‘Mbuti Mbondiyookambauka?’

Nyika yoonse mboizulwa, tulijisi zikozyanyo zibotu zyabakwesu abacizyi bali mukutola lubazu mumulimo wakukambuka cakusyomeka nokuba kuti bajisi mapenzi asiyene-siyene aajatikizya buumi bwabo. Amubone cikozyanyo caba Dalia, ibakkala mudolopo lipati lya Vilnius mucisi ca Lithuania.

Mucizyi Dalia ujisi myaka yakuzyalwa iibalilwa ku 35. Kuzwa nobakazyalwa, bapenga kapati akaambo kabulwazi bwa cerebral apoplexy. Bulwazi oobo bwapa kuti ba Dalia balebuke mubili alimwi akutacikonzya kwaambaula kabotu. Akaambo kaceeci, bamukwasyi wabo balikke mbabacikonzya kumvwa kabotu nzyobaamba. Ba Dalia bakkala abanyina ba Galina balo babalanganya. Nokuba kuti buumi bwaba Dalia buzwide mapenzi akulibilika, tabatyompwi pe. Munzila nzi?

Ba Galina bapandulula kuti: “Mu 1999 mweenima uujisi zyina lya Apolonija wakatuswaya. Twakabona kuti ba Apolonija balo ibakali Bakamboni ba Jehova bakalilizyi kabotu Bbaibbele alimwi ba Dalia bakatalika kubabuzya mibuzyo minji. Tiilyakalampa pe ciiyo ca Bbaibbele cakatalisyigwa kuli ba Dalia. Ziindi zimwi ndakali kubasangana muciiyo kutegwa ndigwasye kusandulula nzyobakali kwaamba ba Dalia. Aboobo, ndakabona kuti zyoonse nzyaakali kwiiya zyakali kumugwasya kapati. Nikwakainda ciindi cisyoonto andime ndakalomba ciiyo ca Bbaibbele.”

Ba Dalia nibakatalika kumvwisya kasimpe kamu Bbaibbele, mubuzyo umwi wakatalika kubakatazya kapati. Mpoona bakabuzya ba Apolonija kuti: “Mbwaanga ndililebukide mubili, mbuti mbondikonzya kukambauka?” (Mt. 28:19, 20) Ba Apolonija bakasyomezya ba Dalia kuti: “Mutayoowi. Jehova uyoomugwasya.” Mubwini Jehova ulacita oobo.

Aboobo, mbuti ba Dalia mbobacikonzya kukambauka? Kwiinda mukubelesya nzila ziindene-indene. Bacizyi Banakristo balabagwasya kulemba magwalo aajisi mulumbe wamu Bbaibbele. Cakusaanguna, ba Dalia balaamba mizeezo yabo kubacizyi. Mpoonya balalemba lugwalo lujisi mizeezo yaba Dalia. Ba Dalia alimwi balakambauka kwiinda mukutuma tugwalo twaafooni yamunkomo. Alimwi kuti bwaca kabotu, basimbungano balababweza kutegwa bakakambauke kubantu mbobajana mumapaaki alimwi amumigwagwa.

Ba Dalia alimwi abanyina bazumanana kuyaambele kumuuya. Boonse bobilo bakalyaaba kuli Jehova alimwi bakabbapatizyigwa mu November 2004. Mu September 2008, kabunga kabelesya mwaambo waci Polishi kakatalisyigwa mu Vilnius. Mbwaanga kabunga aaka kakali kuyandika basikumwaya ba Bwami, ba Dalia alimwi abanyina bakanjila mukabunga aaka. Ba Dalia baamba kuti: “Myezi imwi ndilalibilika kapati ikuti naa tandinaunka mumulimo wakukambauka. Pele kwiinda mukupaila kuli Jehova, inga takwiindi ciindi ulabona umwi wakulomba kuti muunke antoomwe mubukambausi.” Ino mucizyi wesu uuyandwa Dalia ulimvwa buti kujatikizya bukkale bwakwe? Waamba kuti: “Bulwazi oobu bwapa kuti ndilebuke mubili pele tiibwanyonganya kuyeeya kwangu. Eelo kaka ndilikkomene kwaambila bamwi makani aajatikizya Jehova!”