Amubakambaukile Bamaalumi Kutegwa Bayaambele Kumuuya

‘Kuzwa lino munoozuba bantu baumi.’—LK. 5:10.

1, 2. (a) Mbuti bamaalumi mbobakaulanganya mulumbe Jesu ngwaakali kukambauka? (b) Ncinzi ncotutiilange-lange mucibalo eeci?

CIINDI Jesu naakali kukambauka ku Galilaya abasikwiiya bakwe, bakatanta bwato kutegwa baunke kubusena bumbi kuti bakalyookezye. Pele nokuba boobo, nkamu yakabatobela amaulu. Bantu bakaboola bakali “baalumi batandila ku 5,000 ikutabalilizya abamakaintu abana basyoonto.” (Mt. 14:21) Aciindi cimwi, nkamu yakaboola kuli Jesu, kabayanda kuti basilikwe akumvwa nzyaakali kwaamba. Akati kabo “kwakali baalumi bali 4,000, ikutabalilizya abamakaintu abana.” (Mt. 15:38) Cakutadooneka, bamaalumi banji bakali aakati kabantu ibakaboola kuli Jesu alimwi bakatondezya kuti bakali kuziyanda nzyaakali kuyiisya. Kulibonya kuti Jesu wakali kulangila kuti bamwi banji bayooutambula mulumbe, akaambo kakuti kuzwa ciindi naakacita maleele aakujaya nswi, Jesu wakaambila sikwiiya wakwe Simoni kuti: ‘Kuzwa lino munoozuba bantu baumi.’ (Lk. 5:10) Basikwiiya bakwe bakeelede kuwaala tunyandi twabo mulwizi lwabantu akulangila ‘kuzuba’ bantu kubikkilizya abamaalumi banji.

² Mbubwenya buyo amazuba aano bamaalumi balatondezya luyandisisyo alimwi balautambula mulumbe wamu Magwalo ngotukambauka. (Mt. 5:3) Pele nokuba boobo, bamaalumi banji balakaka alimwi tabaunki ambele kumuuya. Mbuti mbotukonzya kubagwasya? Nokuba kuti Jesu kunyina naakali kubikkila buyo maano kubaalumi, wakali kwaamba makani aakali kubajatikizya bamaalumi bamuciindi ncaakali kupona anyika. Kwiinda mukubelesya cikozyanyo cakwe, atubone mbotukonzya kulanganya zyintu zyotatwe zibalibilisya bamaalumi mazuba aano: (1) kujana mali aakuligwasya mubuumi, (2) kuyoowa nzyobaamba bantu banji, alimwi (3) kulitenga.

Kujana Mali Aakuligwasya Mubuumi

3, 4. (a) Ncinzi ncobabikkila kapati maano bamaalumi banji? (b) Nkaambo nzi bamaalumi banji ncobabikkila kapati maano kujana mali aakuligwasya kwiinda kuyandaula zyintu zyakumuuya?

³ Mulembi umwi wakaambila Jesu kuti: “O Mwiiyi, ndilakutobela kufwumbwa nkoyanda kuunka.” Pele nokuba boobo, Jesu naakamwaambila kuti “Mwana wamuntu tajisi akooneka mutwe,” wakacinca mizeezo. Akaambo kakutazyiba nkwaakali kuyoojana cakulya, kulibonya kuti mulembi wakanyongana mumizeezo alimwi kunyina citondezya kuti wakaba sikwiiya wa Kristo.—Mt. 8:19, 20.

⁴ Bamaalumi kanji-kanji babikkila kapati maano kujana mali aakuligwasya kwiinda zyintu zyakumuuya. Kuba alwiiyo lwaatala akujana mulimo uuvwolwa mali manji nzyezyintu nzyobabikkila kapati maano bunji bwabamaalumi. Kweelana akuyeeya kwabo, mpindu yakujana mali ilayandika kapati kwiinda bubotu buboola akaambo kakwiiya Magwalo alimwi akuyandaula cilongwe a Leza. Ncoliyiisya Bbaibbele cilakonzya kuti kacibakkomanisya, pele “kulibilika kwamubweende bwazyintu oobu akoongelezya kwalubono” kusyanikizya luyandisisyo ndobajisi. (Mk. 4:18, 19) Amubone Jesu mbwaakagwasya basikwiiya bakwe kubikkila maano kuzyintu ziyandika kapati.

5, 6. Ncinzi cakagwasya Andreya, Petro, Jakobo alimwi a Johane kuti bacince mizeezo akutalika kubikkila maano kumulimo wakukambauka kuleka kuyanda kujana mali aakuligwasya?

⁵ Andreya alimwi amunyina Simoni Petro bakali  kubelekelaamwi mumakwebo aakuzuba nswi. Johane amunyina Jakobo alimwi abausyi ba Zebedayo bakali bazubi banswi abalo. Makwebo akali kweenda kabotu alimwi kwakali kuyandika bantu bamwi kuti bagwasyilizye. (Mk. 1:16-20) Ciindi cakusaanguna Andreya alimwi a Johane nobakaiya kujatikizya Jesu kuzwa kuli Johane Mubbapatizi, bakasyoma kuti bamujana Mesiya. Andreya wakamwaambila munyina Simoni Petro makani mabotu, kulibonya kuti awalo Johane wakamwaambila munyina Jakobo. (Joh. 1:29, 35-41) Kuzwa waawo, boonse bamaalumi aba bone, bakakambauka kwamyezi iili mbwiibede antoomwe a Jesu mu Galilaya, Judeya alimwi amu Samariya. Mpoonya basikwiiya aba bone bakapiluka akuzumanana amulimo wabo wakuzuba nswi. Bakali kuziyanda zyintu zyakumuuya, pele nokuba boobo, kukambauka tiibakali kukubikkila kapati maano.

⁶ Nokwakainda ciindi, Jesu wakabatamba ba Petro a Andreya kuti baboole kulinguwe akuba “bazubi babantu.” Ncinzi ncobakacita baalumi aba bobilo? “Mpoonya aawo bakasiya tunsabwe akumutobela.” Oobo mbocakacitika akuli Jakobo a Johane. “Mpoonya aawo bakasiya bwato bwabo abausyi akumutobela.” (Mt. 4:18-22) Ncinzi cakabagwasya baalumi aaba kuti batalike mulimo waciindi coonse? Sena bakazumina akaambo kakusala cakubinda? Peepe! Mumyezi yakaindide, baalumi aba ibakaswiilila kuli Jesu, bakabona maleele ngaakacita, bakabona mbwayandisisya bululami alimwi bakabona bantu mbobakaukkomanina kapati mulumbe wakwe. Akaambo kaceeci, lusyomo lwabo muli Jehova lwakayuma.

7. Mbuti mbotukonzya kubagwasya basikwiiya besu ba Bbaibbele kutegwa kabasyoma muli Jehova cakumaninina?

⁷ Mbuti mbotukonzya kumwiiya Jesu akugwasya basikwiiya besu ba Bbaibbele kutegwa babe alusyomo luyumu muli Jehova? (Tus. 3:5, 6) Kutegwa eeci cikonzyeke tweelede kubikkila maano mbotuyiisya. Ciindi notuyiisya, tulakonzya kukankaizya kuti Leza uyootulongezya kapati ikuti twasaanguna kucita ziyandika zya Bwami. (Amubale Malaki 3:10; Matayo 6:33.) Nokuba kuti tulakonzya kubelesya magwalo aasiyene-siyene kutegwa tukankaizye Jehova mbwali mwaabi kubantu bakwe, zimwi ziindi inga twabelesya cikozyanyo cesu tobeni. Kwaamba zyakatucitikila mubuumi kulakonzya kubagwasya kapati basikwiiya besu ba Bbaibbele kutegwa bamusyome Jehova cakumaninina. Alimwi tulakonzya kubaambila zyakuluula zimwi nzyotujana mumabbuku eesu. *

8. (a) Nkaambo nzi ncociyandika kuti sikwiiya Bbaibbele ‘alabile, akubona Jehova mbwali mubotu’? (b) Mbuti mbotukonzya kumugwasya sikwiiya Bbaibbele kubona Jehova mbwali mubotu?

⁸ Kutegwa tube alusyomo luyumu kuli zinji ziyandika kwiinda buyo kubala akuswiilila zyakuluula zitondezya Jehova mbwalongezya. Sikwiiya Bbaibbele awalo weelede kulibonena Jehova mbwali mubotu. Sintembauzyo wakaimba kuti: “Amulabile, mubone kuti Jehova mubotu. Uli acoolwe kufumbwa muntu uuyubila mulinguwe.” (Int. 34:8) Mbuti mbotukonzya kumugwasya sikwiiya Bbaibbele kutegwa abone kuti Jehova mubotu? Amweezyezye kuti sikwiiya Bbaibbele umwi uujisi penzi lyamali ulasoleka kuleka ciyanza cibi mbuli, kufweba, kuuma njuka naa bukolwi. (Tus. 23:20, 21;  2 Ko. 7:1; 1 Ti. 6:10) Inga cainda kugwasya kumuyiisya kupaila sikwiiya Bbaibbele kutegwa alombe lugwasyo kuli Leza kuti acileke ciyanza cibi akubona Jehova mbwali mubotu. Amubone alimwi cikonzya kucitika kuti naa mwamukulwaizya sikwiiya Bbaibbele kuti kabikkila kapati maano kuzyintu zyakumuuya kwiinda mukujana ciindi cakwiiya Bbaibbele nsondo ansondo alimwi kulibambila akujanika kumiswaangano ya Bunakristo. Cilayandika kucita oobo, akaambo kakuti nabona zilongezyo ziboola akaambo kakubeleka canguzu, lusyomo lwakwe luyooyuma.

Kuyoowa Nzyobaamba Bantu Banji

9, 10. (a) Nkaambo nzi ba Nikodemo a Josefa waku Aremateya ncobakaunka kuli Jesu cakusisikizya? (b) Nkaambo nzi bamaalumi bamwi ncobawayawaya kutobela Kristo mazuba aano?

⁹ Akaambo kakuyungwa abamwi, bamaalumi bamwi inga baalilwa kumutobela Kristo cakumaninina. Nikodemo a Josefa waku Aremateya bakali kuukkomanina mulumbe wa Jesu, pele nokuba boobo, bakali kulisisa akaambo kakuti bakali kuyoowa ba Judanyina. (Joh. 3:1, 2; 19:38) Kuyoowa ooku tiikwakali kwakuyeeyela buyo pe. Basololi bazikombelo kunyina nobakali kumuyanda Jesu cakuti kufwumbwa muntu wakali kusyoma muli Jesu wakali kutandwa mucikombelo.—Joh. 9:22.

¹⁰ Mumasena amwi mazuba aano, ikuti muntu wabikkila kapati maano kuli Leza, Bbaibbele naa bukombi, ulakonzya kufwubaazyigwa ababelesinyina, balongwe naa bamukowa. Mumasena amwi, inga walibikka muntenda ikuti naa watalika kwaamba zyakucinca bukombi. Muntu uubeleka kali mupulisa, uutola lubazu mutwaambo twacisi naa uubelekela banamaleya ulakonzya kufwubaazyigwa kapati abeenzinyina kuti watalika kwaamba makani abukombi. Mucikozyanyo mwaalumi umwi waku Germany wakaamba kuti: “Nywebo Bakamboni nzyomukambauka kujatikizya Bbaibbele nzyamasimpe. Pele kuti naa ndaba umwi wa Bakamboni sunu, cifwumo bantu boonse bayoozyiba. Ncinzi ncobayoondiyeeyela babelesima, basimukoboma, alimwi abaabo bandizyi mebo abamukwasyi wangu? Inga tiindacikonzya kuliyumya pe.”

11. Mbuti Jesu mbwaakabagwasya basikwiiya bakwe kuti bacikonzye kuliyumya kupenzi lyakuyoowa bantu?

¹¹ Nokuba kuti taakwe naba omwe wabaapostolo ba Jesu wakali mukandu, boonse bakaliyumya kutegwa batayoowi muntu. (Mk. 14:50, 66-72) Mbuti Jesu mbwaakabagwasya nokuba kuti bakali kuyungwa kapati abamwi? Jesu wakabweza ntaamu kutegwa abagwasye basikwiiya bakwe kuti bakaliyumye ciindi baakukazyigwa. Wakaamba kuti: “Mulikkomene nywebo kufwumbwa leelyo bantu nobamusula, nobamutanda akati kabo, nobamusampaula akumwaamba kuti muli babi akaambo ka Mwana wamuntu.” (Lk. 6:22) Jesu wakabacenjezya basikwiiya bakwe kuti bayoosampaulwa. Kusampaulwa kuli koonse kwakali kuyooboola “akaambo ka Mwana wamuntu.” Jesu alimwi wakabasyomezya kuti Leza kunyina nayoobalekelezya kufwumbwa buyo kuti bazumanana kusyoma munguzu zyakwe alimwi alugwasyo ndwapa. (Lk. 12:4-12) Kwiinda waawo, Jesu wakabatamba basikwiiya bapya kuti kabayanzana abasikwiiya bakwe bakaindi akuba balongwe babo.—Mk. 10:29, 30.

12. Muunzila nzi motukonzya kubagwasya basikwiiya bapya kuti bacileke kuyoowa bantu?

 ¹² Andiswe tweelede kubagwasya basikwiiya besu ba Bbaibbele kutegwa bacileke kuyoowa bantu. Ikuti mwabagwasya kuzyiba ncobeelede kucita penzi kalitanasika inga cabagwasya kapati. (Joh. 15:19) Mucikozyanyo, mulakonzya kumugwasya sikwiiya Bbaibbele kulibambila bwiinguzi butakatazyi, bulimvwisya alimwi buyeeme a Bbaibbele kumibuzyo njobakonzya kumubuzya babelesinyina abantu bambi buyo. Kunze lyakuba mulongwe wakwe, tulakonzya kumuleta afwaafwi kuti ayanzane abaabo bali mumbungano, kwaambisya aabo bajisi bukkale bukozyenye abwakwe. Kwiinda waawo, tweelede kumuyiisya kupaila lyoonse alimwi kupaila mipailo iizwa ansi aamoyo. Kucita oobo kuyoomugwasya sikwiiya kuba acilongwe a Leza, alimwi Jehova uyooba Ndomba alimwi a Mayubilo aakwe.—Amubale Intembauzyo 94:21-23; Jakobo 4:8.

Kulitenga

13. Mbuti kulitenga mbokubapa bamwi kuti batatoli lubazu muzyintu zyakumuuya?

¹³ Bamaalumi bamwi balawayawaya kutola lubazu muzyintu zyakumuuya akaambo kakuti tababali kabotu, tabaambauli cakupasaula naa akaambo kakuti balaansoni. Bamwi bamaalumi tabaanguluki kupa mizeezo yabo naa kwaamba mbobalimvwa mubuleya. Muzeezo wakwiiya, kupa bwiinguzi ciindi camiswaangano ya Bunakristo, naa kwaambila bamwi nzyobasyoma, ulabakatazya kapati. Mukwesu Munakristo umwi wakaamba kuti: “Nindakacili mwana,ndakali kufwambaana kuunka kumulyango, akucita mbuli kuti ndiyanda kukonkomona, mpoonya akupiluka kandiyeeya kuti taakwe wandimvwa naa kundibona. . . . Muzeezo wakukambauka kuŋanda aŋanda wakali kundipa kuciswa.”

14. Nkaambo nzi basikwiiya ba Jesu ncobakaalilwa kuponya mwana wakanjidwe daimona?

¹⁴ Amuyeeye basikwiiya ba Jesu mbobakalimvwa kubula lusyomo, ciindi nobakaalilwa kuponya mwana musankwa wakanjidwe daimona. Bausyi mwana musankwa bakaboola kuli Jesu akwaamba kuti: “Mwanaangu, ngusikasuntu alimwi ulaciswa nkaambo kanji-kanji uwida mumulilo, alimwi amumaanzi; eelyo ndamuletede kuli basikwiiya bako, pele baalilwa kumuponya.” Jesu wakalitanda daimona aboobo mwana wakapona. Kumane basikwiiya bakaboola kuli Jesu akumubuzya kuti: “Ino nkaambo nzi swebo ncotwaalilwa kulitanda?” Jesu wakabaingula kuti: “Nkaambo kakuceya kwalusyomo lwanu. Nkaambo masimpe ndimwaambila kuti: Ikuti kamujisi lusyomo luli mbuli inseke yamusitada, muyooambila mulundu ooyu kuti, ‘Kozwa aawa uunke waalya,’ eelyo uyoozwa, alimwi taakwe ciyoomwaalila pe.” (Mt. 17:14-20) Masimpe, lusyomo muli Jehova lulayandika mukuzunda mampindamangobe aali mbuli mulundu. Ncinzi cikonzya kucitika kuti muntu waleka kuyeeya boobu akutalika kulisyoma? Kutazwidilila kwakwe kuyooba akaambo kakulisyoma.

15, 16. Mbuti mbotukonzya kugwasya sikwiiya Bbaibbele kuliyumya kuti kalitenga?

¹⁵ Nzila mbotu yakugwasya muntu uulitenga nkumuyumya-yumya kuti abikkile maano kuli Jehova muciindi cakulisyoma mwini. Petro wakalemba kuti: “Amulicesye ansi aajanza lya Leza lyanguzu, kutegwa akamusumpule kuciindi ceelede; kumwi kamuwaala makatazyo aanu oonse kulinguwe.” (1 Pe. 5:6, 7) Kucita boobo kuyanda kuti twamugwasya sikwiiya Bbaibbele kuti ayaambele kumuuya. Muntu uubikkila maano kuzyintu zyakumuuya ulazilemeka. Ulaliyanda Jwi lya Leza alimwi ulatondezya “mucelo wamuuya” mubuumi bwakwe. (Gal. 5:22, 23) Alimwi ulabikkila maano kupaila kuli Leza. (Flp. 4:6, 7) Kunze lyaboobo, usyoma Leza kuti amuyumye-yumye  akumupa nguzu ziyandika kutegwa aliyumye mubukkale buli boonse naa kuzuzikizya mulimo uuli woonse akuzwidilila.—Amubale 2 Timoteyo 1:7, 8.

¹⁶ Basikwiiya bamwi bayandika lugwasyo kujatikizya kubala, kubandika naa kwaambaula. Bamwi balakonzya kulimvwa kuti tabeeleli kubelekela Leza akaambo kamicito mibi njobakacita kabatana muzyiba Jehova. Kufwumbwa mbocibede, ncobayandika ndugwasyo alimwi akubakkazikila moyo caluyando. Jesu wakaamba kuti: “Bantu bataciswi tabayandiki musilisi, ccita baciswa.”—Mt. 9:12.

Amugwasye Bamaalumi Banji Kuzyiba Jehova

17, 18. (a) Mbuti mbotukonzya kusikila bamaalumi banji mumulimo wesu wakukambauka? (b) Ncinzi ncotuyoolanga-langa mucibalo citobela?

¹⁷ Tusyoma kuti abamwi bamaalumi banji balautambula mulumbe uugwasya uujanika mu Bbaibbele. (2 Ti. 3:16, 17) Aboobo, mbuti mbotukonzya kusikila bamaalumi banji mumulimo wesu wakukambauka? Kwiinda mukuba aciindi cinji cakukambauka mangolezya, kumamanino aansondo kumazuba naa mumazuba aakulyookezya ciindi bamaalumi banji nobajanika aŋanda. Kuti kacikonzyeka, tulakonzya kulomba kubandika abamukamwini ŋanda basankwa. Atubakambaukile bamaalumi mbotubeleka limwi kwiinda mubukambausi bwamukwiizya kuti kacikonzyeka, alimwi atubasikile bamalumi batasyomi mumbungano.

¹⁸ Kuti twabakambaukila boonse mbotujana, tuli alusyomo lwakuti ibamwi bayooutambula mulumbe. Cakukkazika moyo, atubagwasye boonse batondezya luyandisisyo kukasimpe. Pele mbuti mbotukonzya kubagwasya bamaalumi babbapatizyidwe mumbungano kutegwa beelele kupegwa mikuli mumbunga ya Leza? Tuyooulanga-langa mubuzyo ooyu mucibalo citobela.

[Bupanduluzi buyungizidwe]

Ino Inga Mwaingula Buti?

• Mbuti bamaalumi mbobakonzya kugwasyigwa kutegwa kababikkila maano kuzyintu zyakumuuya?

• Mbuti mbotukonzya kubagwasya basikwiiya bapya kuliyumya nobayungwa?

• Ncinzi cikonzya kubagwasya bamwi kuzunda kuti kabalitenga?

[Mibuzyo yaciiyo]

[Citondezyo cili apeeji 25]

Sena mulajana nzila zyakusikila bamaalumi amakani mabotu?

[Citondezyo cili apeeji 26]

Mbuti mbomukonzya kumugwasya sikwiiya Bbaibbele kulibambila kulwana masunko?