1. Ino Manowa wakacita buti naakamvwa kuti wakali kuyooba muzyali?

MANOWA amukaintu wakwe bakalizyi kuti tabakabi abana pe. Mpoonya bumwi buzuba, mungelo wa Jehova wakaambila mukaintu wa Manowa kuti wakali kuyooba amwana musankwa. Eelo kaka eeci cakamugambya! Naakamwaambila makani aaya Manowa, wakakkomana kapati. Pele alimwi wakayeeya kujatikizya Jehova ncaakali kuyoolangila kulinguwe kali muzyali. Ino walo amukaintu wakwe bakali kuyoomuyiisya buti mwanaabo kuyanda Jehova akumubelekela mbwaanga bantu banji mu Israyeli bakali kucita zintu zibi? Manowa wakamulomba Jehova kuti amutume alimwi mungelo wakwe kwiinda mukwaamba kuti: “Ndalomba kuti muntu wa Leza mwini-mwini ngootumide aboole alimwi kuti azootuyiisye ncotweelede kucita kujatikizya mwana ooyo uuyoozyalwa.”—Babetesi 13:1-8.

2. Ino ncinzi ncomuyandika kutegwa muyiisye bana banu, alimwi ino inga mwacita buti oobo? (Amubone akabbokesi kakuti “ Ziiyo Zyanu zya Bbaibbele Iziyandika Kapati.”)

² Ikuti kamuli muzyali, mulakonzya kumvwisya mbwaakalimvwa Manowa. Andinywe mulijisi mukuli wakugwasya  bana banu kuti bamuzyibe akumuyanda Jehova. (Tusimpi 1:8) Ciindi nomukomba mumukwasyi, mulakonzya kubagwasya kuzumanana kwiiya kujatikizya Jehova alimwi a Bbaibbele. Masimpe, nkozili azimbi nzyomweelede kucita kunze aakubala buyo Bbaibbele abana banu mvwiki amvwiki. (Amubale Deuteronomo 6:6-9.) Ino ncinzi acimbi cikonzya kumugwasya kubayiisya bana banu kumuyanda akumubelekela Jehova? Mucibalo eeci, tulabandika cikozyanyo ca Jesu. Nokuba kuti taakali muzyali, mulakonzya kwiiya mbwaakali kuyiisya basikwiiya bakwe. Jesu wakali kubayanda alimwi wakali kulicesya. Alimwi wakajisi luzyibo, nkokuti wakalizyi mbobakali kulimvwa alimwi wakalizyi mbwaakali kukonzya kubagwasya. Lino atubone mbotukonzya kumwiiya Jesu.

3. Ino basikwiiya ba Jesu bakazyiba buti kuti wakali kubayanda?

³ Jesu kanji-kanji wakali kubaambila basikwiiya bakwe kuti wakali kubayanda. (Amubale Johane 15:9.) Alimwi wakali kuba ambabo ziindi zinji. (Marko 6:31, 32; Johane 2:2; 21:12, 13) Jesu tanaakali buyo mwiiyi wabo pele alimwi wakali mulongwe wabo. Aboobo tiibakali kudooneka pe naa wakali kubayanda. Ino inga mwayiya nzi kuli Jesu?

4. Ino inga mwabatondezya buti bana banu kuti mulabayanda? (Amubone cifwanikiso cili kumatalikilo aacibalo.)

⁴ Amubaambile bana banu kuti mulabayanda, alimwi amubatondezye kuti balayandika kapati kulindunywe. (Tusimpi 4:3; Tito 2:4) Ba Samuel, ibakkala ku Australia, bakaamba kuti: “Nondakacili mwana, bataata bakali kundibalila Bbuku Lyangu Lya Makani Aamu Bbaibbele lyoonse kumangolezya. Bakali kwiingula mibuzyo yangu, kundikumbata, alimwi akundimyoonta kanditanoona. Eelo kaka cakandigambya nondakazoozyiba kuti bataata bakakomenena mumukwasyi mwalo mobatakazyibide kukumbatana akumyoontana! Pele bakasolekesya kunditondezya luyando. Akaambo kaceeci, ndakali kubayanda kapati  alimwi ndakali kulimvwa kukkutila akukwabililwa.” Amubagwasye bana banu kulimvwa boobu kwiinda mukubaambila kuti “Ndilakuyanda.” Amubakumbate akubamyoonta. Amube aciindi cakubandika ambabo, kulya ambabo, alimwi akusobana ambabo.

5, 6. (a) Akaambo kakuti Jesu wakali kubayanda basikwiiya bakwe, ino ncinzi ncaakacita? (b) Ino bana banu mweelede kubalaya buti?

⁵ Jesu wakaamba kuti: “Aabo boonse mbondiyanda ndilabasinsa akubalaya.” * (Amubone bupanduluzi buyungizyidwe.) (Ciyubunuzyo 3:19) Mucikozyanyo, basikwiiya bakwe bakali kukazyanya ziindi zinji kujatikizya iwakali mupati akati kabo. Jesu wakalibikkila maano penzi eeli. Aboobo wakabalaya cakwiinduluka-induluka. Pele lyoonse wakali alubomba, alimwi wakali kulindila kuti kube ciindi cibotu alimwi abusena bubotu kutegwa abalulamike.—Marko 9:33-37.

⁶ Akaambo kakuti mulabayanda bana banu, mulizyi kuti mweelede kubalaya. Zimwi ziindi cilagwasya kubapandulwida buyo cimwi cintu ncociluzi naa ncocitaluzi. Pele ino kuti bazumanana kutatobela malailile? (Tusimpi 22:15) Amwiiye kuli Jesu. Cakukkazika moyo amuzumanane kubalaya kwiinda mukubasololela, kubayiisya, alimwi akubalulamika. Amusale ciindi abusena buli kabotu kuti mubape lulayo, alimwi amucite oobo calubomba. Mucizyi waku South Africa wazina lya Elaine ulayeeya bazyali bakwe mbobakali kumulaya. Lyoonse bakali kupandulula ncobakali kuyanda kuti acite. Ikuti naa bamwaambila kuti balamupa cisubulo akaambo kakutatobela malailile, masimpe bakali kucita oobo. Pele wakaamba kuti: “Kunyina nobakali kundipa lulayo cabukali naa kakunyina kundipandulwida ncobakali kundipeda cisubulo.” Akaambo kaceeci, wakalizyi lyoonse kuti bazyali bakwe bakali kumuyanda.

7, 8. (a) Ino basikwiiya ba Jesu bakayiya nzi kumipailo yakwe? (b) Ino mipailo yanu inga yabayiisya buti bana banu kusyoma Leza?

⁷ Ciindi Jesu naakali afwaafwi kwaangwa alimwi akujaigwa, wakakombelezya Bausyi kuti: “Abba, Taata, zintu zyoonse zilakonzyeka kulinduwe; koigusya nkapu eeyi kulindime. Pele kutabi kuyanda kwangu, akube kuyanda kwako.” * (Amubone bupanduluzi buyungizyidwe) (Marko 14:36) Amuyeeye buyo basikwiiya ba Jesu mbobakalimvwa ciindi nobakamvwa naa nobakazyiba nzyaakaamba mumupailo wakwe. Bakazyiba kuti nokuba kuti wakalilondokede, wakalomba lugwasyo kuli Bausyi. Aboobo abalo bakayiya kuti bakeelede kulicesya akusyoma Jehova.

⁸ Bana banu balakonzya kwiiya zinji kumipailo yanu. Mubwini tamupailili buyo kuyiisya bana banu. Pele ciindi nobamumvwa kamupaila, balayiya kusyoma Jehova. Mumipailo yanu, mutanoolombi buyo kuti Jehova abagwasye bana banu, pele amumulombe kuti amugwasye andinywe. Ba Anna  ibakkala ku Brazil, bakaamba kuti: “Ciindi nokwakali mapenzi, mbuli ciindi baneene alimwi abasyaaneene nobakali kuciswa, bazyali bangu bakali kulomba Jehova kuti abape nguzu zyakuliyumya kupenzi ndyobakajisi aciindi eeco alimwi akulomba busongo bwakusala kabotu. Noziba ziindi zintu nozyakali kukatazya kapati, bakali kusiya mapenzi aabo mumaanza aa Jehova. Akaambo kaceeci, ndakayiya kusyoma Jehova.” Ciindi bana banu nobamumvwa kamulomba Jehova kuti amupe busicamba bwakukambauka kuli basimukobonyoko naa busicamba bwakulomba bakamulemba mulimo kuti bamupe ciindi cakuti mujanike kumuswaangano wacooko, balabona kuti musyoma Jehova kuti amugwasye, aboobo abalo balayiya kucita mbubonya.

9. (a) Ino Jesu wakabayiisya buti basikwiiya bakwe kuti kabalicesya alimwi akuti kabataliyandi? (b) Ikuti kumulicesya alimwi kumutaliyandi, ino ncinzi ncobakonzya kwiiya bana banu?

⁹ Jesu wakaambila basikwiiya bakwe kuti kabalicesya akutaliyanda, alimwi wakabapa cikozyanyo. (Amubale Luka 22:27.) Baapostolo bakwe bakabona kuti wakalyaaba kubelekela Jehova akugwasya bamwi, alimwi abalo bakayiya kucita mbubonya. Andinywe mulakonzya kubayiisya bana banu kwiinda mucikozyanyo canu. Ba Debbie, ibajisi bana bobilo, bakaamba kuti: “Akaambo kakuti balumi bangu mwaalu, kunyina nondakali kubijilwa ciindi nobakali kuba abantu bamwi. Ndakalizyi kuti kufwumbwa ciindi imukwasyi wesu nowakali kuyanda balumi bangu, bakali kujana ciindi cakuba andiswe.” (1 Timoteyo 3:4, 5) Ino cikozyanyo caba Debbie alimwi abalumi babo ba Pranas, cakaugwasya buti mukwasyi wabo? Ba Pranas bakaamba kuti bana babo lyoonse bakali kulisungula kugwasya  kubeleka lyamiswaangano mipati. Bakalikkomene, bakapanga balongwe babotu alimwi bakali kuyanda kuba akati kabakwesu abacizyi. Lino boonse mumukwasyi wabo babelekela Jehova mumulimo waciindi coonse. Ikuti kamulicesya alimwi kamutaliyandi, muyiisya bana banu kulisungula kugwasya bamwi.

10. Ino Jesu wakalubelesya buti luzyibo ciindi bantu bamwi bamu Galileya nobakaboola kumuyandaula?

¹⁰ Jesu wakajisi luzyibo lwakumvwisya zintu munzila iilondokede. Tanaakali kubikkila buyo maano kuzintu bantu nzyobakali kucita pele ikaambo bantu ncobakali kucitila zintu eezyo. Wakali kukonzya kuzyiba izyakali mumyoyo yabo. Mucikozyanyo, cimwi ciindi bantu mu Galileya bakaboola kumuyandaula. (Johane 6:22-24) Wakazyiba kuti kaambo kapati ncobakaboolela tiikwakali kuyanda kuswiilila nzyakali kuyiisya, pele bakali kuyanda zyakulya. (Johane 2:25) Jesu wakalizyi bwini mbobakali kulimvwa. Aboobo cakukkazika moyo wakabalulamika alimwi wakabaambila kucinca nkobakeelede kucita.—Amubale Johane 6:25-27.

11. (a) Ino inga mwasola buti kuzyiba mbobalimvwa bana banu kujatikizya mulimo wakukambauka? (b) Ino inga mwabagwasya buti bana banu kuukkomanina mulimo wakukambauka?

¹¹ Nokuba kuti tamukonzyi kuzyiba izili mumyoyo yabantu, andinywe mulakonzya kuba aluzyibo. Mucikozyanyo, mulakonzya kusola kubamvwisya bana banu mbobalimvwa kujatikizya mulimo wakukambauka. Mulakonzya kulibuzya kuti, ‘Sena inga balangila buyo kuunka mumulimo wakukambauka akaambo kakuti ciindi notuli mumulimo wakukambauka inga tulalyookezya asyoonto kutegwa tubaulile zyakulya? Ikuti naa mwabona kuti bana banu tabaukkomanini kapati mulimo wakukambauka, amusole kucita zintu munzila yakuti kaukkomanisya. Amubape tulimo tusyoonto-syoonto ntobakonzya kucita kutegwa balimvwe kuti balayandika.

12. (a) Ino Jesu wakabacenjezya kujatikizya nzi basikwiiya bakwe? (b) Ino nkaambo nzi basikwiiya ba Jesu ncobakali kuyandika kucenjezyegwa anguwe?

¹² Ino muunzila nzi aimbi Jesu mwaakalubelesya luzyibo? Wakalizyi kuti kulubizya kumwi kulakonzya kusololela kukulubizya kumbi ambweni kucita cibi cipati, aboobo wakabacenjezya basikwiiya bakwe kujatikizya kaambo aaka. Mucikozyanyo, basikwiiya bakalizyi kuti cakali cibi kucita bwaamu. Pele Jesu wakabacenjezya kujatikizya izintu izyakali kukonzya kupa muntu kuti acite bwaamu. Wakaamba kuti: “Kufwumbwa muntu uulangisisya mukaintu cakumunyomenena, wacita kale bumambe anguwe mumoyo wakwe. Lino ikuti liso lyako lyalulyo kalikulebya, kolinonkola akulisowa.” (Matayo 5:27-29) Basikwiiya ba Jesu bakali kupona akati kabana Roma balo ibakali kuyandisya kweebelela zisobano izyakazwide bwaamu alimwi aŋambawido iisofweede. Aboobo caluyando Jesu wakabacenjezya basikwiiya bakwe kweeleba cintu cili coonse icakali kukonzya kupa kuti cibayumine kucita ciluzi.

13, 14. Ino inga mwabagwasya buti bana banu kutantamuka zyakulikondezya izijatikizya bwaamu?

¹³ Mbomuli bazyali, mulakonzya kubelesya luzyibo kukwabilila bana banu kuti bataciti cintu citamukkomanisyi Jehova. Cuusisya ncakuti, mazuba aano nobaba bana baniini bali muntenda yakweebelela zintu ziletela muzeezo wakoonana alimwi azintu zimwi izyabwaamu. Mweelede kubaambila bana banu kuti ncibi kulangilila zintu izyabwaamu. Pele nkozili azimbi nzyomukonzya kucita kutegwa mubakwabilile. Amulibuzye kuti: ‘Sena  bana bangu balizyi ikaambo kweebelela zintu ziletela muzeezo wakoonana ncocili cibi? Ncinzi cikonzya kubapa kuti bayande kweebelela zifwanikiso eezi. Sena ndilasikika kutegwa cibaubileubile kubandika andime kujatikizya twaambo tuli toonse, calo cikonzya kupa kuti baanguluke kundilomba lugwasyo noliba leelyo nobasunkwa kweebelela zintu ziletela muzeezo wakoonana?’ Nociba ciindi bana nobacili baniini, mulakonzya kabaambila kuti: “Ikuti mwabona cili coonse a Intaneti cimupa kuyandisya kuzyiba kujatikizya makani aakoonana alimwi muyanda kuceebelela cintu eeco, ndalomba kuti muzoobandike andime. Mutanikuyoowi naa kufwa nsoni kundilomba kuti ndimugwasye. Ndiyanda kumugwasya.”

¹⁴ Ciindi nomusala zyakulikondelezya, amuyeeye kabotu-kabotu mbomukonzya kuba cikozyanyo cibotu kubana banu. Ba Pranas, ibaambwa kale, bakaamba kuti: “Mulakonzya kwaamba zinji kujatikizya zintu zinji, pele bana banu balanga nzyomucita akwiiya ndinywe.” Ikuti naa lyoonse mulabikkila maano kusala nyimbo, mabbuku, alimwi amavidyo aali kabotu aakweebelela, mulakonzya kubagwasya bana banu kucita mbubonya. —Baroma 2:21-24.

15, 16. (a) Ino nkaambo nzi ncomukonzya kuba masimpe kuti Jehova uyoomugwasya kuyiisya bana banu? (b) Ino tuyoobandika nzi mucibalo citobela?

¹⁵ Ino ncinzi cakacitika ciindi Manowa naakalomba Jehova kuti amugwasye kuba muzyali uuli kabotu? “Leza mwini-mwini wakaswiilila jwi lya Manowa.” (Babetesi 13:9) Nobazyali, Jehova uyakwiiswiilila mipailo yanu andinywe. Uyoomugwasya kubayiisya bana banu. Alimwi uyoomugwasya kubatondezya luyando, kulicesya, alimwi akuba aluzyibo.

¹⁶ Mbubwenya Jehova mbwayoomugwasya kuyiisya bana banu ibacili baniini, ulakonzya kumugwasya kubayiisya baakuba bakubusi. Mucibalo citobela, tuyoobandika cikozyanyo ca Jesu caluyando, cakulicesya, alimwi acakuba aluzyibo mbozikonzya kumugwasya mukuyiisya bana banu bakubusi kubelekela Jehova.