Sena Mulalubikkila Maano Lukono Lwesu Lwakumuuya?

‘Leza wakabikkila maano kuli bamasi kuti muli mbabo ajane bantu bazyina lyakwe.’—MIL. 15:14.

INO INGA MWAINGULA BUTI?

Cacigaminina, amwaambe njiisyo iitali yamumagwalo, akutondezya mbotwakwabililwa kukusyoma njiisyo eeyo.

Mbuti mbotwaangununwa kucibi alufwu?

Ino mulimvwa buti kujatikizya bweendelezi bwa Jehova alimwi amakani aakusyomeka?

1, 2. (a) Ino ‘ŋanda ya Davida’ yakali nzi, alimwi yakali kuyakuyakululwa buti? (b) Mbaani babelekela antoomwe kabali babelesi ba Jehova mazuba aano?

CIINDI muswaangano wakabunga keendelezya uuyandika kapati nowakali kucitika mu Jerusalemu mu 49 C.E., sikwiiya Jakobo wakaamba kuti: “Simoni [Petro] walungulula oobo Leza ciindi cakusaanguna mbwaakabikkila maano kuli bamasi kuti muli mbabo ajane bantu bazyina lyakwe. Alimwi eeci cileendelana amajwi aa Basinsimi, mbubonya mbokulembedwe kuti, ‘Zyaakwiinda zyintu eezyi ndiyoopiluka akuyakulula ŋanda ya Davida iiwide; ndiyooyakulula matongo aayo akuyiimika alimwi, ikutegwa bantu aabo bayoosyaala bakayandaule Jehova camoyo woonse, antoomwe abantu bamuzisi zyoonse, ibantu baitwa azyina lyangu, mbwaamba Jehova ooyo uucita zyintu eezyi, zizyibidwe kuzwa kaindi.’”—Mil. 15:13-18.

² ‘Ŋanda ya Davida’ yakamwaika ciindi Mwami Zedekiya naakagwisyigwa acuuno cabwami. (Am. 9:11) Nokuba boobo, “ŋanda” yakali kuyakuyakululwa awaluzubo lwa Davida, Jesu, kali Mwami walyoonse. (Ezk. 21:27; Mil. 2:29-36) Ciindi Jakobo naakali kwaamba muswaangano uulya uutakalubwi, businsimi oobu bwa Amosi bwakazuzikizyigwa mukuyobolola basikulela ba Bwami kuzwa kuba Juda a Bamasi. Mazuba aano, Banakristo bananike basyeede alimwi amamiliyoni “[aa]mbelele zimbi” zya Jesu balikamantene mukwaambilizya kasimpe kamu Bbaibbele kabali babelesi ba Jehova.—Joh. 10:16.

BANTU BA JEHOVA BAJANA BUYUMUYUMU

3, 4. Mbuti bantu ba Jehova mbobakafwutuka kumuuya mu Babuloni?

³ Ciindi ba Juda nobakatolwa buzike ku Babuloni, cakali kusalala kuti ‘ŋanda ya Davida’ yakaliwide. Mbwaanga bukombi bwakubeja bwakalidumide kapati mu Babuloni, mbuti bantu ba Leza mbobakafwutuka kumuuya mumyaka iili 70 yabuzike kuzwa  mu 607 B.C.E. kusika mu 537 B.C.E.? Bakafwutuka mbubwenya mbotufwutuka katuli bantu ba Jehova munyika iino yeendelezyegwa a Saatani. (1 Jo. 5:19) Lukono lubotu lwakumuuya lwagwasya kutegwa kufwutuka kuli boobo kukonzyeke.

⁴ Tulijisi Jwi lya Leza lilembedwe lyalo lili ncibeela calukono lwakumuuya. Ba Juda ibakali bazike mu Babuloni tiibakajisi Magwalo Aasalala aazwide, pele bakalijisi luzyibo lwa Mulawo wa Musa, iwakali kubikkilizya a Milawo Iili Kkumi. Bakalizizyi ‘nyimbo zya Zioni,’ bakali kukonzya kuyeeya tusimpi, alimwi bakalizizyi kabotu zyintu babelesi ba Jehova bakaindi nzyobakacitide. Masimpe, aabo bazike bakalila nobakayeeya Zioni, alimwi tiibakamuluba Jehova. (Amubale Intembauzyo 137:1-6.) Eeco cakabapa kuzumanana kupona kumuuya nokuba kuti mu Babuloni mwakali njiisyo zinji zyakubeja alimwi azilengwa.

BUTATU BWAKATALIKA KAINDI

5. Mbumboni nzi bwabukombi bwabutatu mbotujisi kuzwa mu Babuloni wansiku a Egepita?

⁵ Bukombi bwabutatu bwakalidumide kapati mu Babuloni. Butatu bumwi mu Babuloni bwakali kubikkilizya a Sin (leza wamwezi), Shamash (leza wazuba) alimwi a Ishtar (leza wabuzyazyi ankondo). Mu Egepita yansiku, leza kanji-kanji wakali kubonwa kuti ukwete leza mukaintu walo wakamuzyalila mwana musankwa, “kupanga baleza botatwe mwalo bausyi, mobatakali bapati lyoonse, zimwi ziindi mobakali kucita mulimo wamwana wamwami, pele leza mupati wakali leza mukaintu.” (New Larousse Encyclopedia of Mythology) Butatu bumwi mu Egepita bwakali kubikkilizya leza Osiris, leza mukaintu Isis alimwi amwanaabo musankwa Horus.

6. Ino Butatu inga mwabupandulula buti, alimwi mbuti mbotwakwabililwa kukusyoma bulubizi buli boobo?

⁶ Mu Bunakristo bwanyika basyoma Butatu. Basololi babukombi baamba kuti Taata, Mwana alimwi amuuya uusalala ngu Leza omwe. Pele ooko nkusampaula mweendelezi wabubumbo boonse Jehova, kumubikka muciimo cabutatu alimwi akutondezya kuti ncibeela comwe akati kabaleza botatwe walo uubonwa kuti ngo leza mupati. Bantu ba Jehova bakwabililwa kukusyoma bulubizi buli boobo nkaambo batobela majwi aaya aakasololelwa aamuuya aakuti: “Swiilila O Israyeli. Jehova ngu Leza wesu, Jehova ngumwi.” (Dt. 6:4) Jesu wakaazubulula majwi aayo, sena kuli Munakristo wakasimpe weelede kumukazya?—Mk. 12:29.

7. Nkaambo nzi ncocitakonzyeki kumuntu uusyoma mu Butatu kubbapatizyigwa kacili citondezyo cakulyaaba kutambulika kuli Leza?

⁷ Njiisyo ya Butatu ilakazyanya amulimo Jesu ngwaakapa basikumutobela ‘wakugwasya bantu bamisyobo yoonse kuba basikwiiya, akubabbapatizya muzyina lya Taata alya Mwana alya muuya uusalala.’ (Mt. 28:19) Kutegwa muntu abbapatizyigwe kuba Munakristo mwini-mwini alimwi Kamboni wa Jehova, weelede kuzumina kuti Taata, Jehova ulisumpukide kapati. Weelede kuzumina alimwi cuuno abweendelezi mbwajisi Mwana wa Leza, Jesu. Muntu uuyanda kubbapatizyigwa alimwi weelede kusyoma kuti muuya uusalala ninguzu zibeleka zya Leza, kutali cibeela ca Butatu. (Matl. 1:2) Muntu uuzumanana kusyoma mu Butatu takonzyi kubbapatizyigwa kacili citondezyo cakulyaaba kutambulika kuli Jehova Leza. Eelo kaka tulalumba kapati kuti lukono lwesu lwakumuuya lwatukwabilila kukusyoma njiisyo eeyi iitamulemeki Leza!

KUSYOMA MIZIMO

8. Ino baleza alimwi amadaimona zyakali kubonwa buti mu Babuloni?

⁸ Bukombi mu Babuloni bwakali kuzumizya njiisyo zyakubeja, baleza, madaimona alimwi amizimo. Bbuku litegwa The International Standard Bible Encyclopaedia  lyaamba kuti: “Mubukombi bwabana Babuloni baleza bakali kuyandika kapati. Kuzwa baleza, kwakali madaimona alo aakajisi nguzu zyakupenzya bantu amalwazi aamumubili naa aamumizeezo. Kuboneka kuti cibeela cipati cabukombi cakalibombya kukulwanwa amadaimona aaya, alimwi baleza koonse-koonse bakali kusikilwa kwiinda mukupaila kutegwa bagwasye bantu kulikwabilila kumadaimona aaya.”

9. (a) Nobakazwa mubuzike ku Babuloni, mbuti ba Juda banji mbobakacegwa amizeezo yanjiisyo zyabukombi bwakubeja? (b) Ino tukwabililwa buti kuntenda zyakujatana amadaimona acaali?

⁹ Nobakazwa mubuzike ku Babuloni, ba Juda banji bakacegwa amizeezo iitali yamumagwalo. Akaambo kakunjila kwamizeezo yaba Giliki, ba Juda banji bakacegwa kukweendelezyegwa amadaimona nkaambo bakatalika kusyoma kuti madaimona alakonzya kuba mabotu naa mabyaabi. Lukono lwesu lwakumuuya lulatukwabilila kuntenda zyakujatana amadaimona acaali, nkaambo tulizyi kuti Leza wakaikazya micito yamizimo yamu Babuloni. (Is. 47:1, 12-15) Kuyungizya waawo, busolozi bwa Leza kujatikizya mizimo bulatusololela.—Amubale Deuteronomo 18:10-12; Ciyubunuzyo 21:8.

10. Ncinzi cikonzya kwaambwa kujatikizya micito alimwi azyintu zisyomwa a Babuloni Mupati?

¹⁰ Kusyoma mizimo kwali kucitwa kutali buyo abana Babuloni pe, pele abaabo bagwasyilizya Babuloni Mupati, bukombi bwakubeja bwanyika yoonse. (Ciy. 18:21-24) Bbuku limwi litegwa The Interpreter’s Dictionary of the Bible lyaamba kuti: “Babuloni [Mupati] ulijisi zilengwa zinji. Ulapandululwa amituni iidumide muciindi caminyinza yacisi.” (Vol. 1, p. 338) Akaambo kakuti ulizwide amizimo, mituni alimwi azibi zimbi, Babuloni Mupati ucipona—pele kutali kwaciindi cilamfwu.—Amubale Ciyubunuzyo 18:1-5.

11. Nkucenjezya nzi nkotwamwaya kujatikizya mizimo?

¹¹ Jehova wakaambilizya kuti: “Nsikonzyi kubotelwa bubi.” (Is. 1:13) Kubelesya mizimo kwakalidumide kapati mumwaanda wamyaka wa 19. Aboobo, magazini ya Zion’s Watch Tower yamu May 1885 yakaamba kuti: “Kusyoma kuti bafwide balapona muciimo cimbi kwakatalika kaindi. Cakali cibeela cabukombi bwansiku, alimwi twaano toonse motwakatalikila.” Cibalo cakayungizya kuti muzeezo uutali wamumagwalo iwakuti bafwide balabandika abaumi “wavwumba alimwi akupa nguzu kulweeno lucitwa ‘amadaimona’ lwamyuuya yabantu bafwide. Madaimona alalibikka muciimo cabantu bafwide, akukujatikizya kuyeeya amicito yabantu banji.” Kabbuku kakaindi kakuti What Say the Scriptures About Spiritism? kakapa kucenjezya mbubwenya mbuli kooko kujanika mumabbuku eesu aamazuba aano.

SENA BAFWIDE BALAPENGA MUNYIKA IIMBI?

12. Kwiinda mukusololelwa amuuya uusalala, ncinzi Solomoni ncaakaamba kujatikizya ciimo cabafwide?

¹² “Boonse lino ibakazyi kasimpe” balakonzya kuwiingula mubuzyo ooyo. (2 Jo. 1) Masimpe kuti tulaazumina majwi aa Solomoni aakuti: “Mubwa uucipona mubotu kwiinda mulavu uufwide. Nkaambo baumi balizi kuti balafwa, pele bafwide tabezi cintu niciba comwe . . . Kufumbwa milimo njaajana maanza aako, kocita canguzu, nkaambo taakwe milimo niiba miyeeyo neluba luzibo nebuba busongo mukabanda moyoonjila.”—Muk. 9:4, 5, 10.

13. Ino ba Juda bakajatikizyigwa buti azilengwa alimwi abukombi bwaba Giliki?

¹³ Ba Juda bakali muciimo cakukonzya kuzyiba kasimpe kujatikizya bafwide. Ciindi cisi caba Giliki nocakaandaanizyigwa akati kabasikalumamba iba Alesandro Mupati, kwakaba kusoleka kwakuti Juda a Suriya zikamantane kwiinda mubukombi  bwaba Giliki alimwi azilengwa zyabo. Akaambo kaceeci, ba Juda bakazumina njiisyo zyakubeja zyakuti buumi tabufwi alimwi akuti kuli busena bwakupengela. Tabali ba Giliki ibakautalisya muzeezo wanyika iizwide bantu bapenga, nkaambo bana Babuloni bakali “kusyoma kuti kuli nyika iimbi . . . busena buyoosya, . . . ikuli baleza alimwi amadaimona aajisi nguzu alimwi makali.” (The Religion of Babylonia and Assyria) Masimpe, bana Babuloni bakali kusyoma mubuumi butafwi.

14. Ncinzi Jobu alimwi a Abrahamu ncobakazyi kujatikizya lufwu abubuke?

¹⁴ Nokuba kuti muntu uululeme Jobu wakanyina Magwalo, wakalikazyi kasimpe kujatikizya lufwu. Alimwi wakalizyi kuti Jehova ngu Leza siluyando uuyandisya kumubusya. (Job. 14:13-15) Awalo Abrahamu wakali kusyoma mububuke. (Amubale Bahebulayo 11:17-19.) Mbwaanga tacikonzyeki kubusya muntu uutakonzyi kufwa, baalumi aaba ibakali kuyoowa Leza tiibakali kusyoma mubuumi bwamuntu butafwi. Cakutadooneka, muuya wa Leza wakagwasya Jobu alimwi a Abrahamu kumvwisya ciimo cabantu bafwide akutondezya lusyomo mububuke. Twaambo twamasimpe ootu atwalo ncibeela calukono lwesu.

“KWAANGUNUNWA ACINUNUZYO” —KULAYANDIKA KAPATI

15, 16. Muunzila nzi motwaangununwa kucibi alufwu?

¹⁵ Alimwi tulalumba kapati kuti Leza wayubununa kasimpe kajatikizya bubambe bwakutuvwuna kucibi alufwu nzyotwakakona kuli Adamu. (Lom. 5:12) Tulizyi kuti Jesu “wakaboola, ikutali kuzyoobelekelwa, pele kuzyoobeleka akupa buumi bwakwe ikuba cinunuzyo cabanji.” (Mk. 10:45) Eelo kaka ncibotu kuzyiba kujatikizya ‘kwaangununwa kwiinda mucinunuzyo ca Kilisito Jesu ncaakabbadela.’—Lom. 3:22-24.

¹⁶ Ba Juda abamasi bamumwaanda wamyaka wakusaanguna bakali kuyandika  kweempwa zibi zyabo alimwi akutondezya lusyomo mucipaizyo cacinunuzyo ca Jesu. Kutacita oobo nokwakapa kuti batalekelelwi. Mbocibede amazuba aano. (Joh. 3:16, 36) Ikuti muntu kakakatila kunjiisyo zyakubeja, mbuli Butatu alimwi abuumi butafwi, takonzyi kugwasyigwa acinunuzyo. Pele swebo tulakonzya. Tulikazyi kasimpe kujatikizya “Mwanaakwe [Leza] ngwayandisya, ooyo wakapa kuti twaangununwe kwiinda mucinunuzyo, nkokuti kulekelelwa zibi zyesu.”—Col. 1:13, 14.

AMUZUMANANE MBULI BANTU BAZYINA LYA JEHOVA

17, 18. Nkuuli nkotukonzya kujana makani aagwasya kujatikizya makani eesu aakaindi, alimwi mbuti mbotukonzya kugwasyigwa kwiinda mukwaaiya?

¹⁷ Nzinji zikonzya kwaambwa kujatikizya njiisyo zyakasimpe nzyotwaiya, zyintu zyatucitikila mbuli babelesi ba Jehova, alimwi azilongezyo zyakumuuya azyakumubili nzyotujisi. Kwamyaka minji yainda, ma Yearbook eesu azumanana kwaamba zibalo zikkomanisya kujatikizya milimo yesu mumasi aaindene-indene nyika yoonse. Makani eesu aakaindi alitondezyedwe mumavidiyo aa Faith in Action, Cibeela 1 a 2, alimwi amumabbuku mbuli lya Jehovah’s Witnesses—Proclaimers of God’s Kingdom. Alimwi mamagazini eesu kanji-kanji ajisi zibalo zikkomanisya kujatikizya basyomima.

¹⁸ Tulagwasyigwa kwiinda mukulanga-langa makani aakaindi kujatikizya mbunga ya Jehova, mbubwenya mbuli bana Israyeli mbobakagwasyigwa kwiinda mukulanga-langa mbwaakabavwuna Leza kuzwa mubuzike mu Egepita. (Kul. 12:26, 27) Kali mudaala iwakali kukonzya kupa bumboni bwamilimo mibotu ya Jehova, Musa wakaambila bana Israyeli kuti: “Amwiibaluke mazuba aaciindi, amuyeeye myaka yamazyalani aakamana. Amubuzye bamauso, bamulwiide. Bapati banu bamupandulwide makani.” (Dt. 32:7) Swebo ‘tobantu ba Jehova alimwi tombelele zyameembelelo aakwe,’ toonse tulamutembaula akwaambila bamwi milimo yakwe mipati. (Int. 79:13) Kuyungizya waawo inga twacita kabotu kulanga-langa makani eesu aakaindi, kwaaiya alimwi akulibambila zyakumbele.

19. Mbwaanga tulakkomana amumuni wakumuuya, ncinzi ncotweelede kucita?

¹⁹ Tulalumba kapati kuti tatwiingaili mumudima pele tulikkomene mumumuni wakumuuya uuzwa kuli Leza. (Tus. 4:18, 19) Aboobo, atubikkile maano kukwiiya Jwi lya Leza alimwi akwaambilizya kasimpe cabusungu kuli bamwi katujisi muuya wasintembauzyo iwakatembaula Mwami Jehova amajwi aakuti: “Njooamba bululami bwako, bwako luzutu. O Leza, nduwe wandiiyisya kuzwa kubwanike bwangu, lino asunu nciluula malele aako. Utandisii, O Leza, nekuba kuti ndacembaala akuba amvwi, kuti ndwiide izyalani liciza makani aakuboko kwako, anguzu zyako kuliboonse baciboola.”—Int. 71:16-18.

20. Ino ntwaambo nzi tuswaangene tuliko, alimwi mulimvwa buti kujatikizya twaambo ooto?

²⁰ Mbotuli bantu ba Jehova balyaabide, tulizyi mbotuswaangene twaambo tujatikizya bweendelezi bwa Leza akusyomeka kwabantu. Masimpe, tulaambilizya kasimpe katakonzyi kukazyigwa kakuti Jehova Mwami Wabubumbo Boonse, ngotweelede kulemeka camoyo woonse. (Ciy. 4:11) Kwiinda mukugwasyigwa amuuya wakwe, tulaambilizya alimwi amakani mabotu kubabombe, kwaanga batyokede mumoyo, akuumbulizya boonse balila. (Is. 61:1, 2) Nokuba kuti Saatani wasolekesya kudyaaminina bantu ba Leza kubikkilizya abantu boonse buyo, swebo tulalumba lukono lwesu lwakumuuya alimwi tulikanzide kuzumanana kusyomeka kuli Leza akumutembaula Mwami Jehova lino alimwi kukabe kutamani.—Amubale Intembauzyo 26:11; 86:12.

[Mibuzyo yaciiyo]

[Kabbokesi kali apeeji 11]

Mbuti Mbotwakwabililwa Kukusyoma Zyintu Zyakubeja?

“Swiilila, O Israyeli. Jehova ngu-Leza wesu, Jehova ngumwi.”—Dt. 6:4

“Nsikonzyi kubotelwa bubi.”—Is. 1:13

“Pele bafwide tabezi cintu niciba comwe.”—Muk. 9:5, 10