Kutobela Kristo Musololi Uulondokede

KANJI-KANJI aabo batobela baleli baanyika balatyompwa. Pele aabo balibombya kubusolozi bwa Kristo tabatyompwi pe. Jesu wakaamba kuti: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, akwiiya kulindime, nkaambo ndimubombe moyo, alimwi ndilalicesya, eelyo mulakatalusyigwa.” (Mt. 11:28, 29) Busolozi bwa Jesu bulakatalusya alimwi bulakkomanisya. Ulabayanda babombe myoyo abadyaaminidwe, akubaita kuti babe mujoko lyakwe. Ino ncinzi cibikkilizyidwe mukutobela busolozi bwa Jesu?

Mwaapostolo Petro wakalemba kuti: “Kilisito lwakwe wakapenga akaambo kandinywe, akumusiila citondezyo kutegwa mwiitobelesye mikondo yakwe.” (1 Pe. 2:21) Nkaambo nzi ncociyandika kutobela mikondo ya Jesu? Amuyeeye kuti muli mukabunga kabantu bayanda kwiinda mubusena buzwide tudandamiti alimwi omwe buyo nguuzyi mwakwiinda kutegwa mutalicisi. Sena inga tiimwatobela mumikondo yakwe naa kulyata mwalyata? Mbubwenya buyo, buumi bwesu bwakumbele buyeeme akutobela cikozyanyo ca Jesu. Kucita boobo kubikkilizya kumuswiilila akumutobela alimwi akubelekela antoomwe abaabo bamwiiminina.

Amuswiilile Akucita

Kali afwaafwi kumanizya Mulumbe waa Cilundu, Jesu wakaamba kuti: “Kufwumbwa muntu uuswiilila akucita eezyi nzindaamba, uyookozyanisyigwa amwaalumi uucenjede, walo wakayaka ŋanda yakwe amwala. Lino kwakawa mvwula mpati amaanzi akapaya, muwo wakaunga akubbubbula kuŋanda eeyo, pele tiiyakawa pe, nkaambo yakayakidwe amwala.”—Mt. 7:24, 25.

Aboobo, Jesu wakali kwaamba muntu uswiilila akucita nzyaamba kuti “ulicenjede.” Sena tulatondezya kuti tulasyomeka akulumba citondezyo ca Kristo kuzwa ansi amoyo, naa ndiza tuyanda buyo kusala imwi milawo myuuba-uba iitakatazyi kucita? Jesu wakaamba kuti: “Lyoonse ndicita zimukkomanisya [Leza].” (Joh. 8:29) Atuzumanane kwiiya cikozyanyo cakwe.

Mumwaanda wamyaka wakusaanguna, baapostolo bakapa cikozyanyo cibotu cakulibombya kubusolozi bwa Kristo. Ciindi cimwi, Petro wakaambila Jesu kuti: “Bona! Twakasiya zyintu zyoonse alimwi twali kukutobela.” (Mk. 10:28) Masimpe, baapostolo bakabona busolozi bwa Jesu kuti bwakali kuyandika kapati cakuti bakalisungula kusiya zyintu nzyobakajisi kutegwa bamutobele.—Mt. 4:18-22.

Amubelekele Antoomwe Abamwiiminina Kristo

Kali afwaafwi kufwa, Jesu wakaamba aimbi nzila mbotukozya kutobela busolozi bwakwe. Wakaamba kuti: “Uutambula kufwumbwa ngwendatuma ulanditambula andime.” (Joh. 13:20) Jesu wakali kwaamba bamwiiminina bananike kuti ‘mbanyina.’ (Mt. 25:40) Jesu naakabusyigwa kuunka kujulu, ‘banyina’ mbabakabikkwa “mubusena bwa Kilisito” kuti babe baiminizi batamba bantu kuti kabayanzana a Jehova Leza. (2 Ko. 5:18-20) Kuzyiba bweendelezi bwa Kristo kulabikkilizya akumvwida ‘banyina.’

 Tweelede kulilanga-langa mbotulutambula lulayo lwamu Magwalo lujanika mumabbuku aapandulula zyamu Bbaibbele. Kwiinda mukwiiya Magwalo alimwi akujanika kumiswaangano yambungano, tulaibalusyigwa nzyaakaamba Kristo. (2 Pe. 3:1, 2) Tulatondezya kuti tulalumba kuzilyo zyakumuuya nzyotupegwa kwiinda mukuzilya lyoonse. Ino tweelede kucita buti kuti lulayo lumwi lwapegwa cakwiinduluka-induluka? Mucikozyanyo, Jwi lya Leza lyaambila Banakristo kukwata naa kukwatwa “buyo mu Mwami.” (1 Ko. 7:39) Kwamyaka minji kaambo aaka kali kubandikwa cakwiinduluka-induluka mu Ngazi Yamulindizi. Masimpe, banyina Kristo balatondezya kuti balacibikkila maano cilongwe cesu a Jehova kwiinda mukulemba zibalo zijatikizya makani aazikwati aamwi buyo azwa mumagwalo. Kubikkila maano kululayo oolu ninzila imwi yakutondezya kuti tulamutobela Musololi wesu uulondokede, Jesu Kristo.

Ibbuku lya Tusimpi 4:18 lyaamba kuti “Pele inzila yabaluleme ili mbuli mumuni uumweka, uuya bungwengwemuka mane bwaca buzuba.” Masimpe, busolozi bwa Jesu bulabeleka. Aimwi nzila mbotukonzya kubelekela antoomwe ‘abanyina’ Kristo nkuzilanga munzila yeelede kufwumbwa njiisyo zyamu Magwalo zikonzya kuncinca kwiinda “[mu]muzike musyomesi uucenjede.”—Mt. 24:45.

Alimwi tulatondezya kulibombya kwesu ‘kubanyina’ Kristo kwiinda mukubelekela antoomwe abalangizi bamumbungano ya Bunakristo. Mwaapostolo Paulo wakaamba kuti: “Kamubamvwida aabo basololela akati kanu alimwi kamulibombya, nkaambo balanganya buumi bwanu.” (Heb. 13:17) Mucikozyanyo, mwaalu ulakonzya kutuyumya-yumya kujatikizya ncociyandika kapati Kukomba Mumukwasyi lyoonse naa ulakonzya kupa nzila zimwi zyambotukonzya kucita mulimo wesu wamumuunda. Mulangizi weendeenda ulakonzya kutupa lulayo lwamu Magwalo kujatikizya kaambo kamwi kambobeelede kupona Banakristo. Kuti twalutobela lulayo lwa Jesu tutondezya kuti tulabutobela busolozi bwakwe.

Basololi bali munyika tabagwasyi pe. Pele cilakatalusya kweendelezyegwa a Kristo. Aboobo, tweelede kumumvwida musololi wesu alimwi akubelekela antoomwe abaabo mbabelesya mazuba aano.

[Zifwanikiso izili apeeji 27]

Sena mulalutobela lulayo lwamu Magwalo lwa kutakwatana abantu batasyomi?