Makani Mabotu Mumyaambo Iili 500

NIKWAKALI nkondo kucisi ca Rwanda, kakamu kabasanduluzi bakaccija akusiya zyintu zyabo zyoonse. Nokuba boobo, bakanyamunizya makkompyuta aabo aamumanza nibakali kuunka kunkambi yabazangalisi. Ino nkaambo nzi? Akaambo kakuti bakali kuyanda kuti bakazumanane kusandulula mabbuku aamba zya Bbaibbele mumwaambo waci Kinyarwanda.

Imukaintu umwi uucili mwana-mwana uukkala ku Southeast Asia, wakali kubelesya kkompyuta kusandulula mabbuku kusikila masiku, nokuba kuti zimwi ziindi mulimo ooyu tanaakali kuucita kabotu akaambo kakukatala, kupya alimwi magesi akali kuunka-unka. Ino ncinzi cakali kumupa kuti kabeleka kusikila masiku? Wakali kuyanda kuti amanizye kusandulula kakucili ciindi.

Basanduluzi aaba bali akati kankamu yaba sikugwasyilizya bali 2, 300 ibali mumasena ainda ku 176 munyika yoonse. Bali akati kamyaka iili 20 a 90 alimwi balabeleka canguzu kutegwa babaumbulizye bantu amulumbe wamu Bbaibbele mumyaambo iili 500.—Ciyubunuzyo 7:9.

Kusanduluda Bantu Baambaula Myaambo Indene-indene

Mumyaaka yainda, mulimo wakusandulula wa Bakamboni ba Jehova wayaambele kapati. Mucikozyanyo, mu 1985, Ngazi Yamulindizi yakali kumwaigwa mumyaambo iili 23 aciindi comwe—ooyu wakali mulimo mupati eeco ciindi. Noliba lino, Ngazi Yamulindizi ilamwaigwa ciindi comwe mumyaambo iili 176 kutegwa bantu nyika yoonse kababala makani aakozyene.

Mumyaambo iitandila ku 50, Ngazi Yamulindizi njimagazini yelikke imwaigwa lyoonse. Nkaambo nzi? Akaambo kakuti bajisi makkampani acita makwebo aakusimba cilabaalila kusimba mabbuku mumyaambo iindene-indene. Pele Bakamboni ba Jehova nyika yoonse balaakusanga mali kutegwa Jwi lya Leza amabbuku aapandulula Bbaibbele amwaigwe koonse nkwaayandika.—2 Ba-Korinto 8:14

Ibantu balaukkomanina mulumbe wamu Bbaibbele ikuti kauli mumwaambo wabo. Mucikozyanyo, mabbuku aamba zyamu Bbaibbele alamwaigwa mucisyobo caci Miskito, mwaambo waambaulwa abantu bali 200,000 baku Nicaragua. Umwi mukaintu wakalomba bbuku lya Bbuku Lyangu Lya Makani Aamu Bbaibbele * mumwaambo waci Miskito. Buzuba mbwaakapegwa bbuku eeli, mufwundisi wakucikombelo awalo wakaliko. Naakalibona bbuku eeli mbotu, mufwundisi wakaliyanda. Nokuba boobo, mukaintu ooyu wakamwiima bbuku mufwundisi nokuba kuti wakamwaambila kuti ulakonzya kumupa kkofi iilema makkilo aali 20.

 Mumyaka iili kkumi yainda, mabbuku aapandulula Bbaibbele akasandululwa mumyaambo minji yaambaulwa ku Mexico, muci Maya, Nahuatl aci Tzotzil amumyaambo imwi buyo. Mumyaka iitandila kukkumi, mbungano zyamucisi eeco azyamumwaambo wakutambaika zya Bakamboni ba Jehova zyakavwula nkaambo zyakali 72 lino zili 1,200. Bakamboni ba Jehova balakonzya kubyala mulumbe wamu Bbaibbele mumyoyo yabantu, pele balekela Leza kuti azikomezye mbuto zyakasimpe.—1 Ba-Korinto 3:5-7.

Bbaibbele Lipya Lyakasandululwa Mumyaambo Iili 80

Mumyaaka yainda, Bakamboni ba Jehova babeleka canguzu kusandulula Bbaibbele lya New World Translation of the Holy Scriptures lyoonse naa cibeela buyo mumyaambo iili 80. Ino lyabagwasya buti bantu? Kamboni umwi waku South Africa wakaamba boobu kujatikizya Bbaibbele lyamuci Tswana: “Elo kaka ndibotu bbuku eeli. Lilandigwasya kulimvwisya kabotu Jwi lya Leza. Mwaambo ngobakabelesya taukatazyi kubala akumvwa.” Musankwa umwi waambaula cisyobo caci Tsonga uukkala ku Mozambique wakalemba kuti: “Nokuba kuti twakalijisi mabbuku aamwi apandulula Bbaibbele, kubula Bbaibbele cakali mbuli mvwula iitawi nokuba kuti ilazuma akulaba. Pele, ciindi Bbaibbele lya New World Translation nilyakazwa muci Tsonga twakakkomana mbubonya mbobakkomana bantu kuti mvula kiiwa.”

Aabo basandulula akumwaya makani mabotu aajanika mu Bbaibbele bazuzikizya businsimi. Jesu Kristo nguwakaamba kuti: “Aya Makani Mabotu aa-Bwami azookambaukwa munyika yoonse kuti abe citondezyo kumisyobo yoonse. Elyo mamanino azoosika.”—Matayo 24:14.

Bupanduluzi buyungizidwe

[Caption icili apeeji 31]

NEW WORLD MABBUKU

TRANSLATION AAMWI

Nkolili lyoonse naa

mucibeela buyo

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

MWEELWE WAMYAAMBO

[Zifwanikiso izili apeeji 31]

Basikugwasyilizya bali 2,300 mbabasandulula mabbuku aamba zyamu Bbaibbele mumyaambo iili 500

BENIN

SLOVENIA

ETHIOPIA

BRITAIN