Sena Leza Wakali Silunya Ciindi Naakali Kusubula Bantu?

KUTEGWA twiingule mubuzyo ooyu, mubufwaafwi atulange-lange zikozyanyo zyobilo zyakusubula bantu nkwaakacita Leza ikwaambwa mu Bbaibbele—Zambangulwe lyakuciindi ca Nowa alimwi akunyonyoonwa kwabana Kanana.

ZAMBANGULWE LYAKUCIINDI CA NOWA

NZYOBAAMBA BANTU BAMWI: “Leza wakacita calunya naakaleta zambangulwe lyakanyonyoona bantu boonse kunze buyo lya Nowa alimwi amukwasyi wakwe.”

NCOLYAAMBA BBAIBBELE: Leza wakaamba kuti: “Nsiyandi abuniini kuti sizibi afwe pe, ndayanda kuti aleke bubi bwanzila zyakwe akulijanina buumi.” (Ezekiele 33:11) Aboobo, lunyonyooko lwabasizibi bamuciindi ca Nowa tiilwakamukkomanisya Leza. Pele nkaambo nzi ncaakabanyonyweeda?

Ibbaibbele liingula kuti ciindi Leza naakaleta lubeta luli boobo kubantu bakali kusampaula Leza kaindi, wakali kupa “citondezyo cazyintu ziyoobacitikila bantu basampaula Leza.” (2 Petulo 2:5, 6) Ino ncitondezyo nzi Leza ncaakapa?

Cakusaanguna, Leza wakaamba kuti nokuba kuti cilamucisa kunyonyoona bantu, ulibabwene bantu baleta mapenzi alimwi uyoobasubula akaambo kamicito yabo. Mukuya kwaciindi, uyooamana mapenzi oonse akutalulama.

Cabili, nzila njaakabelesya Leza kucita zyintu kaindi citondezya kuti, Leza ulabacenjezya bantu caluyando katanaleta lunyonyooko. Nowa wakali mukambausi wabululami, pele bantu banji tiibakamubikkila maano. Ibbaibbele lyaamba kuti: “Tiibakabikkila maano kusikila Zambangulwe lyakaboola akubatola boonse.”—Matayo 24:39.

Sena Leza uciibelesya nzila eeyi? Inzya. Mucikozyanyo, wakacenjezya bantu bakwe bana Israyeli kuti ikuti naa batalika kucita micito mibyaabi mbuli mbozyakali kucita zisi zyakabazingulukide, wakali kuyoolekela basinkondo kusaala nyika yabo, kunyonyoona munzi wabo wa Jerusalemu, alimwi akubalekela kuti batolwe mubuzike. Bana Israyeli bakatalika kucita micito mibyaabi—mane buya akutuula bana. Sena Jehova kuli ncaakacita? Inzya, pele wakacita oobo lilikke naakamana kutuma basinsimi kuyoocenjezya bantu bakwe cakwiinduluka-induluka kutegwa bacince nzila zyabo cakufwambaana. Mane wakaamba kuti: “Mwami Jehova taciti cintu, atana kuyubunwida balanda bakwe basinsimi maseseke aakwe.”—Amosi 3:7.

 MBOMUJATIKIZYIDWE: Inzila njaakabelesya Jehova kunyonyoona bantu kaindi ipa kuti tube abulangizi. Tulijisi lusyomo lwakuti Leza uyoobabeteka aabo bapenzya bantu calunya. Ibbaibbele lyaamba kuti: “Basizibi balanyonyooka . . . babombemyoyo bayoovuba nyika, Bayookondwa muluumuno lunji.” (Intembauzyo 37:9-11) Ino inga mwalubona buti lunyonyooko lwaangulula bantu kumapenzi? Sena ndunya, naa nduzyalo?

KUNYONYOONWA KWABANA KANANA

NZYOBAAMBA BANTU BAMWI: “Kunyonyoonwa kwabana Kanana yakali nkondo yalunya yeelene ankondo zyacijaye-jaye zyamazuba aano.”

NCOLYAAMBA BBAIBBELE: “Milimo ya [Leza] yoonse ililuleme. Ngu-Leza uusyomeka uutakwe cibi.” (Deuteronomo 32:4) Bululami bwa Leza tabukonzyi kweezyanisyigwa kunkondo nzyobalwana bantu. Nkaambo nzi? Nkaambo Leza tali mbuli bantu, walo ulazyiba zili mumoyo—nkokuti kuzyiba nzyobayeeya bantu.

Mucikozyanyo, ciindi Leza naakabeteka minzi ya Sodoma a Gomora akuyanda kwiinyonyoona, mwaalumi uusyomeka, Abrahamu wakayanda kusinizya kuti Leza ncaakasala kucita cakaliluleme. Wakalizyi kuti Leza wakwe mululami takonzyi ‘kunyonyoona baluleme antoomwe abasizibi.’ Cakukkazyika moyo, Leza wakamusyomezya kuti, ikuti kakuli bantu bali kkumi baluleme mu Sodoma, taakali kuyoonyonyoona munzi ooyu akaambo kambabo. (Matalikilo 18:20-33) Masimpe, Leza wakailingula myoyo yabantu aabo alimwi akubona mbobakali basizibi.—1 Makani 28:9.

Mbubwenya buyo, Leza wakabona kuti bana Kanana bakali basizibi alimwi cakweelela wakalailila kuti banyonyoonwe. Bana Kanana bakalizyibidwe kapati akaambo kalunya lwalo ilwakali kubikkilizya akutenta bana baumi mumililo yakupaizya. * (2 Bami 16:3) Bana Kanana bakalizyi kuti Jehova wakalailila Israyeli kukona nyika yoonse. Aabo ibakasala kusyaala alimwi akulwana nkondo bakali kulwana kutali buyo bana Israyeli, pele a Jehova walo wakapa bumboni buzulide bwakuti wakali aabantu bakwe.

Nokuba boobo, Leza wakabafwida luzyalo bana Kanana aabo ibakaleka micito yabo mibyaabi akuzumina kutobela zyeelelo zya Jehova zisumpukide. Mucikozyanyo, Rahabu, mukaintu muvwuule muna Kanana, wakafwutulwa antoomwe abamukwasyi wakwe. Alimwi ciindi bana Gibeoni ibakali kukkala mumunzi wa Kanana nobakalomba kufwidwa luzyalo, balo abana babo tiibakanyonyoonwa.—Joshua 6:25; 9:3, 24-26.

MBOMUJATIKIZYIDWE: Tulakonzya kwiiya ciiyo ciyandika kapati kukunyonyoonwa kwabana Kanana. Tuyaabuswena afwaafwi “kubuzuba bwalubeta abwalunyonyooko lwabantu basampaula Leza.” (2 Petulo 3:7) Ikuti katumuyanda Jehova alimwi akucita zyintu ziluleme mumeso aakwe, tuyoolongezyegwa ciindi aakugwisya mapenzi aakatazya bantu alimwi akunyonyoona baabo batayandi bweendelezi bwakwe bululeme.

Caluyando, Jehova ulatuyeezya kuti zyakusala nzyobasala bazyali zilabajatikizya bana babo. Jwi lya Leza lyaamba kuti: “Amusale, buumi kuti mupone nywebo abana banu. Amuyandisye Jehova Leza wanu, amuswiilile jwi lyakwe amumukakatile.” (Deuteronomo 30:19, 20) Sena majwi aaya nga Leza silunya naa majwi aa Leza uubayanda bantu alimwi uuyanda kuti basale zyintu ziluzi?

[Bupanduluzi buyungizidwe]

[Cifwanikiso icili apeeji 5]

Leza katananyonyoona bantu basizibi lya Zambangulwe, wakaambila Nowa kuti abacenjezye bantu

[Majwi aakwelelezya sikubala aali apeeji 6]

Bana Kanana bakali basilunya kapati, alimwi bakamukazya Leza antoomwe abantu bakwe