Amugwasyigwe Kwiinda Mukwaandaanya
Amugwasyigwe Kwiinda Mukwaandaanya
Cakutadooneka mulazumina kuti Jesu ngowakali Mwiiyi mupati iwakaponede ano anyika. Andiza mulasola kwiiya nzila zimwi nzyaakali kubelesya ciindi naakali kuyiisya, mbuli mbwaakali kubelesya mibuzyo azikozyanyo. Nokuba boobo, sena kuli nomwakalanga-langa kale akubona kuti ziindi zinji wakali kuyiisya kwiinda mukwaandaanya?
Bantu banji ciindi nobaambaula balaandaanya. Andinywe mulakonzya kucita oobo kakunyina kuyeeyesya. Mulakonzya kwaamba kuti, “Bakaambide kuti micelo yoonse ilibizidwe, nokuba boobo, eeyi icili miyumu kapati.” Naa, “Kaindi mwana ooyu wakalijisi nsoni, pele mazuba aano zyakamana.”
Mutwaambo ituli mbuli tootu, mulakonzya kusaanguna kwaamba kaambo kamasimpe; mpoonya akutalika kwaandaanya kwiinda mukubelesya mabala mbuli pele, nokuba boobo, muciindi caboobo, naa kulubazu lumwi. Ambweni mulakonzya kwaandaanya kwiinda mukuyungizya twaambo tumbi. Kukanana munzila eeyi kuli buyo kabotu, alimwi kulakonzya kubagwasya bambi kukabona kaambo.
Nokuba kuti mumyaambo imwi tabavwuli kwaandaanya, tweelede kuzyiba kuti kwaandaanya kulagwasya. Ino nkaambo nzi? Nkaambo kakuti kwaandaanya kunji kulajanika amu Jwi lya Leza lyakasololelwa amuuya. Kanji-kanji Jesu wakali kwaandaanya. Amuyeeye twaambo ootu: “Bantu tabayasyi lambe akulivwumba cisuwo cakupimina, pele balalibikka acibikkilo calyo alimwi lilabamunikila boonse bali muŋanda.” ‘Tiindakaboolela kujaya Mulawo pe, pele kuzuzikizya.’ “Mwakamvwa kuti kwakaambwa kuti: ‘Utaciti bumambe.’ Pele ndimwaambila kuti kufwumbwa muntu uulangisisya mukaintu . . . ” “Mwakamvwa mbokwakaambwa kuti: ‘Liso kuliso alinyo kulinyo.’ Pele ndimwaambila kuti: Utapilusyi cibi kumuntu mubi, pele kufwumbwa muntu wakuuma lubayi kusaya lyalulyo, umupe asaya limbi.”—Mt. 5:15, 17, 27, 28, 38, 39.
Kwaandaanya kuli boobu kulajanika amumabbuku aambi aamu Bbaibbele. Kwaandaanya kulakonzya kupa kuti kaambo kamvwike naa kukankaizya mboceelede kucitwa cintu cimwi. Ikuti kamuli muzyali, amubone kwaandaanya ooku: “Anywebo nomausyi, mutanoobanyemyi bana banu pe, pele amuzumanane kubalela mululayo lwa Jehova akubayiisya kutobela mizeezo yakwe.” (Ef. 6:4) Ikuti mwaapostolo Paulo naakalemba buyo kuti bausyi (naa banyina) beelede kulela mwana mululayo lwa Leza, kucita boobo nokwakaba kwabusongo alimwi kwamasimpe. Nokuba boobo, muzeezo ulamvwika kapati kwiinda mukwaandaanya kwakuti ‘mutanoobanyemyi, pele amuzumanane kubalela mululayo lwa Jehova akubayiisya kutobela mizeezo yakwe.’
Kumane Paulo mucaandaano eeciya wakalemba kuti: “Tujisi nkondo yakutingana, ikutali abantu bajisi mubili wanyama abulowa pe, pele . . . amyuuya mibi iili mumasena aakujulu.” (Ef. 6:12) Kwaandaanya ooko kulakonzya kumugwasya kuzyiba kuti mulijisi nkondo mpati. Takuli kulwana abantu balya maila pe, muciindi caboobo nkulwana amyuuya mibi.
AMUGWASYIGWE AKWAANDAANYA
Mubbuku ndimunya eeli lyamu Bbaibbele lya Baefeso, muyakujana tupango tumwi tunji Paulo mwaakabelesya kwaandaanya. Kuyeeya tupango ootu kulakonzya kutugwasya kumvwa kaambo Paulo nkaakali kwaamba alimwi akumvwisya ncotweelede kucita.
Mulakonzya kukkomana alimwi akubona mbocigwasya kulanga-langa ccaati iyabikkwa iitondezya kwaandaanya nkomukonzya kujana mubbuku lya Baefeso caandaano 4 a 5. Nomubala kwaandaanya kumwi akumwi, amuyeeye kujatikizya buumi bwanu. Amulibuzye kuti: ‘Mubwini ino muuya nzi ngondijisi? Ino ndicita buti mubukkale oobu naa mubukkale bukozyenye? Ino bamwi babona kuti nkuli nkondilemenena mukwaandaanya ooku?’ Kuti mwabona kuti kwaandaanya kumwi kuyubununa mbazu imwi mpomweelede kubelekela, amusole kucita oobo. Amugwasyigwe akwaandaanya ooko.
Mulakonzya kubelesya ccaati ciindi cakukomba mumukwasyi. Banamukwasyi balakonzya kubalila limwi kwaandaanya ooko. Mpoonya umwi akati kanu ulakonzya kwaamba cibeela cakusaanguna cakwaandaanya ooko, mpoonya banamukwasyi bambi balakonzya kusola kuyeeya twaambo twaambidwe mucibeela cabili cakwaandaanya. Kucita oobo kulakonzya kupa kuti mube amubandi uukkomanisya nomubona mbomunga mwabelesya zyeezyo zyaambidwe mucibeela cabili cakwaandaanya. Kulanga-langa kwaandaanya munzila eeyi kulakonzya kubagwasya bana abapati kuba abukkale bwa Bunakristo mumukwasyi alimwi akubusena kulikoonse nkobakonzya kujanika.
Mbomuyaabuzumanana kubona bubotu bwakwaandaanya, inga mwakuzyiba cakufwambaana ciindi nomubala Bbaibbele, alimwi mulakonzya kubona kuti kulagwasya kapati mumulimo wanu wa Bunakristo. Mucikozyanyo mulakonzya kwaamba boobu kuli mukamwini ŋanda: “Bantu banji baamba kuti muntu uuli woonse ulijisi buumi butafwi, nokuba boobo amubone ncolyaamba Jwi lya Leza.” Naa ciindi nomusololela ciiyo ca Bbaibbele, mulakonzya kubuzya kuti: “Mumakani aaya bantu banji basyoma kuti Leza a Jesu muntu omwe; nokuba boobo, ncinzi ncotwajana kweelana ancolyaamba Bbaibbele? Alimwi ino nywebo musyoma nzi?”
Magwalo alijisi zikozyanyo zinji zyakwaandaanya zikonzya kutugwasya kweendela munzila ya Leza. Alimwi tulakonzya kubelesya kwaandaanya kugwasya bamwi kuzyiba kasimpe kamu Bbaibbele.
[Cifwanikiso icili apeeji 3]
[Ccaati iili apeeji 4, 5]
Kwaandaanya Kumwi Ikujanika Mucaandaano 4 a 5 ca Baefeso
Amukabelesye ccaati eeyi ciindi cakukomba mumukwasyi!
“Tatweelede kuzumanana . . . kupepaulwa . . . anjiisyo zyabantu ziindene-indene kwiinda mulweeno lwabo, kwiinda mubucenjezu bwakubelesya nzila zyakubeja.”—4:14.
“Pele katwaamba zyamasimpe, caluyando atukomene muzyintu zyoonse mukutobela yooyo uuli ngomutwe wesu, Kilisito.”—4:15.
‘Bamasi bali mumudima mumizeezo yabo . . . akaambo kakutazyiba ikuli muli mbabo akuyuma kwamyoyo yabo.’—4:18, 19.
“Pele nywebo kunyina nomwakaiya kuti Kilisito uli boobu. Aaya masimpe kufwumbwa kuti mwakamumvwa alimwi akuti mwakayiisyigwa kwiinda mulinguwe.”—4:20, 21.
“Mweelede kusamununa buntu bwanu bwakaindi oobo bweendelana abukkale bwanu bwakaindi.”—4:22.
‘Pele mweelede kuzumanana kubukulusya mizeezo iimweendelezya lyoonse, akusama buntu bupya.’—4:23, 24.
“Ooyo uubba atabbi limbi pe.”—4:28.
“Pele muciindi cakubba abeleke mulimo canguzu, acite mulimo mubotu amaanzaakwe.”—4:28.
“Kutazwi jwi libolede neliba lyomwe mukanwa mwanu.”4:29.
“Pele buyo ijwi lili kabotu kukuyaka bamwi.”—4:29.
“Amuzisowe zyintu zyoonse eezyi, kulutila, bukali, kunyema, kubwenta alimwi amajwi aakusampaula antoomwe abubi buli boonse.”4:31.
“Pele amufwidilane luzyalo, mube amoyo mutete walubomba, akulekelelana camoyo woonse.”—4:32.
“Bwaamu abusofwaazi bwamusyobo uuli oonse naa busyaacivwulemwangu tazyeelede nokuba kwaambwa akati kanu pe.”—5:3.
“Pele mweelede buyo kulumba.”—5:4.
“Cimwi ciindi mwakali mudima.”—5:8.
“Pele lino muli mumuni akaambo kakuyanzana a Mwami.”—5:8.
“Amuleke kutola lubazu mumilimo yabuyo yamudima.”——5:8.
“Pele muciindi caboobo, kamwiitondezya kuti njabuyo.”—5:11.
‘Aboobo amucenjele kapati, mutanooendi mbuli bantu bafwubafwuba pe.’—5:15.
“Pele mbuli bantu basongo, kamucibelesya kabotu ciindi coonse ncomujisi.”—5:15, 16.
“Akaambo kaceeci, amuleke kufwubaala.”—5:17.
“Pele amuzumanane kumvwisya ncayanda Jehova.”—5:17.
“Mutakolwi waini pe, nkaambo kukolwa kupa butaka.”—5:18.
“Pele amuzumanane kuzuzyigwa muuya.”—5:18.
‘Kutegwa mbungano eeyo ibote mumeso aa Kristo, kaitakwe kabala naa kankwinya niciba cintu cimbi cili boobo.’—5:27.
“Pele kuti kaisalala alimwi kainyina kampenda nokaba komwe.”—5:27.
“Kunyina muntu wakasulide kale mubili wakwe mwini.”—5:29.
“Pele ulausanina akuubamba kabotu, mbubonya Kilisito mbwacitila mbungano.”5:29.
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso]
[Cifwanikiso icili apeeji 6]
Sena muliciyeeyede cibeela cabili cakwaandaanya?
