AMUBE ACILONGWE A LEZA

‘Ngu Leza Wabaumi’

Sena lufwu lulaanguzu kwiinda Leza? Peepe! Ino mbuti lufwu—naa “sinkondo” uuliwoonse—mbolukonzya kuba anguzu zinji kwiinda “Leza Singuzuzyoonse”? (1 Bakolinto 15:26; Kulonga 6:3) Leza ulijisi nguzu zyakumanya lufwu kwiinda mukubusya bafwide, alimwi wasyomezya kucita oobo munyika mpya. * Sena cisyomezyo eeci ciyoozuzikizyigwa ncobeni? Jesu, Mwana wa Leza, utwaambila majwi aakonzya kutupa bulangizi.—Amubale Matayo 22:31, 32.

Naakali kubandika aba Saduki, ibatakali kusyoma mububuke, Jesu wakaamba kuti: “Kujatikizya bubuke bwabafwide, sena tiimwakabala nzyaakamwaambila Leza naakati: ‘Ndime Leza wa Abulahamu a Leza wa Izaka a Leza wa Jakobo’? Tali Leza wabafwu, pele ngwabaumi.” Aawa Jesu wakali kwaamba mubandi Leza ngwaakajisi a Musa acitewo ciyaka mulilo kuma 1513 B.C.E. (Kulonga 3:1-6) Kweelana ambwaakaamba Jesu, majwi Jehova ngaakaambila Musa aakuti, ‘Ndime Leza wa Abrahamu a Leza wa Isaka, a Leza wa Jakobo”—atondezya kuti cisyomezyo cabubuke ciyoozuzikizyigwa ncobeni. Munzila nzi?

Amusaangune kulanga-langa cakali kucitika. Ciindi Jehova naakabandika a Musa, bamasyaanyinakulu nkokuti Abrahamu, Isaka, alimwi a Jakobo bakalifwide kale—Abrahamu kwakaindide myaka iili 329, Isaka iili 224, alimwi a Jakobo iili 197. Nokuba boobo, Jehova wakaamba kuti “Ndime”—kutali “Ndakali”—Leza wabo. Jehova wakaamba kujatikizya bamasyaanyinakulu aaba mbuli kuti bakacili kupona. Nkaambo nzi?

Jesu wakapandulula kuti: “[Jehova] tali Leza wabafwu, pele ngwabaumi.” Amuyeeye ncaamba majwi aaya. Ikuti naa kunyina bubuke, nkokuti Abrahamu, Isaka, alimwi a Jakobo banoofwide mane kukabe kutamani. Nicakali boobo, Jehova nali Leza wabafwide. Mpoonya eeco nicakaamba kuti lufwu lulaanguzu kwiinda Jehova—mbuli kuti tanaakajisi nguzu zyakubaangulula kulufwu babelesi bakwe basyomeka.

Aboobo, ncinzi ncotukonzya kwaamba kujatikizya Abrahamu, Isaka, Jakobo, alimwi ababelesi ba Jehova basyomeka ibakafwa? Jesu wakaamba majwi aaya aajisi nguzu: “Boonse mbaumi kulinguwe.” (Luka 20:38) Masimpe, cisyomezyo ca Jehova cakubusya babelesi bakwe basyomeka ciyoozuzikizyigwa ncobeni cakuti uyeeya kuti mbaumi. (Baloma 4:16, 17) Jehova ulabayeeya boonse bali boobu kusikila ciindi cakwe cikasike cakubapa buumi alimwi.

Sena bulangizi bwakuyoobonana abayandwa banu bafwide bulamukkomanisya? Kuti kacili boobo, kamuyeeya kuti Jehova ulaanguzu kapati kwiinda lufwu. Kunyina cikonzya kumulesya kuzuzikizya cisyomezyo cakwe cakubusya bafwide. Mulakonzya kwiiya zinji kujatikizya cisyomezyo cabubuke alimwi a Leza uuyoocizuzikizya. Kucita boobo ncobeni ciyoomupa kuba acilongwe a Jehova, ‘Leza wabaumi.’

Magwalo Aamu Bbaibbele Aasalidwe Kubalwa mu February

Matayo 22–Maako 8

[Bupanduluzi buyungizidwe]

[Majwi aakwelelezya sikubala aali apeeji 7]

Jehova ulaanguzu kapati kwiinda lufwu