Amucite Zyintu Kweelana Amupailo Wa Jesu Uutondezya Luyando
Amucite Zyintu Kweelana Amupailo Wa Jesu Uutondezya Luyando
“Taata, . . . komulemya mwanaako kuti awalo akulemeke.”—JOH. 17:1.
INO INGA MWAINGULA BUTI?
Ncinzi cijatikizyidwe ‘mukumuzyiba’ ncobeni Leza?
Mbuti mupailo wa Jesu uulembedwe mulugwalo lwa Johane caandaano 17 mbowakaingulwa mumwaanda wamyaka wakusaanguna?
Mbuti mbotukonzya kucita zyintu kweelana amupailo wa Jesu mazuba aano?
1, 2. Amupandulule Jesu ncaakacitila baapostolo bakwe basyomeka nobakamana kusekelela Pobwe Lyakwiindilila mumwaka wa 33 C.E.
CAKALI ciindi cakumazuba mubuzuba bwa Nisani 14 mumwaka wa 33 C.E. Eeci cakali ciindi Jesu abalongwe bakwe nobakamanizya kusekelela Pobwe Lyakwiindilila, pobwe eeli lyakali kubayeezya mbuli Leza mbwaakafwutula bamausyi kuzwa kubuzike mu Egepita. Pele basikwiiya bakwe bakali kulangila cintu cipati loko, “lufwutuko lutamani.” Buzuba ibwakali kutobela, Musololi wabo uutakwe cibi wakali kuyakujaigwa abasinkondonyina. Pele cintu eeci cibi cakali kuyakuba cilongezyo. Bulowa bwa Jesu ibwakatilwa bwakali kuyakupa kuti bantu bafwutulwe kuzwa kucibi alufwu.—Heb. 9:12-14.
2 Kutegwa tutabulubi bubambe oobu bwaluyando, Jesu wakatalisya bubambe bumbi bupya ibucitwa amwaka ibwakanjila mubusena bwa Pobwe Lyakwiindilila. Wakacita oobo kwiinda mukukomoona mukamu uutakwe bumena, akubapa baapostolo bakwe ibali 11 ibasyomeka, mpoonya wakati: “Eeci ciiminina mubili wangu uuyoopegwa akaambo kandinywe. Kamucita oobu lyoonse kundiibaluka.” Wakacita mbubonya oobo akunkomeki nobakamana kulya cilalilo, ulaamba, “Inkomeki eeyi yiiminina cizuminano cipya iciyeeme abulowa bwangu ibuyootililwa ndinywe.”—Lk. 22:19, 20.
3. (a) Nkucinca nzi kupati ikwakacitwa Jesu naakafwa? (b) Mibuzyo nzi njotweelede kulanga-langa iijatikizya mupailo wa Jesu uulembedwe mulugwalo lwa Johane caandaano 17?
3 Aciindi eeci, kwakaceede buyo ciindi cisyoonto kuti cizuminano ca Mulawo icakali akati ka Leza abana Israyeli cimane. Cizuminano eeci cakali kuyakunjililwa busena acizuminano cipya icijatikizya Jehova abasikutobela Jesu bananike. Jesu wakali kucibikkila kapati maano cisi eeci cakumuuya cipya. Bana Israyeli bakumubili tiibakakamantene pe mubukombi bwa Leza, alimwi eeci cakaleta masampu kuzyina lya Leza lisalala. (Joh. 7:45-49; Mil. 23:6-9) Mukwiimpana, Jesu wakali kuyanda kuti basikumutobela kabakamantene kutegwa kababelekela antoomwe akuleta bulemu kuzyina lya Leza. Aboobo, ncinzi Jesu ncaakacita? Wakapaila mupailo mubotu kapati walo muntu uuli woonse ngwayelede kubala. (Joh. 17:1-26; amubone cifwanikiso cili kumatalikilo aacibalo.) Swebo tulijisi coolwe cakulanga-langa mupailo ooyu akubuzya kuti: “Sena Leza wakawiingula mupailo wa Jesu?” Alimwi tweelede kulilingula akulibuzya kuti: “Sena ndilacita zyintu kweelana amupailo ooyu?”
ZYINTU NZYAAKALI KUBIKKILA KAPATI MAANO JESU
4, 5. (a) Nziiyo nzi nzyotwiiya kuzwa kukulomba kwa Jesu ikujanika kumatalikilo aamupailo wakwe? (b) Mbuti Jehova mbwaakaingula kulomba kwa Jesu ikwakali kujatikizya buumi bwakwe bwakumbele?
4 Jesu wakabayiisya basikwiiya bakwe zyintu zinji zibotu zijatikizya Leza mane masiku eeni. Mpoonya naakamana wakalanga kujulu akupaila kuti: “Taata, ciindi casika lino; komulemya mwanaako kuti awalo akulemeke, ikutegwa mbubonya walo mbowamupa nguzu zyakweendelezya bantu boonse, akonzye kupa buumi butamani kumweelwe woonse wabaabo mbomupede. . . . Ndakulemeka anyika, kwiinda mukumanizya mulimo ngookandipa kuti ndicite. Aboobo Taata kondilemya lino kumbali lyako abulemu mbondakajisi nendakacili anduwe inyika kaitanaba.”—Joh. 17:1-5.
5 Amubone zyintu Jesu nzyaakali kubikkila kapati maano izyaambidwe kumatalikilo aamupailo wakwe. Cintu ncaakali kubikkila maano kapati nkulemekwa kwazyina lyaba Usyi ba kujulu, alimwi eeci cileendelana akulomba kwakusaanguna ikwaambidwe mumupailo wakwe wacikozyanyo kwakuti: “Taata, alisalazyigwe zyina lyako.” (Lk. 11:2) Cintu cabili Jesu ncaakabikkila maano mumupailo wakwe nzyintu nzyobakali kuyandika basikwiiya bakwe kutegwa “akonzye kupa buumi butamani.” Naakamana kwaamba zyintu eezyo, Jesu wakalomba ncaakali kuyanda mwini, wakati: “Taata kondilemya lino kumbali lyako abulemu mbondakajisi nendakacili anduwe inyika kaitanaba.” Jehova wakamulumbula Mwanaakwe uusyomeka kwiinda aali zyeezyo nzyaakalomba akupa Jesu “zyina libotu kapati kwiinda” lyabangelo boonse.—Heb. 1:4.
‘KUZYIBA LEZA MWINI-MWINI UULI ALIKKE’
6. Kutegwa baapostolo bakajane buumi butamani, ncinzi ncobakali kuyandika kucita, alimwi tuzyiba buti kuti bakazwidilila?
6 Jesu alimwi wakapaila kujatikizya zyintu swebo tobasizibi nzyotuyandika kutegwa tweelele kutambula cipego caluzyalo lwa Leza cabuumi butamani. (Amubale Johane 17:3.) Wakaamba kuti tweelede kuzumanana ‘kumuzyiba’ Leza a Kristo. Nzila imwi motukonzya kucita oobo ijatikizya kubelesya meso alimwi amatwi eesu kutegwa twiiye zinji kujatikizya Jehova a Mwanaakwe. Aimwi nzila motukonzya kumuzyiba Leza nkwiinda mukujana lukkomano iluboola akaambo kakwiiya akubelesya zyeezyo nzyotwiiya kujatikizya nguwe. Baapostolo bakaitobela nzila eeyi iipa buumi. Jesu wakazumanana kupaila kuti: “Ndabaambila majwi ngowakandipa, eelyo baatambula.” (Joh. 17:8) Pele kutegwa bajane buumi butamani, bakeelede kuzumanana kuzinzibala kuyeeya zyintu nzyaamba Leza akuzibelesya mubuumi bwabo abuzuba. Sena baapostolo basyomeka bakacikonzya kucita oobo kusikila kumamanino aabuumi bwabo bwaanyika? Inzya, bakacita oobo. Tulizyi oobo nkaambo mazyina aabo oonse alilembedwe amabwe aantalisyo aali 12 aa Jerusalemu Mupya wakujulu alimwi taakalubwi.—Ciy. 21:14.
7. Ino “kuzyiba” Leza caamba nzi, alimwi nkaambo nzi ncociyandika kapati?
7 Kweelana abasikwiiya mwaambo wa Chigiriki, majwi aakasandululwa kuti “kuzyiba” alakonzya alimwi kusandululwa kuti “mweelede kuzumanana kuzyiba” naa “kuzumanana kuyaabuzyiba.” Bupanduluzi boonse bobilo buleendelana, alimwi boonse bobilo bulayandika. Aboobo, “kuzyiba” Leza caamba kuzumanana kwiiya kujatikizya nguwe. Nokuba boobo, eeci tacaambi buyo kuzyiba bube bwakwe amakanze aakwe pe. Kuzyiba Jehova kujatikizya kumuyanda kapati akuba aacilongwe ciyumu anguwe alimwi abakombima. Bbaibbele lipandulula kuti: “Kufwumbwa muntu uutatondezyi luyando tanamuzyiba Leza pe.” (1 Jo. 4:8) Aboobo, kuzyiba Leza kulabikkilizya akumumvwida. (Amubale 1 Johane 2:3-5.) Eelo kaka ncoolwe cipati kuba akati kabaabo baambwa kuti balimuzyi Jehova! Pele mbubwenya mbocakacitika kuli Judasi Iskariote, cilongwe eeci cibotu kapati cilakonzya kumana. Atubeleke canguzu kutegwa tuzumanane kuba mucilongwe eeci. Mpoonya kumamanino tuyakweelela kutambula cipego caluzyalo lwa Leza cabuumi butamani.—Mt. 24:13.
“AKAAMBO KAZYINA LYAKO”
8, 9. Ncinzi Jesu ncaakali kubikkila kapati maano mumulimo wakwe waanyika, alimwi kweelede kuti nzilengwa nzi nzyaakakaka?
8 Notubala mupailo wa Jesu uulembedwe mulugwalo lwa Johane caandaano 17, cilisalede kuti Jesu wakali kubayanda kapati baapostolo alimwi andiswe. (Joh. 17:20) Nokuba boobo, tweelede kumvwisya kuti cintu cipati ncabikkila kapati maano Jesu taluli lufwutuko lwesu pe. Makanze aakwe kuzwa kumatalikilo kusikila kumamanino abuumi bwakwe bwaanyika akali aakubeleka kutegwa zyina lyaba Usyi lisalazyigwe akulemekwa. Mucikozyanyo, ciindi naakali kwaamba zyamulimo wakwe mucikombelo caku Nazareta, Jesu wakabala kuzwa mubbuku lya Isaya kuti: “Muuya wa Jehova uli alindime nkaambo wakandinanika kuti ndaambile bacete makani mabotu.” Cakutadooneka, kweelede kuti Jesu wakaamba zyina lya Leza kabotu-kabotu mbolyeelede kwaambwa naakali kubala zyamulimo wakwe.—Lk. 4:16-21.
9 Kweelana azilengwa zyaba Juda, kakucili ciindi Jesu katanaboola aano anyika, basololi bazikombelo bakali kubakasya bantu kubelesya zyina lya Leza. Tulakonzya kuba masimpe kuti Jesu wakazikaka zilengwa zili boobu zitali zyamu Magwalo. Wakaambila basikumukazya kuti: “Ndaboola muzyina lya Taata, pele tiimwanditambula pe; ikuti umbi naakaboola muzyina lyakwe mwini, ooyo nomwakamutambula.” (Joh. 5:43) Mpoonya kakuceede buyo ciindi cisyoonto kuti afwe, Jesu wakaamba cintu ncaakali kubikkila kapati maano mubuumi bwakwe kwiinda mukupaila kuti: “Taata, kolilemya zyina lyako.” (Joh. 12:28) Aboobo, notulanga-langa mupailo ooyu tatweelede kugambwa ciindi notubona Jesu cakwiinduluka-induluka kaamba kaambo aaka ikajatikizya zyina lyaba Usyi.
10, 11. (a) Ncinzi cakajatikizyidwe mumulimo wa Jesu wakuzyibya zyina lyaba Usyi? (b) Makanze nzi ngobeelede kuba aangayo basikwiiya ba Jesu?
10 Jesu wakapaila kuti: “Ndabazyibya zyina lyako bantu mbookandipa munyika. Bakali bako, pele wakabapa kulindime alimwi balibamba jwi lyako. Alimwi tandicili munyika, pele balo bali munyika, mebo ndiboola kulinduwe. Taata Oosalala, kobakwabilila akaambo kazyina lyako eelyo ndyookandipa, ikutegwa babe bamwi mbubonya mbotubede swebo.”—Joh. 17:6, 11.
11 Kuzyibya zyina lyaba Usyi kuli basikwiiya bakwe kwakali kujatikizya zinji kutali buyo kwaamba zyina eelyo. Jesu alimwi wakabagwasya kuzyiba kuti zyina lya Leza lyakali kwiiminina bube bwakwe bubotu alimwi ambwatweendelezya. (Kul. 34:5-7) Kuyungizya waawo, nokuba kuti Jesu Mwami kujulu, wazumanana kubagwasya basikwiiya bakwe kutegwa bazyibye zyina lya Jehova nyika yoonse mbwiizulwa. Nkaambo nzi mulimo ooyu ncouli mukucitwa? Kutegwa bantu banji baiye kujatikizya Jehova mamanino aabweende bwazyintu oobu kaatanasika. Mpoonya ciindi eeco caakusika, Jehova uyakubafwutula bakamboni bakwe basyomeka, alimwi bantu boonse bayakulizyiba zyina lipati lya Jehova!—Ezk. 36:23.
“KUTEGWA NYIKA ISYOME”
12. Nzyintu nzi zyotatwe iziyandika kapati kutegwa tuzwidilile mumulimo wesu wakufwutula bantu?
12 Ciindi Jesu naakali anyika, wakabeleka canguzu kugwasya basikwiiya bakwe kulwana kulezya kwabo. Eeci cakali kuyandika kulimbabo kutegwa bamanizye mulimo Jesu ngwaakatalisya. Jesu wakapaila kuti: “Mbubonya yebo mbowakandituma munyika, andime ndakabatuma munyika.” Kutegwa bazwidilile mumulimo wakufwutula bantu, Jesu wakakankaizya zyintu zyotatwe iziyandika kapati. Cakusaanguna, wakapaila kulomba kuti basikwiiya bakwe batabi banyika ya Saatani iisofweede. Cabili, wakapaila kulomba kuti basalazyigwe, naa kuti basalale, kwiinda mukubelesya nzyobaiya kuzwa mukasimpe ka Jwi lya Leza. Catatu, Jesu cakwiinduluka-induluka wakakombelezya kuti basikwiiya bakwe bakamantane muluyando mbubwenya mbuli walo mbwakamantene aba Usyi. Umwi aumwi wesu weelede kulilingula. Tweelede kulibuzya kuti, ‘Sena ndilacita zyintu eezyi zyotatwe nzyaakaamba Jesu mumupailo?’ Kwiinda mukubikkila maano kuzyintu eezyi, Jesu wakatondezya kuba alusyomo lwakuti basikwiiya bayakucita zyintu eezyi kwiinda mukwaamba majwi aakuti: “Kutegwa nyika isyome kuti nduwe wakandituma.—Amubale Johane 17:15-21.
13. Mbuti mupailo wa Jesu mbowakaingulwa mumwaanda wamyaka wakusaanguna C.E.?
13 Ikuti twalanga-langa lugwalo lwamu Bbaibbele lwa Milimo ya Batumwa, ilugwalo luccilila mabbuku aa Makani Mabotu one, tulakonzya kubona kuti mupailo wa Jesu wakaingulwa. Akati ka Banakristo bakusaanguna cakali cuuba-uba kuti kube kwaandaana mbwaanga kwakali bantu basiyene-siyene, ba Juda a Bamasi, bavwubi abacete, basimalelo abazike. Nokuba boobo, boonse buyo bakakamantana antoomwe alimwi bakali kukonzya kukozyanisyigwa kuzizo zisiyene-siyene zyamubili, Jesu kali ngomutwe wamubili ooyu. (Ef. 4:15, 16) Eelo kaka ooku kwakali kuzwidilila kupati munyika ya Saatani iitakamantene! Jehova nguweelede kutembaulwa nkaambo nguwakapa kuti cikonzyeke kwiinda mumuuya wakwe uusalala uulaanguzu.—1 Ko. 3:5-7.
14. Ino mupailo wa Jesu waingulwa buti mazuba aano?
14 Cuusisya ncakuti, ciindi baapostolo nobakamana kufwa, lukamantano oolu lwakamana. Kweelana ambokwakaambilwa limwi, luleyo lupati lwakatalika mumbungano, calo icakapa kuti kube kwaandaana. (Mil. 20:29, 30) Pele mumwaka wa 1919, Jesu wakabaangununa basikumutobela bananike kuzwa kubuzike bwabukombi bwakubeja akubabunganya antoomwe ‘mucaanzyo calukamantano cilondokede.’ (Kol. 3:14) Ncinzi cacitika akaambo kamulimo wabo wakukambauka? Beenzinyina ‘ibambelele zimbi’ ibainda ku 7 miliyoni “ibazwa muzisi zyoonse, mumisyobo yoonse, mumikowa yoonse alimwi amumilaka yoonse” babunganisyigwa antoomwe akuba butanga bomwe bukamantene abananike ba Leza. (Joh. 10:16; Ciy. 7:9) Ooku nkwiingulwa ikugambya kwamupailo wa Jesu kuli Jehova kwakuti: ‘Ikuti nyika izyibe kuti nduwe Jehova wakandituma akuti ulabayanda balo mbubonya mbowali kundiyanda mebo’!—Joh. 17:23.
MAMANINO AAKULWAIZYA
15. Nkulomba kuli buti kwaalubazu Jesu nkwakalombela basikwiiya bakwe bananike?
15 Mubuzuba bwa Nisani 14, kumazuba, Jesu wakabalemeka baapostolo bakwe kwiinda mukupanga cizuminano ambabo kutegwa bakalele antoomwe anguwe mu Bwami bwakwe. (Lk. 22:28-30; Joh. 17:22) Aboobo, kujatikizya boonse aabo ibakali kuyakuba basikumutobela bananike, Jesu wakapaila kuti: “Taata, ndiyanda kuti aabo mbowandipa abalo bakabe andime ooko nkweyooba, ikutegwa bakabone bulemu mbowandipa, nkaambo wakandiyanda kaitanaba nyika.” (Joh. 17:24) Bambelele zimbi balakkomana akaambo kabulumbu mbobaya kutambula bananike, tababafwidi munyono pe, eeci ncitondezyo calukamantano luliko akati ka Banakristo bakasimpe mazuba aano.
16, 17. (a) Kumamanino aamupailo wakwe, ncinzi Jesu ncaakaamba kuti uyakuzumanana kucita? (b) Ino tweelede kukanza kuzumanana kucita nzi?
16 Kwiinda mukuyungwa abasololi bazikombelo, bantu banji basala kutabubikkila maano bumboni butondezya kuti Jehova ulijisi bantu bakamantene ibamuzyi ncobeni. Oobu mbocakabede ciindi Jesu naakali kupona anyika. Aboobo, wakamanizya mupailo wakwe amajwi aaya aakulwaizya aakuti: “Taata ooluleme, inyika ncobeni taikuzyi pe; pele mebo ndilikuzyi alimwi bantu aaba balizyi kuti nduwe wakandituma. Alimwi ndabazyibya zyina lyako alimwi ndiyoolizyibya ikutegwa luyando ndookali kundiyanda andulo lube muli mbabo alimwi mebo ambabo tukamantane.”—Joh. 17:25, 26.
17 Nguni uukonzya kudooneka kuti Jesu tanaacita zyintu kweelana amupailo wakwe? Mbwaanga ngo Mutwe wambungano, wazumanana kutugwasya kuzyibya zyina lyaba Usyi amakanze ngobajisi. Atuzumanane kulibombya kubusilutwe bwakwe kwiinda mukuba basungu mukumvwida mulawo wakwe wakukambauka akugwasya bantu kuba basikwiiya. (Mt. 28:19, 20; Mil. 10:42) Alimwi atubeleke canguzu kutegwa tukwabilile lukamantano lwesu lutaliboteli. Kwiinda mukucita zyintu eezyi, nkokuti tulacita zyintu kweelana amupailo wa Jesu, akupa kuti zyina lya Jehova lilemekwe alimwi akupa kuti tuzumanane kukkomana mane kukabe kutamani.
[Mibuzyo yaciiyo]
[Cifwanikiso icili apeeji 26]
[Cifwanikiso icili apeeji 28]
Banakristo bamumwaanda wamyaka wakusaanguna bakabeleka kweelana abusolozi bwamuuya uusalala kutegwa bazumanane kukamantana
(Amubone muncali 13)
[Cifwanikiso icili apeeji 30]
Bantu ba Jehova nyika yoonse mbwiizulwa balikamantene
(Amubone muncali 14)
