Injiisyo Iidumide Kapati

“Ndakali kulota kuti ndilapya mumulilo wahelo! Ndakali kulota kuti bandisowela mumulilo, ndasinsimuka ndakali kukwiila. Aboobo, ndakali kuyoowa kucita cibi.”—Arline.

SENA musyoma kuti basizibi baya kupenzyegwa mumulilo wahelo? Bantu banji mbobasyoma oobo. Mucikozyanyo, mukuvwuntauzya kwakacitwa mumwaka wa 2005, haazibwene umwi wakucikolo cipati ca St. Andrews mucisi ca Scotland wakajana kuti ibunji bwabasololi bazikombelo mucisi oomu basyoma kuti basizibi “baya kupenga kukabe kutamani mumulimo wahelo.” Ibamwi basyoma kuti aabo bali mumulilo wahelo baya kusubulwa.

Mumasi manji, njiisyo yamulilo wahelo ilidumide. Mucikozyanyo, mukuvwuntauzya kwakacitwa mumwaka wa 2007 mu United States, kwakajanika kuti bantu banji batandila ku 70 pesenti basyoma mulilo wahelo. Nomuba muzisi bantu banji mobatabikkili maano kumakani aabukombi bacisyoma mulilo wahelo. Mubuvwuntauzi ibwakacitwa mu 2004, kwakajanika kuti bantu basika ku 42 pesenti mucisi ca Canada basyoma mulilo wahelo. Amwalo mu Great Britain, bantu basika ku 32 pesenti basyoma kuti mulilo wahelo nkouli ncobeni.

Ncobayiisya Basololi Bazikombelo

Bunji bwabasololi bazikombelo bacileka kuyiisya kuti mulilo wahelo mbusena bwini bwakupenzyela bantu. Nokuba boobo, bupanduluzi bwabo bulakozyanya aboobo bulembedwe mukabbuku kaba Katolika kakuti Catechism of the Catholic Church, kakamwaigwa mu 1994. Kabbuku aaka kaamba kuti, “Icisubulo cini camulilo wahelo, nkwaandaanina limwi a Leza.”

Nokuba kuti cili boobo, bantu banji bacisyoma kuti bantu baya kupenzyegwa naa kusubulwa mumulilo wahelo. Aabo basyoma njiisyo eeyi baamba kuti izwa mu Bbaibbele. Albert Mohler, imweendelezi wa Southern Baptist Theological Seminary wakaamba kuti: “Njiisyo eeyi njamu Magwalo.”

Nkaambo nzi Ncomweelede Kwaabikkila Maano Makani Aaya?

Ikuti naa mulilo wahelo nkouli ncobeni, nkokuti mweelede kuuyoowa. Nokuba boobo, ikuti njiisyo eeyi kaitali yabwini, basololi babukombi bayiisya boobo balabanyonganya bantu babasyoma akubapa kuyoowa. Alimwi basampula Leza.

Ino Jwi lya Leza, Ibbaibbele, lyaamba nzi kumakani aaya? Zibalo zitobela zilaingula mibuzyo eeyi yotatwe kwiinda mukubelesya Bbaibbele: (1) Ino ncinzi cini cicitika muntu afwa? (2) Sena Jesu kuli ncaakaamba kujatikizya mulilo wahelo? (3) Ino mbuti ikuzyiba bwini kujatikizya mulilo wahelo mbokukonzya kumugwasya?