Mubandi Amukamwini Ŋanda Sena Bantu Boonse Bacita Zibotu Bayakujulu?

BAKAMBONI BA JEHOVA balakkomana kubandika makani aamu Bbaibbele abasimukobonyina. Sena kuli mubuzyo wamu Bbaibbele ngomwakalibuzyide kale? Sena mulayandisisya kuzyiba njiisyo zimwi nzyobasyoma naa mbobakomba Bakamboni ba Jehova? Ikuti kacili boobo, mutakawayiwayi kubabuzya Bakamboni ciindi mwaakubaswaanya. Bayookkomana kubandika andinywe kujatikizya makani aaya.

Mubandi uutobela utondezya Bakamboni ba Jehova mbobakonzya kubandika abasimukobonyina. Atweezyeezye kuti Kamboni uutegwa Mainza wasika kuŋanda yamwaalumi uutegwa Mapenzi.

Ino Ncinzi Ncobayamukucita Aabo Bayakujulu?

Mainza: Mwayeeya kujatikizya zyintu ziyoocitika kumbele, sena muyeeya kuti zyintu ziyoobota, kwiindila kubija naa ziyooba mbubwenya mbozibede lino?

Mapenzi: Ndiyeeya kuti zyintu ziyoocinca kuba kabotu. Ndilangila kumbele kuyounka kujulu kuyooba a Mwami.

Mainza: Mbulangizi bubotu oobo. Bbaibbele lilaamba kapati kujatikizya mbokubede kujulu alimwi acoolwe cakuunka nkuko. Sena kuli nimwakayeeyede kuti ncinzi ncobayoocita aabo bayakujulu?

Mapenzi: Tunooli a Leza alimwi akumutembaula mane kukabe kutamani.

Mainza: Cakutadooneka oobo mbulangizi bukkomanisya. Pele Bbbaibbele talyaambi buyo kujatikizya coolwe ncobajisi aabo bayakujulu, pele alimwi lilaamba kujatikizya mulimo uuyandika kapati ngobanoojisi.

Mapenzi: Ino mulimo nzi ooyo?

Mainza: Mulimo waambidwe mulugwalo lwa Ciyubunuzyo 5:10. Kapango aaka kaamba kuti: “Wakabapa [Jesu] kuti babe Bwami abapaizi kuli Leza wesu, eelyo bayooba bami ibayoolela nyika.” Ba Mapenzi, sena mwaubona mulimo aabo bayakujulu ngobanoojisi?

Mapenzi: Kapango kaamba kuti bayoolela nyika kabali bami.

Mainza: Eeci cilakkomanisya kapati, tee kayi?

Ino Mbaani Mbobayoolela?

Mainza: Aboobo, sena tamuzumini kuti, ikuti aabo bayakujulu bayoolela kabali bami, kweelede kuba bantu mbobanoolela? Kuyungizya waawo, ino inga cagwasya nzi kuba amfwulumende iinyina balelwa?

Mapenzi: Ndakabona kaambo.

Mainza: Aboobo, mubuzyo uuyandika kubuzya ngwakuti, Ino mbaani mbobayoolela?

Mapenzi: Ndisyoma kuti tuyoolela bantu banooli anyika batanafwa akuya kujulu.

Mainza: Eeco cimvwikka kabotu—kuti bantu boonse bacita zibotu bayakujulu. Pele nkaaka kaambo akambi kayandika kulanga-langa. Sena kulangilwa kuti bantu bamwi—bamwi bantu bacita zibotu—tabakaunki kujulu?

Mapenzi: Tandinamvwide Banakristo ibasyoma boobo.

 Mainza: Ndaamba boobo akaambo kancotubala mulugwalo lwa Intembauzyo 37:29. Sena inga mwakabala kapango aaka?

Mapenzi: Inzya. Kaamba kuti: “Balulami bayookona nyika, bayookkala alinjiyo lyoonse.”

Mainza: Ndalumba. Sena mwabona bantu banji bacita zibotu nkobayookkala?

Mapenzi: Kapango kaamba kuti bayookkala anyika.

Mainza: Masimpe—alimwi kutali buyo kwakaindi kasyoonto. Amubone kuti kapango kaamba kuti: “Bayookala alinjiyo lyoonse.”

Mapenzi: Ambweni eeco caamba kuti lyoonse kunooli bantu bacita zibotu anyika. Ciindi nitufwa akuya kujulu, kuli bantu bambi bacita zibotu ibazyalwa batunjilila busena.

Mainza: Ambweni banji mbobakonzya kukapandulula kapango aaka. Pele, sena cilakonzyeka kuti kapango aaka kajisi bupanduluzi bumbi? Sena inga kakaamba kuti bantu bacita zibotu mbabayoopona anyika kukabe kutamani?

Mapenzi: Ccita, tandizyi kabotu pe.

Nyika ya Paradaiso Kumbele

Mainza: Amubone cibeela cimwi ca Bbaibbele mbocaamba kujatikizya buumi munyika kumbele. Atubale Ciyubunuzyo 21:4. Kujatikizya bantu bayoopona kumbele kapango kaamba kuti: “[Leza] uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.” Sena oobu tabuli bulangizi bukkomanisya?

Mapenzi: Inzya. Pele ndiyeeya kuti caamba kujatikizya buumi mbobunoobede kujulu.

Mainza: Masimpe kuti aabo bayakujulu abalo banoojisi zilongezyo zikozyenye. Pele amukalange kapango aaka alimwi. Ino kaamba kuti ncinzi ciyoocitika kulufwu?

Mapenzi: Kaamba kuti “lufwu talukooyoobako limbi.”

Mainza: Masimpe. Lino ndisyoma kuti mulakonzya kuzumina kuti kutegwa cintu cimwi citakabiko, nkokuti kusaanguna cakaliko.

Mapenzi: Mbombubo.

Mainza: Pele lufwu kunyina nilwakaliko kujulu, tee? Mpaano buyo anyika bantu mpobafwa.

Mapenzi: Hmm. Ndeelede kuyeeya kabotu kujatikizya kaambo aaka.

Mainza: Mwabona ba Mapenzi, Bbaibbele lyaamba kuti bantu bamwi bacita zibotu bayounka kujulu, pele alimwi lyaamba kuti bamwi banji bayoopona kukabe kutamani aano anyika. Masimpe ngakuti, ndisyoma kuti mwakaamvwa kale majwi aaya aadumide kapati aakuti: “Balikkomene babombe myoyo, nkaambo bayookona nyika.”—Matayo 5:5.

Mapenzi: Inzya, ndakacimvwa kale cibalo eeco kacibalwa kucikombelo ziindi zinji.

Mainza: Ikuti babombe myoyo bayookona nyika, sena eeci tacaambi kuti bantu banookkala anyika? Aabo bakkala anyika bayookkomana azilongezyo eezyo zyaambidwe aawa mulugwalo lwa Ciyubunuzyo. Bayooibona nyika yesu mboiyoocinca nkaambo Leza uyoogwisya zyintu zyoonse zibi kubikilizya alufwu.

Mapenzi: Ndacimvwa ncomwamba, pele tandisyomi pe kuti kapango kamu Bbaibbele komwe buyo naa tobilo inga twakasinizya kaambo nkomwamba.

Mainza: Peepe. Mubwini kuli magwalo manji aamba kujatikizya buumi mbobunoobede aano anyika kumbele. Andiza ndilakonzya kumutondezya cibalo cimwi ncondiyandisya kapati kuti kamujisi ciindi.

Mapenzi: Inzya, ndijisi maminiti masyoonto.

“Sizibi Takooyooba wo”

Mainza: Twalibalide kapango 29 mu Intembauzyo 37. Atupilukile kuntembauzyo iilya. Lino tulabala tupango 10 a 11. Sena mulayanda kutubala tupango ootu?

Mapenzi: Inzya. “Kaba kaindi kaniini sizibi takooyooba wo; unooyeeya nkwakabede, pele takooyooba nkuko. Pele babombemyoyo bayoovuba  nyika, bayookondwa muluumuno lunji.”

Mainza: Ndalumba. Kweelana akapango 11, ino “babombemyoyo” naa bantu bacita zibotu bayookkala kuli?

Mapenzi: Kapango kaamba kuti “bayoovuba nyika.” Nokuba boobo, ndiyeeya kuti kapango aaka kaamba cecino ciindi; nkaambo bantu bacita zibotu bakkala anyika mazuba aano.

Mainza: Masimpe aayo. Nokuba boobo, kapango alimwi kaamba kuti bantu bacita zibotu bayookondwa “muluumuno lunji.” Aano mazuba taakwe luumuno ndotubona munyika, sena taali masimpe aayo?

Mapenzi: Mbombubo tatuluboni.

Mainza: Aboobo ino cisyomezyo ciyoozuzikizyigwa buti? Ambweni ndibelesye cikozyanyo eeci: Amweezyeezye kuti mujisi ŋanda mpati iijisi maluumu manji. Bamwi bantu ibacita leenti mbantu bacita zibotu—balalanganya luumu mobakkala alimwi mbaasimukobonyina bacita zibotu kuli bamwi. Mulikkomene kubazumizya kucita leenti muŋanda yanu. Pele bamwi ibacita leenti mbantu babi; banyonyoona busena alimwi bapa kuti buumi bubayumine basimukobonyina. Kuti bantu babi ibacita leenti bakaka kucinca micito yabo, ino inga mwacita nzi?

Mapenzi: Inga ndabatanda.

Mainza: Eeco ncayoocita Leza kubantu babyaabi batuzingulukide mazuba aano. Amulange alimwi kapango 10. Kaamba kuti: “Sizibi takooyooba wo.” Munzila imwi, Leza “uyoobatanda” bantu baletela bamwi mapenzi. Mpoonya bantu bacita zibotu bayookondwa abuumi munyika yaluumuno. Ndabona kuti imuzeezo ooyu wakuti bantu bacita zibotu bayoopona anyika kukabe kutamani ambweni uliindene anzyoomwakayiisyigwa kaindi.

Mapenzi: Masimpe, tandinamvwide muzeezo uuli boobo kucikombelo nkonduunka.

Mainza: Alimwi mbubwenya mbomwaambide kale, tacigwasyi kwiile kulanga buyo kapango komwe naa tobilo kujatikizya kaambo. Mubwini, tweelede kulanga-langa ncaamba magwalo woonse aamu Bbaibbele kujatikizya bulangizi mbobajisi bantu bacita zibotu kumbele. Kweelana amagwalo ngotwabala sunu, sena muyeeya kuti cilakonzyeka kuti bantu bamwi bacita zibotu bakaye kujulu mpoonya bantu bamwi bacita zibotu banji bakakkale anyika kukabe kutamani?

Mapenzi: Tandizyi kabotu. Pele ndeelede kuzumina kuti mbociboneka oobo kweelana amagwalo ngomwabala. Ndeelede kwaayeeyesya makani aaya alimwi.

Mainza: Ciindi nomulanga-langa makani aaya alimwi, mulakonzya kuba amibuzyo iimbi. Mucikozyanyo, mbuti kujatikizya bantu bacita zibotu ibakapona kaindi? Sena boonse bakayakujulu? Kuti kacitali boobo, ino bali kuli lino?

Mapenzi: Mibuzyo mibotu eeyo

Mainza: Ambweni inga ndamugwasya zyintu zyobilo. Cakusaanguna ndilamulembela magwalo masyoonto aajatikizya makani aaya. * Cabili ndiyanda kuti ndikapiluke kuzoobandika magwalo aaya mwaakumana kwaabala alimwi akuyeeya kujatikizya ngawo. Sena cili buyo kabotu?

Mapenzi: Inzya, cili kabotu. Ndalumba.

[Bupanduluzi buyungizidwe]