“Kamubalemeka Aabo Ibabeleka Canguzu Akati Kanu”

“Kamubalemeka aabo ibabeleka canguzu akati kanu alimwi ibamweendelezya mu Mwami akumupa lulayo.”—1 TE. 5:12.

1, 2. (a) Ino ncinzi cakali kucitika mumbungano yaku Tesalonika ciindi Paulo naakabalembela lugwalo lwakusaanguna? (b) Ino Paulo wakabakulwaizya kucita nzi bana Tesalonika?

KAMUYEEYA buyo kuti muli mumbungano yabana Tesalonika yamumwaanda wamyaka wakusaanguna yalo yakali akati kambungano zyakusaanguna mu Europe. Mwaapostolo Paulo wakabeleka ciindi cili mbocibede kugwasya banyina. Weelede kuti wakasala baalu bakali kusololela, mbubwenya mbukwakabede kumbungano zimbi. (Mil. 14:23) Noyakatalisyigwa mbungano, bama Juda bakalibunga-bunga kuti bamugwisye Paulo a Sila mumunzi. Banakristo bakacaala bakalimvwa kulekelezyegwa, ambweni akuyoowa.

² Naakazwa ku Tesalonika, Paulo wakalipengede mumoyo kujatikizya mbungano mpya. Wakali kuyanda kupiluka, pele ‘Saatani wakasinka’ nzila. Aboobo wakatuma Timoteo kuti akayumye-yumye mbungano. (1 Te. 2:18; 3:2) Timoteo naakapiluka kuleta mulumbe mubotu, Paulo wakakulwaizyigwa kubalembela lugwalo bana Tesalonika. Akati kazyintu nzyakaamba, Paulo wakabakulwaizya ‘kubalemeka aabo ibabeleka canguzu akati kabo.’—Amubale 1 Batesalonika 5:12, 13.

3. Ino ntwaambo nzi Banakristo baku Tesalonika twakali kubapa kuti kababalemeka kapati baalu?

³ Bakwesu bakali kusololela Banakristo baku Tesalonika tiibakajisi luzyibo mbuli lwakajisi Paulo abeenzyinyina mbaakali kweenda limwi alimwi abaalu baku Jerusalemu. Kuyungizya  waawo, kwakaindide buyo myezi misyoonto kuzwa ciindi noyakatalika mbungano. Nokuba boobo, aabo bakali mumbungano bakeelede kulumba akaambo kabaalu bakali ‘kubeleka canguzu,’ ‘kweendelezya’ mbungano alimwi “akupa lulayo” kubakwesu. Masimpe bakalijisi kaambo kabotu ‘kakubalemeka kapati baalu muluyando.’ Naakamana Paulo wakaamba kuti: “Amukkale muluumuno umwi amweenzinyina.” Kuti nomwakaliko ku Tesalonika, sena nomwakali kwiikkomanina milimo njobakali kucita baalu? Ino muzibona buti “zipego zyabantu” nzyaakamupa Leza kwiinda muli Kristo izili mumbungano yanu?—Ef. 4:8.

“Babeleka Canguzu”

4, 5. Nkaambo nzi ncowakali mulimo muyumu kubaalu bamumazuba a Paulo kuyiisya mbungano, alimwi nkaambo nzi ncocili boobo mazuba aano?

⁴ Ba Paulo a Sila nobakatumwa ku Bereya, ino mbuti baalu baku Tesalonika ‘mbobakabeleka canguzu’? Kabaiya Paulo, cakutadooneka bakabelesya Magwalo kuyiisya mbungano. Mulakonzya kulibuzya kuti, sena Banakristo baku Tesalonika bakali kutondezya kulumba ku Jwi lya Leza? Kuyungizya waawo, Bbaibbele lyaamba kuti baku Bereya “bakali amizeezo mibotu kwiinda baku Tesalonika, . . . kabavwuntauzya cakulomya mu Magwalo abuzuba.” (Mil. 17:11) Kwiindana ooku kwakali kujatikizya bama Juda baku Tesalonika boonse, ikutali Banakristo. Aabo bakasyoma ‘bakaazumina ikutali mbuli majwi aabantu, pele mbubonya mbwaabede ncobeni, kaali majwi aa Leza.’ (1 Te. 2:13) Baalu beelede kuti bakabeleka canguzu kuyiisya mbungano.

⁵ Mazuba aano ciinga camuzike musyomesi uucenjede cilapa butanga bwa Leza ‘cakulya aciindi ceelede.’ (Mt. 24:45) Kwiinda mukusololelwa amuzike, baalu balabeleka canguzu kusanina ibanyina kumuuya. Aabo bali mumbungano balakonzya kuti kabajisi mabbuku aapandulula Bbaibbele manji alimwi mumyaambo imwi zibelesyo mbuli Watch Tower Publications Index alimwi Watchtower Library iili a CD-ROM zilajanika. Kutegwa bape mbungano ziyandika zyakumuuya, baalu balatola ciindi kulibambila zibeela zyamiswaangano kutegwa kabakonzya kuzyaamba munzila iigwasya. Sena mulicizyi ciindi ncobatola baalu kulibambila zibeela zyamiswaangano yambungano, yabbazu, yaalubazu alimwi ayacooko?

6, 7. (a) Ino baalu baku Tesalonika bakaiya nzi kucikozyanyo ca Paulo? (b) Nkaambo nzi ncocikonzya kubakatazya baalu bamazuba aano kumwiiya Paulo?

⁶ Baalu baku Tesalonika bakaciyeeya cikozyanyo cibotu Paulo ncaakapa mukweembela butanga. Wakali kubulanganya caluyando butanga, ikutali cakwiinzya buyo mulawo pe. Mbubwenya mbuli mbokwabandikwa kale mucibalo cainda, Paulo ‘wakaba mutete moyo mbubonya mbuli mutumbu uunyonsya mbwabalanganya kabotu bana bakwe.’ (Amubale 1 Batesalonika 2:7, 8.) Wakalilibambilide nokuba ‘kubaabila buumi bwakwe.’ Ciindi baalu nobakali kweembela, bakeelede kuba mbuli nguwe.

⁷ Beembezi Banakristo mazuba aano balamwiiya Paulo kwiinda mukubulanganya kabotu butanga. Bantu bamwi balakatazya kugwasya. Nokuba boobo, baalu balatondezya busongo akulanga buyo zyintu zibotu nzyobacita. Masimpe, akaambo kakutalondoka mwaalu ulakonzya kuba apenzi lyakubona umwi aumwi munzila yeelede. Akaambo kakuti ulasolekesya kuba mutete moyo, weelede kulumbaizyigwa kuba mweembezi mubotu usololelwa a Kristo.

8, 9. Ino muunzila nzi baalu bamazuba aano ‘mobalanganya buumi bwesu’?

⁸ Toonse tweelede ‘kulitesya’ kubaalu. Paulo wakalemba kuti ‘nkambo balanganya buumi bwesu.’ (Heb. 13:17) Majwi aaya atuyeezya mweembezi wambelele zini uutaoni kutegwa akwabilile butanga bwakwe. Mbubwenya buyo, baalu mazuba aano abalo tabaoni kutegwa balanganye ziyandika zyabaabo baciswa  naa bapengede mumizeezo naa bajisi buyumu-yumu mukubelesya njiisyo zyamu Bbaibbele. Mucikozyanyo, bakwesu bali mu Hospital Liaison Committee balabusyigwa masiku kutegwa bagwasye kuti kwaba mapenzi aajatikizya busilisi. Eelo kaka tulabalumba akaambo kamulimo ngobacita kutugwasya ciindi notujanika mubukkale oobo!

⁹ Baalu ibali muma Kkomiti Aamayake alimwi amakkomiti aalanganya baabo bacitikilwa ntenda balabeleka canguzu kugwasya bakwesu. Tweelede kubagwasyilizya. Amuyeeye lugwasyo lwakapegwa ciindi guwo pati liitwa kuti Nargis, nolyakacitika ku Myanmar mu 2008. Kutegwa basike ku Mbungano ya Bothingone, iyakajatikizyidwe kapati mucibeela ca Irrawaddy Delta, kabunga kalanganya baabo bacitikilwa ntenda kakali kwiinda mumasena mwakali mitunta yabantu. Ibakwesu bakubusena oobu nobakabona kabunga kakasaanguna kusika ku Bothingone kakali kubikkilizya awakali mulangizi wabbazu, bakoompolola kuti: “Amubone! Mulangizi wesu wabbazu, Jehova watufwutula.” Sena mulalumba mulimo ngobabeleka canguzu baalu masikati amasiku? Baalu bamwi balasalwa kuti babeleke mumakkomiti aalubazu kulanganya twaambo twalubeta tukatazya. Baalu aaba tabalisumpuli akaambo kakuzwidilila, pele aabo bagwasyigwa akaambo kamilimo yabo balalumba kapati.—Mt. 6:2-4.

10. Ino milimo nzi iitazyibidwe kapati njobacita baalu?

¹⁰ Baalu banji aano mazuba balijisi mulimo wakulemba-lemba. Mucikozyanyo, sicuuno wa kabunga kabaalu ulabamba mulongo wamiswaangano wansondo ansondo. Mulembi mumbungano ulalemba malipooti amulimo wamumuunda aamwezi aamwaka. Mulangizi wacikolo ulabikkila maano kulanganya mulongo wacikolo. Lyoonse kwainda myezi yotatwe mapepa aamaakkaunti aambungano alalingulwa. Baalu balabala magwalo aazwa kuofesi lyamutabi akutobela malailile aagwasya kuti kube ‘kukamantana mulusyomo.’ (Ef. 4:3, 13) Akaambo kabaalu babeleka canguzu ‘zyintu zyoonse zilacitwa kabotu-kabotu alimwi kweelana abubambe.’—1 Ko. 14:40.

“Ibamweendelezya”

11, 12. Ino mbaani beendelezya mbungano, alimwi ino kucita boobo kubikkilizya nzi?

¹¹ Paulo wakapandulula baalu bakali kubeleka canguzu baku Tesalonika kuti bakali ‘kweendelezya’ mbungano. Ibbala lyaci Giliki lyaamba kweendelezya lilakonzya kwaamba “kwiima kumbele.” (1 Te. 5:12) Paulo wakaamba baalu aaba kuti “ba[la]beleka canguzu.” Wakali kwaamba baalu boonse mumbungano. Mazuba aano, baalu banji balaima kumbele lyambungano kweendelezya miswaangano. Kucinca kwakacitwa ino-ino kuzyina lya “sicuuno wa kabunga kabaalu” kutugwasya kubona baalu boonse ikuba zizo zyamubili omwe uukamantene.

¹² ‘Kweendelezya’ mbungano kujatikizya zyintu zinji kutali kuyiisya buyo. Ibbala eeli lilabelesyegwa alimwi mulugwalo lwa 1 Timoteyo 3:4. Paulo wakaamba kuti mulangizi weelede kuba “muntu uubeendelezya kabotu bamuŋanda yakwe, uujisi bana balibombya cakumaninina.” Aawa ibbala lyakuti “uubeendelezya” talyaambi buyo kuyiisya bana bakwe, pele akusololela mumukwasyi alimwi akuba “[a]bana balibombya cakumaninina.” Masimpe, baalu baleendelezya mbungano kutegwa boonse bagwasyigwe kulibombya kuli Jehova.—1 Ti. 3:5.

13. Nkaambo nzi ncocikonzya kutola ciindi kuti baalu basale cakucita nobali mumuswaangano wabaalu?

¹³ Kutegwa beendelezye kabotu butanga, baalu balabandika mbobakonzya kulanganya ziyandika mumbungano. Cilakonzya kulibonya mbuli kuti cilagwasya kuti mwaalu omwe wasala zyeelede kucitwa. Pele kutobela cikozyanyo cakabunga keendelezya kamumwaanda wamyaka wakusaanguna, tubunga twabaalu mazuba aano tulabandika twaambo cakwaanguluka akuyandaula busolozi bwamu  Magwalo. Makanze aabo ngakutobela njiisyo zyamu Magwalo kutegwa balanganye ziyandika mumbungano. Eeci cilagwasya kapati ciindi mwaalu umwi aumwi nalibambila miswaangano yabaalu, kulanga-langa Magwalo alimwi amalailile aazwa kuciinga camuzike musyomesi uucenjede. Mubwini eeci citola ciindi cilamfwu. Ciindi nokwaba kwiindana kwamizeezo mbubonya mbocakabede mukabunga keendelezya ciindi nobakali kulanga-langa makani aakupalulwa, inga kwayandika ciindi cinji alimwi akuvwuntauzya kutegwa kube kuzuminana kuyeeme a Magwalo.—Mil. 15:2, 6, 7, 12-14, 28.

14. Sena mulalumba kuti kabunga kabaalu kabelekela antoomwe mulukamantano? Nkaambo nzi ncomulimvwa boobo?

¹⁴ Ino ncinzi cikonzya kucitika kuti mwaalu omwe uzumanana kuti mizeezo yakwe ibeleke njiyo? Mbuti kuti umwi uuli mbuli Diyotulefe wamumwaanda mwamyaka wakusaanguna waleta muuya wakukazyanya? (3 Jo. 9, 10) Cakutadooneka mbungano yoonse ilakonzya kuba mumapenzi. Kuti naa Saatani wakasola kunyonganya mbungano yamumwaanda wamyaka wakusaanguna, tulakonzya kuba masimpe kuti amazuba aano ulayanda kunyonganya luumuno lwambungano. Ulakonzya kubelesya tumpenda twabantu, mbuli kulombozya kuba ampuwo. Aboobo, baalu beelede kulicesya alimwi akubelekela antoomwe mbuli mubili uukamantene. Tulabalumba kaka baalu balicesya ibabelekela antoomwe mbuli mubili omwe!

“Kumupa Lulayo”

15. Ino ncinzi cikulwaizya baalu nobapa lulayo kumukwesu naa mucizyi?

¹⁵ Kumane Paulo wakaamba mulimo wabaalu uukatazya pele uuyandika kapati: kupa  lulayo kubutanga. Mu Magwalo aa Banakristo aaci Giliki, alikke Paulo nguwakabelesya bbala lyaci Giliki lisandululwa kuti ‘kupa lulayo.’ Lilakonzya kwaamba kupa lulayo canguzu pele kutali cabukali. (Mil. 20:31; 2 Te. 3:15) Mucikozyanyo, Paulo wakalembela baku Korinto kuti: “Ndimulembela zyintu eezyi, ikutali kuti ndimuusye nsoni, pele kuti ndimulaye mbuli bana bangu bayandwa.” (1 Ko. 4:14) Cakali kumupa kulaya bamwi ncakuti wakali kubayanda.

16. Ino ncinzi baalu ncobeelede kuyeeya nobalaya bamwi?

¹⁶ Baalu balayeeya mbociyandika kubikkila maano mbuli mbobapa bamwi lulayo. Balasola kwiiya Paulo kwiinda mukutondezya luzyalo, luyando alimwi akuyandisisya kugwasya. (Amubale 1 Batesalonika 2:11, 12.) Nokuba boobo, baalu ‘balakakatila kumajwi aasyomeka kutegwa bacikonzye kukulwaizya bamwi anjiisyo mbotu.’—Tit. 1:5-9.

17, 18. Ino ncinzi ncomweelede kuyeeya kuti mwapegwa lulayo kuzwa kumwaalu?

¹⁷ Masimpe, baalu tabalondokede alimwi balakonzya kwaamba zyintu zikonzya kubapa kuusa kumamanino. (1 Bam. 8:46; Jak. 3:8) Kuyungizya waawo, baalu balizyi kuti kubakwesu abacizyi kutambula lulayo ‘takukkomanisyi pe, kulausisya.’ (Heb. 12:11) Aboobo, ciindi mwaalu nayanda kupa lulayo kuli umwi, usaanguna kwaalanga-langa makani alimwi akwaapailila. Ikuti naa mwapegwa lulayo, sena mulatondezya kulumba akaambo kakuti baalu balamubikkila maano?

¹⁸ Amweezyeezye kuti mujisi bulwazi bukatazya kapati. Mpoonya musilisi wabuzyiba bulwazi oobo, pele tamukonzyi kuzumina busilisi mbwaamba. Sena inga mwamusula musilisi ooyo? Peepe. Nokuba kuti waamba kuti mwaandulwe, mulakonzya kuzumina busilisi kamusyomede kuti muyoogwasyigwa. Musilisi mbwaamwaambila makani aayo kulakonzya kumukatazya kapati, pele sena eeco inga camunyonganya mukusala? Peepe. Mbubwenya buyo, lulayo mbolwapegwa kulindinywe takweelede kumulesya kuswiilila baabo mbabelesya Jehova alimwi a Jesu kumugwasya kuyaambele kumuuya naa kukwabilila cilongwe canu a Jehova.

Kamulumba Kububambe bwa Jehova Bwakubikka Baalu

19, 20. Ino inga mwatondezya buti kulumba “[ku]zipego mubantu”?

¹⁹ Ino ncinzi ncomukonzya kucita kuti mwatambula cipego? Sena inga mwatondezya kulumba kwiinda mukucibelesya? Jehova kwiinda muli Jesu Kristo wamupa “zipego mubantu.” Nzila imwi mbomukonzya kulumba kuzipego eezyi, nkwiinda mukuswiilila kumakani ngobapa baalu alimwi akutubelesya twaambo ntobaamba. Alimwi mulakonzya kulumba kwiinda mukwiingula kumiswangano. Amugwasilizye mulimo ngobasololela baalu, mbuli mulimo wamumuunda. Kuti mwakagwasyigwa alulayo ndomwakatambula kuzwa kumwaalu umwi, mweelede kumwaambila oobo. Kuyungizya waawo, mulakonzya kulumba kumikwasyi yabaalu. Amuyeeye kuti kutegwa mwaalu abeleke canguzu mumbungano bamukwasyi wakwe balaaba ciindi ncobeelede kuba anguwe.

²⁰ Inzya, tweelede kulumba kubaalu babeleka canguzu aakati kesu, kutweendelezya akutupa lulayo. Masimpe, “zipego mubantu” mbubambe bwaluyando kuzwa kuli Jehova.

Sena Muciyeeyede?

• Ino ntwaambo nzi ntobakajisi Banakristo baku Tesalonika twakubalumba aabo bakali kusololela akati kabo?

• Ino mbuti baalu mumbungano yanu mbobabeleka canguzu?

• Ino mugwasyigwa buti akaambo kakweendelezyegwa abaalu?

• Ino ncinzi ncomweelede kuyeeya kuti mwaalu wamupa lulayo?

[Mibuzyo yaciiyo]

[Cifwanikiso icili apeeji 27]

Sena mulabalumba baalu mbobeembela mbungano munzila ziindene-indene?