‘Amusinizye Zyintu Ziyandika Kapati’
‘Amusinizye Zyintu Ziyandika Kapati’
‘Amusinizye zyintu ziyandika kapati.’—FLP. 1:10.
TWAAMBO TWAKUZINZIBALA KUYEEYA
Ino zilengaano zyaba Isaya, Ezekiele alimwi a Daniele zitugwasya kuba alusyomo luli buti?
Nciiyo nzi ncotwiiya kwiinda mukulanga-langa cibeela caanyika cambunga ya Jehova?
Ino cibalo eeci camugwasya kuba amakanze nzi?
1, 2. Mbusinsimi nzi bujatikizya mazuba aamamanino ibweelede kuti bwakabakkomanisya basikwiiya ba Jesu, alimwi nkaambo nzi?
PETRO, Jakobo, Johane alimwi a Andreya bakali a Simalelaabo. Majwi ngaakaambide Jesu kujatikizya lunyonyooko lwatempele akali bakatazyide mumyoyo yabo. (Mk. 13:1-4) Aboobo, bakabuzya kuti: “Ino ndilili zyintu eezyi noziyooba alimwi ncinzi ciyooba citondezyo cakubako kwako acamamanino aabweende bwazyintu?” (Mt. 24:1-3) Jesu wakatalika kubaambila kujatikizya zyintu naa bukkale, ibwakali kuyakupa kuti buumi bucince kapati alimwi akuba citondezyo camazuba aamamanino aabweende bwazyintu bubyaabi bwa Saatani. Kuli cintu cimwi iceelede kuti cakabakkomanisya basikwiiya ba Jesu. Naakamana kubaambila makani aatyompya mbuli nkondo, nzala alimwi akuvwula kwabubi, Jesu wakaambila limwi kuti kuli cintu cimwi cibotu alimwi icakali kuyakuba citondezyo camazuba aamamanino. Wakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumisyobo yoonse, mpoonya mamanino ayoosika.”—Mt. 24:7-14.
2 Basikwiiya ba Jesu bakalikkomene kukambauka makani mabotu aa Bwami antoomwe a Kristo. (Lk. 8:1; 9:1, 2) Beelede kuti bakayeeya kuti wakaambide kuti: “Mulimo wakutebula mupati, pele basimilimo mbasyoonto. Aboobo amulombe Simalelo wabutebuzi kuti atume basimilimo mumulimo wakwe wakutebula.” (Lk. 10:2) Pele mbuti mbobakali kukonzya kukambauka “munyika yoonse” alimwi akupa “bumboni kumisyobo yoonse”? Ino basimilimo bakali kuyakuzwa kuli? Eelo kaka nobakakkala buyo a Jesu buzuba oobuya kumwi kabalangila kumbele! Cakutadooneka, nobakagambwa kubona kuzuzikizyigwa kwamajwi aayo masyoonto lino ngotubala mulugwalo lwa Matayo 24:14.
3. Mbuti lugwalo lwa Luka 21: 34 mboluli mukuzuzikizyigwa mazuba aano, alimwi nkulilingula nzi nkotweelede kucita?
3 Tupona muciindi businsimi bwa Jesu nobuli mukuzuzikizyigwa. Mamiliyoni aabantu bakamantana kutegwa bakambauke makani mabotu aa Bwami munyika yoonse. (Is. 60:22) Nokuba boobo, Jesu wakatondezya kuti bamwi bayakujana buyumuyumu mukuzumanana kubikka mulimo wakukambuka mubusena bwakusaanguna. Bakali kuyakunyonganizyigwa alimwi ‘akulengaana.’ (Amubale Luka 21:34) Kuzuzikizyigwa kwamajwi aayo akwalo tulakubona. Bamwi akati kabantu ba Leza bali mukunyonganizyigwa. Eeci cilalibonya mukusala nkobacita kujatikizya mulimo wakumubili, lwiiyo lwaatala, kujana lubono kubikkilizya aciindi ncobabelesya muzisobano akulikondelezya. Bamwi balacileka akaambo kamapenzi alimwi akulibilika kwamubuumi. Amulibuzye kuti: ‘Ino mebo ndicita buti? Ino kusala kwangu kutondezya nzi kujatikizya zyintu nzyondibikkila maano mubuumi?’
4. (a) Ncinzi Paulo ncaakaamba mumupailo kujatikizya Banakristo baku Filipi, alimwi nkaambo nzi? (b) Ncinzi ncotutiilange-lange mucibalo eeci alimwi acitobela, alimwi makanze nzi ngotujisi notucita boobo?
4 Banakristo ibakali kupona mumwaanda wamyaka wakusaanguna bakali kusolekesya kutegwa bazumanane kubikkila maano kumbaakani zyabo zyakumuuya. Mwaapostolo Paulo wakabona kuti cakali kuyandika kupailila kuti aabo ibakali mu Filipi ‘basinizye zyintu ziyandika kapati.’ (Amubale Bafilipi 1:9-11.) Mbubwenya mbuli mwaapostolo Paulo, banji kuciindi eeco ‘bakaindila kuba basicamba ikwaamba jwi lya Leza cakutayoowa.’ (Flp. 1:12-14) Mbubwenya buyo, ibunji bwesu mazuba aano tulakambauka cabusicamba Jwi lya Leza. Pele sena kulanga-langa izili mukuzuzikizyigwa mumbunga ya Jehova lino inga kwatugwasya kubikkila kapati maano kumulimo wakukambauka uuyandika kapati? Inzya! Mucibalo eeci, atulange-lange bubambe Jehova mbwaabikka kutegwa lugwalo lwa Matayo 24:14 luzuzikizyigwe. Ncinzi ncabikkilide maano mumbunga yakwe, alimwi mbuti kuzyiba kaambo aaka mbokukonzya kutukulwaizya amikwasyi yesu? Mucibalo citobela, tuyakulanga-langa cikonzya kutugwasya kutegwa tuliyumye akuzumanana kweendela antoomwe ambunga ya Jehova.
CIBEELA CAKUJULU CAMBUNGA YA JEHOVA CILI MUKWEENDA
5, 6. (a) Nkaambo nzi Jehova ncaakapa zilengaano kujatikizya cibeela cakujulu cambunga yakwe? (b) Ncinzi Ezekiele ncaakabona mucilengaano?
5 Kuli zyintu zinji Jehova nzyaakasala kuti atazibikkilizyi mu Jwi lyakwe. Mucikozyanyo, tanaakaamba kujatikizya boongo mbobubeleka naa bubumbo mbobubeleka nokuba kuti makani aali boobo naali kukkomanisya kapati. Muciindi caboobo, Jehova wakapa malailile ngotuyandika kutegwa tumvwisye makanze aakwe alimwi akupona kweelana ancaamba. (2 Ti. 3:16, 17) Eelo kaka cilakkomanisya kuzyiba kuti Bbaibbele lilapa makani mubufwaafwi kujatikizya mbunga ya Jehova iitalibonyi! Tulakkomana kubala bupanduluzi bwaamba bubambe bwambunga ya Jehova yakujulu bulembedwe mu Isaya, Ezekiele, Daniele alimwi amucibalo cili mu Ciyubunuzyo ncaakalemba Johane. (Is. 6:1-4; Ezk. 1:4-14, 22-24; Dan. 7:9-14; Ciy. 4:1-11) Cili mbuli kuti Jehova wakavwununa mulembo kutegwa tubone mbokubede kujulu. Nkaambo nzi ncaakatupa makani aaya?
6 Jehova wakali kuyanda kuti tutalubi kuti tuli cibeela cambunga yabubumbo boonse. Kuli zyintu zinji zili mukucitika kusumpula makanze aa Jehova kwiinda zyeezyo nzyotukonzya kubona. Mucikozyanyo, Ezekiele wakabona cibeela citalibonyi cambunga ya Jehova kaciimininwa a nkalaki mpati yakujulu. Nkalaki eeyi yakali kukonzya kweenda cakufwambaana kapati alimwi akucinca nkoiya mukulaba kwaliso. (Ezk. 1:15-21) Kwiinda mukuzinguluka kwamavwili aanjiyo ciindi comwe, nkalaki eeyi ilakonzya kweenda musinzo mulamfwu kapati. Mucilengaano, Ezekiele alimwi wakali kukonzya kumubona buyo asyoonto Sikweenzya nkalaki. Wakaamba kuti: ‘Ndakabona mbuli mundalila uusalalisya ambuli mulilo uuli mukati kansaka Mbuboobo mbucakabede cilengano cabulemu bwa Jehova.’ (Ezk. 1:25-28) Cakutadooneka, kweelede kuti cakamugambya Ezekiele kubona cilengaano eeci! Wakabona Jehova keendelezya mbunga yakwe, kusololela mboyeenda kwiinda mumuuya wakwe uusalala. Eelo kaka bulagambya bupanduluzi bwiiminina cibeela cakujulu cambunga ya Jehova mboyeenda!
7. Mbuti cilengaano cakapegwa kuli Daniele mbocitupa kuba alusyomo?
7 Awalo Daniele wakabona zinji kutegwa ayumye lusyomo lwesu. Wakazumizyigwa kubona Jehova kaimininwa ‘Asinsiku’ uukkede acuuno ciyaka mulilo. Cuuno cakali aamavwili. (Dan. 7:9) Jehova wakali kuyanda kuti Daniele abone kuti mbunga yakwe ileenda, kuzuzikizya makanze aakwe. Daniele alimwi wakabona “umwi uuli mbuli mwana amuntu,” Jesu, kapegwa bweendelezi bwacibeela cambunga ya Jehova yaanyika. Bulelo bwa Kristo bulondokede tabuli bwamyaka buyo misyoonto pe. Muciindi caboobo, “mbweendelezi butamani butakonzyi kweela, abwami bwakwe tabukonzyi kunyonyoonwa.” (Dan. 7:13, 14) Tulakulwaizyigwa kumusyoma Jehova alimwi akuzyiba nzyali mukuzuzikizya. Wakapa “bweendelezi abulemu abwami” ku Mwanaakwe iwakasolwa akusunkwa, Jesu. Jehova ulamusyoma Mwanaakwe. Aboobo, abwalo bweendelezi bwa Jesu tulakonzya kubusyoma.
8. Ino zilengaano izyakazwa kuli Jehova zyakabajatikizya buti ba Ezekiele a Isaya, alimwi ino swebo ceelede kutujatikizya buti?
8 Ino kucibona munzila eeyi cibeela citalibonyi cambunga ya Jehova kweelede kutupa kucita nzi? Mbubwenya mbuli Ezekiele, kwiinda mukubona zyeezyo Jehova zyali mukuzuzikizya, citupa kugambwa alimwi akulibombya. (Ezk. 1:28) Kuzinzibala kuyeeya kujatikizya mbunga ya Jehova kulakonzya kutupa kubweza ntaamu mbubwenya mbwaakacita Isaya. Nokwakaba coolwe cakwaambila bamwi kujatikizya nzyacita Jehova, wakacita oobo kakunyina kuwayawaya. (Amubale Isaya 6:5, 8.) Isaya wakalaalusyomo lwakuti kwiinda mukugwasyigwa a Jehova, wakali kukonzya kuzwidilila mubuyumuyumu buli boonse. Mbubwenya buyo, makani aaya masyoonto aajatikizya cibeela cambunga ya Jehova iitalibonyi ayelede kutugambya alimwi akutukulwaizya kubweza ntaamu. Eelo kaka cilakulwaizya kuba mumbunga yalo iili mukweenda ciindi coonse kuzuzikizya makanze aa Jehova!
CIBEELA CAANYIKA CAMBUNGA YA JEHOVA
9, 10. Nkaambo nzi ncokuyandika cibeela cilibonya cambunga ya Jehova?
9 Kwiinda mu Mwanaakwe, Jehova wakabikka bubambe aano anyika ibubelekela antoomwe acibeela cambunga citalibonyi. Nkaambo nzi bubambe bulibonya ncobuyandika kutegwa mulimo waambidwe mulugwalo lwa Matayo 24:14 uzuzikizyigwe? Atulange-lange twaambo totatwe.
10 Kaambo kakusaanguna, Jesu wakaamba kuti mulimo wakukambauka ooyu wakali kuyakupa kuti basikwiiya bakwe beende “kusikila kumagolelo aanyika.” (Mil. 1:8) Kaambo kabili, bubambe bwakali kuyandika kutegwa kube cakulya cakumuuya alimwi akulanganya baabo batola lubazu mumulimo ooyu. (Joh. 21:15-17) Kaambo katatu, bubambe bwakeelede kubikkwa kutegwa aabo bakambauka makani mabotu kababungana antoomwe kukomba Jehova alimwi akuyiisyigwa mbobakonzya kuubeleka mulimo. (Heb. 10:24, 25) Kuzuzikizya mbaakani eezyi takukonzyi kulicitikila buyo pe. Kutegwa basikutobela Kristo bazwidilile, kwakeelede kubikkwa bubambe bubotu kujatikizya mulimo.
11. Mbuti mbotutondezya kuti tulabusumpula bubambe bubikkwa ambunga ya Jehova?
11 Mbuti mbotutondezya kusumpula bubambe bubikkwa ambunga ya Jehova? Nzila imwi iiyandika kapati, nkuzumanana kusyoma baabo basyomwa a Jehova a Jesu ibatusololela mumulimo wesu wakukambauka. Kuli zyintu zinji zicitika munyika mazuba aano izikonzya kupa kuti tuyandike kulanganizyigwa abaabo basololela akati kesu. Pele, ino cibeela cambunga ya Jehova icilibonya cibikkila kapati maano kunzi?
KUBIKKILA MAANO ‘KUZYINTU ZIYANDIKA KAPATI’
12, 13. Mbuti baalu Banakristo mbobazuzikizya mulimo wabo, alimwi nkaambo nzi eeci cilamukulwaizya?
12 Baalu Banakristo ibajisi luzyibo nyika yoonse basalwa kutegwa balanganye akupa busolozi mumulimo wakukambauka Bwami muzisi mobabelekela. Ciindi bakwesu aaba nobasala zyeelede kucitwa, balayandaula busolozi mu Jwi lya Leza, akupa kuti libe ‘lampi kuzituta zyabo alimwi akumunikila inzila yabo’ alimwi akupaila cakusinizya kutegwa Jehova abasololele.—Int. 119:105; Mt. 7:7, 8.
13 Mbubwenya mbuli baabo ibakali kusololela mumwaanda wamyaka wakusaanguna, baalu Banakristo ibalanganya mulimo wakukambauka mazuba aano balilyaabide “kumulimo wakuyiisya jwi lya Leza.” (Mil. 6:4) Balakkomana kapati nobamvwa mbouyaambele mulimo wakukambauka makani mabotu mucisi mobazwa alimwi amunyika yoonse. (Mil. 21:19, 20) Taakwe nobabikka milawo minji alimwi anzila zyeelede kubelesyegwa. Muciindi caboobo, batobela Magwalo abusolozi bwamuuya uusalala wa Leza ciindi nobabikka bubambe buyandika kutegwa mulimo wakukambauka uyaambele. (Amubale Milimo 15:28.) Kwiinda mukucita boobo, bakwesu aaba ibasyomwa bapa cikozyanyo cibotu kuli boonse mumbungano.—Ef. 4:11, 12.
14, 15. (a) Mbubambe nzi buliko ibugwasyilizya mulimo wakukambauka nyika yoonse? (b) Ino mulimvwa buti kujatikizya lubazu ndomujisi mukusumpula mulimo wakukambauka Bwami?
14 Mulimo uutabonwi kubantu banji nguyooyo wakulemba mabbuku aapandulula Bbaibbele, kubamba miswaangano yambungano alimwi ayacooko. Zyuulu-zyuulu zyabasikulisungula balabeleka canguzu kapati kusandulula cakulya cakumuuya eeci mumyaambo iibalilwa ku 600 kutegwa bantu banji baiye kujatikizya “milimo mipati ya Leza.” (Mil. 2:7-11) Bakwesu abacizyi bacili bana-bana balabeleka kumincini iisimba akupanga mabbuku manji muciindi cisyoonto. Mpoonya mabbuku aaya alatumwa kumbungano nomuba mumasena aali kulamfwu.
15 Bubambe bulabikkwa kutegwa katubikkila maano kukukambauka makani mabotu mumbungano zyesu. Mucikozyanyo, banji balalisungula kugwasyilizya mumayake aa Maanda aa Bwami alimwi a Maanda Aakucitila Miswaangano Mipati, kugwasya baabo ibali mumasena muli ntenda zilicitikila naa ibayandika lugwasyo lwabusilisi cakufwambaana, kubamba miswaangano yaalubazu, yabbazu, yacooko, alimwi akuyiisya zikolo zyamulimo weendelezyegwa a Leza. Eeyi njimwi yamilimo misyoonto iicitika iitalibonyi kubantu banji. Ino makanze aamulimo woonse ooyu ninzi? Kutegwa mulimo wakukambauka makani mabotu weende kabotu, aabo bacita mulimo ooyu bayaambele kumuuya alimwi akusumpula bukombi bwakasimpe. Sena cibeela caanyika cambunga ya Jehova cazumanana kubikkila maano kuzyintu ziyandika kapati? Inzya!
AMUTOBELE CIKOZYANYO CAMBUNGA YA JEHOVA
16. Ino mbubambe nzi bubotu bwakwiiya Bbaibbele ibukonzya kumugwasya nywebo naa mukwasyi wanu?
16 Sena ziindi zimwi tulajana ciindi cakulanga-langa mboibeleka mbunga ya Jehova? Bamwi basala kuti kabajana ciindi mukukomba kwabo kwamumukwasyi naa muciiyo cabo beni kuti kabavwuntauzya twaambo ootu alimwi akuzinzibala kuyeeya kujatikizya ntuto. Zilengaano izyakapegwa kuli Isaya, Ezekiele, Daniele alimwi a Johane nziiyo zikkomanisya. Bbuku lyamu Cingisi lyakuti Jehovah’s Witnesses—Proclaimers of God’s Kingdom alimwi amabbuku aamwi naa ma DVD aaliko mumwaambo wanu alapa makani aakkomanisya kujatikizya mbunga.
17, 18. (a) Ino mubandi ooyu wamugwasya buti? (b) Mibuzyo nzi njotweelede kulanga-langa?
17 Kuzinzibala kuyeeya ncali mukuzuzikizya Jehova kwiinda mumbunga yakwe cilatugwasya kapati. Antoomwe ambunga eeyi mbotu, atube amakanze aakuzumanana kubikkila maano kuzyintu ziyandika kapati. Kucita boobo kuyakutuyumya kuba amakanze ngaakajisi Paulo iwakalemba kuti: “Mbwaanga tujisi mulimo ooyu ngotwakapegwa kweelana aluse ndotwakatondezyegwa, tatulengaani pe.” (2 Ko. 4:1) Alimwi wakakulwaizya basimilimonyina kuti: “Tutaleki pe kucita zibotu, nkaambo kuciindi ceelede tuyootebula ikuti naa tiitwatyompwa.”—Gal. 6:9.
18 Sena kuli kucinca nkotweelede kucita umwi aumwi wesu naa mbuli mikwasyi kutegwa tusinizye zyintu ziyandika kapati mubuumi bwesu bwabuzuba abuzuba? Sena tulakonzya kuubyaubya buumi bwesu naa kucesya zyintu zinyonganya kutegwa tubikkile kapati maano kumulimo uuyandika kapati? Mucibalo citobela, tuyakulanga-langa zyintu zyosanwe iziyakutugwasya kweendela antoomwe ambunga ya Jehova.
[Mibuzyo yaciiyo]
