Amuzumanane Kulangila!

Sena mwali Kamboni wa Jehova kwamyaka minji walo uuyanda kuti ngomukwetene limwi amusangane mukukomba Jehova?

Naa mulimvwa kutyompwa ciindi sikwiiya Bbaibbele wanu, iwakali kuboneka kucita kabotu kumatalikilo, naalilwa kukajatisya kasimpe?

 Zyakuluula zisyoonto kuzwa ku Britain zilamugwasya kubona kaambo ncomweelede kuzumanana kulangila. Mulabona alimwi ncomukonzya kucita mumulimo wanu uuli mbuli ‘kuwaala zilyo zyanu atala lyamaanzi,’ kutegwa mugwasye baabo ibatanakatambula kasimpe.—Muk. 11:1.

KULIYUMYA—KULAYANDIKA KAPATI

Kaambo kamwi kayandika kapati nkuliyumya. Mweelede kukakatila kukasimpe alimwi akuli Jehova. (Dt. 10:20) Mbobakacita oobo ba Georgina. Ciindi nibakatalika kwiiya Bbaibbele a Bakamboni ba Jehova mu 1970, balumi babo ba Kyriacos bakanyema kapati. Bakasola kubakasya kwiiya, bakali kubakasya Bakamboni kunjila muŋanda alimwi akusowa kufwumbwa mabbuku aa Bakamboni ba Jehova ngobakali kujana.

Ciindi ba Georgina nibakatalika kujanika kumiswaangano yambungano, ba Kyriacos bakaindila kunyema. Bumwi buzuba bakaunka ku Ŋanda ya Bwami kutegwa bakaakukazyanye abakwesu. Mucizyi umwi naakazyiba kuti ba Kyriacos bakali kwaambaula kabotu ci Giliki kwiinda Cingisi, wakatumina fooni mukwesu mu Giliki wamumbungano iimbi kuti aboole agwasye. Ba Kyriacos bakatondezya luyandisisyo akaambo kakulilemeka kabotu kwamukwesu, alimwi nokwakainda myezi misyoonto, bakatalika kwiiya Bbaibbele amukwesu ooyu. Pele mukuya kwaciindi ba Kyriacos bakacileka kwiiya.

Kwamyaka aimbi yotatwe, ba Georgina bakazumanana kukazyigwa. Ba Kyriacos bakaamba kuti bayakubaleka ba Georgina kuti naa babbapatizyigwa. Buzuba mbobakali kubbapatizyigwa, ba Georgina bakapaila camoyo woonse kuli Jehova kutegwa ba Kyriacos batabaleki. Ciindi Bakamboni nobakasika kuti bababweze ba Georgina kumuswaangano, ba Kyriacos bakabaambila kuti: “Kamuya tulamujana. Tulaboola amootoka wesu.” Ba Kyriacos bakajanika ciindi camafwumo-fwumo akulangilila bakaintu babo nobakali kubbapatizyigwa.

Kuzwa waawo, kukazya kwaba Kyriacos kwakaceya, alimwi buce-buce bakatalika kucinca kapati. Nokwakainda myaka iitandila ku 40 kuzwa nobakabonana a Bakamboni ciindi cakusaanguna, ba Georgina bakabona balumi babo kababbapatizyigwa. Ncinzi cakagwasya ba Kyriacos? Bakaamba kuti: “Ndakakkomana kapati aba Georgina akaambo kakutazungaana kwabo.” Ba Georgina bakaamba kuti: “Nokuba kuti balumi bangu bakali kukazya, nindatakaleka kukomba Leza wangu. Kulubazu lumwi, ndakazumanana kupaila kuli Jehova, alimwi ndakazumanana kulangila.”

BUBOTU BWABUNTU BUPYA

Akambi kaambo kakonzya kugwasya ngomukwetene limwi nkuba abube bwa Bunakristo. Mwaapostolo Petro wakakulwaizya bamakaintu Banakristo kuti: “Amulibombye kubalumi banu, ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo.” (1 Pe. 3:1) Ba Christine bakali kulutobela lulayo oolu mubuumi bwabo nokuba kuti cakabatolela myaka minji kuti bakwelelezye balumi babo. Ciindi nobakaba Bakamboni myaka iinda ku 20 yainda, balumi babo ba John bakali kulimvwa kuti tabayandiki Leza mubuumi bwabo. Ba John tiibakali kuyanda kujatikizyigwa mumakani aabukombi, nokuba boobo bakali kubona ba Christine mbobakali kubuyanda bukombi bwabo bupya. Ba John bakaamba kuti: “Ndakabona kuti bukombi bwabo bwakali kubapa kukkomana. Bakayuma kapati alimwi bakali kusyomwa, eeci cakandigwasya mubukkale bunji bukatazya.”

Ba Christine kunyina nobakali kusungilizya balumi babo kuti batalike kusyoma nzyobakali kwiiya. Balumi babo baamba kuti: “Ba Christine bakalizyi kuzwa kumatalikilo kuti tiindakali kuyanda kwaambilwa makani aabukombi, alimwi cakukkazyika moyo bakandileka kuti ndiiye kweelana ambondikonzya alimwi munzila njondiyanda.” Ciindi ba Christine nobakali kubona zibalo mumamagazini aa Ngazi Yamulindizi naa Sinsimuka! izyaamba makani ngobakazyi kuti inga abakkomanisya ba John mbuli aamba zyasayaansi azilengwaleza, bakali kubatondezya akwaamba kuti, “ndisyoma kuti mulakkomana kubala cibalo eeci.”

Mukuya kwaciindi, ba John bakacileka kubeleka akutalika mulimo wakulima gaadeni. Akaambo kakuba aciindi cinji cakuyeeya mibuzyo iiyandika kapati mubuumi, bakatalika kulibuzya kuti, ‘Sena tobantu twakaile kulitalikila kupona naa kuli kaambo ncotwakalengelwa?’ Bumwi buzuba mukwesu iwakali kubandika aba John wakabalomba kuti, “Sena inga mwayanda kwiiya Bbaibbele?” Ba John bakaamba kuti: “Lino akaambo kakuti ndakatalika kusyoma muli Leza, ndakazumina kulomba kwakwe.”

Eelo kaka cakali kuyandika kuti ba Christine bazumanane kulangila! Nokwakainda myaka iili 20 kabapailila kuti ba John batambule kasimpe, ba John bakabbapatizyigwa. Lino babelekela Jehova antoomwe cabusungu. Ba John baamba kuti: “Kuli zyintu zyobilo izyakandikwelelezya—luzyalo abulongwe bwa Bakamboni. Alimwi kuti wakwata Kamboni wa Jehova, nkokuti wakwata muntu uusyomeka, uusyomwa alimwi uulyaabide.” Masimpe, ba Christine bakalubelesya  lulayo lujanwa mulugwalo lwa 1 Petulo 3:1 alimwi lwakabeleka.

MBUTO ZILAZYALA KWAINDA MYAKA

Mbuti kujatikizya basikwiiya Bbaibbele bamwi akaambo katwaambo tumwi ibaleka kutondezya luyandisisyo mbuli kaindi? Mwami Solomoni wakalemba kuti: “Cifumofumo byala imbuto zyako, aciindi cagoko utalesyi maanza aako, nkaambo tozi na nzizili zisi kule akati kazyo, na zyoonse zyobile zilaba kabotu.” (Muk. 11:6) Zimwi ziindi mbuto zyakasimpe zilatola myaka minji kuti zimene. Nokuba boobo, mukuya kwaciindi, muntu ulakonzya kubona mbociyandika kuswena kuli Leza. (Jak. 4:8) Inzya, bumwi buzuba mulakonzya kugambwa alimwi akukkomana.

Amubone cakacitikila ba Alice, ibakalongela ku England kuzwa ku India. Mu 1974, bakatalika kwiiya Bbaibbele. Bakali kwaambaula ci Hindi pele bakali kuyanda kwiiya kwaambaula kabotu Cingisi. Ciiyo cakazumanana kwamyaka iili mbwiibede, alimwi ba Alice bakali kujanika kumiswaangano ziindi zisyoonto kumbungano iibelesya Cingisi. Bakalizyi kuti ncobakali kwiiya kakali kasimpe pele tiibakali kukabona kuti kalayandika kapati. Kunze lyaboobo, bakali kuyandisisya mali alimwi akuunka kumapobwe. Mukuya kwaciindi, ba Alice bakacileka kwiiya.

Nokwakainda myaka iitandila ku 30, ba Stella ibakali kwiiya aba Alice bakatambula lugwalo kuzwa kulimbabo. Lwakali kwaamba kuti: “Ndisyoma kuti mulakkomana kumvwa kuti sikwiiya Bbaibbele wanu kuzwa mu 1974 wakabbapatizyigwa amuswaangano wacooko wainda. Mwakabeleka mulimo mupati mubuumi bwangu. Mwakasyanga mbuto yakasimpe mulindime alimwi nokuba kuti ciindi eeco tiindakalilibambilide kulyaaba kuli Leza, ndakaiyobola mbuto eeyo yakasimpe mumizeezo amumoyo wangu.”

Ncinzi cakacitika? Ba Alice bakapandulula kuti bakausa kapati ciindi balumi babo nobakafwa mu 1997. Bakapaila kuli Leza. Mumaminiti buyo aali kkumi, Bakamboni bobilo baambaula ci Punjabi bakasika kuŋanda yabo akubasiila katulakiti kaamba kuti Ino Bayandwa Bafwide Bajisi Bulangizinzi? Ba Alice bakalimvwa kuti mupailo wabo wakaingulwa alimwi bakasala kuti beelede kuyanzana a Bakamboni ba Jehova. Pele ino bakali kuyakubajana kuli? Bakajana kabbuku mulembwa zicitika aabuzuba ikakaindi kakajisi manamba aaluwaile ba Stella ngobakabapede kaindi kujatikizya mbungano iibelesya ci Punjabi. Ba Alice bakaunka ku Ŋanda ya Bwami kwalo nkobakatambulwa kabotu abakwesu abacizyi baambaula ci Punjabi. Ba Alice baamba kuti: “Luyando ndobakatondezya kulindime lwakazumanana alimwi lwakanduumbulizya mukutyompwa kwangu.”

Bakatalika kujanika lyoonse kumiswaangano akwiiya Bbaibbele alimwi, akwiiya kwaambaula akulemba kabotu ci Punjabi. Mu 2003 bakabbapatizyigwa. Lugwalo ndobakalembela ba Stella kumamanino lwakaamba kuti: “Ndamulumba kapati akaambo kakusyanga mbuto eezyo myaka iili 29 yainda alimwi akundipa cikozyanyo cibotu cakutobela.”

Ncinzi ncomukonzya kwiiya kuzyakuluula eezyi? Cilakonzya kutola ciindi cilamfwu kwiinda mbomuyeeya, pele kuti muntu kajisi nzala yakumuuya, kasyomeka alimwi akulibombya, Jehova uyakumugwasya kumvwisya kasimpe akuti kakomene mumoyo wakwe. Amuyeeye majwi aa Jesu mucikozyanyo cakwe aakuti: “Mbuto zyamena akukomena—pele mbozyamena walo tazyi. Bulongo kubugama bulazyala micelo buce-buce, kusaanguna busonga mpoonya makunka, kumamanino kulaba nseke kumakunka.” (Mk. 4:27, 28) Kukomena kuli boobo kulacitika “buce-buce.” Mubwini, umwi aumwi sikwaambilizya Bwami tazyi eeci mbocikonzya kucitika. Aboobo amuzumanane kusyanga apati. Mulakonzya kutebula zinji.

Alimwi mutalubi mbouyandika mupailo. Ba Georgina aba Christine bakazumanana kupaila kuli Jehova. Kuti ‘mwajatisya kupaila’ alimwi akuzumanana kulangila, ‘kwamana mazuba manji muzoocijana “cilyo” alimwi’ eeco ncomwakaaba atala lyamaanzi.—Lom. 12:12; Muk. 11:1.

[Cifwanikiso icili apeeji 30]

Nokwakainda myaka iitandila ku 40 kuzwa nobakabonana a Bakamboni ciindi cakusaanguna, ba Georgina bakabona balumi babo kababbapatizyigwa

[Cifwanikiso icili apeeji 30]

Lugwalo ba Stella ndobakatambula kuzwa kuli ba Alice lwakali kwaamba kuti: “Ndisyoma kuti mulakkomana kumvwa kuti sikwiiya Bbaibbele wanu kuzwa mu 1974 wakabbapatizyigwa amuswaangano wacooko wainda”

[Majwi aakwelelezya sikubala aali apeej 32]

“Ndamulumba kapati akaambo kakusyanga mbuto eezyo myaka iili 29 yainda alimwi akundipa cikozyanyo cibotu cakutobela.”—Ba Alice