1, 2. Ino Leza wakacita nzi muciindi ca Bbaibbele, alimwi ncinzi bamwi ncobakonzya kuyeeya ciindi nobaciswa?

IKUTI NAA mwakalicisidwe kale kapati, andiza mwakalibuzya kuti, ‘Mwati ndiyoopona?’ Naa ambweni umwi mumukwasyi naa mweenzinyoko ulaciswa eelyo tamuzyi ikuti naa uyoopona alimwi. Cili kabotu kuyanda kuba abuumi buli kabotu nywebo lwanu alimwi abaabo mbomuyanda. Mu Bbaibbele, tubala kujatikizya bamwi ibakali kuciswa alimwi ibakali kuyanda kuzyiba naa bayoopona. Mucikozyanyo, Mwami Ahaziya, mwana wa Ahabu a Jezebeli, wakali kuyanda kuzyiba naa wakali kuyoopona kumacise. Mukuya kwaciindi Mwami Beni-hadadi waku Siriya wakaciswa akubuzya naa wakali kuyoopona.—2 Bami 1:2; 8:7, 8.

² Ibbaibbele alimwi litwaambila kuti ikaindi, Jehova zimwi ziindi wakali kuponya bantu kwiinda mumaleele alimwi buya wakabelesya basinsimi bakwe kubusya bamwi ibakafwide. (1 Bami 17:17-24; 2 Bami 4:17-20, 32-35) Mazuba aano, bantu bamwi ibaciswa inga bayanda kuzyiba naa Leza uyoobacitila cimwi cintu kutegwa bayumye.

3-5. Ino Jehova a Jesu inga bacita nzi, alimwi ino mibuzyo nzi njotutiibandike?

 ³ Jehova ulaanguzu zikonzya kupa kuti bantu baciswe naa bataciswi. Wakasubula bamwi amalwazi mbuli Farao muciindi ca Abrahamu, kumane mukuya kwaciindi amucizyi wa Musa, Miriamu. (Matalikilo 12:17; Myeelwe 12:9, 10; 2 Samuele 24:15) Alimwi wakabasubula bana Israyeli ‘amalwazi naa cipenzyo’ ciindi nobakaleka kusyomeka. (Deuteronomo 28:58-61) Ziindi zimwi, Jehova wakali kubakwabilila bantu bakwe kuti bataciswi. (Kulonga 23:25; Deuteronomo 7:15) Alimwi bamwi wakabaponya. Mucikozyanyo, wakaponya Jobu ciindi naakacisidwe kapati kayanda kufwa.—Jobu 2:7; 3:11-13; 42:10, 16.

⁴ Tulisinizyide kuti Jehova ulijisi nguzu zyakuponya baabo baciswa. Jesu awalo ulakonzya kuponya baciswa. Naakali anyika, wakabaponya aabo ibakali aamalwazi mbuli cinsenda naa kusuntuka. Wakabaponya boofwu alimwi abaabo bakalebukide mibili. (Amubale Matayo 4:23, 24; Johane 9:1-7) Maleele aalya atugwasya kulangila kuzintu zibotu Jesu nzyayoocita munyika mpya. Aciindi eeco, “taakwe muntu naba omwe uukkala munyika uuyakwaamba kuti: ‘Ndaciswa.’”—Isaya 33:24.

⁵ Pele ikuti naa twaciswa kapati, sena inga twalangila kuti Jehova naa Jesu atuponye camaleele mazuba aano? Alimwi ncinzi ncotweelede kuyeeya ciindi notusala busilisi?

6. Ino Bbaibbele lyaamba nzi kujatikizya maleele ngobakali kucita Banakristo mumwaanda wamyaka wakusaanguna?

⁶ Mumwaanda wamyaka wakusaanguna, Jehova wakananika Banakristo amuuya wakwe uusalala akupa bamwi nguzu zyakucita maleele. (Milimo 3:2-7; 9:36-42) Mucikozyanyo, bakali kukonzya kuponya bantu akwaambaula mumyaambo iisiyene-siyene. (1 Bakorinto 12:4-11) Pele mukuya kwaciindi maleele aaya akazikumana, mbubonya Bbaibbele mbolyakaamba kuti ayoomana. (1 Bakorinto 13:8) Aboobo mazuba aano tatukonzyi kulangila kuti Leza atuponye camaleele naa kuponya bayandwa besu.

7. Ino lugwalo lwa Intembauzyo 41:3 inga lwatukulwaizya buti?

⁷ Pele ikuti naa mwaciswa, Jehova uyoomuumbulizya alimwi akumugwasya, mbubonya mbwaakacita kubabelesi bakwe bakaindi. Mwami Davida wakalemba kuti: “Ulikkomene ooyo uumubikkila maano muntu uupengede; Jehova uyoomuvwuna mubuzuba bwamapenzi. Jehova uyoomulinda akumubamba kuti kapona.” (Intembauzyo 41:1, 2) Mubwini, Davida tanaakali kwaamba kuti muntu mubotu iwakali kupona aciindi eeco alimwi iwakali kubikkila maano kumuntu uupengede tanaakali kuyoofwa. Aboobo ino Jehova wakali kuyoomugwasya buti muntu ooyo mubotu? Davida wakapandulula kuti: “Jehova uyoomulanganya  abulo mpacisilwa; ciindi naciswa yebo uyoomulanganya kabotu abulo bwakwe.” (Intembauzyo 41:3) Jehova ulizyi cini babelesi bakwe ncobaciswa, alimwi tabalubi pe. Ulakonzya kubapa busicamba abusongo. Jehova alimwi wabamba mubili munzila yakuti ulakonzya kuliponya ulikke.

8. Kweelana alugwalo lwa Intembauzyo 41:4, ncinzi Davida ncaakalomba kuli Jehova kuti amucitile ciindi naakali kuciswa kapati?

⁸ Mulugwalo lwa Intembauzyo 41, Davida alimwi ulatwaambila kujatikizya ciindi naakacisidwe kapati alimwi zyakamumana nguzu alimwi wakalibilika. Kuboneka kuti aciindi eeci, mwanaakwe Abisalomu wakali kuyanda kuba mwami muciindi canguwe. Davida wakaciswa kapati cakuti tanaakali kukonzya kumulesya Abisalomu. Wakalizyi kuti mapenzi ngaakajisi mumukwasyi akaboola akaambo kacibi ncaakacita a Bateseba. (2 Samuele 12:7-14) Aboobo ino wakacita nzi? Wakapaila kuti: “O Jehova, kondifwida luzyalo. Kondiponya, nkaambo ndakubisizya.” (Intembauzyo 41:4) Davida wakalizyi kuti Jehova wakamulekelela cibi cakwe, alimwi wakali kumusyoma Leza kuti amugwasye ciindi naakali kuciswa. Pele sena Davida wakali kulangila kuti Jehova ulamuponya camaleele?

9. (a) Ino Jehova wakamucitila nzi Mwami Hezekiya? (b) Ino Davida wakali kulangila nzi kuli Jehova?

⁹ Masimpe kuti zimwi ziindi Leza wakali kusala kubaponya bantu bakwe. Mucikozyanyo, ciindi Mwami Hezekiya naakali kuyanda kufwa, Jehova wakamuponya. Hezekiya wakapona myaka aimbi iili 15. (2 Bami 20:1-6) Pele Davida tanaakali kulangila maleele. Muciindi caboobo, wakali kulangila Leza kuti amugwasye munzila njoona Leza mbwakonzya kubikkila ‘maano muntu uupengede.’ Davida wakalijisi cilongwe cibotu a Jehova, aboobo wakali kukonzya kulomba Jehova kuti amuumbulizye akumulanganya ciindi naakali kuciswa. Alimwi wakalomba kuti mubili wakwe upone akulimvwa kabotu. Andiswe tulakonzya kulomba Jehova munzila njoona kuti atugwasye.—Intembauzyo 103:3.

10. Ino ncinzi cakacitika kuli Turofimo a Epafrodita, alimwi ino eeci cituyiisya nzi?

¹⁰ Mumwaanda wamyaka wakusaanguna, tabali boonse Banakristo ibakaponezyegwa kwiinda mumaleele nokuba kuti mwaapostolo Paulo alimwi abambi bakali kukonzya kuponya baciswa. (Amubale Milimo 14:8-10.) Mwaapostolo Paulo wakaponya bausyi Populiyo ibakali kuciswa kupya mubili alimwi akusoomona kalowa. Paulo ‘wakapaila, wakabikka maanza aakwe alinguwe akumuponya.’ (Milimo 28:8) Pele Paulo tanaakaponya bantu boonse mbaakazyi. Mweenzinyina umwi wazina lya Turofimo, wakaunka a Paulo anyendo yabumisyinali. (Milimo 20:3-5, 22; 21:29) Ciindi Turofimo naakaciswa, Paulo tanaakamuponya. Aboobo Turofimo wakaleka kweenda a Paulo akukkala ku Melita kutegwa apone. (2 Timoteyo 4:20) Aumbi mweenzinyina wa Paulo, Epafrodita, wakaciswa cakuyanda kufwa. Pele Bbaibbele talyaambi kuti Paulo wakamuponya.—Bafilipi 2:25-27, 30.

11, 12. Ino ncinzi ncotuzyi kujatikizya Luka, alimwi ino munzila nzi mwaakali kukonzya kumugwasya Paulo?

¹¹ Luka wakali dokota, alimwi wakali kweenda a Paulo. (Milimo 16:10-12; 20:5, 6; Bakolose 4:14) Kuboneka kuti wakamugwasya Paulo alimwi abambi ciindi nobakali  kuciswa munyendo zyabo zyabumisyinali. (Bagalatiya 4:13) Mbubonya mbuli Jesu mbwaakaamba kuti, “baciswa mbabayandika musilisi.”—Luka 5:31.

¹² Luka tanaakali buyo muntu iwakali kuyanda kupa mizeezo iijatikizya busilisi. Wakayiisyigwa kuba dokota. Ibbaibbele talyaambi busena naa ciindi Luka naakayiisyigwa kuba dokota. Pele lilaamba kuti Paulo wakatuma myooni ku Bakolose kuzwa kuli Luka. Aboobo kuboneka kuti Luka wakayiila ku Laodikeya mulimo wakwe wabusilisi, munzi iwakali afwaafwi aku Kolose. Alimwi, ciindi Luka naakalemba Makani aakwe Mabotu alimwi abbuku lya Milimo, wakabelesya mabala aabelesyegwa abamadokota. Akaambo kakuti wakali dokota, wakabikkilizya twaambo tunji twaziindi Jesu naakali kuponya bantu.

13. Ncinzi ncotweelede kuyeeya katutanapa naa kuzumina muzeezo uujatikizya busilisi?

¹³ Mazuba aano, kunyina mukwesu uukonzya kucita maleele akutuponya. Pele akaambo kakuti bayanda kutugwasya, bamwi balakonzya kutupa lulayo nokuba kuti tiitwabalomba. Masimpe ngakuti, mizeezo imwi inga kaili buyo kabotu. Mucikozyanyo, Paulo wakaambila Timoteyo kuti kanywa waini. Timoteyo wakajisi penzi lyamwida, ambweni akaambo kakuti wakanywa maanzi aalaatombe. * (Amubone bupanduluzi buyungizyidwe.) (Amubale 1 Timoteyo 5:23.) Pele tweelede kucenjela. Mukwesu umwi ulakonzya kusoleka kuti atuzule kubelesya musamu umwi naa kuti katulya naa tuleke kulya zyakulya zimwi. Ulakonzya kwaamba kuti umwi wakagwasyigwa mumukwasyi wakwe iwakajisi penzi mbuli leeli. Pele tacaambi kuti eeci inga catugwasya andiswe. Tweelede kuyeeya kuti nokuba kuti bantu banji balaubelesya musamu naa balasilikwa munzila eeyi, cilakonzya kuleta ntenda.—Amubale Tusimpi 27:12.

14, 15. (a) Ino mbantu bali buti mbotweelede kucenjelela? (b) Ino ncinzi ncotukonzya kwiiya kulugwalo lwa Tusimpi 14:15?

¹⁴ Toonse tuyanda kuba abuumi buli kabotu kutegwa tukkomane mubuumi alimwi akubelekela Jehova canguzu. Pele tatulondokede, aboobo tatukonzyi kwaayeleba malwazi oonse. Twaciswa, kulakonzya kuba busilisi bwiindene-indene, alimwi tulijisi nguzu zyakusala busilisi mbotukonzya kuzumina. Cuusisya ncakuti, bantu bamwi alimwi amakkampani aamba kuti bajana busilisi bukonzya kuponya bulwazi mbotujisi. Balacita oobo nkaambo bayanda kupanga mali manji. Balakonzya kwaamba kuti banji bakaubelesya kale musamu ooyo alimwi bakapona. Alimwi ikuti naa twaciswa, tulakonzya kuzumina kusoleka musamu uuboneka mbuli kuti inga watugwasya kulimvwa kabotu akupona kwaciindi cilamfwu. Pele tatweelede  kuluba kuti lulayo luli mu Jwi lya Leza lwaamba kuti: “Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.”—Tusimpi 14:15.

¹⁵ Ikuti katucenjede, naa katuli basongo, tuyakubikkila maano kujatikizya nzyotusyoma ikapati ikuti muntu uutupa lulayo katajisi luzyibo lwamisamu. Tulalibuzya mibuzyo yakuti: ‘Waamba kuti mavitamini aaya, musamu ooyu, naa cakulya eeci cabagwasya bantu, pele sena ndili masimpe naa cakabagwasya ncobeni? Nokuba kuti bamwi bagwasyigwa, ino ndizyi buti kuti andime inga ndagwasyigwa? Sena ndeelede kucita buvwuntauzyi bumwi akubandika abantu bajisi luzyibo mumisamu kuti bandisilike?’—Deuteronomo 17:6.

16. Ncinzi ncotweelede kulanga-kalanga ciindi notusala busilisi?

¹⁶ Ciindi notusala busilisi mbotukonzya kuzumina, tweelede ‘kubatama,’ naa kubelesya bupampu. (Tito 2:12) Eeci cilayandika kapati kwaambisya ciindi busilisi nobutupa kudooneka munzila imwi. Sena muntu ngotubuzya ulakonzya kupandulula busilisi naa musamu mboubeleka? Sena bupanduluzi bumvwika kutaba kabotu? Sena bamadokota banji balazumina kuti busilisi naa musamu ulakonzya kuponya bantu? (Tusimpi 22:29) Ambweni umwi  watwaambila kuti kuli musamu mupya iwakajanika kubusena kule alimwi akuti bamadokota banji tabanauzyiba. Pele sena kuli bumboni buliko butondezya kuti kuli musamu uuli boobu? Bamwi balakonzya akumupa musamu uubeleka kwiinda mukubikka zintu zyakusisikizya naa nguzu zimwi zitazyibidwe. Eeci cilakonzya kuleta ntenda. Kamuyeeya kuti Leza ulatucenjezya kutabelesya nguzu zimwi zitazizyidwe naa kubelesya nguzu zyamasalamuzi.—Deuteronomo 18:10-12; Isaya 1:13.

17. Ino nkulombozya nzi kuli kabotu nkotujisi toonse?

¹⁷ Kabunga keendelezya kamumwaanda wamyaka wakusaanguna kakatuma lugwalo kubakwesu mumbungano kubaambila zintu zimwi nzyobakeelede kutantamuka. Kumamanino aalugwalo, kabunga keendelezya kakalemba kuti: “Ikuti mwazumanana kuzitantamuka zintu eezyi cakulomya, zinoomweendela kabotu zintu. Kamupona kabotu!” (Milimo 15:29) Nokuba kuti majwi aakumamanino akali buyo majwi aakulaya, atuyeezya kuti ncamaano kuyanda kuba abuumi buli kabotu.

18, 19. Ino ncinzi ncotukonzya kulangila munyika mpya?

¹⁸ Akaambo kakuti tatulondokede, tatukonzyi kwaayeleba malwazi oonse. Alimwi ciindi twaciswa, tatulangili kuti Jehova atuponye camaleele. Pele tulakonzya kulangila kumbele ciindi Leza nayootuponya cakumaninina. Lugwalo lwa Ciyubunuzyo 22:1, 2, mwaapostolo Johane wakaamba kujatikizya “maanzi aabuumi” alimwi ‘azisamu zyabuumi’ iziyooponya bantu boonse. Eeci tacaambi kusilikwa kwiinda mukubelesya zisamu lino naa munyika mpya. Muciindi caboobo, caamba zintu zyoonse Jehova a Jesu nzyobayoocita kutegwa tukapone kukabe kutamani.—Isaya 35:5, 6.

¹⁹ Tulangila kuciindi eeci citaliboteli. Pele aciindi cino, tulasyoma kuti Jehova ulatuyanda umwi aumwi wesu akuti ulizyi mbotulimvwa notuciswa. Mbubonya mbuli Davida, tulizyi kuti ikuti naa twaciswa, Jehova takatulekelezyi. Lyoonse unoobalanganya aabo ibasyomeka kulinguwe.—Intembauzyo 41:12.