Mbuti Mbomupa Lulayo?

Sena kuli nimwakalombwa kale kuti mupe bamwi lulayo? Mucikozyanyo, sena mwakabuzyigwa kale mibuzyo mbuli yakuti: ‘Ino ndeelede kucita nzi? Sena ndeelede kuunka kupobwe eeli? Sena ndeelede kuzumanana amulimo ooyu? Sena ndeelede kuyanzana amuntu ooyu kandijisi makanze aakuti tukakwatane?’

Bantu bamwi balakonzya kumulomba kuti mubagwasye kusala zyakucita—zyakucita zikonzya kujatikizya cilongwe cabo abeenzinyina, amukwasyi alimwi ambweni a Jehova. Ino bwiinguzi bwanu bunooyeeme aanzi? Ino mujisi cilengwa cili buti ciindi nimupa bamwi lulayo? Kufwumbwa naa makani alibonya kuti masyoonto naa mapati, lugwalo lwa Tusimpi 15:28, lwaamba kuti: “Moyo wamululami ulayeeya kabotu mbweelede kuvuwa.” Atubone njiisyo zyamu Bbaibbele zili musanu izitobela mbozikonzya kutugwasya kujatikizya kupa lulayo.

1 Amuzyibe Cini Cijatikizyidwe Mubukkale Oobo.

“Na muntu wavuwa katana kumvwa, mbufubafuba bwakwe ansoni.”—TUS. 18:13.

Kutegwa tupe lulayo lukonzya kugwasya, tweelede kubumvwisya bukkale alimwi ambwayeeya ooyo uulomba kugwasyigwa. Mucikozyanyo: Kuti muntu umwi wamutumina luwaile akumubuzya nzila mbotu iiya kuŋanda nkomukkala, ino ncinzi ncomweelede kuzyiba kutegwa mumugwasye? Sena mulakonzya kumwaambila nzila mbotu njakonzya kubelesya kamutanazyiba mpeendela? Peepe! Mbubwenya buyo, kupa lulayo lugwasya kuyandika kuzyiba “mpeendela”—bukkale bwakwe ambwayeeya—ooyo uuyanda lugwasyo. Sena kulakonzya kuba bukkale bukonzya kujatikizya bwiinguzi bwesu? Akaambo kakubula luzyibo lujatikizya bukkale bumwi, tulakonzya kupa lulayo lukonzya kupa kuti muntu ooyo uuyanda lugwasyo anyongane.—Lk. 6:39.

Mweelede Kuzyiba Buvwuntauzi Mbwaakacita Kale. Inga cabota alimwi kubuzya muntu uuyandaula lugwasyo mibuzyo mbuli yakuti: “Ninjiisyo nzi zyamu Bbaibbele nzyomuyeeya kuti inga zyabeleka?” “Mbubotu nzi alimwi mbubi nzi buliko kubelesya nzila ziliko?” “Nkuvwuntauzya kuli buti nkomwakacita kale?” “Ino ndugwasyo nzi bamwi ndobakamupa kale, mbuli baalu mumbungano, bazyali banu naa ibamusololela ciiyo ca Bbaibbele?”

Bwiinguzi kumibuzyo eeyi bulakonzya kutugwasya kuzyiba kusola nkwaakacita kale muntu kutegwa ajane bwiinguzi. Kunze lyaboobo, ciindi nitupa lulayo tulakonzya kubikkila maano bamwi nzyobaamba kale. Alimwi tulakonzya kuzyiba naa muntu ooyo uuyanda lulayo uyanda buyo kuti ooyo uumupa lulayo ‘amutekunye kumatwi’ alulayo ndwayanda kumvwa.—2 Ti. 4:3.

2 Tamweelede Kufwambaana Kwiingula.

“Muntu woonse weelede kufwambaana kuswiilila, kumuka kwaambaula.”—JAK. 1:19

 Katujisi makanze mabotu, tulakonzya kwiingula cakufwambaana. Pele sena inga caba cabusongo kucita oobo ikapati kuti tubandika makani ngotutazyi kabotu? Lugwalo lwa Tusimpi 29:20 lwaamba kuti: “Sa ulibwene muntu uufwanzya kwaamba? Mufubafuba ulasyomeka kwiinda nguwe.”

Amulibambile kabotu kutegwa musinizye kuti nzila njomutiibelesye ileendelana abusongo bwabunaleza. Amulibuzye kuti: ‘Sena kuyeeya kwangu kweendelezyegwa “[a]muuya wanyika”?’ (1 Ko. 2:12, 13) Amuyeeye kuti makanze mabotu alagwasya, pele kuli azimwi ziyandika. Naakamana kuzyiba mulimo wa Jesu uukatazya, mwaapostolo Petro wakaambila Jesu kuti: “Kolyeengelela Mwami; eeci tacikakucitikili pe.” Ncinzi ncotukonzya kwiiya kumajwi aa Petro? Kuyandika kucenjela, naba muntu uusyomeka ulakonzya kusumpula “mizeezo yabantu ikutali ya Leza.” (Mt. 16:21-23) Kuyandika kuyeeya katutanaamba. Kayi busongo bwa Leza bulainda azyintu zitucitikila.—Job. 38:1-4; Tus. 11:2.

3 Cakulibombya Amubelesye Jwi lya Leza.

“Tandilicitili cintu cili coonse; pele mbubonya mbwaakandiyiisya Taata ndilaamba makani aaya.” —JOH. 8:28.

Sena inga mwaamba kuti, “Nindali ndinywe, nindacita . . . ”? Nikuba kuti bwiinguzi bulizyibidwe, inga cabota kwiiya cikozyanyo ca Jesu cakulibombya. Walo wakalijisi busongo alimwi aluzyibo kwiinda muntu uuliwoonse, nikuba boobo wakaamba kuti: “Tiindali kwaamba mukuyanda kwangu ndemwini pe, pele Taata mwini . . . nguwakandipa mulawo kujatikizya nzyondeelede kwaamba akukanana.” (Joh. 12:49, 50) Kuyiisya kwa Jesu alimwi alulayo lwakwe lyoonse zyakayeeme aakuyanda kwa Bausyi.

Mucikozyanyo, mulugwalo lwa Luka 22:49 tubala kuti basikwiiya ba Jesu bakalomba busolozi kuti naa bakeelede kulwana naa pe ciindi naakali kuyanda kwaangwa. Sikwiiya umwi wakabelesya ipanga. Amubone kukozyanya kuliko mucibalo cili mulugwalo lwa Matayo 26:52-54 kuti nimuba mubukkale buli boobo, Jesu wakabapandulwida basikwiiya kujatikizya luyando lwa Jehova. Kazyi njiisyo zijanika mulugwalo lwa Matalikilo 9:6 alimwi amubusinsimi buli mulugwalo lwa Intembauzyo 22 alimwi a Isaya 53, Jesu wakabapa busolozi bugwasya bwalo bwakafwutula maumi alimwi akukkomanisya Jehova.

4 Amubelesye Laibbulali Yanu Yamabbuku Aamba Zyamu Bbaibbele.

“Ino mubwini, nguni muzike musyomesi uucenjede ooyo Simalelo wakwe ngwaakasala kulanganya babelesi bamuŋanda yakwe, kuti kabapa cakulya cabo aciindi ceelede?”—MT. 24:45.

 Jesu wasala ciinga camuzike uusyomeka balo bapa cakulya cakumuuya ciyandika. Ciindi nimupa lulayo alimwi abusolozi kujatikizya makani aayandika, sena mulajana ciindi cakuvwuntauzya cakulomya mumabbuku aapandulula Bbaibbele?

Zibelesyo mbuli Watch Tower Publications Index alimwi a Watchtower Library * zilapa makani manji alimwi aatakatazyi. Inga kwaba kulubizya kuti tiitwabikkila maano kuzibelesyo eezyi. Mitwe yamakani minji ilitondezyedwe alimwi azibalo zinji zikonzya kugwasya muntu uuyandaula lulayo. Sena mulicibwene kugwasya bamwi kuvwuntauzya njiisyo zyamu Bbaibbele alimwi akupandulula kweelana a Jwi lya Leza? Mbubwenya mbuli maapu mboikonzya kugwasya muntu kuzyiba mpabede alimwi akumusololela kubusena nkwaya, azyalo zibelesyo nzyotubelesya nituvwuntauzya zilakonzya kumugwasya muntu kubona munzila mwabede alimwi akuzyiba mbwakonzya kuzumanana kuba munzila iitola kubuumi.

Baalu banji babayiisya basikumwaya mbokujanwa zibalo kwiinda mukubelesya Index naa Watchtower Library, aboobo babagwasya bakwesu abacizyi kupandulula Magwalo. Lugwasyo luli boobo lugwasya basikumwaya kulanganya twaambo tubakatazya aciindi eeco, pele alimwi lubagwasya kuba acilengwa cakuvwuntauzya alimwi akusyoma bubambe bwa Jehova bwakumuuya. Munzila eeyi, baba “amaano aayiisyidwe kwaandaanya ciluzi acitaluzi kwiinda mukwaabelesya.”—Heb. 5:14.

5 Tamweelede Kubasalila Cakucita Bamwi.

“Umwi aumwi weelede kunyamuna mukuli wakwe uumugeme.”—GAL. 6:5.

Kumamanino umwi aumwi weelede kulisalila lulayo ndwayelede kubelesya. Jehova ulatupa toonse lwaanguluko lwakulisalila zyakucita kweelana anjiisyo zyakwe naa pe. (Dt. 30:19, 20) Bukkale bumwi bujatikizya njiisyo zyamu Bbaibbele zinji, calo cipa kuti muntu uuyandaula lulayo alisalile cakucita mwini. Kweelana akaambo naa myaka yamuntu uuyandaula lulayo kulindiswe, tulakonzya alimwi kulibuzya kuti, ‘Sena ndilipedwe nguzu zyakulanganya mubuzyo ooyu?’ Twaambo tumwi tuyandika kulekela baalu bambungano naa ibazyali bakwe ikuti sikubuzya ucili mwana.

[Bupanduluzi buyungizidwe]

[Kabbokesi/Cifwanikiso icili apeeji 8]

Bubambe bwa Kukomba Mumukwasyi

Kacili cibeela cakwiiya, amusole kujana bwiinguzi kumibuzyo njomwakabuzyigwa caino-ino. Nzibalo nzi alimwi ninjiisyo nzi zyamu Bbaibbele zikonzya kugwasya muntu uunga wabuzya mibuzyo iili boobo? Mucikozyanyo, kuti mukwesu naa mucizyi wamubuzya kujatikizya kweebana amuntu uumwi kajisi makanze aakukwatana anguwe. Kuti kamubelesya Index naa Watchtower Library, amusaangune kuyandaula makani aayendelana amubuzyo. Mucikozyanyo, mu Index mulakonzya kuyandaula “Dating” (Kweebana) naa “Marriage” (Cikwati). Kumane amuyandaule tutwe tusyoonto tweendelana amakani ngomuyanda. Ciindi nimulanga mutwe mupati, amubone naa kuli mpobaamba kuti, “See also” (Amubone alimwi) tutwe ootu, twalo tukonzya kumusololela kututwe tweendelana kapati amakani ngomuvwuntauzya.

[Kabbokesi kali apeeji 9]

Tulalumba bubambe bwa Jehova kwiinda mumbunga yakwe, tulakonzya kupa alimwi akutambula lulayo. Lugwalo lwa Mukambausi 12:11 lwaamba kuti: ‘Majwi aabasongo ali mbuli zibinzyo, twaambo tuyobwedwe tuli mbuli mpikili zigagailidwe, tupedwe Mweembezi omwe.’ Mbubwenya mbuli “zibinzyo,”—tusamu ntobabelesya kubinga basune bali mujoko, lulayo lupegwa caluyando alimwi lugwasya lulakonzya kusololela muntu kunzila iili kabotu. “Mpikili zigagailidwe” zipa kuti eeco cagagailwa cijate. Mbubwenya buyo, akwalo kupa lulayo lubotu kulakonzya kugwasya. Basongo ‘balalyaaba’ kujana “twaambo tuyobwedwe” twalo tutondezya busongo bwa ‘Mweembezi wabo omwe’ buyo, Jehova.

Amutobele citondezyo ca Mweembezi ciindi nimupa lulayo. Eelo kaka ncoolwe kuswiilila alimwi akupa lulayo lugwasya! Kuti kaluyeeme ncobeni anjiisyo zyamu Bbaibbele, lulayo lwesu lunooli kabotu alimwi luyoomugwasya lyoonse ooyo uulutambula.