Jehova Wandijula Meso

Akaluulwa aba Patrice Oyeka

Cakali ciindi cakumangolezya. Kuba abuzuba bumbi mumudima—kandoofweede, kandilendeledwe, kandiswiilila wailesi cakutaleka—ndakayeeya kulijaya. Ndakabikka musamu walusu uujaya munkapu yameenda mpoonya ndakaibikka atebulu kumbele lyangu. Ndakali kuyanda kusambila limwi akusama kabotu kanditanaunywa musamu ooyo kutegwa ndilijaye. Nkaambo nzi ncindakali kuyanda kulijayila? Alimwi ncinzi cakapa kuti kandicipona asunu akuluula makani aaya?

NDAKAZYALWA mu February 2, 1958, mudolopo lya Kasaï Oriental, mucisi ca Democratic Republic of the Congo. Bataata bakafwa nindakajisi myaka iili fwuka yakuzyalwa, aboobo mupati wangu musankwa nguwakali kundilanganya kusikila nindakakomena.

Nindakamanizya cikolo ndakatalika kubeleka mukkampani yakali kulima zisamu nzyobapangisya labba. Bumwi buzuba kuseeni mu 1989, nindakali kulemba lipooti muofesi yangu, cakutayeeyela ndakacileka kubona. Kusaanguna, ndakayeeya kuti aunka malaiti pesi ndakamvwa jeneleta yamalaiti kailila alimwi kwakali kuseeni! Kandiyoowede kapati, ndakazyiba kuti tiindakacili kukonzya kubona cilicoonse, niiba lipooti njindakali kulemba!

Cakufwambaana ndakaita mwaalumi umwi ngondakali kubeleka limwi kutegwa anditole kumuntu wakali kubelekela kucibbadela. Mpoonya muntu ooyu wakaamba kuti ndeelede kutolwa kumusilisi wamudolopo uucibwene kapati. Naakabona kuti nsinga zyameso zyakalibbansukide akuti bulwazi bwakali bupati, wakalailila kuti nditolwe kudolopo pati lya Kinshasa.

Buumi mu Kinshasa

Mudolopo lya Kinshasa, ndakabonana abamadokota banji bameso pele kunyina wakakonzya kundisilika. Nikwakainda mazuba aali 43 kandili mucibbadela, bamadokota bakandaambila kuti ndinoofweede mubuumi bwangu boonse! Aboobo banamukwasyi bakanditola kuzikombelo zisiyene-siyene kutegwa bandiponye munzila yamaleele pele akali maliminya buyo.

Kumamanino, bulangizi bwakuti ndiyoobona alimwi bwakamana. Buumi bwangu boonse bwakali mumudima. Ndakaleka kubona, alimwi bakanditanda amulimo. Awalo mukaintu wangu wakanditija akubweza zyintu zyoonse nzyotwakajisi muŋanda yesu. Ndakali kufwa nsoni kuzwa anze nokuba kuyanzana abantu. Ndakali kubbililwa zuba muŋanda endikke. Tiindakali kuyanda kubonana abantu alimwi ndakali kulimvwa kubula mulimo.

Ndakali kuyanda kulijaya ziindi zyobilo. Ciindi cabili cilaambidwe kumatalikilo aacibalo eeci. Mwana muniini waaŋanda ngookandifwutula. Nindakali kusamba wakabweza nkapu yakajisi musamu katazyi akuutila ansi. Ndakalumba buyo kuti kunyina naakaunywa. Pele ndakatyompwa kapati ciindi nindatakaijana nkapu. Mpoonya ndakabaambila banamukwasyi kaambo ncindakali kuyandawinda nkapu alimwi ancindakali kuyanda kucita.

Ndilamulumba Leza alimwi abanamukwasyi akaambo kakundilanganya. Makanze aangu aakulijaya akamana.

 Kujana Lukkomano Mubuumi Alimwi

Mu Mujibelo mu 1992, nindakakkede aŋanda kandifweba, Bakamboni ba Jehova bobilo bakandisikila nibakali kuyaabucita mulimo wabo wakuŋanda aŋanda. Nibakabona kuti ndili moofwu, bakandibalila lugwalo lwa Isaya 35:5 lwaamba kuti: “Lino meso aaboofu ayoobononona, amatwi aabasinke ayoosinkuka.” Ndakakkomana kapati nindakamvwa majwi aaya! Mukwiimpana azyintu nzyondakali kumvwa muzikombelo nzyondakaswaide, Bakamboni tiibakali kuponya munzila yamaleele. Muciindi caboobo, bakapandulula kuti ndiyakutalika kubona alimwi munyika mpya njaakasyomezya Leza kufwumbwa buyo kuti ndamuzyiba Leza. (Johane 17:3) Mpoonya-mpoonya, ndakatalika kwiiya Bbaibbele a Bakamboni kwiinda mukubelesya bbuku lyakuti Mulakonzya Kupona Kukabe Kutamani mu-Paradaiso Anyika. Alimwi ndakatalika kujanika kumiswaangano yoonse ya Bunakristo ku Ŋanda ya Bwami alimwi akucinca buumi bwangu. Ndakacileka kufweba.

Pele boofwu bwangu bwakali kupa kuti nditayaambele kumuuya. Aboobo ndakaunka kucikolo caboofwu kutegwa ndikaiye kubala akulemba mabala aaboofwu. Eeci cakandipa kuti nditalike kutola lubazu mucikolo camulimo cicitwa ku Ŋanda ya Bwami. Tiilyakalampa, ndakatalika kutola lubazu mumulimo wakukambauka kubusena nkondakali kukkala. Ndakatalika kujana lukkomano mubuumi alimwi. Ndakazumanana kuyaambele mpoonya ndakalyaaba kuli Jehova. Ndakabbapatizyigwa mu May 7, 1994.

Luyando lwangu kuli Jehova alimwi abantu mbolwakali kuyaabukomena, ndakaba amakanze aakutalika mulimo waciindi coonse. Kuzwa mu December 1, 1995, ndilabeleka kandili mupainiya waciindi coonse. Alimwi ndaba acoolwe cakubeleka kandili mwaalu mumbungano mondibede kuzwa mu February 2004. Zimwi ziindi balanditamba kupa makani aa Bbaibbele mumbungano zimbi zili kubusena nkondikkala. Zilongezyo zyoonse eezyi zindipa kukkomana kapati alimwi akundigwasya kuzyiba kuti kunyina bulema bukonzya kutulesya kuzuzikizya makanze eesu aakubelekela Jehova Leza.

Jehova Wandipa “Meso”

Mbuli mbondaamba kale kumatalikilo, bakaintu bangu bakandisiya akaambo kaboofwu bwangu. Pele ndatambula cilongezyo acimbi kuzwa kuli Jehova. Munzila iilibedelede, wakandipa meso aakubona. Ba Anny Mavambu, ibakandizumina kuti ndibe mwaalumi wabo nokuba kuti ndili moofwu bakaba meso aangu. Mbwaanga abalo mbakambausi baciindi coonse, balandisindikila lyoonse mubukambausi. Alimwi balandibalila ikuzwa makani aangu kutegwa ndilembe mumabala aaboofwu. Ncilongezyo cilibedelede kulindime. Akaambo kambabo, ndabona mbwaali aamasimpe majwi aali kuli Tusimpi 19:14 aakuti: “Maanda ambono, muntu ulazikona kuliwisi, pele mwanakazi uucenjede ulazwa kuli-Jehova.”

Alimwi Jehova wandilongezya aba Anny kuba abana bobilo—musankwa amusimbi. Ndiliyandide kapati kuyoobona busyu bwabo mu Paradaiso! Cilongezyo acimbi ncakuti mupati wangu musankwa, iwakatuzumizya kukkala muŋanda yakwe, wakakazumina kasimpe kamu Bbaibbele akubbapatizyigwa! Toonse tuli mumbungano yomwe.

Nokuba kuti ndili moofwu, ndiciyanda kuzumanana kumubelekela Leza nkaambo wandilongezya kapati. (Malaki 3:10) Buzuba abuzuba ndilabupailila Bwami bwa Leza kuti buboole alimwi akuti buzoogwisye mapenzi oonse munyika. Kuzwa ciindi nindakamuzyiba Jehova, masimpe ndilakonzya kwaamba kuti: “Lulongezyo lwa-Jehova lulavubya, alimwi tayungizyi mause kulindulo.”—Tusimpi 10:22.

[Cifwanikiso icili apeeji 15]

Kandipa makani aa Bbaibbele; amukwasyi wangu amwanaakwesu musankwa