Sena Mulalikkomanina Ncobeni Jwi lya Leza?

BA LORRAINE bakaamba kuti: “Ciindi nindakatalika kubala Bbaibbele abuzuba, ndakali kucibona kuti mulimo mupati ikutali cintu cikkomanisya. Lyakali kundikatazya kumvwa aboobo ndakali kwiile kuyeeya zimbi.”

Abamwi bakazumina kuti nibakatalika kubala Bbaibbele tiicakali kubakkomanisya. Nokuba boobo, bakazumanana akaambo kakuti bakalizyi kuti kubala Magwalo Aasalala ncecintu ncobeelede kucita. Ba Marc bakaamba kuti: “Tacikatazyi kuti zyintu zimwi zitulesye kubala Bbaibbele akucita ciiyo cesu tobeni. Ndakali kupaila alimwi akusoleka canguzu kutegwa ndicikonzye kunoobala Bbaibbele abuzuba.”

Ncinzi ncomweelede kucita kutegwa mube aluyandisisyo lwakubala Jwi lya Leza, Bbaibbele? Ino inga mwalikkomanina buti kulibala Bbaibbele? Amulange nzila zitobela.

Mbaakani Anzila Zikonzya Kubeleka

Amupaile kamutanatalika kubala Bbaibbele kutegwa muzimvwe nzyomwiiya. Amumulombe Jehova kutegwa amugwasye kuba aluyandisisyo lwakubala Jwi lyakwe. Amupaile kuti amupe busongo bwakumvwisya nzyomubala. (Int. 119:34) Ikuti mwatacita oobu, kubala Bbaibbele cilakonzya kuba cintu cakwiinzya buyo mulawo alimwi inga mwacileka. Ba Lynn bakaamba kuti: “Zimwi ziindi ndilabala cakufwambaana cakuti twaambo tuyandika kapati tandituboni pe. Ziindi zinji twaambo tupati tanditumvwisyi kabotu. Ndilapaila kutegwa kanditayeeyi zimbi.”

Amuzibelesye nzyomwiiya. Kamuyeeya kuti kumvwisya akubelesya kasimpe kamu Bbaibbele cilakonzya kumupa kuti mukafwutuke. Aboobo, amusoleke canguzu kujana twaambo tukonzya kumugwasya akutubelesya. Ba Chris bakaamba kuti: “Ndiyanda kuzyiba mponditaciti kabotu. Eeci cilandikulwaizya kubona twaambo tujanika mu Bbaibbele amumabbuku eesu nokuba kuti bakaalemba tabandizyi.”

Amulibikkile mbaakani nzyomukonzya kuzuzikizya. Amwiiye cintu cimwi cipya kujatikizya bantu baambwa mu Bbaibbele. Mulakonzya kujana twaambo tukkomanisya kujatikizya bantu aaba kwiinda mukubala Insight on the Scriptures naa Watch Tower Publications Index. Mbomuya bubazyiba bamaalumi abamakaintu bamu Bbaibbele kuti mbantu ncobeni bakali kulimvwa mbuli mbomulimvwa, muyoogwasyigwa kapati.

Amujane nzila zimbi zyakumvwisya Magwalo. (Mil. 17:2, 3) Eeyi njembaakani ba Sophia njobajisi. Baamba kuti: “Makanze aangu ngakwiiya nzila zipya zyambondikonzya kupandulula twaambo munzila iilimvwisya kujatikizya kasimpe kamu Bbaibbele nondili mumulimo wamumuunda alimwi amuziindi zimwi. Mboipandulula twaambo Ngazi Yamulindizi ninzila mbotu iitondezya mbondikonzya kucita oobu.”—2 Ti. 2:15.

Amweezyeezye zibalo zyamu Bbaibbele. Lugwalo lwa Bahebulayo 4:12 lwaamba kuti, “Jwi lya Leza lili abuumi.” Nomubala Magwalo, imulumbe wa Leza weelede kumugwasya kuyeeya ncobakali kubona bantu baambidwe mu Bbaibbele. Amuswiilile nzyobakali kuswiilila akulimvwa mbobakali kulimvwa.  Amubone zyakabacitikila mbozikozyenye azimucitikila mubuumi bwanu. Amwiiye mbobakacita. Eeci ciyoomugwasya kumvwisya zibalo zyamu Bbaibbele akuzibelesya.

Amube aciindi cakulanga-langa magwalo aakatazya alimwi abupanduluzi bwangawo kutegwa mwaamvwisye kabotu. Amujane ciindi cinji cakucita ciiyo. Zimwi ziindi mulakonzya kujana mibuzyo iiyandika kumvuntauzya. Amulanga-lange mabala ngomutazyi kabotu, amulange bupanduluzi buyungizyidwe, alimwi amubone magwalo aamba makani aakozyenye mu Bbaibbele. Mbomuyaabuzimvwisya kabotu akuzibelesya nzyomubala, muyoolikkomanina kapati Jwi lya Leza. Muyooamba mbuli mbwaakaamba sintembauzyo naakati: “Milumbe yako ndukono lwangu lyoonse; njenjiyo iibotezya moyo wangu.”—Int. 119:111.

Mutabindi buyo kutegwa mumane cibalo. Amulibikkile ciindi ceelede ncomukonzya kucita ciiyo canu. Ciindi ncomubelesya kucita ciiyo canu taceelede kumana ciindi cakulibambila miswaangano yambungano. Ba Raquel bakaamba kuti: “Ziindi zinji ndilakatala kapati cakuti ndilaalilwa kuzimvwa nzyondibala. Aboobo ndabona kuti kubala buyo ciindi cisyoonto kulagwasya. Eeci candigwasya kapati muciiyo cangu.” Ba Chris bakazuminizya kuti: “Ikuti ndabala cakubinda, manjezyeezya aangu alandikatazya nkaambo inga kunyina ncondimvwa. Kanji-kanji cibalo inga tacindisiki amoyo.” Aboobo, amubale cakukkalikila.

Amube aluyandisisyo lwa jwi lya Leza. Mwaapostolo Petro wakaamba kuti: “Mbuli bavwanda bazyalwa lino-lino, amuyandisye mukupa uutavweledwe uuli mujwi lya Leza, kutegwa kwiinda mulinguwo mukomene mane kulufwutuko.” (1 Pe. 2:2) Bana tabeelede kwiiya buya kuyandisisya mukupa. Kuyanda mukupa bazyalwa ankuko. Pele Magwalo atwaambila kuti tweelede kuliyanda jwi lya Leza. Ikuti naa kamubala peeji lyomwe lya Bbaibbele abuzuba, muyakuba aluyandisisyo. Cintu cakali kulibonya kuti cilakatazya ciyootalika kumukkomanisya.

Amuzinzibale kuyeeya Magwalo. Kuzinzibala kuyeeya azyintu nzyomubala kulagwasya kapati. Eeci ciyoomugwasya kubona mbotweendelana twaambo ntomwali kulanga-langa. Mukuya kwaciindi, muya kubuziba busongo bujanwa mu Bbaibbele.—Int. 19:14; Tus. 3:3.

 Kucibelesya Kabotu Ciindi

Ikuzumanana acilengwa cibotu cakubala kuyandika kusolekesya alimwi kuletela zilongezyo zinji. Munoamvwisya magwalo. (Heb. 5:12-14) Kumvwisya zyintu alimwi abusongo mbomujana kuzwa mu Magwalo aakasololelwa amuuya ciletela lukkomano aluumuno. Busongo bujanika mu Jwi lya Leza “musamu wabuumi” kuli baabo babujana akububelesya.—Tus. 3:13-18.

Kuba aciiyo cisitikide ca Jwi lya Leza kulakonzya kumugwasya kuzimvwa nzyomubala. (Tus. 15:14) Eeci ciya kupa kuti mucikonzye kupa bamwi lulayo kweelana ambolyaamba Bbaibbele. Ikuti naa mwasala zyakucita kweelana ambwaamba Magwalo amabbuku amwaigwa “[a]muzike musyomesi uucenjede,” muyookatalusyigwa alimwi muyoogwasyigwa a Jwi lya Jehova ilyakasololelwa amuuya. (Mt. 24:45) Munoozilanga bweelede zyintu, munoojisi bulangizi alimwi zyoonse nzyomucita munoozicita kweelana ancolyaamba Jwi lya Jehova. Kuyungizya waawo, zyoonse nzyomucita zijatikizya cilongwe canu a Leza zinoozwidilila.—Int. 1:2, 3.

Luyando ndomujisi kuli Leza luya kumupa kwaambila bamwi nzyomusyoma. Eeci acalo ciletela zilongezyo zinji. Ba Sophia balasola kuyeeya magwalo akwaabelesya kutegwa kaabakkomanisya bamukamwini ŋanda alimwi kutegwa mulimo wabo wamumuunda kuukkomanisya akugwasya. Baamba kuti: “Kubona bantu mbobalimvwa kujatikizya twaambo twamu Bbaibbele cilakkomanisya kapati.”

Cintu cipati ncotujana akaambo kakuyanda Jwi lya Leza nkuba acilongwe ciyumu a Jehova. Kwiiya Bbaibbele kumugwasya kumvwisya akuzyiba zyeelelo, luyando, bwaabi alimwi abululami bwa Leza. Aboobo kunyina cintu ciyandika kapati kwiinda kwiiya Bbaibbele. Amubikkile maano kwiiya Jwi lya Leza. Kuti mwacita oobo, inga mwacibelesya kabotu ciindi.—Int. 19:7-11.

[Kabbokesi/Zifwanikiso izili apeeji 5]

KUBALA JWI LYA LEZA: MBAAKANI ANZILA ZIKONZYA KUBELEKA

▪ Amupaile kamutanatalika kubala Bbaibbele kutegwa muzimvwe nzyomwiiya.

▪ Amuzibelesye nzyomwiiya.

▪ Amulibikkile mbaakani nzyomukonzya kuzuzikizya.

▪ Amujane nzila zimbi zyakumvwisya Magwalo.

▪ Amweezyeezye zibalo zyamu Bbaibbele.

▪ Amube aciindi cakulanga-langa magwalo aakatazya alimwi abupanduluzi bwangawo kutegwa mwaamvwisye kabotu.

▪ Mutabindi buyo kutegwa mumane cibalo.

▪ Amube aluyandisisyo lwa Jwi lya Leza.

▪ Amuzinzibale kuyeeya Magwalo.

[Cifwanikiso icili apeeji 4]

Nomubala cibalo camu Bbaibbele, amubone ncomukonzya kucita kuti kamuli mubukkale bukozyenye aboobo mwamana mulibikke andinywe