana ciindi cakucita zyintu zyakumuuya kwiinda mukubikka ciindi icini ncobeelede kukomba mumukwasyi ansondo. Mbokunga lino kwainda ciindi cilimbocibede, tulakonzya kulibuzya kuti: ‘Sena ndilacibelesya ciindi eeci Kukomba Mumukwasyi naa kuba aciiyo cangu ndemwini? Sena ndali kucikonzya kucita oobu?’

14. (a) Ino nkaambo nzi kapati ncotweelede kuzumanana Kukomba Mumukwasyi naa kuba aciiyo cesu tobeni? (b) Ino nkaambo nzi ncociyandika kubikka ciindi cakwiiya?

¹⁴ Kaambo kapati ncotweelede kuzumanana kuba aciindi ca Kukomba Mumukwasyi naa kuba aciiyo cesu tobeni, nkuyumya cilongwe cesu a Leza. (Jak. 4:8) Kuti katwiiya Bbaibbele lyoonse akuyungizya luzyibo lwesu kujatikizya Mulengi wesu, cilongwe cesu anguwe ciyooyuma. Kuti naa twaswena kuli Jehova tunakumuyanda ‘amoyo wesu woonse, abuumi bwesu boonse, amizeezo yesu yoonse alimwi anguzu zyesu zyoonse.’ (Mk. 12:30) Masimpe, tulikanzide kusyomeka kuli Leza akumwiiya. (Ef. 5:1) Kuzumanana Kukomba Mumukwasyi nenzila iikonzya kugwasya banamukwasyi boonse kuti ‘kabalibambide’ kuboola kwa “mapenzi mapati.” (Mt. 24:21) Eezyi zyoonse zilayandika kutegwa tukafwutuke.

15. Ino Kukomba Mumukwasyi inga kwabagwasya buti banamukwasyi kuti kabamvwana?

¹⁵ Bubambe bwa Kukomba Mumukwasyi bulagwasya amunzila iimbi—bubambe oobu mbwakugwasya banamukwasyi kuti bakamantane. Ikuba antoomwe kababandika makani aamu Bbaibbele ansondo kulabagwasya banamukwasyi kuti kabamvwana. Eelo kaka banabukwetene balakamantana nobaiya antoomwe Bbaibbele! (Amubale Mukambausi 4:12.) Ibazyali abana ibakombela antoomwe balakamantana nkaambo eeci “ncecaanzyo calukamantano cilondokede.”—Kol. 3:14.

16. Amupandulule mbocabagwasya bacizyi botatwe kuba aciiyo ca Bbaibbele.

¹⁶ Amubone bacizyi botatwe mbobakagwasyigwa abubambe bwakwiiya Bbaibbele. Nokuba kuti tabazwi mumukwasyi omwe, aaba bacizyi bacembeede botatwe  bakkala mudolopo lyomwe alimwi bali balongwe kwamyaka minji. Akaambo kakuyanda kuba aciindi cakuyanzana alimwi akuyanda kukulwaizyanya kumuuya kutali buyo kuba amusalo, bakasala buzuba bumwi mangolezya kutegwa kabaiya Bbaibbele. Bakatalika kucita oobo kwiinda mukubelesya bbuku lyakuti “Bearing Thorough Witness” About God’s Kingdom. Umwi wabo wakaamba kuti: “Tulakkomana kapati cakuti ciiyo cesu cilatola ciindi ciinda kuwoola. Tulayeeya zyakali kubacitikila bakwesu bamumwaanda wakusaanguna akubona mbotukonzya kucita kuti naa twaba apenzi likozyanya aleelyo. Twamana tulatubelesya twaambo ntotwakabandika notuli mumulimo. Eeci capa kuti kukambauka makani aa Bwami akugwasya bantu kuba basikwiiya kacikkomanisya kwiinda kaindi.” Kunze lyakuyumizyigwa kumuuya, bubambe oobu bwabapa kuti bacizyi aaba botatwe kabamvwana kapati. Bakati: “Tulabuyanda kapati bubambe oobu.”

17. Ino ntwaambo nzi tubikkilizyidwe kutegwa Kukomba Mumukwasyi kakweenda kabotu?

¹⁷ Ino mbuti nywebo? Mbuti mbomwagwasyigwa abubambe bwa kukomba mumukwasyi naa ciiyo canu nobeni? Kuti naa kamucita buyo muziindi, ibubambe oobu tabukonzyi kumugwasya pe. Umwi aumwi mumukwasyi weelede kuti kalibambide casika ciindi cakwiiya. Tuntu tusyoonto-syoonto tatweelede kumunyonganya aciindi eeco. Nokuba boobo, nomusala zyakubandika mweelede kusala zyintu zikonzya kumugwasya mumukwasyi abuzuba. Ino ncinzi ncomukonzya kucita kutegwa ciindi eeco cakwiiya kacikkomanisya? Mweelede kubelesya nzila zigwasya alimwi kweelede kuba luumuno.—Jak. 3:18. *

‘Amupakamane’ Alimwi ‘Amulibambile’

18, 19. Ino kuzyiba kuti Mwana amuntu uli afwaafwi kuboola kumujatikizya buti nywebo amukwasyi wanu?

¹⁸ Bukkale bwanyika bubyaabi buyaabumana butondezya kuti kuzwa mu 1914 bweende bwanyika ya Saatani bwasika kumazuba aamamanino. Harmagedoni iili afwaafwi. Lino-lino cilasika ciindi cakuti Mwana amuntu azoobeteke basizibi. (Int. 37:10; Tus. 2:21, 22) Eeci cilakonzya kumujatikizya nywebo amukwasyi wanu.

¹⁹ Sena mulaatobela malailile aa Jesu aakuti ‘kamulanga buyo acintu comwe’? Nokuba kuti banji bayanda kuvwuba akuba ampuwo naa kuba anguzu, sena nywebo amukwasyi wanu mulijisi mbaakani zyakumuuya? Sena bubambe bwa Kukomba Mumukwasyi naa ciindi cakuba aciiyo canu nobeni bulabeleka kulindinywe? Sena camugwasya mumukwasyi ikuswena kuli Jehova akuti kamumvwana akati kanu? Mbuli mbotwabandika mucibalo cainda, sena mulaucita mulimo wanu ngomupedwe wamu Magwalo mbomuli balumi, bakaintu naa bana akugwasya bantu boonse mumukwasyi kuti ‘bapakamane’? (1 Te. 5:6) Kuti kakuli boobo, ‘munakulibambide’ kukuboola kwa Mwana amuntu.

[Bupanduluzi buyungizidwe]

Ino Ncinzi Ncomwaiya?

• Amupandulule Banakristo mumikwasyi mbobakonzya ‘kulibambila’ kwiinda . . .

‘mukulanga buyo acintu comwe.’

mukuba ambaakani zyakumuuya akuzicita.

mukuzumanana Kukomba Mumukwasyi.

[Mibuzyo yaciiyo]

[Cifwanikiso icili apeeji 13]

‘Kulanga buyo acintu comwe’ kuya kumulesya kucita zyintu zyanyika zikonzya kumunyonganya