Zyoonse Nzyaamba Jehova Zilazuzikizyigwa

“N DIME Leza, taakwe umbi. Ndime Leza, taakwe ngutweelene awe. Ndime uulungulula makani aamamanino nikuba kuzwa kumatalikilo, uumulwiida makani naatana kuba.” (Isaya 46:9, 10) Oobu mbwaamba Jehova, ooyo uukonzya kwaamba zyakumbele cakutalubizya.

Kutacikonzya kwamuntu kwaamba zikonzya kucitika kumbele cakutalubizya kulizibidwe kabotu. Akaambo kakuti Ibbaibbele ndibbuku lyabusinsimi, bantu boonse bayandaula kasimpe beelede kukulwaizyigwa kulilanga-langa akubona naa ngu Leza wakalyaanza. Atulange-lange businsimi bumwi bwamu Bbaibbele bwazuzikizyigwa kale.

Bantu Bakaindi Mbobakali Kupona

Leza wakasinsima kuti Edomu, Moabu a Amoni ziyaakunyonyoonwa cakumaniina. (Jeremiya 48:42; 49:17, 18; 51:24-26; Obadiya 8, 18; Zefaniya 2:8, 9) Ikuloba kwamisyobo yabantu aaba kutondezya kusyomeka kwa Jwi lya Leza lyabusinsimi.

Masimpe, muntu umwi ulakonzya kwaamba kuti muntu uuli woonse ulakonzya kwaambila limwi kuti musyobo wabantu, nokuba kuti ulijisi nguzu, uyoonyonyoonwa cakumaniina. Pele kukazya kwamusyobo ooyo kubapa kuunduluzya kaambo kayandika kakuti Ibbaibbele lyakaamba makani manji. Mucikozyanyo, lyakaamba munzi wa Babuloni mbuwakali kuyoonyonyoonwa. Ibaibbele lyakaambila limwi kuti munzi ooyu uyoozundwa aba Mediya alimwi basikalumamba bakali kuyoosololelwa a Koresi alimwi akuti milonga yakali kubakwabilila iyooyuma.—Isaya 13:17-19; 44:27–45:1.

Talili lyoonse Ibbaibbele nolyakali kwaambila limwi kuti musyobo naa bantu boonse bayoozundwa bayooloba. Mukwiimpana, naakali kwaamba kujatikizya kunyonyoonwa kwa Jerusalemu abana Babuloni, Leza wakaamba kuti munzi ooyo uyaakuyakululwa nokuba kuti bana Babuloni bakajisi mulawo wakali kukasya kwaangulula bazike babo. (Jeremiya 24:4-7; 29:10; 30:18, 19) Eeci cakazuzikizyigwa, alimwi luzubo lwaba Juda lwakazumanana kuba bantu baindene abantu bamwi kusikila sunu.

Kuyungizya waawo, Jehova wakaambila limwi kuti Egepita uyoonyonyoonwa acisi cijisi nguzu pele “kusule lyayaaya cisi ca-Egepita ciyookalwa mbubonya mbuli mumazuba aakalekale.”  Mukuya kwaciindi cisi eeco “ciyooba ciniini buyo.” (Jeremiya 46:25, 26; Ezekiele 29:14, 15) Eeci acalo cakazuzikizyigwa. Kunze lyaboobo, Jehova wakaamba kuti cisi ca Gilisi ciyoonyonyoonwa acisi canguzu, pele kunyina naakaamba kuti musyobo ooyu uyakumaniina. Ino ncinzi ncotwiiya kubantu bakali kupona kaindi Jehova mbaakaamba kuti bakali kuyoonyonyoonwa abaabo mbaatakaamba kuti bayoonyonyoonwa cakumaniina? Ciiyo ncotwiiya ncakuti, Ijwi lya Leza lilijisi businsimi busyomeka.

Twaambo Tukkomanisya

Kweelana ambokwaambwa kale atala aawa, Jehova wakaamba twaambo tuji kujatikizya kunyonyoonwa kwa Babuloni. Mbubwenya buyo, naakali kwaamba kunyonyoonwa kwa Turo, ibbuku lya Ezekiele lyakaamba kuti mabwe, zisamu, abulongo bwazyo, “bayoozisowa mumaanzi.” (Ezekiele 26:4, 5, 12) Businsimi oobu bwakazuzikizyigwa mu 332 B.C.E. ciindi basikalumamba ba Alesandro Mupati nibakazunda cibeela cipati camunzi wa Turo akubamba nzila iitozya kunsumbu yamunzi ooyu, ayalo nsumbu eeyi yakanyonyoonwa.

Businsimi bwakalembwa ku Daniele 8:5-8, 21, 22 a 11:3, 4 abwalo bwakaamba makani aakkomanisya kujatikizya “mwami waku Gilisi” singuzu. Mweendelezi ooyu wakali kuyoojaigwa kacijisi nguzu zyakweendelezya alimwi bwami bwakwe bwakali kuyooandanizyigwa muzibeela zyone pele tiibwakapegwa kubana bakwe. Nokwakainda myaka iinda ku 200 businsimi oobu kabulembedwe kale, Alesandro Mupati wakazikuba mwami ooyo singuzu. Makani akaindi atwaambila kuti wakafwa lufwu lwakutayeeyela alimwi bwami bwakwe mukuya kwaciindi bwakapegwa kubapati babasikalumamba bakwe bone ikutali bana bakwe.

Basikukazya baamba kuti businsimi oobu bweelede kuti bwakalembwa kazicitikide kale zintu eezyo. Pele, amubone alimwi zilembedwe atala mucibalo cabbuku lya Daniele. Ikuti twazilanga munzila yabusinsimi, bupanduluzi buli  mumo buliluzi. Pele ikuti twazilanga munzila yamakani aakaindi ayeeyelwa kuti mbusinsimi, nkokuti tazyeendelani anzyobaamba. Ikuti sikwaamba zyakubeja wakali kupona kafwide kale Alesandro wakali kusola kukkomanisya basikubala abusinsimi bwakubeja, nkaambo nzi ncaatakaamba kaambo kakuti mbwaakafwida buyo Alesandro, bana bakwe bobilo bakasola kukkazikizya bwami bwabo pele bakajaigwa? Nkaambo nzi ncaatakaambila kuti kwakeelede kwiinda myaka minji basikalumamba bone kabatanalibikka muzibeela ziindene-indene zyabwami bwa Alesandro? Aboobo, nkaambo nzi ncaatakaamba mazina amwami mupati abasikulumamba bakwe bone?

Ikwaamba kuti businsimi bwamu Bbaibbele bwakalembwa kazicitikide kale zintu zyakaambwa kwali kusyomwa kuzwa kaindi abantu baamba kuti tacikonzyeki kwaamba zyakumbele nokuba kuti tabajisi bumboni kutwaambo ntobaamba. Akaambo kakuti tabazumini kuti Bbaibbele ndi Jwi lya Leza, balilisungwide kupandulula zyoonse kweelana akuyeeya kwabuntu. Nokuba boobo, Leza cabusongo wakalemba businsimi buyandika kutegwa atondezye kuti ngosikwaanza wabusinsimi bwamu Bbaibbele. *

Businsimi bwamu Bbaibbele bulakonzya kuyumya lusyomo lwanu ikuti kamuba aciindi cakukkala ansi kuyeeya businsimi akubona mbobwakazuzikizyigwa. Ino mulekela nzi kwiiya businsimi bwamu Bbaibbele? Maccaati aali amapeeji 343 kusika ku 346 aamubbuku lya “All Scripture Is Inspired of God and Beneficial” alakonzya kumugwasya mumakani aaya. * Ikuti mwatobela nzila eeyi, amuucite mulimo ooyu kamujisi makanze aakuyumya lusyomo lwanu. Mutabindi kubala buyo zilembedwe. Muciindi caboobo, amukkale ansi kuyeeya kaambo kamasimpe kakuti, cili coonse Jehova ncaamba cilacitika ncobeni.

Bupanduluzi buyungizidwe

Kabbokesi/[Cifwanikiso icili apeeji 24]

NJIISYO ZIGWASYA MUBUUMI

Ngooyu aumwi muzeezo ngomweelede kukkalila ansi kuyeeya. Leza iwakaamba kabotu makani aakubuka akuwa kwabeendelezi bamucisi alimwi Nguupa njiisyo zyamu Bbaibbele zitugwasya mubuumi. Nzyeezyi njiisyo zimwi:

Utebula eco ncobyala.—Ba-Galatiya 6:7.

Kupa kuli coolwe kwiinda kupegwa.—Incito 20:35.

Tulakonzya kukkomana ikuti katubikkila maano kuzintu zyakumuuya.—Matayo 5:3.

Ikuti mwazibelesya njiisyo eezi mubuumi bwanu, mulakonzya kusyoma kuti muyookkomana akuzwidilila.

[Zifwanikiso izili apeeji 22]

Ijwi lya Leza lyakaambilila limwi kuloba kwabantu aaba . . .

EDOMU

BABULONI

. . . pele kutali baaba

GILISI

EGEPITA

[Kulumba]

Pictorial Archive (Kufwiifwi aku Eastern History) Est

Cifwoto caba WHO cakafwotulwa a Edouard Boubat

[Cifwanikiso icili apeeji 23]

Alesandro Mupati