1, 2. Nkaambo nzi Bbaibbele ncolikozyanisya nguzu nzyotujisi zyakwaambaula kumulilo?

MU 1871, mulilo wakatalika muzisaka zili ku Wisconsin, mucisi ca United States. Cakufwambaana wakayandilila akuumpa masamu aasika ku 2 bbiliyoni. Bantu bainda ku 1,200 bakafwa. Mulilo ooyo wakajaya bantu banji kwiinda bakafwa mumulilo uuli woonse mucisi ca United States. Kulibonya kuti nsasi zyamulilo kuzwa kucitima icakali kwiinda mucisaka eeci nzezyakatalisya mulilo mupati ooyo. Eeci cituyeezya kapango kamu Bbaibbele ikaamba kuti: “Amubone, takaliceeli kaka kalilo ikaumpa syokwe pati!” (Jakobo 3:5) Nkaambo nzi mulembi wa Bbaibbele Jakobo ncaakaambila boobu?

² Wakaamba kuti: “Mulaka uli mbuli mulilo.” (Jakobo 3:6) “Mulaka” caamba nguzu nzyotujisi zyakwaambaula. Alimwi mbubwenya mbuli mulilo, nzyotwaambaula zilakonzya kuleta mapenzi kapati. Majwi eesu alakonzya kubajatikizya kapati bamwi. Mane buya Bbaibbele litwaambila kuti nzyotwaamba zilakonzya kupa buumi naa kuleta lufwu kubantu. (Tusimpi 18:21) Pele sena eeci caamba kuti tatweelede kwaamba cili coonse akaambo buyo kakuti tulakonzya kwaamba cintu cimwi citali kabotu? Peepe.  Tatukonzyi kuleka kuubelesya mulilo akaambo buyo kakuti tulakonzya kupya. Muciindi caboobo, tulabikkila maano mbotuubelesya. Mucikozyanyo, tulakonzya kubelesya mulilo kujika cakulya, kulikasaazya, alimwi akuti tube amumuni. Mbubwenya buyo, ikuti katubikkila maano mbotwaambaula, tulakonzya kucibelesya cipego eeci kulemeka Jehova akugwasya bamwi.—Intembauzyo 19:14.

3. Nzintu nzi zyotatwe iziyootugwasya kukulwaizya bamwi ciindi notwaambaula?

³ Jehova wakatulenga munzila yakuti katukonzya kwaambila bamwi nzyotuyeeya ambotulimvwa, kwiinda mukwaambaula naa kubelesya mwaambo wakutambaika. Aboobo mbuti mbotukonzya kubelesya cipego eeci citaliboteli kukulwaizya bamwi? (Amubale Jakobo 3:9, 10.) Tweelede kuzyiba notweelede kwaambaula, ncotweelede kwaamba, alimwi ambotweelede kucaamba.

4. Ino ndilili notweelede kuumuna buyo?

⁴ Zimwi ziindi cili kabotu kuumuna buyo. Bbaibbele lyaamba kuti kuli “ciindi cakuumuna.” (Mukambausi 3:7) Mucikozyanyo, tulaumuna ciindi bamwi nobaambaula kutegwa tutondezye kuti tulabalemeka. (Jobu 6:24) Kuyungizya waawo, tatwaambi zintu zyamaseseke eezyo bantu bamwi nzyobateelede kuzyiba. (Tusimpi 20:19) Alimwi ciindi muntu umwi naatunyemya, ncabusongo kukkazyika moyo akutaamba cintu cili coonse.—Intembauzyo 4:4.

5. Mbuti mbotukonzya kumutondezya Jehova kuti tulamulumba akaambo kakutupa cipego cakwaambaula?

⁵ Pele alimwi kuli ziindi nocili kabotu kwaambaula. (Mukambausi 3:7) Kuli ciindi cakutembaula Jehova, cakukulwaizya bamwi, cakwaamba mbotulimvwa, alimwi acakwaambila bamwi nzyotuyanda. (Intembauzyo 51:15) Ikuti cipego cakwaambaula twacibelesya munzila eeyi, tutondezya Jehova kuti tulamulumba akaambo kakutupa cipego eeci. Kayi, ciindi mweenzuma naatupa cipego citaliboteli, tuyanda kucibelesya kabotu kapati.

6. Nkaambo nzi ncociyandika kapati kusala ciindi ceelede cakwaambaula?

⁶ Nkaambo nzi ncociyandika kusala ciindi ceelede cakwaambaula? Lugwalo lwa Tusimpi 25:11 lwaamba kuti: “Mbuli maapele aangolida mumbale zyansiliva mbolibede jwi lyaambwa aciindi ceelede.” Maapele aangolida aleebeka, pele alakonzya kweebeka kwiinda ciindi naabikkidwe kumbele lyacintu cansiliva. Mbubwenya buyo, tulakonzya katujisi makani mabotu aakwaambila muntu umwi. Pele ikuti naa twasala ciindi cibotu cakwaambaula, tulakonzya kumugwasya kapati muntu ooyo. Mbuti mbotukonzya kucita boobu?

7, 8. Mbuti bakwesu ku Japan mbobakaiya cikozyanyo ca Jesu?

⁷ Ikuti naa twaambaula aciindi citeelede, bantu tabakonzyi kucimvwisya naa kucizumina ncotwaamba. (Amubale Tusimpi 15:23.) Mucikozyanyo, mu March 2011 muzuzumo wanyika alimwi akupaya kwamaanzi zyakanyonyoona minzi minji cisi ca Japan nkocili kujwe. Bantu bainda ku 15,000 bakafwa. Nokuba kuti bunji bwa Bakamboni ba Jehova bakafwidwa banamukwasyi abalongwe, bakali kuyanda kubelesya Bbaibbele kutegwa bagwasye bamwi ibakali mubukkale bukozyenye. Pele bakalizyi kuti bunji bwabantu aabo bakali ba Bbuda alimwi akuti nzisyoonto nzyobakazyi kujatikizya Bbaibbele. Aboobo muciindi cakubaambila aciindi eeco kujatikizya bubuke, bakwesu bakabaumbulizya alimwi akupandulula ikaambo zintu zibyaabi zili boobo ncozibacitikila bantu babotu.

⁸ Bakwesu aabo bakaiya Jesu. Wakalizyi ciindi naakeelede kuumuna, alimwi aciindi naakeelede  kwaambaula. (Johane 18:33-37; 19:8-11) Alimwi wakali kulindila ciindi ceelede kutegwa ayiisye basikwiiya bakwe zintu zimwi. (Johane 16:12) Bakwesu ku Japan bakalindila ciindi ceelede kutegwa baambile bantu izyabubuke. Nokwakainda myaka yobilo acisela kuzwa ciindi maanzi naakapaya, bakaabila bantu katulakiti kakuti Sena Bafwide Balakonzya Kupona Alimwi? Bantu banji bakakabweza katulakiti aaka alimwi bakaumbulizyigwa amulumbe ngobakali kubala. Andiswe tweelede kububikkila maano bukkale alimwi anzyobasyoma bantu mucilawo cesu kutegwa tujane ciindi ceelede cakwaambaula ambabo.

9. Ino muubukkale nzi bumbi motweelede kulindila ciindi ceelede cakwaambaula?

⁹ Ino muubukkale nzi bumbi motweelede kulindila ciindi ceelede cakwaambaula? Ambweni muntu umwi waamba cintu cimwi icatunyemya. Muciindi cakwiingula mpoonya-mpoonya akwaamba cintu cimwi cabufwubafwuba, inga twacita cabusongo kwiima akulibuzya kuti: ‘Sena wacita caali kwaambaula munzila iitali kabotu? Sena cilayandika ncobeni kuti ndaambaule anguwe kujatikizya majwi ngaamba?’ Inga cainda kubota kuumuna buyo. Pele ikuti kakuli kaambo kabotu ncotweelede kwaambaula anguwe, tweelede kulindila kusikila moyo wakkala. (Amubale Tusimpi 15:28.) Naa ambweni tuyanda kukulwaizya banamukwasyi ibatali Bakamboni kuti bamuzyibe Jehova. Tweelede kukkazyika moyo, kuyeeyesya ncotuyanda kwaamba, alimwi akujana ciindi ceelede nobakonzya kuswiilila nzyotuyanda kwaamba.

10. (a) Nkaambo nzi ncotweelede kubikkila maano kusala nzyotwaamba? (b) Nkwaambaula kuli buti nkotweelede kutantamuka?

¹⁰ Nzyotwaamba zilakonzya kupa bamwi kuti balimvwe kabotu naa kuti babijilwe kapati. (Amubale Tusimpi 12:18.) Bantu banji munyika ya Saatani babelesya ‘majwi mabi’ aali mbuli “mivwi” naa “panga” akaambo kakuti bayanda kupa kuti bamwi cibacise naa balimvwe kubijilwa. (Intembauzyo 64:3) Bantu banji baiya kwaambaula munzila eeyi kuzwa kumafilimu naa kumapulogilamu aacipekupeku ngobalangilila. Pele Banakristo tabakonzyi kwaamba majwi aali woonse mabi alimwi aatali kabotu, nomuba munzila yamasesya. Kwaamba munzila iisesya nkubotu alimwi kulakonzya kupa nzyotwaamba kukondelezya kapati. Pele tatweelede kubelesya majwi aakunonga, nkokuti kwaamba zintu zimwi zikonzya kubajazya nsoni bamwi naa kubasampaula kutegwa tusesye bamwi. Bbaibbele lilailila Banakristo kutabelesya “majwi aakusampaula.” Alimwi lyaamba kuti: “Kutazwi jwi libolede neliba lyomwe mukanwa lyanu, pele buyo ijwi lili kabotu kukuyaka bamwi kweelana abukkale aciindi eeco, kutegwa libe jwi likonzya kubagwasya aabo baswiilila.”—Baefeso 4:29, 31.

11. Ncinzi cikonzya kutugwasya kusala majwi aayelede?

¹¹ Jesu wakayiisya kuti “mulomo waamba zizwide mumoyo.” (Matayo 12:34) Eeci caamba kuti zintu nzyotwaamba zilakonzya kutondezya bwini mbotulimvwa. Aboobo, ikuti naa katubayanda bantu alimwi katubabikkila maano ncobeni, tuyoosala mabala aayelede ngotweelede kubelesya notwaambaula ambabo. Zintu nzyotwaamba ziyoobakulwaizya akubayaka.

12. Ino ncinzi cimbi cikonzya kutugwasya kusala majwi aayelede?

 ¹² Kuyandika kusolekesya kutegwa tujane majwi aayelede aakwaamba. Nokuba kuti Mwami Solomoni wakali musongo, “wakali kukkala ansi kuyeeya akulomya kuvwuntauzya makani” kutegwa nzyaakali kulemba kaziluzi alimwi kazikondelezya kubala. (Mukambausi 12:9, 10) Ncinzi cikonzya kutugwasya kuzyiba ncotweelede kwaamba? Tulakonzya kulanga mu Bbaibbele alimwi amabbuku eesu kutegwa tujane nzila zipya mbotweelede kwaambaula. Tulakonzya kwiiya ncaamba mabala amwi ngotutazyi kabotu. Alimwi tulakonzya kwiiya cikozyanyo ca Jesu kutegwa twiiye mbotweelede kwaambaula munzila iiyoogwasya bamwi. Jesu wakalizyi cini ncaakeelede kwaamba akaambo kakuti Jehova wakamuyiisya ‘mbwakonzya kuvwiila amajwi mabotu.’ (Isaya 50:4) Alimwi cilayandika kapati kuyeeya majwi eesu mbwaayoobajatikizya bamwi. (Jakobo 1:19) Tulakonzya kulibuzya kuti: ‘Ikuti naa ndaamba boobu, sena muntu uumbi ulacimvwa ncondisola kumwaambila? Ino ulalimvwa buti?’

13. Nkaambo nzi ncotweelede kwaambaula munzila iitakatazyi kumvwa?

¹³ Kulila kwamyeembo kwakali kubelesyegwa mu Israyeli kuzyibya bantu ciyandika kucita. Kulila kumwi kwamweembo kwakali kwaamba kuti bantu beelede kubungana antoomwe. Kulila kumbi kwakali kwaamba kuti basikalumamba beelede kusaala. Amuyeeye buyo cakali kukonzya kucitika kuli basikalumamba ikuti naa kulila kwamweembo tiikwalimvwisya kabotu! Bbaibbele likozyanisya kulila kubotu kwamweembo kumajwi aatakatazyi kumvwa. Ikuti naa katutazipandululi zintu munzila iilimvwisya, bantu balakonzya kunyongana naa kusyoma zintu zitali zyamasimpe. Nokuba kuti tuyanda kwaamba munzila iilimvwisya, tweelede kucenjela kutegwa nzyotwaamba katuzyaamba cabulemu ikutali cakusampaula.—Amubale 1 Bakorinto 14:8, 9.

14. Ncikozyanyo nzi icitondezya kuti Jesu wakabandika munzila iitakatazyi kumvwa?

¹⁴ Zintu Jesu nzyaakaamba kulugwalo lwa Matayo zyaandaano 5 kusikila ku 7 nzikozyanyo zibotu zijatikizya Jesu mbwaakasala majwi aatakatazyi kumvwa. Mumakani ngaakapa, tanaakasola kukondelezya bantu kwiinda mukubelesya mabala aakatazya kumvwa naa aatayandiki. Alimwi tanaakaamba zintu izyakali kukonzya kubanyemya bamwi. Muciindi caboobo, wakabelesya majwi maubauba alimwi aatakatazyi kumvwa kutegwa abasike amoyo bantu ibakali kumuswiilila. Mucikozyanyo, Jesu wakali kuyanda kubakkazyika myoyo basikwiiya kuti tiibakali kuyandika kulibilika kujatikizya zyakulya zyabuzuba abuzuba. Aboobo wakabapandulwida kuti Jehova lyoonse ulabasanina bayuni. Mpoonya wakababuzya kuti: “Sena tamuyandiki kwiinda mbabo?” (Matayo 6:26) Kwiinda mukubelesya majwi maubauba aaya, Jesu wakabagwasya kumvwisya ciiyo ciyandika kapati alimwi bakakulwaizyigwa.

15. Nkaambo nzi ncotweelede kwaambaula munzila yaluzyalo?

¹⁵ Tweelede kubikkila maano kapati mbotwaambaula abantu mbubwenya mbotubikkila maano kuzintu nzyotwaamba. Bantu bakali kukkomana kuswiilila Jesu naakali kwaambaula akaambo kakuti wakali kwaambaula ‘kabotu,’ naa munzila yaluzyalo. (Luka 4:22) Ciindi notwaambaula munzila yaluzyalo, bantu balalangilwa kukkomana kuswiilila kulindiswe alimwi akuzumina nzyotwaamba. (Tusimpi 25:15) Tuyoocikonzya kubandika abamwi munzila yaluzyalo ikuti naa katubalemeka alimwi akubabikkila  maano mbobalimvwa. Eeci ncaakacita Jesu. Mucikozyanyo, ciindi naakabona nkamu kaisolekesya kuswiilila nzyaakali kwaamba, wakakkomana kapati kuba aciindi cakuba ambabo alimwi akubayiisya. (Marko 6:34) Nociba ciindi bantu nobakali kumutukila, Jesu kunyina naakatalika kutukila awalo.—1 Petro 2:23.

16, 17. (a) Mbuti mbotukonzya kumwiiya Jesu ciindi notwaambaula abanamukwasyi alimwi abalongwe? (Amubone cifwanikiso icili kumatalikilo aacibalo.) (b) Mbubotu nzi bwakajanika ciindi muzyali umwi naakaambaula munzila yaluzyalo?

¹⁶ Nokuba kuti tulabayanda bamukwasyi alimwi abalongwe, tulakonzya kwaambaula kulimbabo munzila iitali kabotu akaambo kakuti tulibazyi kabotu. Tulakonzya kuyeeya kuti tatweelede kubikkila maano kujatikizya mbotwaambaula kulimbabo. Pele Jesu kunyina naakaambaula munzila iitali kabotu kubalongwe bakwe. Ciindi bamwi akati kabo nobakakazyanya kujatikizya iwakali mupati, wakabalaya munzila yaluzyalo alimwi akubelesya cikozyanyo camwana musyoonto kutegwa abagwasye kucinca mbobakali kuyeeya. (Marko 9:33-37) Baalu balakonzya kwiiya cikozyanyo ca Jesu kwiinda mukulaya bamwi munzila yalubomba.—Bagalatiya 6:1.

¹⁷ Nociba ciindi umwi muntu naamba cintu cimwi icatupa kubijilwa, tulakonzya kucita kabotu kapati kwaambaula munzila yaluzyalo. (Tusimpi 15:1) Mucikozyanyo, mukubusi umwi musankwa, imwana wamukaintu uuli alikke wakali kucita zintu zibi kumwi kalicengeezya kubelekela Jehova. Mucizyi umwi mumbungano wakeetezyegwa abanyina musankwa ooyu akubaambila kuti: “Cabija kuti mwaalilwa kuyiisya mwanaanu.” Banyina musankwa ooyo bakatungumana kuyeeya mpoonya bakati: “Masimpe kuti lino zintu tazyeendi kabotu, pele mulimo wakuyiisya mwana ooyu ucizumanana. Mukabandike andime yaakwiinda Amagedoni; mpoonya tuyoozyiba ncobeni naa ndaalilwa.” Akaambo kakuti banyina mwana ooyo bakakkazyika moyo alimwi bakatondezya luzyalo kumucizyi ooyu, bakazumanana kuba balongwe. Kuyungizya waawo, mwana musankwa ooyo wakamvwa mbobakaamba banyina alimwi wakabona kuti bakacili alusyomo lwakuti ulakonzya kucinca. Aboobo wakacileka kuyanzana abalongwe babi, wakabbapatizyigwa mpoonya mukuya kwaciindi wakaakubeleka ku Bbeteli. Kufwumbwa naa tubandika abakwesu, bamukwasyi, naa bantu mbotutazyi, majwi eesu ayelede kuti “kaakondelezya lyoonse, aalweezyedwe kabotu amunyo.”—Bakolose 4:6.

18. Mbuti mbotunga twaiya cikozyanyo ca Jesu munzila njotwaambaula?

¹⁸ Coolwe ncotujisi cakwaambila bamwi nzyotuyeeya alimwi ambotulimvwa masimpe ncipego citaliboteli kuzwa kuli Jehova. Ikuti naa twatobela cikozyanyo ca Jesu, tuyoosala ciindi ceelede cakwaambaula, tuyoobikkila maano kuzintu nzyotwaamba, alimwi lyoonse tunoosolekesya kutondezya luzyalo. Aboobo atubelesye majwi eesu kukulwaizya bamwi alimwi akukkomanisya Jehova.