“Kotwaambila, Ino Ndilili Zyintu Eezyi Noziyooba?”

“Ncinzi ciyooba citondezyo cakubako kwako acamamanino aabweende bwazyintu?”—MT. 24:3.

INO INGA MWAINGULA BUTI?

Ino nkukozyanya nzi kuliko kujatikizya kuzuzikizyigwa kobilo kwabusinsimi bwa Jesu ibujatikizya mapenzi mapati?

Ino cikozyanyo cambelele ampongo cijatikizya buti mbotuubona mulimo wakukambauka?

Ino Jesu naakali kwaamba kujatikizya kuboola kwakwe mulugwalo lwa Matayo caandaano 24 a 25, wakali kwaamba ciindi cili?

1. Mbubwenya mbuli baapostolo, ncinzi andiswe ncotuyanda kuzyiba?

MULIMO wa Jesu anyika wakali kuya kumamanino, alimwi basikwiiya bakwe bakali kuyanda kuzyiba zyintu izyakali kuyakubacitikila kumbele. Aboobo, kakuceede buyo mazuba masyoonto kuti afwe, baapostolo bakwe bone bakamubuzya kuti: “Ino ndilili zyintu eezyi noziyooba alimwi ncinzi ciyooba citondezyo cakubako kwako acamamanino aabweende bwazyintu?” (Mt. 24:3; Mk. 13:3) Jesu wakabaingula kwiinda mukubelesya businsimi ibujatikizya zyintu zinji bulembedwe mucaandaano 24 a 25 mubbuku lya Matayo. Mubusinsimi oobu, Jesu wakaambila limwi kujatikizya zyintu zinji zipati izyakali kuyakucitika. Majwi aakwe alaabupanduluzi buyandika kapati kulindiswe nkaambo andiswe tuyanda kuzyiba zyintu iziyakutucitikila kumbele.

2. (a) Kwamyaka iili mbwiibede, ncinzi ncotwali kuyandisisya kumvwisya? (b) Mibuzyo nzi yotatwe njotutiilange-lange?

² Kwamyaka iili mbwiibede, babelesi ba Jehova bali kwiiya businsimi bwa Jesu bujatikizya mazuba aamamanino. Bali kuyanda kumvwisya naayakuzuzikizyigwa majwi aa Jesu. Kutegwa tubone kuteelela kwesu mbokwasalazyigwa, atulange-lange mibuzyo yotatwe yakuti “ndilili.” Ndilili “mapenzi mapati” naayakutalika? Ndilili Jesu nayakubeteka bantu kuba “mbelele” naa “mpongo”? Ndilili Jesu ‘nayoosika,’ naa kuboola?—Mt. 24:21; 25:31-33.

NDILILI MAPENZI MAPATI NAAYAKUTALIKA?

3. Ino ciindi camapenzi mapati twakali kuciteelela buti kaindi?

³ Kwamyaka iili mbwiibede twali kuyeeya kuti mapenzi mapati akatalika mu 1914 ciindi ca Nkondo Yanyika Yakusaanguna alimwi akuti ‘mazuba aayo akafwiinsyigwa’ a Jehova mu 1918 noyakamana nkondo kutegwa bananike bajane ciindi cakukambauka makani mabotu muzisi zyoonse. (Mt. 24:21, 22) Mpoonya alimwi kuti mulimo ooyu wakukambauka waakumana, bulelo bwa Saatani buyakunyonyoonwa. Aboobo, mapenzi mapati akali kuyeeyelwa kuti ajisi zibeela zyotatwe: Ciindi naakatalika (1914-1918), ciindi mapenzi mapati naakali kuyakunyonganizyigwa  (kutalikila mu 1918 kuya kumbele), alimwi anaakali kuyakumana lya Amagedoni.

4. Ncinzi capa kuti businsimi bwa Jesu ibujatikizya mazuba aamamanino tubumvwisye?

⁴ Kwiinda mukubulanga-langa businsimi bwa Jesu alimwi, twakazoozyiba kuti businsimi bwa Jesu ibujatikizya mazuba aamamanino bulazuzikizyigwa muzibeela zyobilo. (Mt. 24:4-22) Kuzuzikizyigwa kwakusaanguna kwakacitika mu Judaya mumwaanda wamyaka wakusaanguna C.E., alimwi kwakali kuyakuba kuzuzikizyigwa kwamunyika yoonse muciindi cesu. Kubuteelela munzila eeyi businsimi oobu kwapa kuti twaambo tuli mbotubede tusalazyigwe. *

5. (a) Nciindi cili icikatazya icakatalika mu 1914? (b) Ino ciindi eeci camapenzi cikozyenye aciindi cili mumwaanda wamyaka wakusaanguna C.E.?

⁵ Alimwi twazyiba kuti cibeela cakusaanguna camapenzi mapati tiicakatalika mu 1914. Nkaambo nzi ncotwaambila boobo? Akaambo kakuti businsimi bwamu Bbaibbele butondezya kuti mapenzi mapati ayakutalika akulwanwa kwabukombi bwakubeja, ikutali ankondo akati kamasi. Aboobo, zyintu izyakacitika mu 1914 akali “ngamatalikilo aamapenzi aali mbuli kumyongwa kwamukaintu uuyanda kutumbuka,” ikutali matalikilo aamapenzi mapati. (Mt. 24:8) ‘Mapenzi aaya aali mbuli kumyongwa kwamukaintu uuyanda kutumbuka’ alikozyenye acakacitika mu Jerusalemu amu Judaya kutalikila mu 33 C.E. kusikila mu 66 C.E.

6. Ncinzi ciyakuba citondezyo camatalikilo aamapenzi mapati?

 ⁶ Ncinzi ciyakutondezya kuti mapenzi mapati atalika? Jesu wakaambila limwi kuti: “Mwaakubona cisesemyo cinyonyoona icakaambwa kwiinda mumusinsimi Daniyele kaciimvwi mubusena busalala (ooyo uubala abelesye bupampu), mpoonya aabo bali mu Judaya bakatalike kutijila kumalundu.” (Mt. 24:15, 16) Mukuzuzikizyigwa kwakusaanguna, ‘kwiima mubusena busalala’ kwakacitika mu 66 C.E. ciindi basikalumamba bana Roma (“cisesemyo cinyonyoona”) nobakasaala munzi wa Jerusalemu atempele yamumo (busena busalala kweelana ambobakali kububona  ba Juda). Mukuzuzikizyigwa kupati, ‘kwiima’ kuyakucitika ciindi mbunga ya United Nations (Lukamantano Lwazisi) (“cisesemyo cinyonyoona” camazuba aano) yaakulwana Bunakristo Bwanyika (bwalo busalala kweelana ambobabubona aabo balitaminina kuba Banakristo) alimwi a Babuloni Mupati. Kulwanwa nkukonya ooku kulipandulwidwe mulugwalo lwa Ciyubunuzyo 17:16-18. Zyaakucitika zyintu eezyi, anooli ngamatalikilo aamapenzi mapati.

7. (a) Ino ‘bantu bakafwutulwa’ buti mumwaanda wamyaka wakusaanguna? (b) Ncinzi ncotukonzya kulangila kuti ciyakucitika kumbele?

 ⁷ Jesu alimwi wakaambila limwi kuti: “Mazuba aayo ayoofwiinsyigwa.” Mukuzuzikizyigwa kwakusaanguna, eeci cakacitika mu 66 C.E. ciindi basikalumamba bana Roma ‘nobakafwiinsya’ kusaala kwabo. Kumane, Banakristo bananike mu Jerusalemu amu Judaya bakatija kutegwa ‘bantu bafwutulwe.’ (Amubale Matayo 24:22; Malk. 3:17) Aboobo, ncinzi ncotukonzya kulangila kuti ciyakucitika aakutalika mapenzi mapati? Jehova ‘uyakufwiinsya’ ciindi cakulwanwa kwabukombi bwakubeja ambunga ya Lukamantano Lwazisi kutegwa bukombi bwakasimpe butakanyonyoonwi antoomwe abwakubeja. Eeci ciyakupa kuti bantu ba Leza bafwutuke.

8. (a) Nzyintu nzi ziyakucitika caakwiinda cibeela cakusaanguna camapenzi mapati? (b) Ino kweelede kuti ndilili munanike wamamanino wamunkamu ya 144,000 nayakutambula bulumbu bwakwe bwakujulu? (Amubone majwi aakumamanino.)

  ⁸ Ncinzi ciyakucitika caakwiinda cibeela cakusaanguna camapenzi mapati? Majwi aa Jesu atondezya kuti kuyakwiinda ciindi nkondo ya Amagedoni kaitanatalika. Nzyintu nzi ziyakucitika muciindi eeco? Bwiinguzi bulilembedwe mulugwalo lwa Ezekieli 38:14-16 alwa Matayo24:29-31. (Amubale.) * Caakwiinda ciindi eeci, tuyakubona nkondo ya Amagedoni, mamanino aamapenzi mapati aakozyenye alunyonyooko lwa Jerusalemu mu 70 C.E. (Malk. 4:1) Kwaakucaala asyoonto kuti nkondo ya Amagedoni imane, mapenzi mapati aaboola ayakuba cintu cilibedelede—cintu ‘citanacitikide kuzwa kumatalikilo  aanyika.’ (Mt. 24:21) Amagedoni yaakwiinda, Bulelo bwa Kristo bwa Myaka Iili 1,000 buyakutalika.

9. Ino businsimi bwa Jesu bujatikizya mapenzi mapati bubajatikizya buti bantu ba Jehova?

⁹ Businsimi oobu ibujatikizya mapenzi mapati bulatuyumya-yumya. Ino nkaambo nzi? Akaambo kakuti butusyomezya kuti kufwumbwa mapenzi ngotuyakujana, bantu ba Jehova kabali kabunga bayakufwutuka mapenzi mapati. (Ciy. 7:9, 14) Ciinda waawo, tulikkomene nkaambo lyankondo ya Amagedoni, Jehova uyakusumpula bweendelezi bwakwe alimwi akusalazya zyina lyakwe lisalala.—Int. 83:18; Ezk. 38:23.

NDILILI JESU NAYAKUBETEKA BANTU KUBA MBELELE NAA MPONGO?

10. Ino kubeteka bantu kuba mbelele naa mpongo twakali kukuteelela buti kaindi?

¹⁰ Lino atulange-lange ciindi cibeela cimbi cabusinsimi bwa Jesu nocakali kuyakuzuzikizyigwa—cikozyanyo cakubeteka bantu kuba mbelele naa mpongo. (Mt. 25:31-46) Kaindi twakali kuyeeya kuti kubeteka bantu kuti bali mbuli mbelele naa mpongo kwakali kucitika muciindi coonse camazuba aamamanino, kutalikila mu 1914. Alimwi twakali kuyeeya kuti aabo bakaka mulumbe wa Bwami alimwi akufwa kaatanatalika mapenzi mapati, bakali mbuli mpongo—kakunyina abulangizi bwakubusyigwa.

11. Nkaambo nzi kubeteka bantu kuti bali mbuli mbelele naa mpongo ncokweelede kuti tiikwakatalika mu 1914?

¹¹ Akati-kati kamuma 1990, lugwalo lwa Matayo 25:31 lwakalangwa-langwa alimwi mu Ngazi Yamulindizi, lugwalo lwaamba kuti: “Mwana wamuntu aakusika mubulemu bwakwe, antoomwe abangelo bakwe boonse, uyookkala acuuno cakwe cabwami cabulemu.” Cakalibonya kuti Jesu wakaba Mwami wa Bwami bwa Leza mu 1914, pele kunyina ‘naakakkala acuuno cakwe cabwami cabulemu’ kali Mubetesi ‘wamasi oonse.’ (Mt. 25:32; amweezyanisye a Daniele 7:13.) Nokuba boobo, cikozyanyo cambelele alimwi ampongo cipandulula Jesu kali Mubetesi. (Amubale Matayo 25:31-34, 41, 46.) Akaambo kakuti Jesu tanaakali Mubetesi wamasi oonse mu 1914, nkokuti kubeteka bantu kuti bali mbuli mbelele naa mpongo tiikwakatalika mumwaka ooyo. * Aboobo, ndilili kubeteka kwa Jesu nokuyakutalika?

12. (a) Ndilili Jesu nayakubeleka kali Mubetesi wamasi oonse ciindi cakusaanguna? (b) Ino nzyintu nzi zipandulwidwe mulugwalo lwa Matayo 24:30, 31 alwa Matayo 25:31-33, 46?

  ¹² Businsimi bwa Jesu ibujatikizya mazuba aamamanino butondezya kuti Jesu uyakubeleka kali Mubetesi wamasi oonse kwaciindi cakusaanguna bukombi bwakubeja bwaakunyonyoonwa. Mbubwenya mbuli mbokwaambwa  mumuncali 8, zyintu zimwi iziyakucitika aciindi eeco zililembedwe mulugwalo lwa Matayo 24:30, 31. Ikuti mwatulanga-langa tupango ootu, mulajana kuti Jesu wakaambila limwi zyintu zikozyenye azyeezyo nzyaakaamba mucikozyanyo cambelele alimwi ampongo. Mucikozyanyo, Mwana wamuntu ulaboola mubulemu antoomwe abangelo; misyobo alimwi azisi zyoonse zyabunganisyigwa; aabo ibabetekwa kuti bali mbuli mbelele ‘balilungumene’ nkaambo “buumi butamani” bulabalindila. * Aabo ibabetekwa kuba mbuli mpongo ‘balalyuuma acamba akulila,’ nkaambo balizyi kuti balindila ‘kunyonyoonwa kukabe kutamani.’—Mt. 25:31-33, 46.

13. (a) Ndilili Jesu nayakubeteka bantu kuba mbuli mbelele naa mpongo? (b) Ino kuziteelela boobu zyintu kujatikizya buti mbotuubona mulimo wesu wakukambauka?

 ¹³ Aboobo, ncinzi ncotukonzya kwaamba? Jesu aakuboola ciindi camapenzi mapati uyakubeteka bantu bamuzisi zyoonse kuba mbuli mbelele naa mpongo. Kumane, lyankondo ya Amagedoni, mamanino aamapenzi mapati, aabo bali mbuli mpongo “bayoonyonyoonwa kukabe kutamani.” Ino kuziteelela boobu zyintu kuujatikizya buti mbotuubona mulimo wesu wakukambauka? Kulatugwasya kubona mbouyandika mulimo wesu wakukambauka. Kusikila mane mapenzi mapati akatalike,  bantu bacijisi ciindi cakucinca akutalika kweenda munzila iisyanikide “iitola kubuumi.” (Mt. 7:13, 14) Calino bantu balakonzya kutondezya bube buli mbuli bwambelele naa bwampongo. Pele, tweelede kuyeeya kuti lubeta lwamamanino iluyakutondezya kuti naa mbaani bali mbuli mbelele naa mpongo luyakucitika ciindi camapenzi mapati. Aboobo, tulijisi kaambo kabotu kakuzumanana kupa coolwe kubantu banji cakuswiilila mulumbe wa Bwami akubweza ntaamu.

NDILILI JESU NAYAKUSIKA NAA KUBOOLA?

14, 15. Ino ntupango nzi tone twamumagwalo twaamba Kristo kaboola kali Mubetesi?

¹⁴ Sena kubulanga-langa alimwi businsimi bwa Jesu kuyubununa kuti kuteelela kwesu kujatikizya ciindi noziyakucitika zyintu izimbi zipati kweelede kucinca? Businsimi mbubwenya oobu bulawiingula mubuzyo ooyu. Munzila nzi?

¹⁵ Mubusinsimi bwakwe bulembedwe mulugwalo lwa Matayo 24:29–25:46, Jesu wakabikkila kapati maano kuzyintu iziyakucitika mumazuba aano aamamanino alimwi amuciindi camapenzi mapati. Aawa Jesu wakaamba ziindi zili lusele kujatikizya ‘kuboola’ naa kusika kwakwe. * Kujatikizya mapenzi mapati, wakaamba kuti: “Bayoobona Mwana wamuntu kaboola mumakumbi.” “Tamuzyi buzuba Mwami wanu nayooboola.” “Aciindi ncomutayeeyeli, Mwana wamuntu ulaboola.” Alimwi mucikozyanyo cakwe cambelele ampongo, Jesu wakaamba kuti: “Mwana wamuntu aakusika mubulemu bwakwe.” (Mt. 24:30, 42, 44; 25:31) Ziindi zyoonse eezyi zyone zyaamba Kristo aakuboola kali Mubetesi kumbele. Mubusinsimi bwa Jesu, nkookuli kumbi nkotujana ziindi zimwi zyone Jesu nkwaakaamba kujatikizya kuboola naa kusika kwakwe?

16. Ino muutupango tuli tumbi kusika kwa Jesu mokwaambidwe?

¹⁶ Kujatikizya muzike musyomesi uucenjede, Jesu wakaamba kuti: “Ulikkomene muzike ooyo ikuti Simalelo wakwe aakusika akamujane ulacita oobo!” Mucikozyanyo cabanakalindu, Jesu wakaamba kuti: “Nobakacili kweenda kuti bakaule, sibwiinga wakasika.” Mucikozyanyo camatalenta, Jesu wakaluula kuti: “Nokwakainda ciindi cilamfwu simalelo wabo bazike aabo wakaboola.” Mucikozyanyo nciconya eeco, simalelo wakati: “Nondakasika nondakaajana.” (Mt. 24:46; 25:10, 19, 27) Ino tupango ootu tone  itwaamba kusika kwa Jesu twaamba ciindi cili?

17. Ncinzi ncotwakaambide kujatikizya kusika ikwaambidwe mulugwalo lwa Matayo 24:46?

¹⁷ Kaindi twakalaambide mumabbuku eesu kuti ziindi zyone eezyi zyamamanino zyakali kwaamba kusika naa kuboola kwa Jesu mu 1918. Mucikozyanyo, atubone majwi aa Jesu aajatikizya “muzike musyomesi uucenjede.” (Amubale Matayo 24:45-47.) Twakazyi kuti ‘kusika’ kwaambidwe mukapango 46 kwakali kweendelana aciindi Jesu naakasika kulingula ciimo cakumuuya cabananike mu 1918, alimwi akuti kubikwa kwamuzike kulanganya lubono loonse lwa Simalelaakwe kwakacitika mu 1919. (Malk. 3:1) Nokuba boobo, kulanga-langa businsimi bwa Jesu alimwi, kutondezya kuti kucinca mukumvwisya kwesu kujatikizya ciindi zyintu zimwi nozyakali kuyakucitika kulayandika. Ino nkaambo nzi?

18. Ino kulanga-langa businsimi bwa Jesu boonse mbobubede kutupa kwaamba nzi kujatikizya kusika kwakwe?

 ¹⁸ Mutupango tuli musyule lyakapango ka Matayo 24:46, bbala lyakuti ‘kusika’ cakwiinduluka-induluka lyaamba ciindi Jesu aakuboola kwaambilizya lubeta akubeteka ciindi camapenzi mapati. (Mt. 24:30, 42, 44) Alimwi, mbubwenya mbotwabona  mumuncali 12, ‘kusika’ kwa Jesu ikwaambidwe mulugwalo lwa Matayo 25:31, kwaamba ciindi nciconya eeco cakumbele calubeta. Aboobo, cileelela kwaamba kuti kusika kwa Jesu kusala muzike musyomesi kuti kalanganya lubono lwakwe ikwaambidwe mulugwalo lwa Matayo 24:46, 47, akwalo kwaamba kuboola kwakwe kwakumbele, ciindi camapenzi mapati. * Inzya, kulanga-langa businsimi bwa Jesu boonse mbobubede kulacisalazya kuti ziindi zyoonse zili lusele izijatikizya kuboola kwakwe kwaamba ciindi calubeta lwakumbele ciindi camapenzi mapati.

19. Ino nkucinca mukumvwisya kuli buti nkotwalanga-langa, alimwi mibuzyo nzi iiyakwiingulwa mucibalo citobela?

¹⁹ Ino ncinzi ncotwaiya? Kumatalikilo aacibalo eeci twabuzyide mibuzyo yotatwe kubelesya bbala lyakuti “ndilili.” Cakusaanguna twabandika kuti mapenzi mapati tanaakatalika mu 1914 pe, pele ayakutalika ciindi mbunga ya Lukamantano Lwazisi yaakulwana Babuloni Mupati. Kumane, twabandika kuti lubeta lwa Jesu lwambelele ampongo tiilwakatalika mu 1914, pele luyakucitika ciindi camapenzi mapati. Kumamanino, twalanga-langa kaambo kusika kwa Jesu kuti asale muzike musyomesi kulanganya lubono lwakwe loonse ncokwatakacitika mu 1919, pele kuyakucitika muciindi camapenzi mapati. Aboobo, bwiinguzi kumibuzyo yoonse yotatwe yakuti “ndilili,” bujatikizya ciindi cakumbele cikozyenye—ciindi camapenzi mapati. Mbuti kuteelela ooku kupya mbokujatikizya mbotucimvwisya cikozyanyo camuzike musyomesi? Alimwi mbuti mbocijatikizya mbotuzimvwisya zikozyanyo zimbi zya Jesu izili mukuzuzikizyigwa muciindi eecino camamanino? Mibuzyo eeyi iiyandika kapati iyakulangwa-langwa mucibalo citobela.

MAJWI AAKUMAMANINO: (Ayelede kubalwa mbubwenya mbuli majwi aamunsi kweelana amincali.)

[Bupanduluzi buyungizidwe]

[Mibuzyo yaciiyo]

[Ccaati iili apeeji 4, 5]

CIINDI CAMAPENZI MAPATI ALIMWI AKUYA KUMBELE

KUZUZIKIZYIGWA KWAMUMAZUBA AANO

MAZUBA AAMAMANINO

ZYINTU ZIKOZYENYE IZYAKACITIKA MUMWAANDA WAMYAKA WAKUSAANGUNA

Mbunga ya Lukamantano Lwazisi (“cisesemyo cinyonyoona”) iyakulwana Bunakristo Bwanyika (“busena busalala”) alimwi abukombi bwakubeja boonse (Ciy. 17:16-18)

KUNYONYOONWA KWABUKOMBI BWAKUBEJA

Basikalumamba bana Roma (“cisesemyo cinyonyoona”) bakasaala munzi wa Jerusalemu atempele yamumo (“busena busalala”)

‘Cisesemyo cinyonyoona ciliimvwi mubusena busalala’ (Mt. 24:15, 16)

(Amubone  muncali 6)

Jehova ‘uyakufwiinsya’ kulwanwa kwabukombi bwakubeja;

Bantu ba Leza bayakufwutulwa

Basikalumamba bana Roma bakafwiinsya kusaala kwabo; Banakristo ibakali mu Jerusalemu amu Judaya bakatija

“Akaambo kabasale imazuba aayo ayoofwiinsyigwa” (Mt. 24:22)

(Amubone  muncali 7)

BULAMFWU BWACIINDI CITAZYIBIDWE

Jesu uyakubeteka bantu bamuzisi zyoonse kuba mbuli mbelele naa mpongo (Mt. 25:31-46)

(Amubone  mincali 12, 13)

MUKATI KACIINDI EECO

“Mbwaayoomanina buyo mapenzi aakumazuba aayo.” (Mt. 24:29-31)

(Amubone  muncali 8)

Jesu uyakusala muzike musyomesi kulanganya “lubono lwakwe loonse” (Mt. 24:46, 47)

(Amubone  muncali 18)

Kunyonyoonwa kwamasi (Ciy. 16:16)

AMAGEDONI

Kunyonyoonwa kwa Jerusalemu

BULELO BWA KRISTO BWAMYAKA IILI 1,000 BWATALIKA

[Cifwanikiso icili apeeji 7]

Kusikila mane mapenzi mapati akatalike, bantu bacijisi ciindi cakucinca mizeezo yabo

(Amubone  muncali 13)