Sena Mulizyi?

Ino ‘cuuno calubeta’ nkwaakatolwa Paulo cakali cinzi?

▪ Cibalo ca Milimo 18:12, 13 caamba kuti ba Juda bamu Korinto bakatamikizya Paulo kuti wakali kukambauka katazumizyidwe alimwi akuti bakamutola “kucuuno calubeta” naa beʹma (Ibbala lya Chigiliki lyaamba kuti “ntaamu”). Munzi wa Korinto wansiku wakajisi cibumbili cisumpwidwe anze, afwaafwi abusena bwakubunganina, naa musika, calo cilangilwa kuti cakali buyo ntaamu zisyoonto kuzwa kucikombelo. Akaambo kabusena mpocakayakidwe, cibumbili eeci cakali kubelesyegwa nibakali kwaambaula kubuleya. Cakayakidwe amabwe aadula aamubala wacikambwe aatuba alimwi cakazekawidwe kabotu. Aakali kwiimina mwaambi kwakali twaanda tobilo mwakulindilila twakajisi mabbenci aakapangidwe amabwe aadula alimwi aansi kwakayalidwe tubwe tubotu.

Aawo aakali kwiimina mwaambi ayelede kuti mpaakali cuuno calubeta aawo mpaakaimvwi mwaapostolo Paulo kumbele lya Galiyo, mweendelezi muna Roma waku Akaya. Abusena oobu, basinkuta bakali kukkala kuswiilila twaambo alimwi akuzyibya bantu babungene twaambo twasalwa.

Mudolopo lyaba Giliki, cakali kweelela kuti mbunga yoonse yabantu kaiswaangana kumbele lya beʹma, aakali kucitilwa makwebo oonse. Muzibalo nzyaamba kusunkwa kwa Jesu, majwi aa Chigiliki aali muli Matayo 27:19 alimwi a Johane 19:13 oonse aamba zya Ponto Pilato kabandika kubuleya kuzwa a beʹma lyakwe.—Milimo 12:21.

Nkaambo nzi nzila njaakafwa Jesu ncoyakapa kuti ba Juda bamwi cibayumine kuba Banakristo?

▪ Mwaapostolo Paulo wakaamba kujatikizya Banakristo bakusaanguna kuti: “Tukambauka Kilisito iwakagagaidwe acisamu, icilebyo kuba Juda pele ibufwubafwuba kuli bamasi.” (1 Bakolinto 1:23) Nkaambo nzi nzila njaakafwa Jesu ncoyakaba cilebyo kuli bamwi?

Ikujatikizya lufwu lwa Jesu abukkale bwabantu bakali kukkala ku Middle East mumwaanda wamyaka wakusaanguna, Sikukanana zya Bbaibbele Ben Witherington III waamba kuti “mbwaakafwa ndolwakali lufwu lwiinda kusampuzya kubusena ooko. Tiilwakali kulibonya kuba lufwu lwabulemu lwakujaigwa akaambo kalusyomo.” Witherington alimwi wakati: “Bantu bakubusena ooko bakali kusyoma kuti lufwu ndwafwa muntu lutondezya mbwaakabede. Akaambo kaboobo, Jesu wakali kubonwa kuti wakali mumpelenge wakabukila mfwulumende, muntu wakeelede kupegwa cisubulo icakali kupegwa bazike bakali kubukila simalelaabo.” Mubukkale buli boobu, inga tiicaba camaano kwaamba kuti Banakristo bakusaanguna bakatupanga buya twaambo tujatikizya lufwu lwa Jesu abubuke bwakwe.