Mibuzyo Yabasikubala

Muunzila nzi lufwu lwabantu basyomeka kuli Leza mboluli ‘cintu cipati mumeso aa Jehova’?

▪ Sintembauzyo wakasololelwa amuuya kwiimba kuti: “Mumeso aa Jehova lufwu lwabantu bakwe basyomeka makani mapati.” (Int. 116:15) Buumi bwamukombi wa Jehova wakasimpe uuliwoonse bulayandika kapati kulinguwe. Nikuba boobo, kunze aalufwu lwamuntu omwe, kuli bupanduluzi bumbi mumajwi aazubuludwe mulugwalo lwa Intembauzyo 116.

Ciindi mukwesu naamba makani aamalila kujatikizya Munakristo, taceelede kubelesya lugwalo lwa Intembauzyo 116:15 kwaamba muntu wafwa, nikuba kuti wakafwa kali mubelesi uusyomeka wa Jehova. Nkaambo nzi? Akaambo kakuti majwi aa sintembauzyo alijisi bupanduluzi bunji. Aamba kuti Leza takonzyi kulekela nkamu yoonse yabantu basyomeka kuti bafwe nkaambo balayandika kapati mumeso aakwe.—Amubone Intembauzyo 72:14; 116:8.

Lugwalo lwa Intembauzyo 116:15 lutusyomezya kuti Jehova takalekeli babelesi bakwe basyomeka kabali nkamu kuti bamaninine kugwisyigwa aanyika. Mubwini, makani eesu aakaindi alatondezya mbotuliyumya mumasunko mapati alimwi amukupenzyegwa, calo icipa bumboni bwakuti Leza taakwe nayoolekela kuti tujaigwe toonse.

Akaambo kakuti ngusinguzuzyoonse alimwi ulazuzikizya makanze, Jehova takalekeli kuti tumaninine kugwisyigwa katuli nkamu. Nikwali kuti Leza wazumizya kuti eeco cicitike, inga caboneka kuti basinkondonyina balijisi nguzu kumwiinda, calo citakonzyi kucitika. Makanze aa Jehova aakuti nyika yoonse ikkalwe abantu basyomeka inga taazuzikizyigwa—pele eeco tacikonzyi kucitika. (Is. 45:18; 55:10, 11) Nikuba kubelekela Jehova mulimo uusetekene inga kwamana anyika kuti kwabula bantu ibacaala kumukomba mutempele yakwe mpati yakumuuya yaanyika. Inga kwabula ntalisyo “[y]anyika mpya”—ciinga cabantu baluleme ibapona anyika kwiinda mukusololelwa “[a]julu mpya.” (Ciy. 21:1) Mpoonya alimwi Bulelo bwa Kristo bwa Myaka Iili Cuulu inga tiibwazuzikizyigwa ikuti kakunyina balelwa aanyika.—Ciy. 20:4, 5.

Cuuno ncajisi Leza alimwi ampuwo yakwe inga yadoonekwa ikuti wazumizya basinkondonyina kugwisya nkamu yoonse yabantu bakwe anyika. Makani aali boobo inga anyonganya mpuwo njajisi Jehova kali Mwami Wabubumbo Boonse. Kuyungizya waawo, akaambo kacuuno ncajisi alimwi akaambo kazyina lyakwe lisalala, Jehova takazumizyi bantu bakwe basyomeka kuti bafwe kabali nkamu. Amuyeeye buyo: Mbwaanga ‘takwe cibi’ kuli Leza, taakwe nayooalilwa kuvwuna nkamu yabantu balo ibali kumubelekela cakusyomeka. (Dt. 32:4; Matl. 18:25) Kunze lyaboobo, kulekela kuti babelesi bakwe bajaigwe boonse kabali nkamu inga caindana ancolyaamba Jwi lya Leza kuti: “Jehova takonzyi kuleka bantu bakwe, nkaambo kazina lyakwe ipati.” (1 Sam. 12:22) Masimpe, “Jehova takooyoosowa bantu bakwe, takooyoolekelezya lukono lwakwe.”—Int. 94:14.

Eelo kaka cilaumbulizya kuzyiba kuti bantu ba Jehova kunyina nibayoomana anyika! Aboobo, kusikila mpotugolela, atuzumanane kusyomeka kuli Leza, akusyoma cisyomezyo cakwe cakuti: “Taakwe cilwisyo niciba comwe cibumbwa kukulwisya nduwe cikonzya kujana coolwe, andimi zyoonse zibuka kukubeteka uyoozipa mulandu. Nciceeco caabilo cabalanda ba-Jehova akululamikwa kwabo kuzwa kulindime.”—Is. 54:17.

[Majwi aakwelelezya sikubala aali apeeji 22]

Leza taakwe nayoolekela kuti bantu bakwe bajaigwe boonse