1-3. (a) Ino nkaambo nzi mizeezo alimwi amwaambo wa Leza ncozisumpukide kwiinda mizeezo amyaambo yabantu? (b) Ino tulaiya nzi mucibalo eeci?

JEHOVA wakali kuyanda kuti abamwi babe abuumi alukkomano, aboobo wakalenga bangelo kumane wakalenga bantu. (Intembauzyo 36:9; 1 Timoteyo 1:11) Jehova wakasaanguna kulenga yooyo Johane ngwaakaita kuti “Ijwi.” (Johane 1:1; Ciyubunuzyo 3:14) Jehova wakali kubandika a Jesu, wakali kumwaambila mizeezo yakwe alimwi ambwaakali kulimvwa. (Johane 1:14, 17; Bakolose 1:15) Mwaapostolo Paulo wakaamba kuti bangelo abalo balabandika alimwi balijisi mwaambo iwiindene amyaambo yabantu.—1 Bakorinto 13:1.

² Jehova ulizyi zyoonse izijatikizya mabbiliyoni aabangelo alimwi abantu mbaakalenga. Ulakonzya kuswiilila mipailo yamamiliyoni aabantu aciindi comwe, alimwi ulamvwa mipailo yabo kunyina makani amwaambo uubelesyegwa. Ciindi naswiilila mipailo eeyi yoonse, Jehova alimwi inga ulabandika abangelo akubaambila zyakucita. Kutegwa acite zyoonse eezyi, mizeezo ya Jehova amwaambo ngwabelesya zyeelede kuti kazisumpukide kapati kwiinda mizeezo yabantu amyaambo njobaambaula. (Amubale Isaya 55:8, 9.) Aboobo ciindi nabandika abantu,  ulaubya-ubya mulumbe wakwe kutegwa tuumvwe.

³ Mucibalo eeci, tulayiya Jehova mbwabandika abantu munzila iitakatazyi kumvwa. Alimwi tulalanga-langa mbwacinca-cinca nzila mbwabandika kweelana abukkale.

4. (a) Ino Jehova wakabelesya mwaambo nzi kubandika a Musa, Samuele, alimwi a Davida? (b) Ino ntwaambo nzi itujanika mu Bbaibbele?

⁴ Ciindi naakabandika amuntu wakusaanguna, Adamu mumuunda wa Edeni, kuboneka kuti Jehova wakabelesya mwaambo wa Chihebrayo cakaindi. Kumbele, Jehova wakazikubandika abantu mbuli Musa, Samuele, alimwi a Davida. Nokuba kuti bakalemba kubelesya majwi aabo mu Chihebrayo alimwi mundembelo yabo beni, mubwini bakali kulemba mizeezo ya Leza. Bakalemba twaambo twakali kuzwa kuli Jehova lwakwe alimwi bakalemba kujatikizya cilongwe ncobakajisi bantu a Leza kaindi. Mucikozyanyo, Ibbaibbele lilaamba kujatikizya lusyomo lwabo aluyando ndobakajisi kuli Leza alimwi lilaamba kulubizya akutasyomeka kwabo. Twaambo ootu toonse twakalembwa kutegwa swebo tugwasyigwe.—Baroma 15:4.

5. Sena Chihebrayo ngomwaambo ulikke Leza ngwaakabelesya kubandika abantu? Amupandulule.

⁵ Jehova tanaakali kubandika abantu mu Chihebrayo lyoonse pe. Aciindi bana Israyeli nobakaangululwa kuzwa ku Babuloni, bamwi bakali kwaambaula Chiaramu mubuumi bwabo bwabuzuba abuzuba. Ambweni nkakaambo Daniele, Jeremiya, alimwi a Ezara ncobakalembela zibeela zimwi zyamu Bbaibbele mu Chiaramu.—Amubone bupanduluzi buyungizyidwe bwamagwalo aaya: Ezara 4:8; 7:12; alimwi a Jeremiya 10:11.

6. Ino nkaambo nzi Magwalo aa Chihebrayo ncakasandulwidwa mu Chigiriki?

⁶ Mukuya kwaciindi Alekizanda Mupati wakazikuzunda cibeela cipati canyika, aboobo mwaambo wa Chigiriki iwakazyibidwe abantu banji uutegwa Koine ngowazikuba mwaambo iwakali kubelesyegwa mumasi manji. Bama Juda banji bakatalika kukanana Chigiriki, kumane Magwalo aa Chihebrayo akasandululwa mu Chigiriki. Busanduluzi oobu bwiitwa kuti Septuagint. Bwakali busanduluzi bwa Bbaibbele bwakusaanguna alimwi buyandika kapati. Basyaazibwene baamba kuti basanduluzi ibali 72 bakatola lubazu mukubamba Septuagint. * (Amubone bupanduluzi buyungizyidwe.) Bamwi bakali kusandulula bbala abbala kuzwa mu Magwalo aa Chihebrayo, pele bamwi tiibakali kucita oobo. Nokuba boobo, bama Juda a Banakristo ibakali kukanana Chigiriki bakali kusyoma kuti Septuagint lyakali Jwi lya Leza.

7. Ino Jesu wakali kubelesya mwaambo nzi ciindi naakali kuyiisya basikwiiya bakwe?

 ⁷ Ciindi Jesu naakali anyika, kuboneka kuti wakali kwaambaula Chihebrayo. (Johane 19:20; 20:16; Milimo 26:14) Alimwi ambweni wakali kubelesya amabala amwi aa Chiaramu aakali kuvwula kubelesyegwa aciindi eeco. Pele alimwi wakalicizyi Chihebrayo cakaindi icakali kwaambaulwa a Musa alimwi abasinsimi ibakalemba malembe aakali kubalwa muzikombelo mvwiki amvwiki. (Luka 4:17-19; 24:44, 45; Milimo 15:21) Nokuba kuti Chigiriki alimwi a Chilatini zyakali kwaambaulwa muciindi ca Jesu, Ibbaibbele talyaambi naa Jesu awalo wakali kwaambaula myaambo eeyo.

8, 9. Nkaambo nzi Banakristo banji ncobakali kwaambaula Chigiriki, alimwi ino eeci cituyiisya nzi kujatikizya Jehova?

⁸ Basikutobela Jesu bakusaanguna bakali kwaambaula Chihebrayo, pele naakafwa, basikwiiya bakwe bakatalika kwaambaula myaambo iimbi. (Amubale Milimo 6:1.) Makani mabotu naakali kuyaabumwaigwa, Banakristo banji bakali kwaambaula Chigiriki muciindi ca Chihebrayo. Akaambo kakuti Chigiriki ngomwaambo wakadumide, mabbuku aa Matayo, Marko, Luka, alimwi a Johane akamwaigwa mu Chigiriki. * (Amubone bupanduluzi buyungizyidwe.) Kuyungizya waawo, magwalo aamwaapostolo Paulo amabbuku amwi aamu Bbaibbele akalembwa mu Chigiriki.

⁹ Cilakkomanisya kuzyiba kuti ciindi balembi ba Magwalo aa Chigiriki nobakali kuzubulula kuzwa mu Magwalo aa Chihebrayo, kanji-kanji bakali kubelesya Septuagint. Zimwi ziindi, kuzubulula ooku kwakali kwiindana asyoonto buyo amabala aa Chihebrayo aakusaanguna. Aboobo mulimo wabasanduluzi batalondekede wakaba cibeela ca Bbaibbele ndyotujisi mazuba aano. Eeci cituyiisya kuti Jehova talangi mwaambo umwi naa zilengwa zyabantu bamwi kuba kabotu kwiinda zyabamwi.—Amubale Milimo 10:34.

10. Ino ncinzi ncotwaiya kuli Jehova kujatikizya mbwabandika abantu?

¹⁰ Twaiya kuti Jehova ulabandika abantu kweelana abukkale. Tatulangilwi kuti mane buya tubandike mwaambo ulibedelede kutegwa tumuzyibe Leza alimwi akuzyiba makanze aakwe. (Amubale Zekariya 8:23; Ciyubunuzyo 7:9, 10.) Alimwi twaiya kuti Jehova wakasololela basikulemba Bbaibbele, pele wakabazumizya kulemba mizeezo yakwe mumajwi aabo.

11. Nokuba kuti bantu babelesya myaambo minji iindene-indene, nkaambo nzi ncolitali penzi kuli Jehova?

¹¹ Bantu balabelesya myaambo minji, pele eeli talili penzi kuli Jehova. Ino tuzyiba buti? Ibbaibbele lijisi buyo majwi masyoonto aa Jesu alembedwe mumwaambo wini ngwaakali kubelesya. (Matayo 27:46; Marko 5:41; 7:34; 14:36) Pele Jehova wakabona  kuti mulumbe wa Jesu walembwa alimwi akusandululwa mu Chigiriki, alimwi mukuya kwaciindi, amumyaambo iimbi. Alimwi, akaambo kakuti Ijwi lya Leza lyakakkopwa ziindi zinji abama Juda alimwi a Banakristo, mulumbe wa Leza wakakwabililwa. Makkopi aaya kumane akasandululwa mumyaambo minji. Nokwakainda myaka iitandila ku 400 kuzwa ciindi Kristo naakali kupona, John Chrysostom wakaamba kuti njiisyo zya Jesu zyakasandululwa mumyaambo yakali kukananwa abantu baku Siriya, Egepita, India, Persia, Etiopiya alimwi ayabantu bambi banji.

12. Ino Bbaibbele lyakakazyigwa munzila iili buti?

¹² Kuzwa kaindi, Bbaibbele lyalikukazyigwa kubikkilizya akukazya baabo ibakali kulisandulula akulimwaya. Nokwakainda myaka iibalilwa ku 300 kuzwa ciindi naakazyalwa Jesu, Muleli Mupati waba Roma Diocletian wakalailila kuti ma Bbaibbele oonse anyonyoonwe. Nokwakainda myaka iibalilwa ku 1,200, William Tyndale wakatalika kusandulula Bbaibbele mu Chingisi. Wakaamba kuti ikuti Leza wamuzumizya kupona kwaciindi cilamfwu, inga wayanda kuti mubelesi afaamu alizyibe kabotu Bbaibbele kwiinda amupaizi. Akaambo kakupenzyegwa, Tyndale wakatija mu England kutegwa akasandulule akusimba Bbaibbele. Nokuba kuti basizikombelo bakasoleka kwaaumpa ma Bbaibbele oonse ngobakali kukonzya kujana, busanduluzi bwa Tyndale bwakamwaigwa kubantu banji. Mukuya kwaciindi, Tyndale bakamusina akumuumpa acisamu. Pele Bbaibbele ndyaakasandulula lyakafwutuka kukuzya kwabasizikombelo, aboobo lyakabelesyegwa mukulibambila kusandulula Bbaibbele litegwa King James Version.—Amubale 2 Timoteyo 2:9.

13. Ino butondezya nzi buvwuntauzyi bwamalembe aamu Bbaibbele aakaindi aakalembwa aamanza?

¹³ Masimpe kuti ma Bbaibbele amwi aakaindi, alijisi bulubizi busyoonto alimwi akwiimpana. Nokuba boobo, basyaazibwene mukwiiya zyamu Bbaibbele cakukkazyika moyo bakabala malembe aaya aakaindi, zibeela zyamalembe aakaindi alimwi abusanduluzi bwakaindi bwa Bbaibbele. Nobakamana kwaayezyanisya, bakajana kuti kwakali buyo tupango tusyoonto tujisi bulubizi busyoonto alimwi bulubizi oobu talili penzi pati pe. Pele mulumbe wamu Bbaibbele taucincide pe. Buvwuntauzyi mbuli boobu bupa kuti basikwiiya Bbaibbele basyomeka basinizye kuti Bbaibbele ndyobajisi mazuba aano ndi Jwi lya Jehova ilyakasololelwa amuuya. —Isaya 40:8. * (Amubone bupanduluzi buyungizyidwe.)

14. Ino Bbaibbele lyamwaigwa mumyaambo yongaye mazuba aano?

¹⁴ Nokuba kuti Bbaibbele lyakakazyigwa ziindi zinji, lyasandululwa mumyaambo iinda ku 2,800. Kunyina bbuku ilyamwaigwa akusandululwa mbuli Bbaibbele mazuba aano. Nokuba kuti bantu banji tabajisi lusyomo muli Leza, Ijwi lyakwe lyazumanana kuba bbuku limwaigwa kapati kwiinda bbuku lili lyoonse kuzwa kaindi. Nokuba kuti busanduluzi bumwi bwama Bbaibbele bulakatazya kubala naa tabuluzi kabotu, bunji bwama Bbaibbele aaya ajisi mulumbe uupa bulangizi alimwi abuumi butamani.

15. (a) Kuzwa mu 1919, ino kwaba kucinca kuli buti kumabbuku eesu aamba zyamu Bbaibbele? (b) Ino nkaambo nzi mabbuku eesu ncaasaanguna kulembelwa mu Chingisi?

¹⁵ Mu 1919, kabunga kaniini kabasikwiiya Bbaibbele kakabikkwa kuba “muzike uusyomeka alimwi uucenjede.” Aciindi eeco, muzike uusyomeka wakali kubandika abantu ba Leza kanji-kanji mu Chingisi. (Matayo 24:45) Pele mazuba aano, mabbuku aamba zyamu Bbaibbele alalembwa mumyaambo iinda ku 700. Mbuli mbobakali kubelesya Chigiriki bantu banji kaindi, Chingisi lino ngomwaambo uubelesyegwa mumakwebo, mumakani aalwiiyo alimwi ulizyibidwe abantu banji. Aboobo mabbuku eesu asaanguna kulembwa mu Chingisi mpoonya alasandululwa mumyaambo iimbi.

16, 17. (a) Ino bantu ba Leza bakali kuyandika nzi? (b) Ino ncobakali kuyandika cakazuzikizyigwa buti? (c) Ino Mukwesu Knorr wakali kulombozya nzi?

¹⁶ Mabbuku eesu oonse ayeeme a Bbaibbele. Kusaanguna, bantu ba Leza bakali kubelesya Bbaibbele lya King James Version, lyalo ilyakamana kusandululwa mu 1611. Nokuba boobo, lyakalembedwe mumwaambo wakaindi alimwi iwakali kukatazya kumvwa. Izina lya Leza lyakali kujanika buyo ziindi zisyoonto, nokuba kuti mumalembe aakaindi lyakali kujanika zyuulu zinji. Bbaibbele eeli alimwi lyakajisi bulubizi musanduluzi bwandilyo alimwi lyakajisi tupango tuyungizyidwe twatakali kujanika mumalembe aakaindi. Ma Bbaibbele amwi aamu Chingisi akajisi bulubizi bukozyene aboobu.

¹⁷ Cilisalede kuti bantu ba Leza bakali kuyandika busanduluzi bwa Bbaibbele ibuluzi  alimwi butakatazyi kumvwa. Aboobo New World Bible Translation Committee yakabambwa, alimwi bakwesu ibakali mukkomiti eeyi bakagusya zibeela zya Bbaibbele kuzwa mu 1950 kusikila mu 1960. Cibeela cakusaanguna akati kazibeela zili cisambomwe cakagusyigwa amuswaangano wacooko mu August 2, 1950. Amuswaangano wacooko ooyu, Mukwesu Knorr wakaamba kuti bantu ba Leza bakali kuyandika busanduluzi bwa Bbaibbele bupya, ibuluzi, ibutakatazyi kumvwa alimwi busanduluzi ibwakali kuyoobagwasya kwiiya kasimpe munzila iilimvwisya. Bakali kuyandika busanduluzi bwa Bbaibbele bukatazyi kubala alimwi butakatazyi kumvwa mbuli mbwaakabede malembe aakusaanguna aabasikwiiya ba Kristo. Kulombozya kwa Mukwesu Knorr kwakali kwakuti Bbaibbele lya Busanduluzi Bwanyika Mpya ligwasye mamiliyoni aabantu kuzyiba Jehova.

18. Ino ncinzi cagwasya mumulimo wakusandulula Bbaibbele?

¹⁸ Kulombozya kwa Mukwesu Knorr kwakazuzikizyigwa mu 1963. Busanduluzi bwa Nyika Mpya bwa Magwalo aa Banakilisito aa Chigiliki muci Dutch, French, German, Italian, Portuguese, alimwi amuci Spanish akamwaigwa. Mu 1989, Kabunga Keendelezya ka Bakamboni ba Jehova kakabamba dipatimenti mpya kumaofesi mapati kutegwa kakagwasyilizya basanduluzi ba Bbaibbele. Mpoonya mu 2005, kwakazumizyigwa kuti kusandululwe Bbaibbele mumyaambo eeyo Ngazi Yamulindizi moisandululwa. Akaambo kaceeci, Bbaibbele lya Busanduluzi Bwanyika Mpya nkolili lyoonse mbolizulwa naa muzibeela mumyaambo iinda ku 130.

19. Ino ncintu nzi cipati cakacitika mu 2013, alimwi ncinzi ncotuyakwiiya mucibalo citobela?

¹⁹ Mwaambo wa Chingisi wacinca kuzwa ciindi Bbaibbele lya Busanduluzi Bwanyika Mpya nolyakagusyigwa, aboobo kwakali kuyandika kuti lilembululwe. Kumamanino aamvwiki mu October 5, 2013, baswiilizi basika ku 1,413,676 muzisi zili 31 bakajanika naa kuswiilila kumuswaangano waamwaka wa Watch Tower Bible and Tract Society of Pennsylvania. Mukwesu wamu Kabunga Keendelezya wakaambilizya kugusyigwa kwa Bbaibbele lya Busanduluzi Bwanyika Mpya ilyakalembululwa mu Chingisi. Baswiilizi bakakkomana, alimwi bunji bwabo bakalila nobakatambula Bbaibbele lipya lyakalembululwa. Baambi nobakali kubala tupango mu Bbaibbele eeli lyakalembululwa, cakalibonya kubaswiilizi boonse kuti Bbaibbele eeli tiilyakali kukatazya kubala alimwi akumvwa. Mucibalo citobela, tuyakwiiya zinji kujatikizya Bbaibbele eeli lyakalembululwa, alimwi ambolisandululwa mumyaambo iimbi.