Jehova Ulizyi Kuvwuna Bantu Bakwe

“Jehova ulizyi ikuvwuna bantu bamubelekela cakulyaaba kuzwa kumasukusyo.”—2 PE. 2:9.

NKAAMBO NZI NCOTUKONZYA KUBA MASIMPE KUTI JEHOVA:

․․․․․

Ulizyi ciindi nayoozuzikizya makanze aakwe?

․․․․․

Uyoobelesya nguzu zyakwe kuvwuna bantu bakwe?

․․․․․

Ulizyi zyintu mboziyoocitika kumbele?

1. Nkucinca kuli buti kuyoolibonya mubukkale ciindi “[ca]mapenzi mapati”?

LUBETA lwa Leza anyika eeyi ya Saatani luyooboola cakutayeeyelwa. (1 Te. 5:2, 3) “Buzuba bupati bwa-Jehova” bwaakusika, ciinga cabantu ciyoonyongana. (Zef. 1:14-17) Mapenzi ayoovwula akwalo kubula zyintu ziyandika zyakumubili kuyooindila. Ciyooba ciindi camapenzi “aatanacitikide kuzwa kumatalikilo aanyika kusikila sunu.”—Amubale Matayo 24:21, 22.

2, 3. (a) Nzyintu nzi ziyoocitikila bantu ba Leza ciindi “[ca]mapenzi mapati”? (b) Ncinzi cikonzya kutuyumya kujatikizya zyintu ziboola kumbele?

² “Mapenzi mapati” aakusika kumamanino, bantu ba Leza bayooba bamamanino kulwanwa a “Gogo wakunyika ya-Magogo.” Munkondo eeyi, “impi impati loko” iyoolwana bantu ba Leza “mbuli ijoba livumba nyika.” (Ezk. 38:2, 14-16) Kunyina mbunga yabantu iyooboola kuvwuna bantu ba Jehova. Lufwutuko lwabo lunooli muli Leza alikke buyo. Ino bayoocita buti basinkondonyina baakuboola kuti babajaye?

³ Ikuti muli mubelesi wa Jehova, sena mulijisi lusyomo muli Jehova kuti ulakonzya alimwi kuti uyoobakwabilila bantu bakwe ciindi camapenzi mapati? Mwaapostolo Petro wakalemba kuti: “Jehova ulizyi ikuvwuna bantu bamubelekela cakulyaaba kuzwa kumasukusyo, akuyobola bantu bataluleme kuti bakanyonyoonwe mubuzuba bwalubeta.” (2 Pe. 2:9) Kuzinzibala kuyeeya kujatikizya Jehova mbwaakafwutula bantu bakwe kaindi, kulakonzya kutuyumya kuzyintu ziboola kumbele. Atulange-lange zikozyanyo zyotatwe zikonzya kutupa kuba alusyomo munguzu zya Jehova zyakuvwuna bantu bakwe.

 KUFWUTUKA ZAMBANGULWE LYANYIKA YOONSE

4. Ciindi ca Zambangulwe, nkaambo nzi kubamba ciindi ncocakali kuyandika kapati?

⁴ Cakusaanguna, atulange-lange cibalo cijatikizya Zambangulwe lyakacitika mumazuba aa Nowa. Kutegwa kuyanda kwa Jehova kuzwidilile, ciindi cakali kuyandika kapati. Mulimo mupati wakuyaka bwato wakaleelede kumana alimwi banyama bakeelede kunjizyigwa kabotu-kabotu mubwato mvula kaitanatalika. Cibalo cili mubbuku lya Matalikilo citondezya kuti Jehova tanaakalindila kuti bwato buyakwe kutegwa abikke ciindi mvula niyakali kuyootalika. Wakabikka ciindi Zambangulwe nilyakali kuyootalika kakunyina kulibilika kuti bwato inga bwamuka kumana. Muciindi caboobo, katanamwaambila Nowa zyakuyaka bwato, Leza wakabikka ciindi Zambangulwe nilyakali kuyootalika. Tuzyi buti oobo?

5. Ncinzi Jehova ncaakaambilizya mumajwi aalembedwe mulugwalo lwa Matalikilo 6:3, alimwi ndilili nakaamba majwi aayo?

⁵ Kweelana alugwalo lwa Matalikilo 6:3, Bbaibbele litwaambila kuti Jehova wakaambilizya kujulu kuti: “Muuya wangu tuukooyookazyanya lyoonse amuntu pe, nkaambo ninyama buyo. Mazuba aakwe ayooba myaka iili mwaanda amakumi obile.” Ooyu tiiwakali mweelwe wamyaka bantu njobakali kulangilwa kupona pe. Ooku kwakali kwaambilizya lubeta Jehova ndwaakali kuyooleta kutegwa asalazye nyika yabantu batayoowi Leza. * Mbwaanga Zambangulwe lyakatalika mu 2370 B.C.E., tulakonzya kwaamba kuti Leza wakaambilizya lubeta oolu mu 2490 B.C.E. Aciindi eeco, Nowa wakajisi myaka iili 480 yakuzyalwa. (Matl. 7:6) Nikwakainda myaka iibalilwa ku 20, mu 2470 B.C.E., bana basankwa ba Nowa bakatalika kuzyalwa. (Matl. 5:32) Aciindi eeci kwakaceede myaka iili 100 kutegwa Zambangulwe litalike, nikuba boobo Nowa kunyina naakazyi mulimo waalubazu Jehova ngwaakali kuyanda kuti aucite kutegwa akwabilile mukwasyi wabantu. Ino Leza wakali kuyoolindila ciindi cilamfwu buti?

6. Ndilili Jehova naakaambila Nowa kuti ayake bwato?

⁶ Kulibonya kuti Jehova wakalindila kwamyaka iili mbwiibede katanamwaambila Nowa ncaakali kuyoocita. Nkaambo nzi ncotwaambila boobo? Majwi aakasololelwa amuuya atondezya kuti bana ba Nowa bakali bapati alimwi bakalikwete ciindi Leza naakaambila Nowa kuti ayake bwato. Jehova wakaambila Nowa kuti: “Tuyootangana cizuminano ayebo, aboobo uyoonjila mubwaato, webo abana bako amukaako abamukabana bako.” (Matl. 6:9-18) Aboobo, kulibonya kuti ciindi Nowa naakapegwa mulimo ooyu wakuyaka bwato, kwakaceede buyo myaka iili 40 na 50 kutegwa Zambangulwe litalike.

7. (a) Ino Nowa abamukwasyi wakwe bakatondezya buti lusyomo? (b) Ndilili Leza naakaambila Nowa ciindi cini Zambangulwe nilyakali kuyootalika?

⁷ Mulimo wakuyaka bwato niwakali kuyaambele, kulangilwa kuti Nowa abamukwasyi wakwe bakali kulibuzya kujatikizya Leza mbwaakali kuyoozuzikizya makanze aakwe ciindi Zambangulwe nilyakali kuyootalika. Nikuba boobo, kubula luzyibo mumakani aaya tiikwakabalesya kuyaka bwato. Lugwalo lwaamba kuti: “Nowa wakacita obo. Wakacita mbubonya mbuli Leza mbwaakamulailila.” (Matl. 6:22) Kakuceede buyo mazuba aali ciloba kuti Zambangulwe litalike, iciindi cakaceede kuti Nowa abamukwasyi wakwe banjizye banyama mubwato, Jehova wakaambila Nowa ciindi cini Zambangulwe nilyakali kuyootalika. Aboobo, zipulo zyakujulu nizyakajalulwa “mumwaka wamyanda iili musanu aumwi wabuumi bwa-Nowa, mumwezi wabili, mubuzuba  bwakumi amusanu aabili bwamumwezi,” zyintu zyoonse zyakalibambidwe kale.—Matl. 7:1-5, 11.

8. Ino cibalo icaamba Zambangulwe citugwasya buti kusyoma kuti Jehova ulizyi ciindi cakuvwuna bantu bakwe?

⁸ Cibalo icaamba Zambangulwe cipa bumboni bwakuti Jehova nguuyinda Kubamba ciindi alimwi akuti Muvwuni. Aboobo, nayaabubala ciindi ciceede mubweende bwazyintu oobu, tulakonzya kuba masimpe kuti makanze aa Jehova oonse ayoocitika aciindi ncasalide walo mwini nkokuti “buzuba oobo alimwi aciindi.”—Mt. 24:36; amubale Habakuku 2:3.

BAKAVWUNWA AA LWIZI LUSALALA

9, 10. Ino Jehova wakabelesya buti bantu bakwe koongelezya impi zyabana Egepita kutegwa banjile mukakole?

⁹ Kusika waawa, twabona kuti Jehova nguuendelezya ciindi kuzyintu nzyacita kutegwa azuzikizye makanze aakwe. Cikozyanyo cabili ncotutiilange-lange citondezya kaambo kambi ncotukonzya kusyoma Jehova kuti ulabavwuna bantu bakwe, nkokuti: Uyoobelesya nguzu zyakwe ziteeli kutegwa asinizye kuti luyando lwakwe lwacitwa. Aboobo, masimpe kuti kuli Jehova cilakonzyeka kuvwuna babelesi bakwe cakuti zimwi ziindi ulababelesya koongelezya basinkondonyina kuti banjile mukakole. Mbombubo mbwaakacita ciindi naakaangulula bana Israyeli kuzwa mubuzike mu Egepita.

¹⁰ Bana Israyeli ibakazwa mu Egepita bakali kusika ku 3,000,000. Jehova wakabelesya Musa kuti abasololele munzila iyakapa kuti Farao abone mbuli kuti bakali kwiile kwiingaila. (Amubale Kulonga 14:1-4.) Katakonzyi kukaleya kakole, Farao wakasololela impi yakwe kutobela bantu ibakali bazike akubasyanikizya a Lwizi Lusalala. Kwakali kulibonya mbuli kuti taakwe kwakutijila. (Kul. 14:5-10) Mubwini, bana Israyeli tiibakali muntenda iili yoonse pe. Nkaambo nzi? Akaambo kakuti Jehova wakali afwaafwi kubavwuna.

11, 12. (a) Ino Jehova wakabavwuna buti bantu bakwe? (b) Ncinzi cakatobela akaambo kakuti Leza wakabavwuna, alimwi ino cibalo eeci cituyiisya nzi kujatikizya Jehova?

¹¹ “Musumpululu wajoba” iwakali kusololela bana Israyeli wakainka kusule lyabo,  ikusinkila impi ya Farao alimwi akubabikka mumudima. Nikuba boobo, kubana Israyeli musumpululu wakali kumunika masiku camaleele. (Amubale Kulonga 14:19, 20.) Mpoonya Jehova wakaandaanya Lwizi Lusalala kwiinda mukubelesya muuwo muyumu wakujwe “mane kwakaboneka nyika injumu.” Cakutadooneka, eeci cakatola ciindi cili mbocibede nkaambo cibalo caamba kuti: “Lino bana ba-Israyeli bakainda akati kalwizi anyika injumu.” Kweezyanisya ampi zya Farao izyakajisi nkalaki, bana Israyeli bakali kweenda asyoonto-asyoonto kapati. Nikuba boobo, tiicakali kukonzyeka kuti bana Egepita balakonzya kubajata, nkaambo Jehova wakali kulwanina bantu bakwe. ‘Wakapilinganya makamu oonse aaba Egepita. Nkabela wakaangatizya mavili aankalaki zyabo, wazyeenzya cakusililika.’—Kul. 14:21-25.

¹² Ciindi bana Israyeli boonse nibakazabuka kutala aalwizi, Jehova wakalailila Musa kuti: “Tandabika ijanza lyako atala alwizi, kuti maanzi aboole aba-Egepita, ankalaki zyabo abasimbizi babo.” Ciindi basikalumamba nibakali kusola kutija maanzi aakali kuboola canguzu, “Jehova wakabatapwida mulwizi.” Kwakanyina kwakutijila. “Teekwakasyaala naba omwe.” (Kul. 14:26-28) Aboobo, Jehova wakatondezya kuti ulijisi nguzu zyakuvwuna bantu bakwe mubukkale buli boonse.

KUFWUTUKA LUNYONYOOKO LWA JERUSALEMU

13. Ino malailile nzi Jesu ngaakapa, alimwi ncinzi cakabapa kugambwa basikutobela bakwe?

¹³ Jehova ulizyi kabotu-kabotu mbwayoozicita zyintu kutegwa azuzikizye makanze aakwe. Tulabona mbociyandika eeci mucikozyanyo catatu ncotutiilange-lange: kusaalwa kwa Jerusalemu mumwaanda wamyaka wakusaanguna. Jehova wakabelesya Mwanaakwe kupa malailile ku Banakristo bakali kukkala mu Jerusalemu amu Judaya mbobakali kuyoofwutuka munzi niwakanyonyoonwa mu 70 C.E. Jesu wakaamba kuti: “Mwaakubona cisesemyo cinyonyoona icakaambwa kwiinda mumusinsimi Daniyele kaciimvwi mubusena busalala, . . . mpoonya aabo bali mu Judaya bakatalike kutijila kumalundu.” (Mt. 24:15, 16) Pele ino basikutobela ba Jesu bakali kuyoozyiba buti kuti businsimi oobu buli mukuzuzikizyigwa?

14. Kweelana ambozyakali kucitika zyintu, ino cakagwasya buti kuzyiba ncaakali kwaamba malailile aa Jesu?

¹⁴ Nizyakatalika kucitika zyintu bakazyiba ncaakali kupandulula Jesu. Mu 66 C.E., basikalumamba bana Roma kabasololelwa a Cestius Gallus bakasika mu Jerusalemu kuzoolesya buzangi bwaba Juda. Bazangi bana Juda nibakatijila mutempele, basikalumamba bana Roma bakatalika kusya bwaanda bwatempele. Banakristo ibakapakamene, bakalizyi eeci ncocakali kwaamba: basikalumamba bana Roma azitondezyo zyabo zyamituni (“cisesemyo”) bakaakusika mane afwaafwi abwaanda bwa tempele  (“busena busalala”). Cakali ciindi cakuti basikutobela ba Jesu ‘batalike kutijila kumalundu.’ Ino bakali kuyoozwa buti mumunzi wakali kusaalwa? Cintu catakali kuyeeyelwa cakali afwaafwi kucitika.

15, 16. (a) Ino malailile nzi aacigaminina Jesu ngaakapa, alimwi nkaambo nzi basikutobela bakwe ncobakeelede kwaatobela? (b) Ino kuvwunwa kwesu kunooyeeme anzi?

¹⁵ Kakunyina kaambo, Cestius Gallus abasikalumamba bakwe bakazwa mu Jerusalemu akutalika kupiluka. Bazangi bana Juda bakatalika kubatandaanya. Impi eezyi izyakali kulwana nizyakazwa mu Jerusalemu, basikutobela ba Jesu lino bakajana coolwe cakutija. Jesu wakabapede malailile aagaminide aakuti basiye zyintu zyabo zyoonse musyule akuzwa cakufwambaana. (Amubale Matayo 24:17, 18.) Sena kucita zyintu cakufwambaana kwakali kuyandika? Inzya! Mumazuba buyo masyoonto, ibazangi bakapiluka akutalika kusinikizya bantu ibakali kukkala mu Jerusalemu amu Judaya kubasangana mubuzangi. Muciindi cisyoonto bukkale bwakabija mumunzi akaambo kabazangi aaba iba Juda ibakali kulwanina bweendelezi. Kutija kwakatalika kukatazya. Ciindi nibakapiluka basikalumamba bana Roma mu 70 C.E., tiicakali kukonzyeka kutija. (Lk. 19:43) Aabo ibatakaningatija bakajalilwa. Ku Banakristo ibakatijila kumalundu, malailile aa Jesu akapa kuti bafwutuke. Bakalibonena kuti Jehova ulizyi kuvwuna bantu bakwe. Ino ncinzi ncotukonzya kwiiya kucibalo eeci?

¹⁶ Aakutalika mapenzi mapati, Banakristo bayooyandika kutobela malailile aazwa mu Jwi lya Leza akumbunga yakwe. Mucikozyanyo, malailile aa Jesu ‘aakutalika kutijila kumalundu’ alijisi bupandulizi kuciindi cesu. Kutija kwesu mbokuyooba kuyoolibonya kumbele. * Nikuba boobo, tuli masimpe kuti Jehova uyootwaambila cakusalazya malailile aayo caakusika ciindi cakuti twaabelesye. Mbwaanga kuvwunwa kwesu kunooyeeme akuswiilila, tweelede kulibuzya kuti: ‘Ino ndicita buti mazuba aano Jehova napa malailile kubantu bakwe? Sena ndilafwambaana kwaatobela naa ndilawayawaya?’—Jak. 3:17.

KUYUMIZYIGWA AZYINTU ZIBOOLA KUMBELE

17. Ino businsimi bwa Habakuku buyubununa nzi kujatikizya kulwanwa kwabantu ba Leza kumbele?

¹⁷ Lino atulange-lange alimwi kulwanwa a Gogo kwaambidwe kumatalikilo aacibalo eeci. Mubusinsimi bukozyene, Habakuku wakaamba kuti: “Nindakavwa, mala aangu akali kukankama. Milomo yangu yakabwibwima kujwi lyao. Bubole bwakandijilila muzifuwa. Ndakakankama mpondakabede. Ndakalindila buzuba bwamapenzi, buti sikile bantu babasaala.” (Hab. 3:16) Kumvwa buyo kuti bantu ba Leza bayoolwanwa mala aamusinsimi akakankama, milomo yakwe yakabimba alimwi wakabula nguzu. Mbwaakalimvwa Habakuku citondezya mbotuyoolimvwa andiswe aakutulwana Gogo. Pele musinsimi wakalilibambilide kulindila buzuba bupati bwa Jehova, kasyoma kuti Jehova uyoobavwuna bantu bakwe. Andiswe tulakonzya kuba alusyomo luli boobo.—Hab. 3:18, 19.

18. (a) Nkaambo nzi ncotuteelede kuyoowa kulwanwa kuli kumbele? (b) Ncinzi ncotuyoolanga-langa mucibalo citobela?

¹⁸ Zikozyanyo zyotatwe nzyotwalanga-langa cakutadooneka zilatondezya kuti Jehova ulizyi kuvwuna bantu bakwe. Makanze aakwe taakonzyi kwaalilwa, cakutadooneka uyoozunda. Nikuba boobo, kutegwa tukatole lubazu mukuzunda ooku, tweelede kuzumanana kusyomeka kusikila kumamanino. Mbuti Jehova mbwatugwasya kuzumanana kusyomeka mazuba aano? Aayo ngemakani ngotuyoobandika mucibalo citobela.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 24]

Sena bana Israyeli bakali muntenda iili yoonse akaambo kampi ya Farao?