Samuele Wakazumanana Kucita Ciluzi
Amubayiisye Bana Banu
Samuele Wakazumanana Kucita Ciluzi
SENA kuli nowakabona kale bantu kabacita zibi?— *Samuele wakababona. Wakali kukkala kubusena nkotakonzyi kuyeeyela kuti bantu balakonzya kucita zibi. Ooku kwakali kutente lyakubunganina lya Leza naa busena bwakukombela mumunzi wa Silo. Atubone Samuele mbwaakatalika kukkala kutente lyakubunganina imyaka iili 3,000 yainda.
Samuele katanazyalwa, banyina ba Hana bakali kuyandisya kuba amwana. Nibakaakuswaya kutente lyakubunganina, Hana wakapaila kuli Leza kujatikizya makani aaya. Wakali kupaila camoyo woonse cakuti milomo yakwe yakali kubimba. Eeci cakapa kuti mupaizi mupati Eli ayeeye kuti Hana wakali koledwe. Pele naakazyiba kuti tanaakali koledwe, wakapengede buyo mumoyo, Eli wakamulongezya akumwaambila kuti: “Leza wa-Israyeli akupe cikumbilo cako.”—1 Samuele 1:17.
Mukuya kwaciindi Samuele wakazyalwa, Hana wakakkomana kapati cakuti wakaambila mulumaakwe Elikana kuti: ‘Mbwaya kulekela buyo kunyonka, ndiya kumutola kutente lyakubunganina kutegwa akabelekele Leza.’ Oobo mbwaakacita! Aciindi eeci Samuele weelede kuti wakajisi myaka yone naa yosanwe.
Eli wakazyi kucembaala alimwi bana bakwe ba Hofeni a Pinehasi tiibakali kumukomba Jehova munzila iiluzi. Bakali kuvwuula abasimbi bakali kuswaya tente lyakubunganina. Ino uyeeya kuti ncinzi bausyi ncobakeelede kucita?— Bakeelede kubalaya akubakasya kucita zyintu eezyo zibi.
Samuele wakakomenena atente lyakumbunganina alimwi weelede kuti wakalizyi kuti bana ba Eli tiibakali kulilemeka. Sena Samuele wakali kucita zyintu zibi nzyobakali kucita?— Peepe, wakazumanana kucita ciluzi mbubwena bazyali bakwe mbobakamuyiisya kuti kacita. Nkakaambo kaako Jehova ncaakamunyemena Eli. Mane wakatuma musinsimi kwaakwaambila Eli makani aajatikizya mukwasyi wakwe mbuuya kunyonyoonwa ikapati ibana bakwe babi.—1 Samuele 2:22-36.
Samuele wakazumanana kubeleka a Eli atente lyakubunganina. Mpoonya buzuba bumwi Samuele kalede, wakamvwa muntu wakali kumwiita. Mpoonya Samuele wakabalika kuunka kuli Eli, pele wakamwaambila kuti tanaali kumwiita. Eeci cakacitika alimwi. Nocakacitika ciindi catatu, Eli wakaambila Samuele kwaamba kuti: “Koamba, Jehova, nkaambo mulanda wako ulaswiilila.” Samuele naakaamba boobo, Jehova wakatalika kwaambaula anguwe. Sena ulicizyi Jehova ncaakamwaambila Samuele?—
Leza wakaambila Samuele makanze aakwe aakuti wakali kuyanda kusubula mukwasyi wa Eli. Nobwakaca Samuele wakayoowa kumwaambila Eli Jehova ncaakamwaambila. Pele Eli wakamukombelezya Samuele kuti: “Utasisi kulindime pe.” Aboobo, Samuele wakamwaambila Eli zyoonse nzyakamwaambila Jehova kuti uya kuzicita—kweelana amusinsimi mbwaakali mwaambilide Eli. Eli wakavwiila kuti: “Jehova! acite kufumbwa cintu cimubotela kumeso aakwe.” Mukuya kwaciindi Hofeni a Pinehasi bakajaigwa awalo Eli wakafwa.—1 Samuele 3:1-18.
Pele walo “Samuele wakakomena, alakwe Jehova kabali awe.” Aciindi eeci Samuele ambweni wakali mukubusi, ciindi ciyandika kapati mubuumi. Sena uyeeya kuti cakali cuuba-uba kuli Samuele kuzumanana kucita ciluzi noliba leelyo bantu bamwi nobatakali kucita oobo?— Nokuba kuti tiicakali cuuba-uba, Samuele wakamubelekela Jehova cakusyomeka mubuumi bwakwe boonse.—1 Samuele 3:19-21.
Ino mbuti iwe? Sena uyakuba mbuli Samuele noliba leelyo nowakomena? Sena uyakuzumanana kucita ciluzi? Sena uyakuzumanana kutobela njiisyo zyamu Bbaibbele azyeezyo bazyali bako nzyobakuyiisya? Ikuti naa ukacite oobo, uyakupa kuti Jehova abazyali bako bakakkomane.
Bupanduluzi buyungizidwe
^ munc. 3 Ikuti kamubala makani aaya abana, keengo kali munsi-munsi amubuzyo kamuyeezya kuti mweelede kwiima kutegwa bana baingule.
Mibuzyo:
○ Ino Samuele wakatalika buti kubelekela atente lyakubunganina lya Jehova?
○ Ino mbuyumu-yumu nzi Samuele mbwaakajana okuya?
○ Ino ncikozyanyo nzi Samuele ncaakasiila bana?