1. Ino bbuku lya Levitiko inga lyatugwasya buti?

MUBBUKU lya Levitiko, kusalala kulaambwa ziindi zinji kwiinda mumabbuku aambi aamu Bbaibbele. Mbwaanga bube oobu bulayandika kubakombi ba Jehova beni-beni, kulimvwisya bbuku eeli kuyootugwasya kutegwa katusalala.

2. Ino makani nzi amwi aajanika mubbuku lya Levitiko?

² Bbuku lya Levitiko ilyakalembwa amusinsimi Musa, ncibeela ca “Magwalo oonse” aagwasya mukuyiisya. (2Tim. 3:16) Izina lya Jehova lilajanika ziindi izibalilwa kukkumi mucaandaano cimwi acimwi mubbuku eeli. Kumvwisya ncolyaamba bbuku lya Levitiko kuyakutugwasya kutegwa tutaciti cintu cili coonse cikonzya kuleta masampu kuzina lya Leza. (Lev. 22:32) Mabala aakuti “Ndime Jehova” aabelesyegwa ziindi zinji mubbuku eeli ayelede kutuyeezya kumvwida Leza. Mucibalo eeci alimwi acitobela, tulajana makani aakkomanisya aajanika mubbuku lya Levitiko aakonzya kutugwasya kusalala mubukombi bwesu kuli Leza.

3, 4. Ino kusalala kwa Aroni abana bakwe kwakali kwiiminina nzi? (Amubone cifwanikiso cili kumatalikilo aacibalo.)

³ Amubale Levitiko 8:5, 6. Jehova wakasala Aroni kuba mupaizi mupati mu Israyeli, alimwi bana bakwe bakali kuyakubeleka  kabali bapaizi. Aroni wiiminina Jesu Kristo alimwi bana bakwe baiminina basikutobela Jesu bananike. Aboobo, sena kusamba nkwaakali kucita Aroni kwiiminina kusalazyigwa kwa Jesu? Peepe, nkaambo Jesu tanaakajisi cibi alimwi ‘wakanyina kampenda,’ aboobo tanaakali kuyandika kusalazyigwa. (Heb. 7:26; 9:14) Nokuba boobo, kusalala kwa Aroni kwakali kutondezya ciimo ca Jesu cisalala alimwi ciluleme. Ino kusalala kwabana ba Aroni kwiiminina nzi?

⁴ Kusalazyigwa kwabana ba Aroni kwiiminina kusalazyigwa kwabaabo bakasalwa kuba bapaizi kujulu. Sena kubbapatizyigwa kwabananike kuleendelana akusalazyigwa kwabana ba Aroni? Peepe, kubbapatizyigwa takugwisyi zibi; muciindi caboobo, kutondezya kuti muntu walyaaba kuli Jehova Leza. Kusalazyigwa kwabananike kulacitwa kwiinda ‘mujwi lya Leza,’ alimwi eeci caamba kuti beelede kubelesya njiisyo zya Kristo mubuumi bwabo. (Ef. 5:25-27) Munzila eeyo balasalazyigwa. Pele mbuti kujatikizya “mbelele zimbi”?—Joh. 10:16.

5. Nkaambo nzi ncotukonzya kwaamba kuti bambelele zimbi balasalazyigwa kwiinda mu Jwi lya Leza?

⁵ Bana ba Aroni tiibakali kwiiminina “nkamu mpati” yambelele zimbi zya Jesu. (Ciy. 7:9) Aboobo, sena bantu ibakabbapatizyigwa ibali boobo abalo balasalazyigwa kwiinda mu Jwi lya Leza? Inzya. Ciindi aabo ibajisi bulangizi bwakupona anyika nobabala ncolyaamba Bbaibbele kujatikizya mbobuyandika bulowa mbwaakatila Jesu, balaasyoma majwi aayo alimwi “balamubelekela mulimo uusetekene isyikati amasiku.” (Ciy. 7:13-15) Kuzumanana kusalazyigwa nkobacita bananike alimwi abambelele zimbi kulalibonya nkaambo ‘balazumanana kulilemeka kabotu.’ (1Pet. 2:12) Eelo kaka Jehova ulakkomana kubona bantu bakwe boonse kabasalala alimwi kabakamantene ciindi nobamvwida akutobela cakusyomeka Mweembezi wabo, Jesu!

6. Nkulilingula kuli buti kukonzya kutugwasya?

⁶ Iceelelo cakuti bapaizi bana Israyeli bakeelede kusalala kumubili cijisi bupanduluzi bwini-bwini kubantu ba Jehova mazuba aano. Aabo mbotwiiya limwi Bbaibbele kanji-kanji balabona kuti tulasalala akusama kabotu alimwi masena eesu aakukombela aalo alasalala. Aboobo, kusalala kwabapaizi kulatugwasya kubona kuti kufwumbwa uuyanda kutanta kucilundu cabukombi bwa Jehova weelede kuti ‘kasalala mumoyo.’ (Amubale Intembauzyo 24:3, 4; Is. 2:2, 3.) Milimo yesu iisetekene kuli Leza yeelede kucitwa katujisi mizeezo, moyo alimwi amubili uusalala. Eeci caamba kuti tweelede kulilingula lyoonse, mpoonya bamwi inga bayandika kucinca kapati kutegwa basalale. (2Kor. 13:5) Mucikozyanyo, muntu uubbapatizyidwe iweebelela zintu ziletela muzeezo wakoonana acaali weelede kulibuzya kuti, ‘Sena ndilasalala?’ Mpoonya weelede kulomba lugwasyo kutegwa acileke cilengwa eeci cibyaabi.—Jak. 5:14.

7. Kweelana alugwalo lwa Levitiko 8:22-24, ncikozyanyo nzi Jesu ncaakapa?

⁷ Bapaizi nobakatalika kubikkwa mu Israyeli, bulowa bwamugutu bwakali kubikkwa kukutwi kwalulyo, kucaala cajanza, alimwi akucaala cakukuulu ca Mupaizi Mupati Aroni abana bakwe. (Amubale Levitiko 8:22-24.) Kubelesya bulowa munzila eeyi kwakali kutondezya kuti bapaizi bakali kuyoobeleka milimo yabo cakusyomeka. Mbubwenya buyo, awalo Mupaizi Mupati Jesu wakapa cikozyanyo cibotu kubananike alimwi abambelele zimbi. Wakaswiilila busolozi bwa Leza. Maanza aakwe akabelesyegwa kucita kuyanda kwa Jehova, alimwi maulu aakwe taakwe naakaleya munzila yabusalali.—Joh. 4:31-34.

8. Ino bakombi ba Jehova boonse beelede kucita nzi?

⁸ Banakristo bananike abambelele zimbi  zya Jesu beelede kutobela cikozyanyo cakusyomeka ca Mupaizi wabo Mupati. Bakombi ba Jehova boonse beelede kutobela busolozi bujanika mu Jwi lya Leza alimwi akutapenzya muuya uusalala. (Ef. 4:30) Beelede ‘kululamika nzila zyamaulu aabo.’—Heb. 12:13.

9. Ino majwi nzi ngobakaamba bakwesu ibakali kubeleka antoomwe abakwesu bamu Kabunga Keendelezya, alimwi mbuti majwi aabo mbwaakonzya kumugwasya kusinizya naa mulasalala?

⁹ Amubone mbobalimvwa bakwesu botatwe ibajisi bulangizi bwakuyoopona aano anyika alimwi ibabeleka kwamyaka minji abakwesu bamu Kabunga Keendelezya. Mukwesu umwi wakaamba kuti: “Nokuba kuti eeci ncoolwe cilibedelede camulimo, kuyanzana kwaziindi zili mbozibede abakwesu aaba kwakatondezya kuti nokuba kuti balinanikidwe amuuya, abalo tabalondokede pe. Nokuba boobo, mumyaka yoonse eeyi makanze aangu aali aakuzumanana kumvwida baabo basololela.” Mukwesu wabili waamba kuti: “Imagwalo mbuli lugwalo lwa 2 Bakorinto 10:5, ilwaamba kujatikizya ‘kumvwida Kristo,’ lwandigwasya kapati kubamvwida alimwi akubelekela antoomwe abaabo basololela. Ooku nkokumvwida camoyo woonse.” Mpoonya mukwesu watatu wakaamba kuti: “Kuyanda ceeco Jehova ncayanda alimwi akusulaika ceeco ncatayandi, alimwi akutobela busolozi bwakwe lyoonse akucita zintu zimukkomanisya, caamba kumvwida mbunga yakwe abaabo mbabelesya kuzuzikizya makanze aakwe aajatikizya nyika.” Ooyu mukwesu wakaiya kuti ba Nathan Knorr, ibakazooba bamu Kabunga Keendelezya, bakatuzumina twaambo itwakali mucibalo ca Ngazi Yamulindizi yamu Chingisi yamu 1925, icakajisi mutwe wakuti “Birth of the Nation” (Kuzyalwa Kwacisi) nokuba kuti bamwi bakali kutudooneka. Kumvwida kuli boobu kwakamukkomanisya kapati mukwesu ooyu. Kuzinzibala kuyeeya majwi aabaalumi botatwe ibaambwa atala aawa kulakonzya kumugwasya kusinizya naa mulasalala kwiinda mukuba aamuuya wakumvwida.

10. Mbuti mbociyandika kutobela mulawo wa Leza uujatikizya bulowa?

¹⁰ Amubale Levitiko 17:10. Jehova wakalailila bana Israyeli kuti tiibakeelede kulya “bulowa buli boonse.” Kulikasya kubulowa bwabanyama naa bwabantu, acalo nceelelo ca Banakristo. (Mil. 15:28, 29) Cilatuyoosya kapati twayeeya buyo kuti Leza inga takonzyi kutukkomanina akuti tulakonzya kugwisyigwa mumbungano yakwe. Tulamuyanda Leza alimwi tulayanda kumumvwida. Nociba ciindi notuyaana azintu zikonzya kubikka buumi bwesu muntenda, tulikanzide kutayungwa acintu cili coonse naa bantu aabo ibatamuzyi Jehova alimwi ibatayandi kumukomba naaceya. Inzya, tulalangilwa kukazyigwa akaambo kakulikasya kubulowa, pele swebo tweelede kusala kumvwida Leza. (Jud. 17, 18) Ino ninjiisyo nzi zikonzya kutugwasya kutegwa tube masimpe kuti tatulyi bulowa alimwi tatuzumini kubikkwa bulowa?—Dt. 12:23.

11. Nkaambo nzi ncotukonzya kwaamba kuti Buzuba Bwakumanya Milandu tiicakali buyo cilengwa citajisi mulimo?

¹¹ Mbwaakali kububelesya bulowa bwabanyama mupaizi mupati wabana Israyeli mu Buzuba Bwakumanya Milandu kulatugwasya kumvwisya mbwabubona bulowa Leza. Bulowa bwakali kubelesyegwa mumilimo yaalubazu. Bwakali kubelesyegwa kumanya milandu yabaabo ibakali kulomba kulekelelwa a Jehova. Bulowa bwamupoho alimwi abwampongo bwakali kusansailwa munsi-munsi aacivwumbyo cabbokesi lyacizuminano. (Lev. 16:14, 15, 19) Eeyi nzila yakali kupa kuti Jehova abalekelele milandu bana Israyeli. Kuyungizya waawo, Jehova wakapede malailile aakuti ikuti muntu wajaya munyama kutegwa alye, wakeelede kutila bulowa bwamunyama akubuzikka,  “nkaambo mubulowa mobubede buumi bwabalenge boonse.” (Lev. 17:11-14) Sena eeci cakali cilengwa cakanyina mulimo? Peepe. Kubelesya bulowa mu Buzuba Bwakumanya Milandu, alimwi amulawo wakutila bulowa ansi, kuleendelana amulawo Jehova ngwaakapede Nowa abana bakwe kujatikizya bulowa. (Matl. 9:3-6) Jehova Leza wakakasya kulya bulowa. Ino eeci caamba nzi ku Banakristo?

12. Mbuti lugwalo Paulo ndwaakalembela Banakristo bana Hebrayo mboluswaanganya bulowa alimwi akulekelela?

¹² Ciindi mwaapostolo Paulo naakalembela bana Hebrayo kujatikizya nguzu zyabulowa zyakusalazya, wakapandulula kuti: “Kweelana a Mulawo, ibunji bwazintu zilasalazyigwa abulowa, alimwi ccita kuti bulowa bwatilwa, kunyina pe uukonzya kulekelelwa zibi.” (Heb. 9:22) Alimwi Paulo wakaamba kuti zituuzyo zyabanyama, nokuba kuti zyakali ampindu, pele zyakali kuyeezya buyo bana Israyeli kuti bakali basizibi alimwi akuti bakali kuyandika cintu cimwi cikonzya kumanizya zibi zyabo cakumaninina. Inzya, mulawo wakali ‘cimvwule buyo cazintu zibotu ziboola, pele ikutali zintu eezyo zini-zini.’ (Heb. 10:1-4) Ino kulekelelwa kwamilandu kwakali kuyakukonzyeka buti?

13. Ino mulimvwa buti akaambo kacintu Jesu ncaakacita ikupa buumi bulaampindu yabulowa bwakwe kuli Jehova?

¹³ Amubale Baefeso 1:7. Lufwu lwa Jesu Kristo kacili cinunuzyo, walo ‘iwakalyaaba akaambo kandiswe’ lulaampindu kuliboonse ibamuyanda walo alimwi a Bausyi. (Gal. 2:20) Nokuba boobo, nciceeco ncaakacita Jesu naakamana kufwa alimwi akubusyigwa icakatwaangulula ncobeni, akupa kuti cikonzyeke kuti milandu yesu ilekelelwe. Jesu wakacita ceeco cakali kwiimininwa a Mulawo wa Musa mu Buzuba Bwakumanya Milandu. Mubuzuba oobo, mupaizi mupati wakali kubweza bulowa bwamunyama uutuulwa akunjila mu Busena Busalalisya bwatente lyakukombela, alimwi nokwakainda ciindi wakali kucita oobo mutempele lya Solomoni akubutuula kumbele lya Leza, kacita mbuli kuti Leza nkwali ncobeni. (Lev. 16:11-15) Mbubwenya buyo, awalo  Jesu wakaakunjila kujulu kwini buya kajisi mpindu yabulowa bwakwe alimwi akwiituula kuli Jehova. (Heb. 9:6, 7, 11-14, 24-28) Eelo kaka tulalumba akaambo kakuti zibi zyesu zilakonzya kulekelelwa alimwi tulakonzya kuba amanjezeezya aasalala akaambo kakusyoma mubulowa bwa Jesu!

14, 15. Nkaambo nzi ncociyandika kumvwida alimwi akutobela milawo ya Jehova iijatikizya kubelesya bulowa?

¹⁴ Sena lino mulakamvwisya kabotu-kabotu kaambo Jehova ncatulailila kutalya “bulowa buli boonse”? (Lev. 17:10) Sena mwakabona kaambo Leza ncabona bulowa kuti bulisetekene? Ibulowa ububona kuti mbuumi. (Matl. 9:4) Sena mulazumina kuti tweelede kububona bulowa mbubwenya mbwabubona Leza alimwi akutobela malailile aakwe aakuti tweelede kulikasya kulimbubo? Nzila yomwe njotukonzya kuba muluumuno a Leza nkwiinda mukuba alusyomo mucinunuzyo ca Jesu alimwi akulumba kuti bulowa bwakwe bulijisi bupanduluzi ku Mulengi wesu.—Kol. 1:19, 20.

¹⁵ Toonse buyo tulakonzya kulijana mubukkale ibunga bwayanda kuti tubelesye bulowa. Ambweni munamukwasyi naa mulongwe wesu cakutayeeyela ulakonzya kulijana mubukkale ibunga bwayanda kuti azumine naa kukaka kubikkwa bulowa. Mubukkale buli boobo, kusala cakucita kulayandika kutegwa musale kubelesya tubeela tumwi twabulowa alimwi anzila zimwi zyabusilisi. Nokuba boobo, cilayandika kapati kuvwuntauzya alimwi akulibambilila limwi kujatikizya kuciswa cakuteyeeyela. Kwiinda mukupaila, kulibambila kuli boobu kuyootugwasya kuzumanana kwiima nji alimwi akukaka kuubya-ubya makani aaya. Kwaamba masimpe tatuyandi kumunyemya Jehova kwiinda mukuzumina kucita cintu ncolikasya Jwi lyakwe. Bunji bwabasyaazibwene mubusilisi baambila bantu kuti kabasanga bulowa kutegwa bafwutule maumi aabantu. Nokuba boobo, babelesi ba Jehova balizyi kuti Mulengi ulijisi nguzu zyakubaambila mbobeelede kububona bulowa. Kulinguwe “bulowa” buli boonse bulisetekene. Tweelede kuba amakanze akutobela mulawo uujatikizya bulowa. Kwiinda mukulilemeka kwesu kusalala, tutondezya kuti tulalumba kapati kunguzu zyabulowa bwa Jesu zyakutufwutula, ibulowa bulikke ibupa kuti cikonzyeke kulekelelwa milandu yesu alimwi akuba abuumi butamani.—Joh. 3:16.

16. Nkaambo nzi babelesi ba Jehova ncobeelede kusalala?

¹⁶ Ciindi Jehova naakali kunununa bana Israyeli kuzwa mubuzike mu Egepita, wakabaambila kuti: “Ndime Jehova iwakamusololela kuzwa mucisi ca Egepita kuti ndibe Leza wanu, mweelede kusalala nkaambo mebo ndilasalala.” (Lev. 11:45) Bana Israyeli bakali kuyandika kuti kabasalala nkaambo Jehova ulasalala. Mbotuli Bakamboni ba Jehova, andiswe tweelede kusalala. Ibbuku lya Levitiko lilaamba kujatikizya makani aaya cakusalazya.

17. Mbuti mbomulimvwa lino kujatikizya bbuku lyamu Bbaibbele lya Levitiko?

¹⁷ Masimpe kulanga-langa zibeela zimwi zyabbuku lya Levitiko kwatugwasya kapati. Cakutadooneka, cibalo eeci camugwasya kulumba bbuku eeli lyamu Bbaibbele ilyakasololelwa amuuya. Kakunyina kuzumbauzya, kuzinzibala kuyeeya twaambo tuyandika tujanika mubbuku lya Levitiko kwatugwasya kumvwisya kaambo ncotuyandika kusalala. Nokuba boobo, ntwaambo nzi tumwi tuyandika kapati ntotulangila ikwiiya itulembedwe mubbuku eeli ilyakasololelwa amuuya? Ino ncinzi cimbi ncotukonzya kwiiya kuzwa kulindilyo cijatikizya kubelekela Jehova milimo iisalala? Twaambo ootu tuyakutulanga-langa mucibalo citobela.